I MATIU 13 - Wunta Mempori

Potundaano mongkona asa mia anu morawo 13:1-23 (Mrk. 4:1-20; Luk. 8:4-15)

¹ Ia oleo atuu meluarako Iramo i Yesu inso a raha atuu ka mentoro a wiwi rano.

² Ka mehawe iramo mia hadio ntehuhu ka domenggowo Ira, onaemo ka Dope'ula a bangka ka mentoro i tu'ai, sine mia hadio luwuno mpentade a wiwi rano.

³ Ka hadio rupa pinau-Do ndi ondae a mpotundaano, Dopotae, ”Hinao asa mia puu mporawo meluarako ta morawo.

⁴ Tempono iporawo, asa ntia inii atuu tedonta a wiwi nsala, ka i'amba mehawe iramo manu-manu mengkaano hawe ka ipingko.

⁵ Asa ntia tedonta a wita anu melaro watu, anu nahi hadio witano, ka i'amba inii atuu ronga tuwu, hangano witano monipi.

⁶ Sine mansano saba oleo, moleuomo ka gagi mokari hangano nahi pehaka.

⁷ Asa ntia mbo'u tedonta a laro ewo rui, ka i'amba kolangka-langkaino ewo rui atuu ka ihidio ranta ka imate.

⁸ Ka asa ntia tedonta a wita anu moiko ka ipewua; hinao anu meluka asa etu, hinao meluka nomo pulu, hinao meluka tolu pulu.

⁹ Isema mebiri, ka iporonge!”

¹⁰ Ka me'aiwa iramo ana guru-Do mpesikeno ndi Ondae, ”Tembio ka Ipepauako ira a mpotundaano?”

¹¹ Sumangki Ira i Yesu, ”Ndi omiu mewineeako ka imento'orio rahasiano Poparentaa Suruga, sine ndi ondae naahi.

¹² Hangano isema anu hina, ndi onae ta pinowee, ranta ka imare'e; sine isema anu nahina, maupo hapa anu hina ndi onae ta inala inso ndi onae.

¹³ Onaemo pu'uno ka Kupepau a mpotundaano ndi ondae; hangano maupo dompengkita, nahi domengkitao ka maupo domporonge nahi domerongeo ka nahi dompokonto'orio.

¹⁴ Ka ndi ondae inihiiomo pinauno i Yesaya anu ta gagi, kanandio: Komiu mporonge ka merongeo, sine nahi mpokonto'orio, komiu mpengkita sine nahi mengkitao, sine nahi mperioo.

¹⁵ Hangano aroano tongku andio momaluomo, ka birido nahi poronge lahi, ka matado metako tepusu; ka si domengkitaakono matado ka merongeakono birido ka mpokonto'oriakono aroado, ka do'amba mpepokule ranta ka Kupokotompa ira.

¹⁶ Sine me'uraomo matamiu hangano mongkita ka birimiu hangano moronge.

¹⁷ Hangano Kupauakomiu: Menteeano hadio nabi ka mia mentee mingki mengkitao hapa anu mengkinitamiu, sine nahi domengkitao, ka mingki merongeo hapa anu merinongemiu, sine nahi domerongeo.

¹⁸ Onaemo pu'uno, imerongeomo pengkonaano potundaano mia morawo atuu.

¹⁹ A sompo mia anu rumongeo pau mongkona Poparentaa Suruga, sine nahi pokonto'orio, haweomo i mosa'o ka irontuo anu rinawo i laro aroano mia atuu; onaemo inii anu rinawo a wiwi nsala.

²⁰ Inii anu rinawo a wita anu melaro watu onaemo mia anu rumongeo pau atuu ka ronga itarimao saru mawongko aroano.

²¹ Sine nahi pehaka ka sarai koa ntu'u ipo'ia. Ba hawe pompokonsiia ke pobobarasaia hangano pau atuu, mia mbo'u atuu ronga monsuka.

²² Anu rinawo a laro ewo rui onaemo mia anu rumongeo pau atuu, ka i'amba sala-larono wawontolino andio ka pompopo'oono kaeaa humidio pau atuu ranta nahi pewua.

²³ Anu rinawo a wita anu moiko onaemo mia anu rumongeo pau atuu ka mokonto'orio, ka hangano atuu ka ipewua, hinao anu meluka asa etu, hinao anu meluka nomo pulu, hinao anu meluka tolu pulu.”

Potundaano mongkona lee i olono gandu 13:24-30

²⁴ Ondae i Yesu pauo asa mbo'u potundaano susua ndi ondae, Dopotae, ”Mongkona Poparentaa Suruga atuu pinotundaako kana mia morawo inii anu moiko a lereno.

²⁵ Sine i tempono luwuno mia mpoturi, haweomo iwali morawoakono wua lee i olono gandu atuu, ka i'amba lumako.

²⁶ Mansano tuwu gandu atuu ka mompu'u mewua, tengkitaomo mbo'u lee atuu.

²⁷ Ka mehawe iramo atano ueno lere atuu ndi onae ka dompotae: Ue, komba inii moikoke, anu rinawo a leremiu? Inso isuake lee atuu?

²⁸ Sumangki ueno atuu: Wineweuno asa iwali. Ka do'amba mpotaeakono ata atuudo: Gagi inehemiuke ue ka kimelako mebutao lee atuu?

²⁹ Sine ipotae: Osi'i, hangano bara'ura gandu atuu metonda tebuta tempono imebutao lee atuu.

³⁰ Po'ineeomo ka dotuwu meronga-ronga hawe tempo sumowi. I tempo atuu Aku mepau a luwuno anu mensowi: Imepumpuomo se'elu lee atuu ka imewutuomo nte'o'asa nte'u ka isinongko; ka i'amba mepumpuomo gandu atuu mewinsoo a laro nsi'eku.”

Potundaano mongkona wuku rawoho ka ragi 13:31-35 (Mrk. 4:30-34; Luk. 13:18-21)

³¹ Ondae i Yesu mompau asa mbo'u potundaano susua ndi ondae, Dopotae, ”Mongkona Poparentaa Suruga atuu pinotundaako kana wuku rawoho, anu inala ka domerawoo mia a leredo.

³² Lano wuku mpinopaho atuu anu lalu kodei inso a luwuno rupano wuku mpinopaho, sine ba tuwuomo, rawoho atuu langkaiopo sekono inahu anu susua, tendeano gagi keu ranta manu-manu i laro meene aiwa mpeseno a sampa-sampano.”

³³ Ka Dotutuluako ira mbo'u potundaano andio ndi ondae, ”Mongkona Poparentaa Suruga atuu pinotundaako kana ragi anu inalano asa beine ka isaloo a laro ntarigu otolu ponsa'u hawe ka isoopio luwu.”

³⁴ Luwuno atuu Dopauo i Yesu a mia hadio a mpotundaano, ka nahina maupo te'asa Dopauako ira nahi polalo potundaano,

³⁵ ka i'inihii koa pau anu pinaudo nabi, ”Aku mepau pauo potundaano, Aku pauo anu tewuni mompu'u ipinokogagi wawontolino.”

Pengkonaano potundaano mongkona lee i olono gandu 13:36-43

³⁶ Ka Dobinta Iramo i Yesu mia hadio atuu, ka Dopekule. Ana guru-Do me'aiwa ka dompotaeako Ira, ”Ipauakami pengkonaano potundaano mongkona lee a lere atuu.”

³⁷ Sumangki Ira, Dopotae, ”Mia anu morawo inii moiko onaemo i Ana Manusia;

³⁸ lere onaemo wawontolino. Inii anu moiko atuu ondaemo anano Poparentaa-Do Ue Ala ka lee ondaemo anano i mosa'o.

³⁹ Iwali anu morawo wua lee onaemo i Mosa'o. Tempo sumowi onaemo pokotampulaano wawontolino ka anu mensowi atuu mala'eka.

⁴⁰ Ka kana lee atuu ipinumpu ka itinunu a laro api, kanatuu koa mbo'u a pokotampulaano wawontolino.

⁴¹ I Ana Manusia ta tumena ira mala'eka-Do pumpuo luwuakoano anu mompopo'oo ka luwuno mia anu moweweu mosa'o inso a laro Poparentaa-Do.

⁴² Luwuno ta pinetadiako a laro api; i ra'aimo ta hina ponsabangia ka ke'ingisia.

⁴³ I tempomo atuu luwuno mia mentee ira memewanta kana mata oleo a laro Poparentaa-Do Amado. Isema mebiri, ka iporonge!”

Potundaano mongkona arataa anu tetano ka mutiara anu masuli olino 13:44-46

⁴⁴ ”Mongkona Poparentaa Suruga atuu pinotundaako kana arataa anu tetano a lere, anu hinaweno mia, ka i'amba wali tumanoo. Hangano po'undeno lumakoomo umasao luwuno arataano ka i'amba umolio lere atuu.

⁴⁵ Kanatuu koa mbo'u mongkona Poparentaa Suruga atuu pinotundaako kana asa mia puu mpebalu-balu anu mo'ungke mutiara tekosi.

⁴⁶ Mansano humaweo mutiara anu tedoa masuli olino, lumakoomo umasao luwuno arataano ka i'amba umolio mutiara atuu.”

Potundaano mongkona buani 13:47-52

⁴⁷ ”Kanatuu koa mbo'u mongkona Poparentaa Suruga atuu pinotundaako kana buani anu tinende a ntahi, ka i'amba pumpuo mperupa-rupa bou.

⁴⁸ Mansano buke, buani atuu domempadiio mia a wiwi ntahi, ka do'amba mpentoro ka mepumpuo bou anu moiko a laro mponaapado ka bou anu nahi moiko domentadio.

⁴⁹ Kanatuu koa mbo'u a pokotompaano wawontolino: Mala'eka ira mehawe mponsiao mia memosa'o inso a mia mementee,

⁵⁰ ka do'amba mpetadiako ira mia memosa'o a laro api langkai; i ra'aimo hinao ponsabangia ka ke'ingisia.

⁵¹ Impokonto'oriomoke luwuno atuu?” Mesangki ira, ”Humbee, kimpokonto'oriomo.”

⁵² Onaemo ka Dopotae i Yesu ndi ondae, ”Onaemo pu'uno anu monto'ori Taura anu montarima pompaguru mongkona Poparentaa Suruga atuu pinotundaako kana umbu raha anu moluarako arataa anu wo'ohu ka anu laano inso a mponaapa arataano.”

Ondae i Yesu nahi Dotinarima i Nasare 13:53-58 (Mrk. 6:1-6; Luk. 4:16-30)

⁵³ Mansa-Do umari i Yesu tumutuluo luwuno potundaano atuu, lumako Iramo inso i tu'ai.

⁵⁴ Sahawe-Do a mpo'ianga insoa-Do, Ondae i Yesu paguru ira mia i tu'ai a raha tepumpuado. Ka mengkohali-hali iramo ka dompotae, ”Inso isua Dopohawe ponto'ori mentee ka pabawa moweweu anu kinohali-haliako atuu?

⁵⁵ Kombake Ondae andio anano anu pande mo'angga keu? Kombake ine-Do meneeako i Maria ka pepaekompo-Do: i Yakobu, i Yusupu, i Simo ka i Yuda?

⁵⁶ Ka kombake pepaekompo-Do beine luwuno mekongko ira saru ontae? Gagi inso isua Dohawe ira luwuno atuu?”

⁵⁷ Onaemo ka imosa'odo ka nahi domentarima Ira. Ka Dopotaeako ira i Yesu, ”Asa nabi pinelangkai isua-suamo koa, sangkadio a mpo'ianga insoano ka i rahano.”

⁵⁸ Ka hangano nahi dompompe'ala-ala, nahi hadio anu kinohali-haliako Dopoweweu i tu'ai.