I MATIU 18 - Wunta Mempori

Isema anu lalu langkai a laro Poparentaa Suruga 18:1-5 (Mrk. 9:33-37; Luk. 9:46-48)

¹ I tempo atuu mehawe iramo ana guru atuu ndi Ondae i Yesu ka dompesikeno, ”Isemake anu lalu langkai a laro Poparentaa Suruga?”

² Onaemo ka Dopoboio i Yesu asa nana'ote kodei ka Donaao i tonga-tongado

³ Ka Do'amba motae, ”Kupauakomiu, menteeano tewala nahi ntepidi ka gagi kana nana'ote kodei andio, nahi komiu mpewinso a laro Poparentaa Suruga.

⁴ Sine ba isema anu me'urumako ka gagi kana nana'ote kodei andio, onaemo anu lalu langkai a laro Poparentaa Suruga.

⁵ Ka ba isema anu tumarimao asa nana'ote kanandio a nee-Ku, Ongkuemo tinarimano.”

Isema anu mompopo'oo mia 18:6-11 (Mrk. 9:42-48; Luk. 17:1-2)

⁶ ”Sine ba isema mompopo'oo aasa inso a nana'ote kodei andiodo anu mompe'ala-ala ndi Ongkue, moikoopo ndi onae tewala pinontanggoako watu pogili a we'uno ka i'amba pinotondu a laro ntahi.

⁷ Masolaomo wawontolino saru luwuno pompopo'oono: lano pompopo'oo asalakono hinao, sine masolaomo mia anu weweuo.

⁸ Tewala kaemu ke karumu mopo'ooko, poleomo ka tadiomo atuu, hangano moikoopo upewinso a ntuwua, pudu kae ke tiimpa karu sekonopo mompombali kaemu ke karumu ka upinetadiako a laro api nahina tampulaano.

⁹ Ka tewala matamu mopo'ooko, gogoio ka tadiomo atuu, hangano moikoopo upewinso a ntuwua memata aasa sekonopo upinetadiako a laro api naraka kongko orua mata.

¹⁰ Impopesu'ui, si hina mompokongkodei te'asa inso a nana'ote kodei andiodo. Hangano Kupauakomiu: Hinao mala'ekado i suruga anu wela kumitao rupa-Do Ama-Ku anu i suruga. [

¹¹ Hangano hawe-Do i Ana Manusia mongkadudui anu tetadi.]”

Potundaano mongkona bimba anu tetadi 18:12-14 (Luk. 15:3-7)

¹² ”Kana'umpe pohawemiu? Tewala asa mia hinao asa etu bimbano, ka asa i olodo tetadi, nde nahi ta bintao anu sio pulu ka osio a mentorukuno ka ilako umungkeo anu tetadi atuu?

¹³ Ka Kupauakomiu: Menteeano tewala ihaweo, langkaiopo imawongkoakono anu asa atuu sekonopo a anu siopulu ka osio anu nahi tetadi.

¹⁴ Kanatuu koa mbo'u Ondae Amamiu anu i suruga nahi Dopo'eheako maupo te'asa mia inso a nana'ote andiodo tetadi.”

Mongkona mompatudu pe'asa pepaekompo 18:15-20

¹⁵ ”Tewala pepaekompomu moweweu hala, kuahakono tempono asa-asano. Tewala iperorongeakono patudumu walikomo humaweo.

¹⁶ Tewala nahi perorongeakomu, powawamo te'asa ke orua mia mbo'u hangano pompauno orua ke otolu mia sakosii, kara-kara atuu pine'ala-alaomo.

¹⁷ Tewala nahi perorongeako ira, pauomo teweweuno a bawaa. Ka tewala nahi perorongeako ira mbo'u bawaa, kitaomo kana mia anu nahi to'ori Ira Ue Ala ke asa mia puu popumpu sima'ulu.

¹⁸ Kupauakomiu: Menteeano hapa anu winutumiu i wawontolino andio ta tewutu i suruga ka hapa anu pinotolamiu i wawontolino andio ta tepotola i suruga.

¹⁹ Ka Kupauakomiu mbo'u: Tewala orua mia inso ndi omiu i wawontolino andio moroko mo'ema hapamo koa, po'emado atuu ira uminduo AmaKu anu i suruga.

²⁰ Hangano ba isua orua ke otolu mia mpepumpu a nee-Ku, kongko Aku i tu'ai i tonga-tongado.”

Potundaano mongkona po'ampunia hala 18:21-35

²¹ Ka i'amba aiwaomo i Peturu ka motaeako Ira i Yesu, ”Ue, hawe pempia asalakono aku umampunio halano pepaekompoku tewala onae tehala ndi ongkue? Hawe tepepintu?”

²² Dopotae i Yesu ndi onae, ”Naahi! Kupauakomu: Komba hawe pepintu, tendeano hawe pepintu pulu ka pepintu.

²³ Hangano mongkona Poparentaa Suruga pinotundaako kana asa mokole anu ta moweweu perekea saru luwuno atano.

²⁴ Mansano mompu'u moweweu perekea atuu, pino'aroomo asa mia anu mepasua hopulu nsowu talenta.

²⁵ Sine hangano nahi polio mokolesoo pasuano, mokole atuu meparenta ka i'inasa mia atuu saru anano ka beineno ka luwuno arataano po'owahi pasuano.

²⁶ Onaemo ka ipenggolontu ata atuu mesombaio, ipotae: Imensabaramo ari, luwuno pasuaku aku mokolesoo.

²⁷ Ka i'amba teleluomo aroano mokole atuu hangano mehohawao ata atuu, ranta ka ipotolao ka nami pewowoloo mbo'u pasuano.

²⁸ Sine mansano meluarako ata atuu, itepotowoakono asa ata susua anu mepasua asa etu dinare ndi onae. Irakoo ka itolonggeoo walino atuu, ipotae: Owahio pasuamu!

²⁹ Onaemo ka ipenggolontu walino atuu ka mepepehohawa ndi onae: Imensabaramo ari, pasuaku atuu aku mokolesoo.

³⁰ Sine nahi tarimao ka ipeweengakono walino atuu a laro torungku hawe ka ipokolesoo pasuano.

³¹ Kumitao atuu wali-walino anu susua tedoa pompemasusa ka do'amba mempauakono uedo luwuno anu gagi.

³² Metena mokole moboio mia atuu ka ipotaeakono: Hei ata anu lambaha, luwuno pasuamu nami kupewowoloo hangano omue mepepehohawa ndi ongkue.

³³ Kombake omue mbo'u asalakono mehohawao walimu kana kupehohawako?

³⁴ Ka tekudaomo ueno atuu ka ipeweengakono a mia mpobobarasa, hawe ka ipokolesoo pasuano.

³⁵ Ka Ondae Ama-Ku anu i suruga Ira moweweu kanatuu mbo'u ndi omiu, tewala singge mia nahi ampunio pepaekompono tompaano aroano.”