I MATIU 11 - Wunta Mempori

¹ Mansa-Do umari i Yesu me'oliwi a hopulu ka orua ana guru-Do, lumako Iramo inso i ra'ai ka Dopompaguru ka paleleo moikono tuwua a luwuno kota-Do.

Ondae i Yesu ka i Yohane Puu Mpobaho 11:2-19 (Luk. 7:18-35)

² A laro torungku irongeo i Yohane mongkona inangga-Do i Kerisituu,

³ ka i'amba tumena ira ana guruno mpesikeno ndi Ondae, ”Omiumoke anu Ira hawe atuu ke asalakono kami mposikori mia susua?”

⁴ Dosangki ira i Yesu, ”Imelakomo ka imempauakonomo i Yohane hapa anu rinongemiu ka anu kinitamiu:

⁵ mia morawu mongkita, mia luuka melempa, mia haki ngkuli mesaki gagi tompa, mia mobongo moronge, mia mate winangu ka a mia memongkokolaro pinalele lele mawongkoa.

⁶ Ka me'uraomo mia anu nahi gagi mosa'o aroano ka tumarima Aku.”

⁷ Mansado melako ana guruno i Yohane, mompu'u Iramo i Yesu mepau a mia hadio atuudo mongkona i Yohane, ”Pombioke ka imelako i pada one? Mpokita intowu anu lineluno angi ngkoraane ngkoramai?

⁸ Ke hapake imelakoako? Mpongkita mia anu mesangka alusu? Mia anu mesangka alusu atuu po'iangano a langkanaeno mokole.

⁹ Gagi hapa imelakoako? Mpongkita nabi? Mentee, ka Kupauakomiu, tendeano lauaopo sekono nabi.

¹⁰ Hangano mongkona onae hinao teburi: Kitaomo, Kutenao tinena-Ku mese'elungi-Ko, onae ta patindao pesalaa-Mu i aro-Mu.

¹¹ Kupauakomiu: Menteeano i olodo anu pine'anaakodo beine nahi hori hina anu lalu langkai sekono i Yohane Puu Mpobaho, sine anu lalu kodei a Poparentaa suruga langkaiopo sekono onae.

¹² Mompu'u ipontutulu i Yohane Puu Mpobaho ranta kanandio-andio, Poparentaa Suruga inewai ka anu umewaio mo'arahako pabawaio.

¹³ Hangano luwuno nabi ka wunta Taura mpompau anu ta gagi ranta haweno i Yohane

¹⁴ ka – tewala imentarimao – onaemo i Elia anu ta hawe atuu.

¹⁵ Isema anu mebiri, ka iporonge!

¹⁶ Saru hapake Aku pandiriakono mia tuwu kanandio-andio? Ondae atuu kana nana'ote anu mentoro a olu ka mpebooliako ira wali-walido:

¹⁷ kimpesiloliakomiu, sine nahi mpo'ense-ense, kimpenaniako penani pompemasusa, sine nahi mpo'inombo.

¹⁸ Hangano haweno i Yohane, nahi pongkaa, ka nahi po'inu, ka dompotae: Onae ipewinsokio onitu nsa'o.

¹⁹ Ka i'amba i Ana Manusia hawe, Ondae mongkaa ka mo'inu, ka dompotae: Kitaomo, Ondae asa mia modoko mongkaa ka mara mpo'inu, sambe'edo puu popumpu sima'ulu ka mia ntehala. Sine ponto'ori mentee inso ndi Ondae Ue Ala pinokomentee hangano wineweuno.”

Ondae i Yesu kumuahakono ba opia kota 11:20-24 (Luk. 10:13-15)

²⁰ Ka Do'amba i Yesu mompu'u kumuahako ira kota anu nahi dontepidi, maupo i tu'ai mararu ntu'u Dopoweweu anu kinohali-haliako:

²¹ ”Masolakomo Korasi! Masolakomo Besaida! Hangano tewala i kota Tirusi ka Sidoni gagiano luwuno anu kinohali-haliako anu gagiomo i tonga-tongamiu, tehineomo dontepidi ka mpo'inombo.

²² Sine Kupauakomiu: A oleo pobitaraa tembiado Tirusi ka Sidoni ta lalu monongkoopo sekono tembiamiu.

²³ Ka omue Kapenau, nde kowinuatakoke hawe i langi? Naahi, omue kopinotii hawe a mpo'iangado mia mate! Hangano tewala i Sodomo gagi luwuno anu kinohali-haliako anu gagiomo i tonga-tongamiu, kota atuu manasa da mentade hawe oleo andio.

²⁴ Sine Kupauakomiu: A oleo pobitaraa, tembiano wita Sodomo ta lalu monongko sekono tembiamiu.”

Po'oluako-Do Puu Pongkadudui 11:25-30 (Luk. 10:21-22)

²⁵ I tempo atuu mepau Iramo i Yesu, ”Ku'unde-unde Komiu, Ama, Ueno langi ka tolino, hangano luwuno atuu Iwuniako ira mia mpande mposongka ka mia mempande, sine Ipokomengkaao a mia kodei.

²⁶ Oo Ama, onaemo anu pinemoiko-Miu.

²⁷ Luwuno Dowee Akumo Ama-Ku ka nahina maupo te'asa mia tumo'ori Ira Ana sangkadio Ondae i Ama, ka nahina maupo te'asa mia tumo'ori ira i Ama sangkadio Ana ka mia anu ndi onae Dopemoikoo Ana atuu mopoto'oriakono.

²⁸ Ime'aiwamo ndi Ongkue, luwuno anu memokendo ka ntelusa ka mpopemobea, Aku mowee komiu penaa-naaa.

²⁹ Imentembiomo tinembi anu Kupopotembia komiu ka impepagurumo ndi Ongkue, hangano Ongkue mauru ka me'urumako ka sumangamiu ta mohawe rodoa.

³⁰ Hangano tinembi anu Kupopotembiakomiu atuu monongko.”