I MATIU 14 - Wunta Mempori

I Yohane Puu Mpobaho pinepate 14:1-12 (Mrk. 6:14-29; Luk. 9:7-9)

¹ I tempo atuu mehawe iramo lele mongkona Ondae i Yesu ndi Herode, mokole i wita atuu.

² Ka i'amba motaeako ira pegawaino, ”Onaemo andio i Yohane Puu mpobaho; mewanguomo inso i olodo mia mate ka onaemo pu'uno luwuno pabawa atuu mo'angga i laro-Do.”

³ Hangano lano metenaomo i Herode ka irinako i Yohane, ponguo ka tumorungkuo, hangano i Herodia, beineno i Pilipu pepaekompono.

⁴ Hangano horio i Yohane kumuahakono, ipotae, ”Nahi moiko u'alao i Herodia!”

⁵ I Herode mingki mepateo, sine idoitoako ira mia hadio anu mentuduo i Yohane nabi.

⁶ Sine a oleo hinaano i Herode, lumenseomo anano i Herode anu beine i tonga-tongado ka mokomawongkoo aroano i Herode,

⁷ onaemo ka ipesumpa i Herode ta moweeakono hapamo koa anu inemano.

⁸ Ka mansano montisoakono ineno, motaeomo ana beine atuu, ”Iwee akumo i ndi'ai uluno i Yohane Puu mpobaho a aasa dula.”

⁹ Ka i'amba masusaomo aroano mokole, sine hangano sumpano ka hangano hadio totokano meparenta koa ka iwineeako.

¹⁰ Metenaomo umimpahio uluno i Yohane a ntorungku

¹¹ ka domewawaomo mia uluno i Yohane a aasa dula, ka i'amba wineeako ana beine atuu ka iwawao ndi ineno.

¹² Ka i'amba mehawe iramo ana guruno i Yohane Puu mpobaho me'alao wata ngkoroino ka domengkaburuo. Ka do'amba melako pauako Ira i Yesu.

Ondae i Yesu mompaka lima nsowu mia 14:13-21 (Mrk. 6:30-44; Luk. 9:10-17; Yoh. 6:1-13)

¹³ Mansa-Do rumongeo i Yesu lele atuu meliahako Iramo inso i tu'ai, ka lumako Ira asa-asa-Do me'ula a bangka a mpo'ianga anu boni-boni. Sine domerongeo mia hadio ka domentonda Ira mpewita inso a luwuno kotado.

¹⁴ Tempono Dopetii i Yesu inso a bangka, Dokita ira mia tedoa hadio, ka teleluomo aroa-Do mehohawa ira ka Dopoko tompa ira anu memahaki.

¹⁵ Mansano tamo wongi, me'aiwa ira ana guru-Do ndi Ondae ka dompotae, ”Po'ianga andio boni-boni ka mompu'uomo wongi. Itena iramo mia hadio atuu ka domelako ka dompo'oli kaanga i inia.”

¹⁶ Sine motae Ira i Yesu ndi ondae, ”Siimo domelako, omiu asalakono paka ira.”

¹⁷ Mesangki ira, ”Anu hina ndi omami i ndi'ai butu roti olima ka bou orua.”

¹⁸ Dopotae i Yesu, ”Wawaomo ramai ndi Ongkue.”

¹⁹ Ka Do'amba tumena ira mia hadio atuu mpentoro a ewo. Ka mansa-Do umalao roti olima ka bou orua atuu, mentombu Ira i Yesu i langi ka Doronsoo, ka Do'amba sumiba-sibao roti atuu ka Doweeako ira ana guru-Do, ka do'amba ana guru tumia-tiaako ira mia hadio.

²⁰ Ka luwudo mpongkaa ranta mowohi. Ka do'amba mia mepumpuo luwuno sibano roti anu torea, hopulu ka orua baki buke.

²¹ Anu mpongkaa bara'ura olima nsowu tama, nahi tewinso beine ka nana'ote.

Ondae i Yesu melempa a wawo uwoi 14:22-33 (Mrk. 6:45-52; Yoh. 6:16-21)

²² Umarino atuu Ondae i Yesu dumarasi ira ana guru-Do mpe'ula a bangka ka dompese'elungi Ira hawe i asatowa, kontongaano atuu Dotena ira mia hadio mpekule.

²³ Ka umari-Do tumena ira mia atuudo mpekule, Ondae i Yesu mewuatako a wawo pongku ka Dopekakai asa-asa-Do. Tempono wongiomo, asa-asa-Do i tu'ai.

²⁴ Bangkado ana guru-Do olaiomo inso a wiwi ntahi ka ipopotende-tendeo bomba, hangano angi mokora.

²⁵ Bara'ura langku otolu wongi hawe Iramo i Yesu melempa a wawo uwoi.

²⁶ Tempono domengkita ira ana guru melempa a wawo uwoi, mentededengke ira ka dompebooli, ”Tuu onitu!”, ka do'amba mengkokora-kora hangano doito.

²⁷ Sine Ondae i Yesu ronga motaeako ira, ”Imperodoo aroamiu! Ongkue koa andio, si medoito!”

²⁸ Ka i'amba i Peturu mebooli ka sumangki Ira, ”Ue, ba Omiu atuu, Itena akumo aiwa ndi Omiu melempa a wawo uwoi.”

²⁹ Dopotae i Yesu, ”Aiwamo!” Onaemo ka ipetii i Peturu inso a bangka ka ipelempa a wawo uwoi tepohaweako Ira i Yesu.

³⁰ Sine mansano puurio angi, doitoomo ka mompu'u toondu ka i'amba mebooli, ”Ue, Itulungi aku!”

³¹ Mompari-pari Ira i Yesu tumasiakono kae-Do, uminio ka Dopotae, ”Hei mia anu kodei pompe'ala-alano, tembio ka unanta-nanta?”

³² Ka Do'amba mewuatako a bangka ka angi mbo'u temontoomo.

³³ Ka mia anu a laro bangka mpesombai Ira, dompotae, ”Menteeano Omiu Ana-Do Ue Ala.”

Ondae i Yesu mokotompa ira mia memahaki i Genesare 14:34-36 (Mrk. 6:53-56)

³⁴ Sahawe-Do i asatowa mpetii ira i Genesare.

³⁵ Mansado mento'orio mia a mpo'ianga atuu Ondae i Yesu, domempaleleo i asa wawo wita atuu. Ka luwuno mia anu mahaki mewinawa ndi Ondae.

³⁶ Mpo'ema ira ka dome'ineheako me'anggao wuakino lemba meloe-Do. Ka luwuno mia anu umangga Ira gagi tompa.