I MATIU 10 - Wunta Mempori

Ondae i Yesu mompoboi hopulu ka orua tinena 10:1-4 (Mrk. 3:13-19; Luk. 6:12-16)

¹ Ondae i Yesu moboi ira hopulu ka orua ana guru-Do ka moweeako ira pabawa ka dompoluarako onitu nsa'o ka mompokotompa luwuno haki ka molema.

² Ndiomo needo tinena hopulu ka orua atuu: Amba-ambano i Simo anu nineeako i Peturu ka i Andarea pepaekompono, ka i Yakobu anano i Sebedeu ka i Yohane pepaekompono,

³ i Pilipu ka i Batolomeu, i Toma ka i Matiu puu popumpu sima'ulu, i Yakobu anano i Alipeu, ka i Tadeu,

⁴ i Simo to Seloti ka i Yudasi Karioti anu humapu Ira.

Ondae i Yesu montena hopulu ka orua tinena 10:5-15 (Mrk. 6:6b-13; Luk. 9:1-6)

⁵ Hopulu ka orua ana guru atuu Dotena ira i Yesu ka Do'oliwi ira, ”Si mepansia a nsalado tongku susua ke mpewinso a laro ngkotado to Samaria,

⁶ tendeano imelakomo a luwuno bimba anu ntetadi inso a bawaa Isaraeli.

⁷ Imelakomo ka imempaleleomo: Poparentaa suruga rangkuomo.

⁸ Impokotompaomo mia mahaki; imewanguomo mia mate; impokotompaomo mia haki ngkuli mesaki; imeluarakonomo onitu nsa'o. Luwuno andio imehaweomo mpena, onaemo pu'uno impeweengakono mpena.

⁹ Si mpowawa wulaa ke salaka ke mala a laro nsulepemiu.

¹⁰ Si mpowawa pebaku a nsala, simpowawa te'orua lemba, sapatu ke tuko, hangano mia anu mo'angga tekona mohawe tambono.

¹¹ Tewala mpewinso komiu a ngkota ke inia, ime'ungkeo i tu'ai asa mia anu tekona ka impo'iamo ndi onae hawe ka impelungka.

¹² Tewala mpewinso komiu a rahano mia, impetabei ira.

¹³ Tewala tekona domentarimao, petabemiu atuu metii i wawodo, tewala naahi, petabemiu atuu mekule ndi omiu.

¹⁴ Ka tewala asa mia nahi tarima komiu ka nahi perorongeakono pinaumiu, impeluarakomo ka bintao raha ke kota atuu ka imetantamio pampawu inso a mpele ngkarumiu.

¹⁵ Kupauakomu: Menteeano a oleo pobitaraa Sodomo ka Gumora ta monongkoopo tinembino sekono kota atuu.”

Pobobarasaia anu ta hawe ka umakui Ira i Yesu 10:16-33 (Mrk. 13:9-13; Luk. 12:2-9; 21:12-19)

¹⁶ ”Kitao, Kutena komiu kana bimba i tonga-tongano serigala, onaemo pu'uno ka imempade mpe'aka kana ule ka imemauru kana marapatii.

¹⁷ Sine impetangkoro a luwuno mia; hangano hinao anu ta meweengakomiu a majelisi agama ka ira mensepi komiu a raha tepumpuado.

¹⁸ Ka hangano Ongkue, komiu mewinawa i'arodo anu mempabawa ka a mokole gagi sakosii ndi ondae ka a luwuno mia anu nahi domento'ori Ira Ue Ala.

¹⁹ Tewala dompeweengakomiu, si mensalalaro mongkona ba kana'umpe ka mongkona hapa anu, asalakono komiu pompau, hangano luwuno atuu komiu mewineeako i tempo koa mbo'u atuu.

²⁰ Hangano komba omiu anu mpepau, tendeano Penaa-Do Amamiu; Ondae anu Ira mepau i laromiu.

²¹ Mia ta meweengakono pepaekompono ka ipinepate, kanatuu koa mbo'u asa ama a anano. Ka ana ta umewa a mia mota'uno ka ta mepate ira.

²² Ka ira me'o'aliaakomiu luwuno mia hangano nee-Ku; sine mia anu mompedato hawe a pokotompaano ta tekadudui.

²³ Tewala domeweweu nsa'o komiu a laro ngkota anu aasa, impolaimo a ngkota anu susua; hangano Kupauakomiu: Menteeano napi me'umari mesompoo luwuno kota i Isaraeli, hawe Iramo i Ana Manusia.

²⁴ Asa ana guru nahi lalua sekono guruno, ke asa ata nahi lalua sekono a ueno.

²⁵ Sompoomo nada asa ana guru ba ipengkenaakono guruno ka asa ata ba ipengkenaakono ueno. Tewala umbu raha nineeako i Belesebu, tamoako luwuno pe'asa rahano.

²⁶ Gagi si medoitoako ira, hangano nahina maupo te'asa anu tetutuwi anu nahi ta inungkahi ka nahina maupo te'asa anu tewuni anu nahi ta tino'ori.

²⁷ Hapa anu pinau-Ku a laro wongi-wongi, imempauomo atuu a mewineano; ka hapa anu pinetanga-tangaako a birimiu, imempaleleomo atuu inso a wawo atono raha.

²⁸ Ka si medoitoako ira anu mokompopepate koroi, sine anu nahi pabawa mompepate sumanga; laluaopo imedoitoako Ira anu pabawa mompepate moiko sumanga maupo koroi a laro naraka.

²⁹ Kombake orua manu-manu dena inasa olino asa doi? Sine maupo te'asa inso ndi onae nahi ta tedonta i tolino ba nahi po'ehe-Do Amamiu.

³⁰ Ka omiu, maupo wuu a ulumiu luwuno dinoa.

³¹ Onaemo pu'uno si medoito, hangano masuliopo olimiu sekono manu-manu dena anu hadio.

³² Sompo mia anu umakui Aku i arodo mia, Aku umakuio nada i aro-Do Ama-Ku anu i suruga.

³³ Sine ba isema anu humapu Aku i arodo mia, Aku humapuo mbo'u nada i aro-Do Ama-Ku anu i suruga.”

Ondae i Yesu mowawa teponsiaa Ba kana'umpe tumonda Ira i Yesu 10:34–11:1

³⁴ ”Si ngko'aro-aroa nine Aku hawe mowawa sintuwua i wawontolino; hawe-Ku komba mowawa sintuwua, tendeano ponai.

³⁵ Hangano Ongkue hawe monsiao mia inso a amano, nana'ote beine inso ndi ineno, poni beine inso a ine ponino,

³⁶ ka iwalino mia onaemo luwuno pe'asa rahano.

³⁷ Ba isema mehohawao ama ke ineno laluaopo sekono ndi Ongkue, nahi pototono ndi Ongkue; ka ba'isema mehohawao anano tama ke beine laluaopo sekono Ongkue, nahi pototono ndi Ongkue.

³⁸ Ba isema nahi po'ahao keu pinotambano ka itonda Aku, nahi pototono ndi Ongkue.

³⁹ Ba isema anu me'aluakono penaano, onae ta tetadi penaano, ka ba isema tetadi penaano hangano Ongkue, ta humaweo penaano.

⁴⁰ Ba isema tumotowo komiu, itotowo Aku, ka ba isema tumotowo Aku, itotowo Ira anu tumena Aku.

⁴¹ Ba isema montotowo aasa nabi kana pontotowo nabi, onae ta mohawe tambono nabi, ka ba isema montotowo mia mentee kana pontotowo mia mentee, onae ta mohawe tambono mia mentee.

⁴² Ka ba isema mompowee uwoi morini maupo te'asa sangkirimo koa a mia anu kodei andio, hangano onae ana guru-Ku, Kupauakomiu: Menteeano nahi ta tetadi tambono inso ndi onae.”