I MATIU 20 - Wunta Mempori

Potundaano mongkona mia mentinambo a lere anggoro 20:1-16

¹ ”Ka mongkona Poparentaa Suruga mengkena kana asa mia umbu raha anu mo'o-mo'oru ntu'u meluarako mo'ungke mia mpo'angga a lere anggorono.

² Mansano umari tepo'asa pauako ira mia mpo'angga mongkona tambo asa dinare asa oleo, itena ira melako a lere anggorono.

³ Bara'ura langku osio mo'oru onae meluarako mbo'u ka ikitao hinao mbo'u mia susua nahina po'anggaado a olu.

⁴ Ipotaeako ira: Imelako mbo'u mida a lere anggoroku ka hapa anu tekona kuweeakomiu. Ka melako iramo.

⁵ Bara'ura langku hopulu ka orua ka langku otolu tenggoli oleo onae meluarako mbo'u ka moweweu kana hieno.

⁶ Bara'ura langku olima owowa oleo onae meluarako mbo'u ka ihawe ira mbo'u mia susua, ka i'amba motaeako ira: Tembio ka ibutu mpo'ia i ndi'ai nahi mpo'angga asa oleo andio?

⁷ Dopotaeakono: Hangano nahina mia tumambo kami. Ipotaeako ira: Imelako mbo'u mida a lere anggoroku.

⁸ Tempono wongi ueno lere atuu motaeakono mandorono: Poboi iramo anu mpo'angga atuudo ka owahio tambodo, mompu'u ndi ondae anu mpewinso telembui hawe anu mpewinso tese'elu.

⁹ Ka mehawe iramo anu mpompu'u mpo'angga bara'ura langku olima ka ondae mpotarima singge mia asa dinare.

¹⁰ Ka i'amba mehawe iramo anu mpewinso tese'elu, potaedo ira mpohawe lalu hadio, sine ondae mbo'u mpohawe singge mia asa dinare koa mbo'u.

¹¹ Tempono domentarimao, dompewurukiakono ueno lere atuu,

¹² dompotae: Ondae anu mpewinso telembui andio butu asa langku dompo'angga ka upongkena ira saru omami anu asa oleomo kimpo'angga mobea ka mpepuai mokula oleo.

¹³ Sine ueno lere atuu sumangkio asa mia inso ndi ondae: Pepaekompo, komba nahi moleo kupoweweu ndi omue. Kombake umari kitamo mpepau asa dinare asa oleo?

¹⁴ Alaomo tiamu ka lakomo; aku moweeakono anu mewinso telembui atuu mengkena kana ndi omue.

¹⁵ Nde nahi moikoke kupakeo arataaku montonda po'eheono aroaku? nde mosa'omuke hangano pe'aroaku?

¹⁶ Kanandiomo mia anu pokotompa ta gagi anu tese'elu ka anu tese'elu ta pokotompa.”

Pompopoto'ori kopentoluno mongkona tebobarasai-Do i Yesu 20:17-19 (Mrk. 10:32-34; Luk. 18:31-34)

¹⁷ Tempono Ondae i Yesu Ira lumako i Yerusale, Dopoboi ira butu ana guru-Do anu hopulu ka orua ka Dopotaeako ira a laansala,

¹⁸ ”Kanandio-andio kita melako i Yerusale ka i Ana Manusia Ira pineweengako a mpetewawado sando mpesomba ka guru agama, ka Ira hinuku mate.

¹⁹ Ka Ira pineweengako a luwuno tongku anu nahi domento'ori Ira Ue Ala, ka Dopine'o'awatiako, sinepi ka Dopinaso a ngkeu pinotamba, ka ko'otolu oleono Ira winangu.”

Po'emano ineno i Yakobu ka i Yohane Komba meparenta tendeano mompekakaako 20:20-28 (Mrk. 10:35-45)

²⁰ Ka haweomo inedo anano i Sebedeu saru anano atuudo ndi Ondae i Yesu, ka i'amba menggolontu mesomba i aro-Do nde hinao anu ta inemano ndi Ondae.

²¹ Dopotae i Yesu, ”Hapa ta inemamu?” Sangkino, ”Ipeparentamo, ka dopokompentoro orua ira anaku andio te'ipua a Poparentaa-Miu, anu aasa i koana-Miu ka anu aasa mbo'u i manggali-Miu.”

²² Sine sumangki Ira i Yesu, Dopotae, ”Nahi imento'orio, hapa anu inemamiu. Komiu mempolioke me'inuo ihino tonde anu asalakono Aku uminuo?” Mpotae ira ndi Ondae, ”Kami koa mempolio.”

²³ Dopotaeako ira i Yesu, ”Ihino tondeku lano komiu me'inuo, sine mongkona mentoro i koana-Ku ke i manggali-Ku, komba to'oria-Ku meweengakono. Mongkona atuu ira mewineeako mia ba isema anu Dopatindaako iramo Ama-Ku.”

²⁴ Rumongeo atuu ntekuda iramo hopulu ana guru anu susua a orua mia mepaekompo atuu.

²⁵ Sine Ondae i Yesu moboi ira ka Dopotae, ”Ka imento'orio, nine luwuno topoparenta a luwuno tongku meparenta ira palilido asalakono ka domentondao parentado ka luwuno anu langkai potorodo mpolempao pabawado dumadai ira.

²⁶ Komba kanatuu ndi omiu. Ba isema ineheno gagi langkai po'iano i olomiu, asalakono ka igagi puu pompekakaakomiu,

²⁷ ka ba isema ineheno gagi teto'ori i olomiu, asalakono ka igagi tetenaamiu;

²⁸ mengkena kana i Ana Manusia aiwa komba ka Dopinekakaako, tendeano ka Dopompekakaako ka meweengakono penaa-Do gagi tolosino hadio mia.”

Ondae i Yesu mompokotompa orua mia morawu 20:29-34 (Mrk. 10:46-52; Luk. 18:35-43)

²⁹ Ka tempono Ondae i Yesu ka ana guru-Do mpeluarako inso i Yeriko, mia hadio ntehuhu tumonda ira.

³⁰ Hinao orua mia morawu anu mentoro a wiwi nsala rumongeo, nine Ondae i Yesu telalo, ka do'amba mebooli, ”Ue, Anano i Daudi, Ipehohawa kamimo!”

³¹ Sine mia hadio atuu mengkuahako ira ka dopenoro-noro. Sine komero-merokuno dopebooli, dopotae, ”Ue, Anano i Daudi, Ipehohawa kamimo!”

³² Ka Do'amba i Yesu menaa-naa ka Dopoboi ira, Dopotae, ”Hapa inehemiu ka Kuweweuo ndi omiu?”

³³ Sumangki ira, ”Ue, matamami ka ipokompongkita.”

³⁴ Ka teleluomo aroa-Do i Yesu mehohawa ira, ka Do'amba umanggao matado ka i tempo koa mbo'u atuu mongkita iramo ka do'amba tumonda Ira.