I MATIU 15 - Wunta Mempori

Parenta-Do Ue Ala ka gaudo to Yahudi 15:1-20 (Mrk. 7:1-23)

¹ Ka i'amba mehawe iramo ndi Ondae i Yesu ba opia to Parisi ka anu monto'ori Taura inso i Yerusale ka dompotae,

² ”Tembio ana guru-Miu ka dompolimpai gaudo uempu'uto? Nahi domewo'ohio kaedo ka do'amba mpongkaa.”

³ Sine sumangki Ira i Yesu ndi ondae, ”Tembio mida ka imelaloo parenta-Do Ue Ala hangano gaudo uempu'umiu?

⁴ Hangano Ondae Ue Ala mepau: Pelangkai ira amamu ka inemu; ka mbo'u: Isema anu tumutundalio amano ke ineno manasa hinuku mate.

⁵ Sine mpotae komiu: Ba isema mepau ndi amano ke ineno: Hapa anu hina ndi ongkue anu tekona imentuwuako, pinesombaakoomo ndi Ondae Ue Ala,

⁶ mia atuu siimo mbo'u ipelangkai ira amano ke ineno. Ba kanandio ime'oniniomo pau-Do Ue Ala hangano gaumiu.

⁷ Hei mia anu mpo'onde-onde! Menteeomo pinau anu ta gagi pinauno Nabi Yesaya mongkona omiu:

⁸ Tongku andio mpelangkai Aku a wiwido, kahinaano aroado olai inso ndi Ongkue.

⁹ Nahina tuduno dompesomba ndi Ongkue, hangano pepaguru anu dompopaguruako onaemo parentano mia.”

¹⁰ Ka Do'amba i Yesu moboi ira mia hadio ka Dopotaeako ira,

¹¹ ”Imerongeo ka impe'ihi laroo: komba anu mewinso a laro nganga kumokoburutio mia, tendeano anu meluarako inso a ngangano, onaemo anu kumokoburutio mia.”

¹² Ka mehawe iramo ana guru-Do ka dompesikeno ndi Ondae, ”Ito'orio koake nine pinau-Miu atuu gagiomo watu tetiduado to Parisi?”

¹³ Sumangki Ira i Yesu, ”Sompo pinopaho anu nahi Dopahoo Ama-Ku anu i suruga ta binuta saru luwuno hakano.

¹⁴ Po'inee iramo koa mia atuudo. Ondae mia memorawu anu mpotaate mia morawu. Tewala mia morawu montaate mia morawu, manasa oruano tedonta a laro aa.”

¹⁵ Ka i'amba motae i Peturu ndi Ondae, ”Ipauakamimo pengkonaano potundaano atuu.”

¹⁶ Sumangki Ira i Yesu, ”Naapo koa mbo'uke impokonto'orio?

¹⁷ Nahi imento'orioke nine luwuakoano anu mewinso a laro nganga metii a laro kompo ka i'amba tinadi a ngkakusu?

¹⁸ Sine hapa anu meluarako inso a nganga te'inso i aroa ka onaemo anu mopokomokoburu mia.

¹⁹ Hangano inso i aroa me'umbaako luwuno pinewowolo mosa'o, pompepatea, ponsosaboa, pebelesua, ponakoa, sumpa nahi mentee ka pompepaukiako.

²⁰ Onaemo anu mompokomokoburu mia. Sine mongkaako kae nahi wino'ohi nahi pokomokoburuo mia.”

Beine to Kana'a anu mompe'ala-ala 15:21-28 (Mrk. 7:24-30)

²¹ Ka Do'amba i Yesu lumako inso i tu'ai ka meliahako i wita Tirusi ka Sidoni.

²² Ka haweomo aasa beine to Kana'a inso i wita atuu ka mebooli, ”Ipehohawa aku, oo Ue, Anano i Daudi, hangano anaku beine ipewinsokio onitu nsa'o ka tedoa mompemarasai.”

²³ Sine nahi Dosangkio i Yesu. Ka i'amba ana guru-Do me'aiwa ka me'emao ndi Ondae, ”Itenaomo ka ilako, itonda kita mpiha saru kokora-kora.”

²⁴ Sumangki Ira i Yesu, ”Ongkue tinena butu a luwuno bimba anu tetadi inso a bawaa Isaraeli.”

²⁵ Sine beine atuu merangkuhako ka ipesombai Ira ka ipotae, ”Ue, Itulungi aku.”

²⁶ Sine sumangki Ira i Yesu, ”Nahi tekona umalao roti anu pinatindaako nana'ote ka itendeakono dahu.”

²⁷ Motae beine atuu, ”Mentee Ue, sine dahu atuu mongkaa koa anu tesosala inso a medano ueno.”

²⁸ Onaemo ka Dosangki i Yesu ka motaeakono, ”Hei beine, langkai pompe'ala-alamu, ka gagiomo ndi omue kana anu ino'aroamu.” Ka i tempo koa mbo'u atuu tompaomo anano.

Ondae i Yesu mompokotompa hadio mia mahaki 15:29-31

²⁹ Mansa-Do bintao wita atuu, Ondae i Yesu melempa tumondao wiwi rano Galilea ka Dopewuatako a wawo pongku ka Dopentoro i tu'ai.

³⁰ Ka i'amba mia hadio ntehuhu me'aiwa ndi Ondae mpowawa mia luuka, mia tiimpa karu, mia morawu, mia beebe ka hadio mbo'u anu susua hakino, ka do'amba menaa ira a ngkaru-Do i Yesu ka Dopokotompa ira luwu.

³¹ Ka mengkohali-hali iramo mia hadio atuu mengkitao mia beebe mepau, mia tiimpa karu tompa, mia luuka melempa, mia morawu mongkita, ka dome'unde-unde Ira Ue Alado to isaraeli.

Ondae i Yesu mompaka patonsowu mia 15:32-39 (Mrk. 8:1-10)

³² Ka Do'amba i Yesu moboi ira ana guru-Do ka Dopotae, ”Telelu aroa-Ku mehohawa ira mia hadio atuu. Otolu oleomo domentonda Aku ka nahina kaangado. Nahi Kubehe tumena ira mpekule memokoninggo, mansa ira ntebangku a nsala.”

³³ Dompotae ana guru ndi Ondae, ”Kana'umpe a mpo'ianga boni-boni kanandio kita mpohawe roti pokomowohido mia anu kanandio hadiono?”

³⁴ Motae Ira i Yesu ndi ondae, ”Opia roti anu hina ndi omiu?” mesangki ira, ”Opitu,” ”ka hinao mbo'u ba opia bou kodei.”

³⁵ Ka Do'amba i Yesu tumena ira mia hadio atuu mpentoro a wita.

³⁶ Umarino atuu Do'alao opitu roti ka bou atuu, Dopekakaiakono, sumiba-sibao ka Doweeako ira ana guru-Do, ka i'amba ana guru-Do weeako ira mia hadio.

³⁷ Ka luwudo mpongkaa ranta mowohi. Ka do'amba mia mepumpuo siba-sibano roti anu torea, opitu baki buuke.

³⁸ Anu mpongkaa pato'etu nsowu tama, nahi tewinso beine ka nana'ote.

³⁹ Ka Do'amba i Yesu tumena ira mia hadio atuu mpekule. Ondae me'ula a bangka ka Dolako i wita Magadani.