I MATIU 24 - Wunta Mempori

LAMORO 24–25 PONTUTULU MONGKONA POKOTAMPULAANO WAWONTOLINO Raha-Do Ue Ala ta hinoa 24:1-2 (Mrk. 13:1-2; Luk. 21:5-6)

¹ Umarino atuu Ondae i Yesu meluarako inso a Raha-Do Ue Ala, ka Do'amba lumako. Ka me'aiwa iramo ana guru-Do ka mpetiso a luwuno Raha-Do Ue Ala.

² Dopotaeako ira, ”Imengkitao luwuno atuu? Kupauakomiu, menteeano nahina maupo te'asa watu i ndi'ai ta pino'inee mo'ia i wawono watu anu susua; luwuno ta hinoa.”

Pompu'uano tebobarasaia 24:3-14 (Mrk. 13:3-13; Luk. 21:7-19)

³ Tempono Ondae i Yesu mentoro a wawo Pongku Saitu, mehawe iramo ana guru-Do ndi Ondae mpepau-pauako Ira butu Ondae. Dompotae, ”Ipauakamimo, ba te'ipia atuu ta gagi ka hapake tondonino hawea-Miu ka tondonino tampulaano wawontolino?”

⁴ Sumangki Ira i Yesu ndi ondae, ”Impetangkoromo ka si dompopo'oo komiu mia!

⁵ Hangano hadio mia ira mehawe mpeneeako nee-Ku ka dompotae: Ongkuemo i Mesia, ka ta hadio mia pinopo'oodo.

⁶ Komiu mporonge runduno peteaa ke lele mongkona peteaa. Sine impetangkoro si medanggara; hangano luwuno atuu asalakono ta gagi, sine atuu napi tampulaano.

⁷ Hangano tongku ta mentade umewaio tongku, ka poparentaa umewaio poparentaa. Ta hina mokoninggoa ka leelu a ba opia po'ianga.

⁸ Sine luwuno atuu da pompu'uano marasaia ta haweano tempo wo'ohu.

⁹ I tempo atuu komiu mempineweengako ka imebinobarasai, ka komiu mempinepate ka ira me'o'aliaakomiu luwuno tongku hangano nee-Ku,

¹⁰ ka ta hadio mia anu mebungkui Ira Ue Ala ka ira mambe peweengako ka mambe o'aliaako.

¹¹ Hadio nabi mpegaupi ira mehawe ka mpompopo'oo hadio mia.

¹² Ka hangano koteti-tetiangino anu humapu Ira i Ue, onaemo ka i gagi luuntu pompehohawano hadio mia.

¹³ Sine mia anu mompetea hawe pokotampulaano ta tekadudui.

¹⁴ Ka Lele Mawongkoa Poparentaa andio ta pinalele i asa wawontolino gagi sakosii a luwuno tongku, umarino atuu ka i'amba hawe pokotampulaano.”

Pobobarasaia anu mobea ka Mesia mpegaupi 24:15-28 (Mrk. 13:14-23; Luk. 21:20-24)

¹⁵ ”Gaagi tewala mpongkita komiu Ponsolangi mokoburu mentade a mpo'ianga mempori, montonda pau anu pinohaweno Nabi Danieli – anu mebasao ka dompekokoongakono –

¹⁶ ka mia anu i Yudea asalakono mempolai a mentorukuno.

¹⁷ Mia anu kontongaano a mpe'angi-angia a wawo raha siimo ipetii ta umala ira parewa inso a rahano,

¹⁸ ka mia anu kontongaano a lere siimo ipekule ta umalao sangkano.

¹⁹ Memasola iramo ine anu kontongaado mementia ke anu mompo'uo ana kodeino i tempo atuu.

²⁰ Impekakaimo, ka itempono impolai atuu ka si konaio tempo morini ka komba a oleo Saba.

²¹ Hangano i tempo atuu ta gagi pobobarasaia anu mongkokongiri kana anu napi hori gagi tampu'uno wawontolino hawe kanandio-andio ka anu nahi ta hori gagi mbo'u.

²² Ka ba mansa nahi pinoko'owowa tempono, manasa inso a luwuno anu tuwu nahi ta hina anu tekadudui; sine hangano mia mebininiki tempo atuu ta pinoko'owowa tempono.

²³ I tempo atuu tewala mia mpotae ndi omiu: Kitao, i Mesia kongko i ndi'ai, ke i Mesia kongko i ra'ai, si mpe'ala-alao.

²⁴ Hangano mia mpompe Mesi-mesia ka mpompe nabi-nabi ira mehawe ka ira mpoweweu hadio petondoni anu langkai ka anu mengkinohali-haliako, ranta ba mansa domempolio mopo'oo ira mbo'u mia mebininiki.

²⁵ Impe'ihilaroo, se'eluomo Kupauakomiu.

²⁶ Gaagi, tewala mia mpotae ndi omiu: Kitao, kongko Ira i pada one, si melako i tu'ai; ke: Kitao, kongko Ira a laro bolongko, si mpe'ala-alao.

²⁷ Hangano mengkena kana koliki mekinsa inso i sabaano oleo ka pansario wantano hawe i sumooano oleo, kanandiomo mbo'u te'ipua hawea-Do i Ana Manusia.

²⁸ Ba isua hinao anu mate, i tu'ai dompenggowo manu-manu singko.”

Hawe-Do i Ana Manusia Potundaano mongkona keu ara 24:29-36 (Mrk. 13:24-32; Luk. 21:25-33)

²⁹ ”Sarai koa umarino pobobarasaia i tempo atuu, mata oleo ta gagi wongi-wongi ka wula nahi mewanta ka anano wula ira ntedodonta inso i langi ka luwuno pabawano langi ta telelu.

³⁰ I tempo atuu ta tengkita petondoni-Do i Ana Manusia i langi ka luwuno tongku i tolino ira mposabangi ka mengkita Ira i Ana Manusia aiwa a wawo nseru i langi saru luwuno pabawa ka maramba-Do.

³¹ Ka Dotena ira mala'eka-Do mpeluarako saru mpopuuri tawuwua anu mongkokongiri unino ka ira mepumpuo luwuno mia bininiki-Do inso a opaa siuno tolino, inso i tompano langi anu aasa hawe i tompano langi anu susuano.

³² Mpepagurumo inso a mpotundaano mongkona keu ara: Tewala sampa-sampa motutuno mongura ka mompu'u mentumba, imento'orio, nine rangkuomo tempo motu'i-tu'i.

³³ Kanatuu koa mbo'u, tewala imengkitao luwuno andio, imento'oriomo, nine tempono umpedaomo, rangkuomo a mpuu pewowa.

³⁴ Kupauakomiu: Menteeano mia andiodo napi ta pingko, ba napi gagi luwuno andio.

³⁵ Langi ka tolino ta moliu, sine pau-Ku nahi ta moliu.

³⁶ Sine mongkona oleo ka tempo atuu nahina maupo te'asa mia anu tumo'orio, luwuno mala'eka i suruga naahi, ka maupo Ana naahi, butu Ondae i Ama asa-asa-Do.”

Patudu ka impetangkoro 24:37-44 (Luk. 17:26-30, 34-36)

³⁷ ”Hangano ba kana'umpe butu a tempono i Noho, kanatuu koa mbo'u teweweuno te'ipua a hawea-Do i Ana Manusia.

³⁸ Hangano ba kana'umpe ondae i tempono napi lolowi dompongkaa ka mpo'inu, mpekombia ka mpompopokombia, hawe a oleo pewinsono i Noho a laro bangka,

³⁹ ka nahi domponto'ori hapa-hapa, napi hawe lolowi atuu ka mokotampula ira luwu, kanatuumo mbo'u teweweuno te'ipua a hawea-Do i Ana Manusia.

⁴⁰ I tempo atuu tewala hinao orua mia i lere, anu aasa ta winawa ka anu susua ta bininta;

⁴¹ tewala hinao orua beine tekonai mogili, anu aasa ta winawa ka anu susua ta bininta.

⁴² Onaemo pu'uno impetangkoromo, hangano nahi imento'orio a oleo isua Dohawe Uemiu.

⁴³ Sine ka imento'oriomo andio: Tewala ito'orio umbu raha langku opia tempono wongi ta hawe mia monako, manasaomo ipetangkoro, ka nahi ta mo'ineeo rahano bineta.

⁴⁴ Onaemo pu'uno, omiu mbo'u impepatinda, hangano i Ana Manusia hawe a tempo anu nahi mekoo-kooo.”

Potundaano mongkona ata anu metenunu ka ata anu mosa'o 24:45-51 (Luk. 12:41-48)

⁴⁵ ”Isemake ata anu metenunu ka pande mosongka, anu pinotorono ueno a luwuno miano ka ipoweeako ira kaanga a tempono?

⁴⁶ Me'uraomo ata, anu ihaweo ueno umanggao anggano atuu, tempono i hawe ueno atuu.

⁴⁷ Kupauakomiu: Menteeano ueno atuu ta motoroo onae gagi puu mpodagai luwuno arataano.

⁴⁸ Sine tewala ata atuu mosa'o ka ipotae i laro aroano:

⁴⁹ Nahi dohori hawe ueku, ka i'amba mompu'u tumunduhi ira ata susua, ka mongkaa mo'inu merongaako ira mia wela memolangu,

⁵⁰ ka ueno ata atuu ta hawe a oleo anu nahi koo-kooo, ka a tempo anu nahi to'orio,

⁵¹ ka ta mepateo ka weweuo mengkena saru mia mempo'onde-onde. I ra'aimo ta hina ponsabangia ka ke'ingisia.”