I MATIU 12 - Wunta Mempori

Ana guru mpo'opu gandu a oleo Saba 12:1-8 (Mrk. 2:23-28; Luk. 6:1-5)

¹ I tempo atuu, a oleo Saba, Ondae i Yesu mesala a lere gandu. Hanagano memokoninggo, ana guru-Do mpo'opu wua gandu ka domengkaano.

² Kumitao atuu, mpotae iramo to Parisi ndi Ondae, ”Kita iramo ana guru-Miu mpoweweu iramo anu inonto a oleo Saba.”

³ Sine sumangki Ira i Yesu ndi ondae, ”Nde nahi imebasaoke hapa anu wineweuno i Daudi tempono imokoninggo saru ondae anu mentondao,

⁴ kana'umpe ipewinso a Raha-Do Ue Ala ka kana'umpe domengkaano roti pesomba anu nahi moiko ikinaa, moiko onae maupo ondae anu mentondao, sangkadio luwuno sando mpesomba?

⁵ Ke nahi imebasaoke a wunta Songka, nine a luwuno oleo Saba, sando mpesomba mpolalo ira Songka mongkona oleo Saba a laro Raha-Do Ue Ala, sine nahi domensala?

⁶ Kupauakomiu: I ndi'ai hinao anu lumaloio Raha-Do Ue Ala.

⁷ Tewala lano impokonto'orio tinoono pau andio: Anu inehe-Ku onaemo pompehohawa ka komba pesomba, asalakono nahi komiu mehukuo mia anu nahina salano.

⁸ Hangano i Ana Manusia Ondaemo Ueno oleo Saba.”

Ondae i Yesu mompokotompa mia a oleo Saba 12:9-15a (Mrk. 3:1-6; Luk. 6:6-11)

⁹ Mansa-Do lumako inso i ra'ai, Ondae i Yesu mewinso a raha tepumpuado.

¹⁰ I tu'ai hinao mia anu nggaape kaeno asa mbali. Mpesikeno ira ndi Ondae, ”Moiko koake mompokotompa mia a oleo Saba?” Tinoodo ka ihina koa dompokonsalaako Ira.

¹¹ Sine Dopotaeako ira, ”Tewala asa mia inso i olomiu hinao bimbano aasa ka bimba atuu tedonta a laro ngkineke a oleo Saba, nahi ta umalaoke ka iwuatakono?

¹² Kombake mia laluaopo masuli sekono bimba? Onaemo pu'uno nahi inonto moweweu moiko a oleo Saba.”

¹³ Ka Do'amba motaeakono i Yesu mia atuu, ”Tasiakono kaemu!” Ka itasiakono, ka tompaomo kaeno atuu, ka gagiomo madoo kana kaeno anu asa mbali.

¹⁴ Ka do'amba mpeluarako to Parisi atuudo ka dompe'asa mpau mepate Ira.

^15a Sine doto'orio i Yesu tinoodo onaemo ka Dopeliahako inso i ra'ai.

Ondae i Yesu tetenaa-Do Ue Ala 12:15b-21

^15b Hadio mia tumonda Ira i Yesu ka Dopokotompa ira luwu.

¹⁶ Do'onto ira ntu'u ka si domempauo isema Ondae,

¹⁷ ka i'inihii pau anu pinohaweno Nabi Yesaya:

¹⁸ ”Kitaomo, tuu Tetenaa-Ku anu bininiki-Ku, anu pinehohawa-Ku, anu ndi Onae po'eheno laro-Ku; Aku numaao penaa-Ku ndi Onae ka Onae mopoto'oriao Songka a luwuno tongku.

¹⁹ Nahi Ira megaga ka nahi Ira mebooli ka nahi ira merongeo mia suara-Do a nsala.

²⁰ Intowu anu tepudu telupe nahi Ira umotuhio, ka sumbu anu mo'oro langano nahi ira mepateo, hawe ka Dopokogagio Songka atuu poponangi.

²¹ Ka ndi Ondaemo pomperorohiado luwuno tongku.”

Ondae i Yesu ka i Belesebu 12:22-37 (Mrk. 3:20-30; Luk. 11:14-23; 6:43-45)

²² Ka i'amba winawaomo ndi Ondae i Yesu asa mia anu pinewinsokino onitu nsa'o. Mia atuu morawu ka beebe, ka Do'amba i Yesu mokotompao, ranta i bebe atuu mepauomo ka mongkita.

²³ Ka mengkohali-hali iramo mia hadio atuu, dompotae, ”Onae andio bara'ura anano i Daudi.”

²⁴ Sine mansado merongeo to Parisi, dompotae, ”Saru pabawano i Belesebu, tadulakodo onitu nsa'o, Doponsaariako onitu nsa'o.”

²⁵ Sine Doto'orio i Yesu pinewowolodo onaemo ka Dopotaeako ira, ”Sompo poparentaa anu terawo-rawo manasa ta tekale-kale ka sompo kota ke sombori anu terawo-rawo nahi pokompo'ia mpiha.

²⁶ Kanatuu koa mbo'u tewala i Mosa'o sumaario i Mosa'o, onae mbo'u tetia-tia ka umewaio koroino onaeno; kana'umpeke poparentaano ka ipokompo'ia mpiha?

²⁷ Gagi tewala saru pabawano i Belesebu Kuponsaariako onitu nsa'o, saru pabawano isemake mia mentonda komiu mensaariakono? Onaemo pu'uno ondaemo anu ira megagi puu mpobitaramiu.

²⁸ Sine tewala saru pabawa-Do Ue Ala Kuponsaariako onitu nsa'o, menteeano Poparentaa-Do Ue Ala haweomo ndi omiu.

²⁹ Ke kana'umpe mia ta mokompewinsokio rahano asa mia anu moroso ka rumontuo arataano ba nahi ponguo se'elu mia moroso atuu? Umarino ponguo ka i'amba mokorontuo ihino raha atuu.

³⁰ Isema nahi saru ongkue, onae umewai Aku ka isema anu nahi popumpu saru Ongkue, onae morawo-rawo.

³¹ Onaemo pu'uno Kupauakomiu: Luwuno hala ka pompepaukido mia ta inampuni, sine mompepaukiako Penaa Mempori nahi ta inampuni halano.

³² Tewala asa mia mepauomo umewai Ira i Ana Manusia, ta inampuni halano, sine tewala i'ewai Ira Penaa Mempori, onae nahi ta inampuni halano, i wawontolino andio ke maupo i wawontolino anu ta hawe naahi.

³³ Tewala asa keu mpotae komiu moiko, ta moiko mbo'u wuano; Tewala asa keu mpotae komiu nahi moiko, nahi ta moiko mbo'u wuano. Hangano inso a wuano ka itino'ori keu atuu.

³⁴ Hei omiu inuleno ule me'ipo, kana'umpeke ka komiu mpokopau ira anu moiko, kahinaano omiu mia memosa'o? Hangano anu pinauno wiwi meluarako inso i aroa.

³⁵ Mia anu moiko moluarako luwuno anu moiko inso i larono anu moiko ka mia anu mosa'o moluarako luwuno anu mosa'o inso i larono anu mosa'o.

³⁶ Sine Kupauakomiu: Sompo pau anu nahina tuduno anu pinauno mia asalakono pinopotembiako a oleo pobitaraa.

³⁷ Hangano montonda pinaumu kopinokomentee, ka montonda mbo'u pinaumu kohinuku.”

Petondonino i Yunu 12:38-42 (Luk. 11:29-32)

³⁸ I tempo atuu mpotae iramo ba opia anu mponto'ori Taura ka to Parisi ndi Ondae i Yesu, ”Guru, kami mingki mpongkita te'asa petondoni inso ndi Omiu.”

³⁹ Sine sumangki Ira i Yesu ndi ondae, ”Mia memosa'o ka nahi dompetenunu andio mpo'ema te'asa petondoni. Sine ndi ondae nahi ira mempinoweeako petondoni sangkadio petondonino Nabi Yunu.

⁴⁰ Hangano kana i Yunu mo'ia a laro kompono bou otolu oleo ka otolu wongi, kanatuumo mbo'u i Ana Manusia Ira mo'ia a laro wita otolu oleo ka otolu wongi.

⁴¹ I tempono pobitaraa, to Niniwe ira mpentade saru mia andiodo ka mehukuo mbo'u. Hangano to Niniwe atuudo ntepidi umarido merongeo pompaleleno i Yunu, ka menteeano anu kongko i ndi'ai laluaopo sekono i Yunu!

⁴² I tempono pobitaraa, mokole beine inso i selata atuu ta mentade saru mia andiodo ka onae ta humuku ira mbo'u. Hangano mokole beine andio aiwa inso i tompano tolino ta rumongeo ponto'ori menteeno i Salomo, ka menteeano anu kongko i ndi'ai laluaopo sekono i Salomo!”

Pekuleno onitu nsa'o 12:43-45 (Luk. 11:24-26)

⁴³ ”Tewala onitu nsa'o meluarako inso a mia, onae mo'itu-itu a luwuno po'ianga anu londa mo'ungke penaa-naaano. Sine nahi pohawe.

⁴⁴ Ka i'amba motae: Aku mekule a raha anu kubintaomo atuu. Onaemo ka ilako ka ihaweo raha atuu mooa, rinoahi morina ka te'atora.

⁴⁵ Ka i'amba meluarako ka mo'oluako opitu onitu nsa'o susua anu lalu mosa'o irapo sekono onae ka dompewinso mpo'ia i tu'ai. Ka poko'ariano teweweuno mia atuu lansaraopo sekono amba-ambano. Kanatuumo mbo'u ta gagi a mia andiodo anu mosa'o andio.”

Ondae i Yesu ka pepaekompo-Do 12:46-50 (Mrk. 3:31-35; Luk. 8:19-21)

⁴⁶ Tempono Ondae i Yesu da kontongaa-Do mepau a mia hadio atuudo, ine-Do ka pepaekompo-Do mpentade i bungkuno ka mingki tepohaweako Ira.

⁴⁷ Ka asa mia motaeako Ira, ”Kitao, ine-Miu ka pepaekompo-Miu mekongko ira i bungkuno ka mingki tepohawea-Komiu.”

⁴⁸ Sine sumangki Ira i Yesu a mia anu mompohawe lele atuu ndi Ondae, ”Isema ine-Ku? Ka isema pepaekompo-Ku?”

⁴⁹ Ka Do'amba motae, saru metiso a ana guru-Do, ”Ndio ine-Ku ka pepaekompo-Ku!

⁵⁰ Hangano isema anu weweuo po'ehe-Do Ama-Ku i suruga, onaemo pepaekompo-Ku tama, pepaekompo-Ku beine, ka ine-Ku.”