I MATIU 2 - Wunta Mempori

To majusi inso i sabaano oleo 2:1-12

¹ Umari-Do pine'anaako i Yesu i Beteleme i wita Yudea itempono mokole Herode, mehawe iramo to majusi inso i sabaano oleo melako i Yerusale

² ka mpesisikeno, ”Isua Iramoke, mokoledo to Yahudi anu da iaopo Dohina atuu? Kimengkitaomo buntala-Do isabaano oleo ka kami mehawe mesombai Ira.”

³ Tempono irongeo mokole Herode mongkona atuu tededengkeomo onae saru luwuno mia i Yerusale.

⁴ Ka ipumpu iramo luwu petewawado sando mpesomba ka anu ponto'ori Taurado to Yahudi, ka i'amba mesikeno ndi ondae, ba isua Ira pine'anaako i Mesia.

⁵ Dompotaeakono, ”I Beteleme i wita Yudea, hangano kanandio hinao binuri a laro wuntado nabi:

⁶ Ka omue Beteleme, wita Yahuda, komba omuemo anu lalu kodei i olodo anu moparenta i Yahuda, hangano inso ndi omue ta mesabaako asa mia petewawa, anu ta pakambi ira bawaa-Ku to Isaraeli.”

⁷ Ka i'amba i Herode memaro-maro moboi ira to majusi atuudo ka ipenootio sumikeno ira, indi'ipia i kinita buntala atuu.

⁸ Ka i'amba tumena ira melako i Beteleme, ipotae, ”Imelakomo ka ipepenteeo ntu'u, mongkona nana'ote atuu ka tewala imehaweomo impompari-pari mempaua kune ka ku'aiwa ngkuda mesombai Ira.”

⁹ Mansado merongeo luwuno pauno mokole atuu, mpelungka iramo. Ka kitaomo, buntala anu kinitado i Sabaano Oleo atuu sume'elungi ira ranta hawe ka ipenaa-naa iwawono pepontuno po'iangano nana'ote atuu.

¹⁰ Tempono domengkitao buntala atuu, tedoa ira memawongko.

¹¹ Ka mpewinso iramo i laro raha atuu, ka mengkitao nana'ote atuu saru i Maria, ine-Do, ka do'amba mpenggolontu mpesombai Ira. Ondae mbo'u me'ungkahio ponaapa arataado ka dompesombaakono pesomba ndi Ondae, onaemo io wulaa, dupa ka mire.

¹² Ka hangano pinopoto'oriako a laro mo'ipi, kasi dompekule ndi Herode, onaemo ka dompekule i iniado mpontonda sala susua.

Polaia i wita Masiri 2:13-15

¹³ Mansado mpelungka to majusi atuudo, tengkitaomo mala'eka-Do i Ue ndi Yusupu a laro mo'ipi ka ipotae, ”Pewangu, alaomo Nana'ote atuu saru ine-Do, polaimo i wita Masiri ka po'iamo i ra'ai hawe ka Kupepau ndi omue, hangano I Herode umungkeo Nana'ote atuu ta mepateo.”

¹⁴ Ka mewanguomo i Yusupu, i alao Nana'ote atuu saru ine-Do wongi koa atuu, ka i'amba molai i wita Masiri,

¹⁵ ka mo'ia i ra'ai ranta ka imate i Herode. Gagiomo kanatuu, ka ite'inihii anu pinau-Do i Ue molalo nabi, ”Inso i wita Masiri Kupoboio Ana-Ku.”

Pompepatea nana'ote i Beteleme 2:16-18

¹⁶ Mansano tumo'orio i Herode, nine domempopo'oo to majusi atuudo, onae tedoa tekuda. Ka i'amba metena mepate ira luwu nana'ote i Beteleme ka petengi-tengino, onaemo nana'ote anu tinuwuno napi sompo orua nta'u, menunu saru tempo anu pinokonto'orino inso a to majusi atuudo.

¹⁷ Kanandiomo i inihii pau-Do i Ue anu pinohaweno nabi Yeremia,

¹⁸ ”Terongeomo suara i Rama, pengese ka ponsabangi anu tedoa mompemasusa; i Raheli mengesei ira anano nahi behe itinarero, hangano nami domekongko mbo'u.”

Mekule inso i wita Masiri 2:19-23

¹⁹ Mansano mate i Herode, tengkitaomo mala'eka-Do i Ue ndi Yusupu a laro mo'ipi i wita Masiri, ipotae,

²⁰ ”Pewangumo, alao Nana'ote atuu saru ine-Do, ka pelungkamo lumako i wita Isaraeli, hangano ondae anu mingki mepateo Nana'ote atuu mateomo.”

²¹ Ka i'amba mewanguomo i Yusupu, i alao Nana'ote atuu saru ine-Do ka domelako i wita Isaraeli.

²² Sine mansano rumongeo, nine i Arakelau gagi mokole i Yehuda umeuo i Herode, amano, onae doito lumako raane. Hangano ipinauako a laro mo'ipi, lumakoomo i Yusupu i wita Galilea.

²³ Sahaweno i ra'ai, onae mo'iaomo i asa kota anu meneeako Nasare. Gagiomo kanatuu ka ite'ihiimo pau-Do i Ue anu pinohawedo nabi, nine Ondae Ira pinau to Nasare.