I MATIU 22 - Wunta Mempori

Potundaano mongkona pelimbua a mpetao 22:1-14 (Luk. 14:15-24)

¹ Ka Do'amba i Yesu mepauako ira mbo'u a mpotundaano,

² ”Mongkona Poparentaa Suruga pinotundaako kana asa mokole, anu moweweu pelimbua a petaoano anano.

³ Itena ira atano mempoboio luwuano mia anu me'inolu iramo a mpelimbua a mpetaoa atuu, sine mia atuudo nahi domebehe me'aiwa.

⁴ Itena ira mbo'u atano anu susua, pe'oliwino: Pauako ira mia anu me'inolu atuudo: Menteeano kaanga, kupatindaomo, sapi lakino ka pinotuwuku kusumbele iramo; luwuno tetindaomo, ime'aiwamo a mpelimbua petaoa andio.

⁵ Sine mia anu me'inolu atuudo nahi domperioo; hinao anu lumako a lereno, hinao anu lumako a mpo'anggaano,

⁶ ka anu susua rumako ira ata atuudo, bobarasai ira ka mpepate ira.

⁷ Onaemo ka itekuda mokole atuu, ka i'amba tumena ira sorodaduno melako i ra'ai mpepate ira anu mpompepate atuudo ka mesongkoo kotado.

⁸ Umarino atuu ipotaeako ira atano: Pelimbua a mpetaoa tetindaomo, sine mia anu me'inolu hieno nahi pototodo atuu.

⁹ Onaemo pu'uno imelakomo a luwuno sampangano sala ka ime'olu iramo sompo mia anu hinawemiu i ra'ai a mpelimbua petaoa atuu.

¹⁰ Onaemo ka domelako ata atuudo ka pumpu ira luwuno mia anu hinawedo a nsala, mia memosa'o ka mia memoiko, ranta ka ibukeako totoka bolongko pelimbua a mpetaoa atuu.

¹¹ Tempono ipewinso mokole ta tepohaweako ira totoka atuudo, ikitao asa mia anu nahi pesangkaako sangka mpogawe.

¹² Ipotaeakono: Hei pepaekompo, kana'umpe ka upewinso ramai nahi upesangkaako sangka mpogawe? Sine mia atuu butu mo'ia.

¹³ Ka i'amba mokole motaeako ira atano: Imemponguo karuno ka kaeno ka impetadiakono mia atuu a laro wongi-wongiano anu wongi mpusu, i ra'aimo hinao ponsabangia ka ke'ingisia.

¹⁴ Hangano hadio anu mempinoboi, sine tedei anu bininiki.”

Mongkona mo'owahi sima'ulu a Datu 22:15-22 (Mrk. 12:13-17; Luk. 20:20-26)

¹⁵ Ka i'amba melako iramo to Parisi; menteriso ira ba kana'umpe ka dompoko'oho Ira i Yesu mesala a aasa pesikeno.

¹⁶ Domentena ira ana gurudo mperonga saru to Herodia mpesikeno ndi Ondae, ”Guru, kimento'orio, Omiu asa mia anu moleo ka moleo Ipompaguru mongkona po'ehe-Do Ue Ala ka nahina dinoitoa-Komiu maupo ndi sema, hangano nahi pobiniki mia.

¹⁷ Ipauakamimo pohawe-Miu: Ba moiko koa mo'owahi sima'ulu a Datu ke naahi?”

¹⁸ Sine Doto'orio i Yesu mosa'ono aroado atuu ka Do'amba motae, ”Tembio ka ime'ara-arahako Aku, hei mia mpo'onde-onde?

¹⁹ Impopokitaa-Kune doi po'owahi sima'ulu atuu.” Domewawao aasa dinare ndi Ondae.

²⁰ Ka Dosikeno ira, ”Gambara ka binurino isemake andio?”

²¹ mesangki ira, ”Gambara ka binurido i Datu.” Ka Do'amba i Yesu motaeako ira, ”Peweengakonomo a Datu hapa anu asalakono komiu mpoweeakono a Datu ka ndi Ondae Ue Ala anu asalakono komiu mpeweengakono ndi Ondae Ue Ala.”

²² Rumongeo atuu mengkohali-hali iramo ka domebinta Iramo i Yesu ka domelako.

Pesikenodo to Saduki mongkona pewangua 22:23-33 (Mrk. 12:18-27; Luk. 20:27-40)

²³ A oleo atuu mehawe iramo ndi Ondae i Yesu ba opia to Saduki, anu montonda pohawedo nine hinao pewangua. Mpesikeno ira ndi Ondae,

²⁴ ”Guru, i Musa motae, nine tewala asa mia mate ka nahi pobinta anano, pepaekompono asalakono kumombiao beineno atuu ka motuwuo inuleno pepaekompono atuu.

²⁵ Sine i olomami hinao opitu mia mpepaekompo. Anu ko'aasa mekombia, sine lembuino mate. Ka hangano onae nahina inuleno, beineno atuu ibintaakono pepaekompono.

²⁶ Kanandio koa mbo'u anu ko'orua ka anu ko'otolu hawe anu ko'opitu.

²⁷ Ka poko'ariano, umarino luwudo, beine mbo'u atuu mate.

²⁸ Isemake i olodo opitu mia atuu anu gagi tamano beine atuu a oleo pewangua? Hangano dompekombiaakonomo luwu.”

²⁹ Sumangki Ira i Yesu, ”Mentesaa komiu, hangano nahi mpokonto'orio Wunta Mempori maupo pabawa-Do Ue Ala!

³⁰ Hangano i tempono pewangua mia nahi pekombia ka nahi pinopokombia tendeano tuwu kana mala'eka i suruga.

³¹ Sine mongkona pewangudo mia memate nahi imebasao hapa anu pinau-Do Ue Ala, tempono Dopepau:

³² Ongkuemo Ue Alano i Burahima, Ue Alano i Saki ka Ue Alano i Yako? Ondae komba Ue Alado mia memate, tendeano Ue Alano mia tuwu.”

³³ Mia hadio anu merongeo atuu mengkohali-haliakono pompaguru-Do.

Songka anu lalua 22:34-40 (Mrk. 12:28-34; Luk. 10:25-28)

³⁴ Tempono domerongeo to Parisi, nine Doweweu iramo i Yesu to Saduki atuudo mengkomino, mpepumpu iramo

³⁵ ka asa mia inso ndi ondae, asa guru agama, mesikeno umara-arahako Ira,

³⁶ ”Guru, songka isuake anu lalua a laro Songkano i Musa?”

³⁷ Sumangki Ira i Yesu ndi onae, ”Pehohawa Iramo i Ue, Ue Alamu, tompaano aroamu ka tompaano sumangamu ka tompaano pompewowolomu anu mentee.

³⁸ Onaemo atuu songka anu lalua ka anu ko'aasa.

³⁹ Ka songka anu ko'orua, anu pengkenano, onaemo: Pehohawaomo pe'asa miamu kana koroimu.

⁴⁰ A orua songkamo andio pepu'uano luwuno songka Taura ka wuntado luwuno nabi.”

Penggoeado i Yesu ka i Daudi 22:41-46 (Mrk. 12:35-37; Luk. 20:41-44)

⁴¹ Tempono to Parisi kontongaado ntepumpu, mesikeno Ira i Yesu ndi ondae, Dopotae,

⁴² ”Hapake pohawe-Miu mongkona i Mesia? Anano isemake Ondae?” mpotae ira ndi Ondae, ”Anano i Daudi.”

⁴³ Dopotaeako ira, ”Tewala kanatuu, kana'umpeke i Daudi a pokongkomi-Do Penaa ka ipokopau Ira Ueno, tempono ipotae:

⁴⁴ Mepau Iramo i Ue ndi ondae Ueku: pentoromo i koana-Ku, hawe ka Kunaa ira iwali-Miu a ntoto karu-Miu.

⁴⁵ Gagi tewala motae i Daudi Ondae Ueno, nde kana'umpe mbo'u Onae anano?”

⁴⁶ Nahina maupo te'asa mia mokosangki Ira, ka mompu'u oleo atuu nahina mbo'u maupo te'asa mia anu sapa mompesikenoako maupo hapa ndi Ondae.