I MATIU 16 - Wunta Mempori

To Parisi ka to Saduki mpo'ema petondoni 16:1-4 (Mrk. 8:11-13)

¹ Ka i'amba mehawe iramo to Parisi ka to Saduki ira me'ara-arahako Ira i Yesu. Dome'emao ka Dopopokitao ndi ondae te'asa petondoni inso i suruga.

² Sine sumangki Ira i Yesu, ”Tempono ngkiniwia hangano langi motaha, mpotae komiu: ta moiko laro meene,

³ ka tempono mo'oru, hangano langi motaha ka medomu, mpotae komiu: nahi ta moiko laro meene. Rupano langi imento'orio mposisinggeo sine luwuno petondoni tempo naahi.

⁴ Mia andiodo anu memosa'o ka nahi dompetenunu andio mpo'ema aasa petondoni. Sine ndi ondae nahi ira mempinoweeako petondoni sangkadio petondonino Nabi Yunu.” Ka Do'amba i Yesu binta ira ka Dolako.

Mongkona ragido to Parisi ka to Saduki 16:5-12 (Mrk. 8:14-21)

⁵ I tempono ana guru-Do i Yesu mensakio rano, domengkolupeo mpowawa roti.

⁶ Dopotaeako ira i Yesu, ”Impedagaimo ka impetangkoro a ragido to Parisi ka to Saduki.”

⁷ Onaemo ka dompompewowolo ka asa mia motaeakono walino, ”Ka Dopauo atuu hangano nahi tompowawa roti.”

⁸ Ka mansa-Do tumo'orio i Yesu hapa anu pinopaudo, Dopotae, ”Tembio ka imempopauo mongkona nahina roti? Hei mia anu kodei pompe'ala-alano!

⁹ Naapo koa mbo'u imempokonto'orio? Nami merambeo mbo'u olima roti tiano lima nsowu mia atuu ka ba opia baki roti pinumpumiu lembuino?

¹⁰ Ke maupo anu opitu roti tiano pato nsowu mia atuu ka ba opia baki pinumpumiu lembuino?

¹¹ Nde kana'umpe ka nahi mpokonto'orio nine komba roti anu tinoo-Ku. Kupauakomiu: Impetangkoro a ragido to Parisi ka to Saduki.”

¹² Tempo atuu ka do'amba mpokonto'orio nine komba tinoo-Do ka dompetangkoro a ragino roti, tendeano a pompagurudo to Parisi ka to Saduki.

Mangakuno i Peturu 16:13-20 (Mrk. 8:27-30; Luk. 9:18-21)

¹³ Mansa-Do hawe i Yesu i wita Kaisarea Pilipi, mesikeno Ira a ana guru-Do, ”Dompotae mia, isemake i Ana Manusia atuu?”

¹⁴ mesangki ira, ”Hinao anu motae: i Yohane Puu mpobaho, hinao mbo'u anu motae: i Elia, hinao mbo'u anu motae: i Yeremia ke asa inso a luwuno nabi.”

¹⁵ Ka Do'amba i Yesu mesikeno ndi ondae, ”Sine hapa potaemiu, isemake Ongkue andio?”

¹⁶ Ka sumangkiomo i Simo Peturu, ”Omiumo i Mesia, Ana-Do Ue Ala anu tuwu!”

¹⁷ Dopotae i Yesu ndi onae, ”Me'urakomo Simo anano i Yunu hangano komba mia anu mokomengkaao atuu ndi omue, tendeano Ondae Ama-Ku anu i suruga.

¹⁸ Ka Kupauakomu mbo'u: Omuemo i Peturu ka a wawo watu manaha andio Aku wanguo bawaa-Ku ka nahi ta pabawaio matea.

¹⁹ Ndi omue Aku meweengakono kunsino Poparentaa Suruga. Hapa anu winutumu i wawontolino andio ta winutu i suruga ka hapa anu pinotolamu i wawontolino andio ta pinotola i suruga.”

²⁰ Ka Do'amba i Yesu umonto ira ana guru-Do ka si domempauo maupo ndi sema nine Ondae i Mesia.

Amba-ambano ipinau mongkona tebobarasai-Do i Yesu ka atorano tumonda Ira 16:21-28 (Mrk. 8:31–9:1; Luk. 9:22-27)

²¹ Mompu'u i tempo atuu Ondae i Yesu mompu'u mokomengkaao a ana guru-Do nine Ondae asalakono Ira lumako i Yerusale ka montembi hadio marasaia inso a mia memota'u, petewawado sando mpesomba ka guru agama, ka Do'amba pinepate ka winangu a oleo ko'otolu.

²² Sine i Peturu dumii Ira i Yesu i horino ka ikuahako Ira, ipotae, ”Ue, po'ineeomo ka Dopoko'olaio Ue Ala mongkona atuu! Anu kanatuu naahi ntu'u ta umalu Komiu.”

²³ Ka mewolili Ira i Yesu ka Dopotaeakono i Peturu, ”Polaimo Mosa'o. Omue aasa watu tetidua-Ku, hangano omue komba mompewowolo hapa anu pinewowolo-Do Ue Ala, tendeano hapa anu pinewowolono mia.”

²⁴ Ka Do'amba i Yesu motaeako ira ana guru-Do, ”Sompo mia anu tumonda Aku, asalakono ka ihapuo koroino, po'ahao keu pinotambano tumonda Aku.

²⁵ Hangano ba isema ta kumaduduio penaano, ta tetadi penaano; sine ba isema tetadi penaano hangano Ongkue, onae ta humaweo.

²⁶ Hapa tuduno asa mia ba ihaweo asa wawontolino sine tetadi penaano? Ka hapake anu polio ipeweengakono gagi euno penaano?

²⁷ Hangano i Ana Manusia Ira hawe a laro maramba-Do Ama-Do domentonda Ira mala'eka-Do; i tempo atuu Ira sumuloakono mia montonda wineweuno.

²⁸ Kupauakomiu: Menteeano i olodo mia anu mekongko i ndi'ai hinao anu nahi ta mate ba napi domengkita Ira i Ana Manusia hawe gagi Mokole a laro Poparentaa-Do.”