I MATIU 25 - Wunta Mempori

Ana beine anu mempande mposongka ka ana beine anu memonge-monge 25:1-13

¹ ”I tempo atuu mongkona Poparentaa Suruga pinotundaako hopulu ana beine, anu mpo'ala huludo ka domelako mpototowo umbu ngkoroi tama.

² Olima i olodo monge-monge ka olima pande mposongka.

³ Ana beine anu memonge-monge atuu mpowawa huludo, sine nahi dompowawa lana,

⁴ sine ana beine anu mempande mposongka atuu mpowawa huludo ka lana mbo'u a mpido.

⁵ Sine hangano umbu ngkoroi atuu tehine nahi liu hawe, memongkokoturi iramo ranta ka dontekoturi.

⁶ Tempono porontonga wongi terongeomo suarano mia mebooli: Haweomo umbu ngkoroi! Imentotowo iramo!

⁷ Mpewangu iramo luwu ana beine atuudo ka do'amba mempatindao huludo.

⁸ Ana beine anu memonge-monge mpotaeako ira ana beine anu mepande mposongka: Impowee kami tedei lanamiu atuu, hangano hulumami tamo ronga mate.

⁹ Sine mesangki ira ana beine anu mempande mposongka atuu: Naahi, te'ingka nahi sompo tiamami ka tiamiu. Moikoopo imelako a mia mpo'asa lana ka impo'oli i tu'ai.

¹⁰ Sine, tempono dontepusa melako mpo'oli, haweomo umbu ngkoroi atuu ka ondae anu ntetinda iramo mpewinso mperonga saru onae a bolongko pelimbua petaoa, ka i'amba tinondo pewowa.

¹¹ Umarino atuu mehawe iramo mbo'u ana beine anu susua atuu ka dompotae: Ue, ue, i'ungkahiakami tondo!

¹² Sine sumangki: Kupauakomiu, menteeano nahi kuto'ori komiu.

¹³ Onaemo pu'uno, impetangkoromo, hangano nahi imento'orio oleo maupo tempono.”

Potundaano mongkona talenta 25:14-30 (Luk. 19:12-27)

¹⁴ ”Hangano mongkona Poparentaa Suruga mengkena kana asa mia anu ta lumako a wita susua, anu moboi ira atano ka me'ala-alaako ira arataano ndi ondae.

¹⁵ Anu asa mia iweeakono olima talenta, anu asa mia mbo'u orua ka anu asa mia mbo'u aasa, singge mia montonda pinolino, ka i'amba melungka.

¹⁶ Mompari-pariomo lumako ata anu montarima olima talenta atuu. Ipebalu-baluakono doi atuu onaemo ka ipohawe tetiangino olima talenta.

¹⁷ Ata mbo'u anu montarima orua talenta atuu moweweu mbo'u kanatuu ka mohawe tetiangino orua talenta.

¹⁸ Sine ata anu montarima aasa talenta atuu lumako ka ipongkeke wita ka i'amba wunio doino ueno.

¹⁹ Tehine umarino atuu mekuleomo uedo ata atuu ka do'amba mpereke.

²⁰ Ata anu montarima olima talenta atuu aiwa ka iwawao tetiangino olima talenta, ipotae: Ue, olima talenta ipe'ala-alaakune; kitao, mohawe akumo tetiangino olima talenta.

²¹ Onaemo ka ipotae ueno atuu ndi onae: Moiko ntu'u wineweumu atuu, hei ataku anu moiko ka metenunu; metenunukomo a wineweu kodei, aku me'ala-alaakomu anggaa anu langkai. Pewinsomo ka petondamo a me'uraano uemu.

²² Ka i'amba aiwaomo ata anu montarima orua talenta atuu, ipotae: Ue, orua talenta ipe'ala-alaakune; kitao, mohawe akumo tetiangino orua talenta.

²³ Onaemo ka ipotae ueno atuu ndi onae: Moiko ntu'u wineweumu atuu, hei ataku anu moiko ka metenunu, metenunukomo montembi anggaa anu kodei, aku me'ala-alaakomu anggaa anu langkai. Pewinsomo ka petondamo ame'uraano uemu.

²⁴ Ndio aiwaomo mbo'u ata anu montarima aasa talenta atuu ka ipotae: Ue, kuto'ori komiu nine omiu mia anu lambaha anu sumowi inso a mpo'ianga anu komba rinawomiu ka mopumpu inso a mpo'ianga anu komba pinahomiu.

²⁵ Onaemo pu'uno ka kudoito ka kulako wunio talentamiu atuu a laro wita: ndio, itarimaomo arataamiu!

²⁶ Onaemo ka isangki ueno atuu: Hei omue, ata anu mosa'o ka moluwe, gagi uto'oriomo, nine sumowi aku a mpo'ianga anu komba rinawoku ka mopumpu inso a mpo'ianga anu komba pinahoku?

²⁷ Onaemo pu'uno tekonaano doiku atuu ka uweeako ira mia anu mpopesaboako doi, nde ba kupekule ka kutarimao saru tetiangino.

²⁸ Onaemo pu'uno alaomo talenta atuu inso ndi onae ka weeakono mia anu hopulu talentano atuu.

²⁹ Hangano sompo mia anu hinao, ndi onae ta pinowee, ranta ka ihadio ntu'u. Sine isema anu nahina, maupo hapamo koa anu hina ndi onae ta inala inso ndi onae.

³⁰ Ka petadiakonomo ata anu nahi mentudu atuu a laro wongi-wongia anu wongi mpusu. I ra'aimo ta hina ponsabangia ka ke'ingisia.”

Pobitaraa pokotompa 25:31-46

³¹ ”Tewala hawe Ira i Ana Manusia a laro maramba-Do ka luwuno mala'eka mperongaako Ira, ka Ira mentoro a wawo ngkadera marambaa-Do.

³² Ka i'amba luwuno tongku ira mepinumpu i aro-Do ka Doponsia ira nte'o'asa mia, mengkena kana puu mpompakambi monsia ira bimba inso a bembe,

³³ ka Ira numaao bimba i koana-Do ka bembe i manggali-Do.

³⁴ Ka Mokole atuu ta motae ndi ondae anu i koana-Do: Ime'aiwa, hei omiu anu rinonso-Do Ama-Ku, imentarimaomo Poparentaa anu Kupatindaakomiumo mompu'u ipinokogagi wawontolino.

³⁵ Hangano tempono Kumokoninggo, imempaka Aku; tempono kumokoranga, impopo'inu Aku; tempono Ongkue mia hawe, impetotoka Aku;

³⁶ tempono Kukolambe-lambe, impoposangka Aku; tempono Kumahaki, me'aiwa komiu mengkita Aku; tempono Ongkue a laro torungku, me'aiwa komiu ntepohawea-Kune.

³⁷ Ka mia mentee atuudo ira mesangki, dompotae: Ue, indi'ipiake kimengkita Komiu mokoninggo ka kimempaka Komiu, ke mokoranga ka kimpopo'inu Komiu?

³⁸ Indi'ipiake kimengkita Komiu gagi mia hawe, ka kimpetotoka Komiu, ke kolambe-lambe ka kimpoposangka Komiu?

³⁹ Indi'ipiake kimengkita Komiu mahaki ke a laro torungku ka kime'aiwa kumita Komiu?

⁴⁰ Ka Mokole atuu ta sumangki ira: Kupauakomiu, menteeano luwuakoano anu wineweumiu tiano asa mia inso a mpepaekompo-Ku anu tedoa mongkokolaro andio, imeweweuomo ndi Ongkue.

⁴¹ Ka Ira motae mbo'u ndi ondae anu i manggali-Do: Impolaimo inso i aru-Ku, hei omiu mia anu tetotonaa, impolaimo a laro api anu nahina tampulaano anu tepatindaomo tiano i Mosa'o ka luwuno mala'ekano.

⁴² Hangano tempono Kumokoninggo, nahi mempaka Aku; tempono Kumokoranga, nahi mpopo'inu Aku;

⁴³ tempono Kugagi mia hawe, nahi mpetotoka Aku; tempono Kukolambe-lambe nahi mpoposangka Aku; tempono Kumahaki ka a laro torungku, nahi me'aiwa mengkita Aku.

⁴⁴ Ka i'amba ira mesangki: dompotae: Ue, indi'ipiake kimengkita Komiu mokoninggo, ke mokoranga, ke gagi mia hawe, ke kolambe-lambe, ke mahaki, ke a laro torungku ka nahi kimpekakaa-Komiu?

⁴⁵ Ka Ira sumangki: Kupauakomiu, menteeano luwuakoano anu nahi imeweweuo tiano asa mia inso ndi ondae anu tedoa mongkokolaro andio, nahi meweweuo mbo'u ndi Ongkue.

⁴⁶ Ka ondae andio ira mpewinso a mpo'ianga pobobarasaia anu nahina tampulaano, sine mia mentee a ntuwua anu nahina tampulaano.”