I MATIU 21 - Wunta Mempori

Ondae i Yesu tinotowo i Yerusale 21:1-11 (Mrk. 11:1-10; Luk. 19:28-38; Yoh. 12:12-15)

¹ Tempono Ondae i Yesu ka ana guru-Do me'umpeda iramo i Yerusale ka mehawe i Betipage a Pongku Saitu, Ondae i Yesu tumena ira orua ana guru-Do

² saru pe'oliwi, ”Ilakomo a inia anu i aromiu atuu, ka i tu'ai komiu ronga humaweo aasa kalide waino tinanggo ka anano umpeda ndi onae. Potolaomo tanggono kalide atuu ka wawaomo oruano ndi Ongkue.

³ Ka tewala hinao mia kumuahako komiu, ipotaemo: Dokereo i Ue. Ira koa ronga mokuleo.”

⁴ Luwuno atuu gagi ka i'inihii pau anu pinohaweno nabi,

⁵ ”Pauakono ana beine Sioni: Kitao, Mokolemu hawe ndi omue, Ondae mauru ka mesawi a ngkalide, aasa kalide pateke anu mongura.”

⁶ Ka lumako iramo ana guru atuu ka doweweuo kana anu Dotenaako ira i Yesu.

⁷ Dowawao kalide waino atuu saru anano, ka do'amba umempehiakono sangkado ka mesawi Iramo i Yesu i wawono.

⁸ Mia hadio anu tedoa mehadio ira mewileo sangkado a nsala, hinao mbo'u anu mpo'ala sampa keu ka dome'empehiakono sala.

⁹ Ka mia hadio anu mpelempa i aro-Do i Yesu ka anu tumonda Ira inso i bungku-Do mpebooli, dompotae, ”Hosana Anano i Daudi, rinonso Iramo anu hawe a nee-Do i Ue, hosana a mpo'ianga anu i wawono ntu'u!”

¹⁰ Ka tempono Dopewinso i Yerusale, ntewuka iramo luwuno ihino kota atuu ka dompotae mia, ”Isemake mia andio?”

¹¹ Ka mia hadio atuudo mesangki, ”Ondaemo andio nabi Yesu inso i Nasare, wita Galilea.”

Ondae i Yesu mokomemporio Raha-Do Ue Ala 21:12-17 (Mrk. 11:15-19; Luk. 19:45-48; Yoh. 2:13-16)

¹² Ka Do'amba i Yesu mewinso a Raha-Do Ue Ala ka sumaari ira luwu mia anu mpepangidi ka mpe'oli a kintalano Raha-Do Ue Ala. Dowalite ira meda pontobosia doi ka luwuno bangkudo anu mpo'asa marapatii

¹³ ka Dopotaeako ira, ”Hinao teburi: Raha-Ku ta nineeako raha pekakaia. Sine impokogagio po'iangaado anu mporontu.”

¹⁴ Ka mehawe iramo mia memorawu ka mia tiimpa karu ndi Ondae a laro Raha-Do Ue Ala atuu ka Dopokotompa ira.

¹⁵ Sine mansado mengkitao petewawado sando mpesomba ka anu mponto'ori Taura kumitao luwuno kinohali-haliako anu wineweu-Do atuu ka nana'ote anu mpebooli a laro Raha-Do Ue Ala, ”Hosana Anano i Daudi!” Mosa'odo ntu'u,

¹⁶ ka do'amba mpotaeako Ira, ”Irongeo hapa nineedo nana'ote andiodo?” Dopotaeako ira i Yesu, ”Kurongeo; napi horike mebasao: Inso a ngangado anadalo ka nana'ote anu dakompo'uoado Ipatindaomo po'unde-unde?”

¹⁷ Ka Do'amba binta ira ka Dopeluarako lumako i Betania ka merato i tu'ai.

Ondae i Yesu tumotonaao keu ara 21:18-22 (Mrk. 11:12-14, 20-26)

¹⁸ Tempono mo'oru a laro pelempaa-Do mekule i kota, mokoninggo Ira i Yesu.

¹⁹ Rangku a nsala Dokitao keu ara ka Do'amba lumako tu'ai, sine nahi Dopohawe hapa-hapa a ngkeu atuu sangkadio butu leweno. Dopotaeakono keu atuu, ”Nami komewua mbo'u ranta nahina tampulaano!” Ka i tempo koa mbo'u atuu mokariomo keu ara atuu.

²⁰ Kumitao anu gagi atuu mengkohali-hali iramo ana guru-Do, ka dompotae, ”Kana'umpe keu ara atuu ka imansa mokari?”

²¹ Dosangki ira i Yesu, ”Kupauakomiu, menteeano tewala mpompe'ala-ala komiu ka nahi menanta-nanta, komba butu komiu mpokoweweuo hapa anu wineweu-Ku a ngkeu ara atuu, sine mbo'u tewala impotaeakono torukuno andio: Pelimbamo ka utetadiako a laro ntahi! Anu kanatuu ta gagi.

²² Ka hapamo koa inemamiu a laro mpekakai saru buuke pompe'ala-ala, komiu koa mentarimao.”

Pesikeno mongkona pabawa-Do i Yesu 21:23-27 (Mrk. 11:27-33; Luk. 20:1-8)

²³ Ka Do'amba i Yesu mewinso a Raha-Do Ue Ala, ka tempono Dopompaguru i tu'ai mehawe iramo petewawado sando mpesomba saru mia memota'udo tongku Yahudi ndi Ondae, ka dompesikeno, ”Saru pabawa inso isuake Ipoweweuako luwuno atuu? Ka isemake moweea-Komiu pabawa atuu?”

²⁴ Sumangki Ira i Yesu ndi ondae, ”Aku mesikeno mbo'u ngkuda te'asa ndi omiu ka tewala imesangki Aku, Aku koa mbo'u pauakomiu saru pabawa inso isua Kuweweuo luwuno atuu.

²⁵ Inso isuake pobahono i Yohane? Inso i suruga ke inso a mia?” Dompepau-pauakono i olodo, ka dompotae, ”Tewala mpotae kita: Inso i suruga, Ira motaeakita: Tewala kanatuu tembio ka nahi mpe'ala-alao?

²⁶ Sine tewala mpotae kita: Inso a mia, medoito kita a mia hadio, hangano luwuno mia mpotae i Yohane andio nabi.”

²⁷ Ka do'amba mesangki Ira i Yesu, ”Nahi kimento'orio.” Motae Iramo i Yesu ndi ondae, ”Tewala kanatuu, Ongkue mbo'u nahi Aku pauakomiu saru pabawa inso isua Kuweweu ira luwuno atuu.”

Potundaano mongkona orua nana'ote 21:28-32

²⁸ ”Sine hapa pohawemiu mongkona andio: Asa mia hinao anano orua ira tama. Onae lumako a anano anu aka ka ipotae: Anaku, lakomo ka upo'angga oleo andio a lere anggoro.

²⁹ Sumangki anano atuu: Moiko, ama. Sine nahi lako.

³⁰ Ka i'amba mia atuu lumako a anano anu ko'orua ka ipotae kanatuu koa mbo'u. Ka sumangki anano atuu: Nahi kubehe. Sine lembuino onae me'o'ole onaemo ka i'amba lumako.

³¹ Isemake i olodo orua mia atuu anu weweuo po'eheno amado?” Mesangki ira, ”Anu pokotompa.” Motae Ira i Yesu ndi ondae, ”Kupauakomiu, menteeano luwuno puu popumpu sima'ulu ka beine mebelesu ira mpese'elungi komiu mpewinso a Poparentaa-Do Ue Ala.

³² Hangano i Yohane aiwa montiso sala menteea ndi omiu, ka nahi mpe'ala-alao. Sine luwuno puu popumpu sima'ulu ka beine mebelesu mpe'ala-alao. Ka maupo imengkitao, sine lembuino nahi mpe'o'ole ka nahi mpe'ala-alao koa mbo'u.”

Potundaano mongkona anu mpo'angga a lere anggoro 21:33-46 (Mrk. 12:1-12; Luk. 20:9-19)

³³ ”Rongeomo asa potundaano anu susua. Hinao asa mia ueno wita melere anggoro ka iwalao limbu. Ikekeo wita pomporo'iano anggoro ka mowangu menara podagaia a lere atuu. Ka i'amba metamboakono lere atuu a mia mpo'angga lere ka i'amba lumako a inia susua.

³⁴ Tempono rangkuomo tempo po'opua, itena ira atano melako a mia mpo'angga lere atuu ka domentarimao hasili anu gagi tiano.

³⁵ Sine mia mpo'angga lere atuu merako ira ata atuudo: anu asa mia domentunduhio, anu susuano pinepate ka anu susuano mbo'u winunoako watu.

³⁶ Ka i'amba ueno atuu tumena ira mbo'u atano anu susua, sine ondae mbo'u mewineweu mengkena kana luwuno walido.

³⁷ Poko'ariano itenao anano lumako ndi ondae, ipotae: Anaku ira metampahio.

³⁸ Sine tempono mia mpo'angga lere atuu mengkitao anano atuu, mpotae iramo asa mia ka anu susua: Onaemo anu ta me'ueo, aiwa tompepateo, ka tiano ontaemo gagi mpe'ueo.

³⁹ Domerakoo ka mpetadiakono a bungkuno lere anggoro atuu, ka do'amba mpepateo.

⁴⁰ Ka tewala aiwa ueno lere anggoro atuu, hapa anu wineweuno a mia mpo'angga lere atuu?”

⁴¹ Mpotae ira ndi Ondae, ”Onae ta mepate ira mia memosa'o atuudo ka lere anggorono ta metamboakono a mia mpo'angga lere anu susua anu ta weeakono hasilino ia tempono.”

⁴² Motae ira i Yesu ndi ondae, ”Napi horike mebasao a Wunta Mempori: Watu anu tinadido puu mpowangu raha gagiomo watu pondasi a nsiuno; mongkona atuu gagi inso ndi Ondae i Ue, aasa wineweu kinohali-haliako kinitano matato.

⁴³ Onaemo pu'uno, Kupauakomiu, nine Poparentaa-Do Ue Ala ta inala inso ndi omiu ka ta wineeako asa tongku anu ta mehasiliako wuano Poparentaa atuu. [

⁴⁴ Ka ba isema anu tedonta a wawo watu atuu, onae ta tepuro ka ba isema dinunsino watu atuu, onae ta tepirego.]”

⁴⁵ Mansado merongeo petewawado sando mpesomba ka to Parisi luwuno potundaano pinau-Do i Yesu, dompokonto'orio, nine ondaemo anu tinoo-Do.

⁴⁶ Ka Dome'ungkeakono ka dompokorako Ira, sine medoito ira a mia hadio, hangano mia hadio atuudo mpotae Ondae nabi.