I MATIU 23 - Wunta Mempori

Ondae i Yesu kumuahako ira anu mponto'ori Taura ka to Parisi 23:1-36 (Mrk. 12:38-40; Luk. 11:37-54; 20:45-47)

¹ Onaemo ka Dopepau i Yesu a mia hadio ka a ana guru-Do, Dopotae,

² ”Kaderano i Musa dompentorokiomo anu mponto'ori Taura ka to Parisi.

³ Onaemo pu'uno imentondaomo ka imeweweuomo luwuakoano anu domempaguruakomiu, sine si mentondao luwuno poweweudo, hangano dompopaguruako sine nahi domeweweuo.

⁴ Mpowutu ira tinembi anu mobea, ka do'amba menaao a wawo oweano mia, sine ondaedo nahi domebehe medanggio.

⁵ Luwuno anggaa anu mewineweudo butu tinoodo ka domengkitao mia; mpopokona ira peboo pekakaido anu molue ka wuakino lemba anu meloe;

⁶ inehedo mpentoro a mpentoroa pinelangkai a laro mpelimbua ka a mpentoroa i arono ntu'u a raha tepumpua;

⁷ inehedo mempinelangkai a olu ka inehedo mempinoboiako Guru.

⁸ Sine omiu, si mempinotaeako Guru; hangano aasa koa Gurumiu ka luwumiu mpepaekompo.

⁹ Ka si mpopewua ama maupo isema i tolino andio, hangano aasa koa Amamiu, onaemo Ondae anu i suruga.

¹⁰ Osi'i mbo'u imempinotaeako petewawa, hangano aasa koa petewawamiu, onaemo i Mesia.

¹¹ Ba isema lalu langkai i olomiu, ka igagimo puu pompekakaakomiu.

¹² Ka ba isema mompelangka-langkai, onae ta pine'uru-uru ka ba isema anu me'urumako, onae ta pinelangkai.

¹³ Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano imentondoo luwuno pewowano Poparentaa Suruga i arodo mia. Hangano omiu isa'a nahi mpewinso ka ime'onsoi ira anu mpopete'umala ira mpewinso. [

¹⁴ Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano imeteleo rahado tuwu beine ka impokobenge-benge ira mia mesala a mpekakai me'o'ondau. Onaemo pu'uno manasa komiu mpotarima pohuku anu lalu mobea.]

¹⁵ Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano imesompoomo wawo ntahi ka wawo wita, komiu mpokontepidio te'asa miamo koa gagi tumondao agamamiu ka umarino tepidi, impokogagio miano naraka, anu meluka mpendua mosa'ono sekono omiu.

¹⁶ Memasola komiumo, hei luwuno petewawa memorawu, anu mpotae: Mesumpaako Raha Mempori, sumpa atuu nahi mentee; sine mesumpaako wulaano Raha Mempori, sumpa atuu mowutu.

¹⁷ Hei omiu mia memonge-monge ka mia memorawu, hapake anu lalua, wulaa ke Raha Mempori anu mokomemporio wulaa atuu?

¹⁸ Mesumpaako meda pontunua pesomba, sumpa atuu nahi mentee; sine mesumpaako pesomba anu kongko i wawono, sumpa atuu mowutu.

¹⁹ Hei omiu mia memorawu, hapake anu lalua, pesomba ke meda pontunua pesomba anu mokomemporio pesomba atuu?

²⁰ Onaemo pu'uno ba isema mesumpaako meda pontunua pesomba, ipesumpaako meda pontunua pesomba ka a luwuakoano mbo'u anu ninaa i wawono.

²¹ Ka ba isema mesumpaako Raha Mempori, ipesumpaako Raha Mempori ka ndi Ondae, anu mo'ia i tu'ai.

²² Ka ba isema mesumpaako suruga, ipesumpaako kadera poparentaa-Do Ue Ala ka ndi Ondae mbo'u anu mentoro i wawono.

²³ Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano tia hopuluno solasi, adasi mo'ahi ka jinta ime'owahio, sine anu lalua a songka Taura nahi mentondao, onaemo: moleoa ka pompehohawa ka petenunu. Anu aasa asalakono ka iwineweu ka anu mehano si mpebungkuio.

²⁴ Hei omiu petewawa anu memorawu, tiporo imentirisao inso a inuamiu, sine unta anu i larono imenteleo.

²⁵ Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano sangkiri ka sempe imewo'ohio bungkuno, sine i larono bukeako rinontu ka modokoa.

²⁶ Hei to Parisi anu memorawu, impokomorinao se'elu i larono sangkiri atuu ka i bungkuno mbo'u ta morina.

²⁷ Memasola komiumo, hei anu mpoto'ori Taura ka to Parisi, hei omiu mia mpo'onde-onde, hangano mpengkena komiu kana kaburu anu kinapuru mopute, anu i bungkuno lano tengkita morina, sine i larono bukeako wuku ka mperupa-rupa anu mokoburu.

²⁸ Kanandiomo mbo'u omiu, i bungkuno ntengkita komiu mentee a pongkitado mia, sine i laromiu buke po'onde-onde ka mosa'oa.

²⁹ Memasola komiumo, hei anu mponto'ori Taura ka to Parisi, hei mia mpo'onde-onde, hangano imeweweuo kaburudo nabi ka mpokotekosio tugudo mia memoleo

³⁰ ka mpotae: Ba kimentuwu i tempo domentuwu uempu'uto, manasaomo nahi kami mentonda ira a pompepatea nabi atuudo.

³¹ Sine kanandio imensakosiiomo, nine omiumo inuledo anu mpepate ira nabi atuudo.

³² Gaagi, ime'ihiiomo mbo'u ponsa'udo uempu'umiu!

³³ Hei omiu ule, hei omiu inuleno ule me'ipo! Kana'umpeke ka komiu mpokotola inso a mpohukua i naraka?

³⁴ Onaemo pu'uno, kitaomo, Kutena ira nabi ndi omiu, mia anu mempande mposongka ka guru agama: entongano i olodo komiu mpepate ira ka mempaso ira a ngkeu pinotamba, anu mehano komiu mensepi ira a raha tepumpuamiu ka imebobarasai ira inso a ngkota lumako a ngkota,

³⁵ ka imensusuruo po'uwua reano mia anu nahina salano mompu'u inso ndi Habeli, mia mentee atuu, hawe ndi Sakaria anano i Berekia, anu pinepatemiu i olono po'ianga mempori ka meda pontunua pesomba.

³⁶ Kupauakomiu: Menteeano luwuno andio ira mensusuruo mia andiodo!”

Pompemasusa mongkona Yerusale 23:37-39 (Luk. 13:34-35)

³⁷ ”Yerusale, Yerusale, omue anu mepate ira nabi ka wunoako ira watu mia anu mentinena ndi omue! Mararuomo Kumingki pumpu ira anamu, mengkena kana indompu'u pumpu ira anano a ntoto panino, sine nahi mebehe.

³⁸ Kitaomo rahamu andio ta bininta ka gagi boni-boni.

³⁹ Ka Kupauakomiu: Mompu'u kanandio-andio nami komiu mengkita Aku mbo'u, ranta ka impotae: Rinonso Iramo anu hawe a nee-Do i Ue!”