I MARAKUSU 9 - Wunta Mempori

¹ Dopotaeako ira mbo'u, ”Kupauakomiu, menteeano i olono mia anu mehawe i ndi'ai hinao anu nahi ta mate ba napi domengkitao nine Poparentaa-Do Ue Ala haweomo saru pabawa.”

Ondae i Yesu inunde-unde a wawo ntorukuno 9:2-13 (Mat. 17:1-13; Luk. 9:28-36)

² Onoo oleo lembuino Ondae i Yesu wawa ira i Peturu, i Yakobu ka i Yohane ka Ondae meronga-rongaako ira mporake a asa torukuno anu ondau. I tu'ai butu koa ondae. Ka Do'amba i Yesu mebali rupa a pongkitado,

³ ka sangka-Do mangkilo mopute ntu'u. Nahina maupo te'asa mia i wawontolino andio anu polio mokalanta sangka kanatuu.

⁴ Ka domengkita iramo i Elia meronga saru i Musa, orua ira kontongaado mepau saru Ondae i Yesu.

⁵ Motae i Peturu ndi Ondae i Yesu, ”Guru, meme'ura kami ntu'u mekongko a mpo'ianga andio. Moikoomo kami mewanguo otolu kema, aasa tia-Miu, aasa tiano i Musa ka aasa tiano i Elia.”

⁶ Ka ipepau kanandio, hangano nahi to'orio hapa anu asalakono ipauo, hangano tedoa ira medoito.

⁷ Ka haweomo seru borungi ira ka inso a laro nseru atuu teronge suara, ”Ndiomo Ana-Ku anu pinehohawa-Ku, Imperorongeako Iramo.”

⁸ Ka nahi kinoo-koo tempono dompengkita limbu-limbu i horido, nahi dompongkita mbo'u maupo te'asa mia merongaako ira, sangkadio Ondae i Yesu asa-asa-Do.

⁹ I tempo atuu dompetii inso a ntorukuno atuu, Ondae i Yesu umoliwi ira, ka si domentutuluakono maupo te'asa mia hapa anu domengkitaomo atuu, ba napi Dopewangu i Ana Manusia inso i olodo mia mate.

¹⁰ Dome'inio pe'oliwi hieno kontongaado mpesisikeno i olodo hapa pengkonaano ”mewangu inso i olodo mia mate.”

¹¹ Ka do'amba mpesikeno ndi Ondae, ”Tembio anu mponto'ori Taura ka dompotae, nine i Elia asalakono hawe se'elu?”

¹² Sumangki Ira i Yesu, ”Lano i Elia ta hawe se'elu ka mokomoikoo luwuakoano. Butu, kana'umpe anu hinao teburi mongkona i Ana Manusia, nine ta hadio pompemarasai-Do ka Ira pinokongkodei?

¹³ Sine Kupauakomiu: Lano haweomo i Elia ka domeweweuo mia montonda po'ehedo, menunu saru anu hinao teburi mongkona onae.”

Ondae i Yesu sumaario onitu nsa'o inso a nana'ote anu beebe 9:14-29 (Mat. 17:14-21; Luk. 9:37-43)

¹⁴ Tempono Dompekule i Yesu, i Peturu, i Yakobu ka i Yohane a ana guru anu mehano, domengkita ira mia hadio menggowo ira ana guru atuudo, ka ba opia anu mponto'ori Taura kontongaano hinao dompesisikenoako saru ondae.

¹⁵ I tempono domengkita Ira mia hadio atuudo Ondae i Yesu, ntekokodoho ira luwu ka mpopari-pari tumotowo Ira.

¹⁶ Ka Do'amba i Yesu sumikeno ira, ”Hapa anu impesisikenoako saru ondae?”

¹⁷ Motae asa mia inso a mia hadio atuu, ”Guru, anaku andio kuwawao ndi Omiu, hangano ipewinsokio onitu nsa'o anu mokobebeo.

¹⁸ Ka sompo i'aluo, onitu nsa'o atuu mepasiakono a wita; ka i'amba ngangano mewure, ngisino kokoru ka koroino tidongkora. Ku'emaomo a ana guru-Miu, ka domensaario onitu nsa'o atuu, sine nahi domempolio.”

¹⁹ Onaemo Ondae i Yesu ka Dopotaeako ira, ”Hei omiu mia anu nahi mpompe'ala-ala, opiapo mbo'u tehineno Kupo'ia i olomiu? Opiapo mbo'u tehineno asalakono Kusabara ndi omiu? Wawaomo ramai nana'ote atuu!”

²⁰ Ka do'amba mewawao ndi Ondae. Tempono onitu nsa'o atuu kumita Ira i Yesu, mompari-pariomo rumensuao nana'ote atuu, ka nana'ote atuu nggumenggetoo, ka nana'ote atuu tepasiako a wita ka telundi-lundi, saru ngangano mewure.

²¹ Ka Do'amba i Yesu sumikenoo amano nana'ote atuu, ”Opiamo tehineno i'aluo andio?” Isangki Ira, ”Mompu'u da ikodei.

²² Ka mararu onitu nsa'o atuu wawao a laro api ke a laro uwoi ta mepateo. Onaemo pu'uno tewala Ipolio moweweu hapamo koa, Itulungi kami ka Ipehohawa kamimo.”

²³ Sumangki Ira i Yesu, ”Potaemu: tewala Ipolio? Nahina anu nahi ta gagi a mia anu mompe'ala-ala!”

²⁴ Mompari-pariomo amano nana'ote atuu mebooli, ”Kupe'ala-alao. Itulungi akumo anu nahi pompe'ala-ala andio!”

²⁵ Mansa-Do kumitao i Yesu mia kohadi-hadiono mehawe mpenggowo, Dotekudaakono onitu nsa'o atuu, Dopotae, ”Hei omue onitu nsa'o anu mokobebeo mia ka mokomobongoo, Kuparentako, peluarakomo inso a nana'ote andio ka si pewinso mbo'u!”

²⁶ Ka i'amba meluarakoomo onitu nsa'o atuu saru mebooli ka nggumenggetoo nana'ote atuu meroku ntu'u. Nana'ote atuu tengkita kana mia mate, ranta hadio mia anu mpotae, ”Mateomo.”

²⁷ Sine Do'inio i Yesu kaeno nana'ote atuu ka Dowanguo, ka i'amba mentadeako onaeno.

²⁸ Tempono Ondae i Yesu kongko Iramo i raha, ka butumo koa Ondae saru ana guru-Do, mpesikeno iramo, ”Tembio nahi kimpokosaario onitu nsa'o atuu?”

²⁹ Dosangki ira, ”Anu kanandio nahi pinokosaari sangkadio saru pekakai.”

Pompopoto'ori kompenduano mongkona tebobarasai-Do i Yesu 9:30-32 (Mat. 17:22-23; Luk. 9:43-45)

³⁰ Ondae i Yesu ka ana guru-Do melungka inso i tu'ai ka telalo i Galilea, ka nahi Dobehe i Yesu ba domento'orio mia;

³¹ hangano kontongaa-Do paguru ira ana guru-Do. Dopotaeako ira, ”I Ana Manusia Ira pineweengako a ngkaeno mia, ka do'amba mpepate Ira, ka otolu oleo umari-Do pinepate Ira mewangu,”

³² Nahi dompokonto'orio pinau atuu, sine nte'ondaha ira mpesikenoakono ndi Ondae.

Isema anu lalu langkai i olodo ana guru 9:33-37 (Mat. 18:1-5; Luk. 9:46-48)

³³ Ka i'amba hawe Iramo i Yesu ka ana guru-Do i Kapenau. Tempono Ondae i Yesu kongko Iramo i raha, mesikeno Ira a ana guru-Do, ”Hapa anu impepau-pauako hieno a ntonga nsala?”

³⁴ Sine mengkomino ira, hangano a ntonga nsala hieno ondae mpegagaako isema anu lalu langkai i olodo.

³⁵ Ka Do'amba mentoro i Yesu ka Dopoboi ira hopulu ka orua ana guru-Do atuu. Dopotaeako ira, ”Tewala aasa mia ineheno gagi anu tese'elu asalakono ka igagi anu pokotompa inso a luwuno ka puu pompekakaakodo luwu.”

³⁶ Onaemo ka Do'alao i Yesu aasa nana'ote kodei ka Donaao i tonga-tongado, ka Do'amba kumopuio nana'ote atuu ka Dopotaeako ira,

³⁷ ”Ba isema anu tumotowoo aasa nana'ote kanandio a nee-Ku, Ongkuemo tinotowono. Ka ba isema tumutowo Aku, komba Ongkue anu tinotowono, sine Ondae anu tumena Aku.”

Aasa mia anu komba ana guru-Do i Yesu monsaari onitu nsa'o 9:38-41 (Luk. 9:49-50)

³⁸ Motae i Yohane ndi Ondae i Yesu, ”Guru, kimengkitao aasa mia monsaari onitu nsa'o a nee-Miu komba mia anu tumonda kita, ka ki'amba me'ontoo mia atuu hangano komba itonda kita.”

³⁹ Sine Dopotae i Yesu, ”Si me'ontoo! Hangano nahina maupo te'asa mia anu moweweuomo kinohali-haliako a nee-Ku, polio mepaukia-Kune i tempo koa mbo'u atuu.

⁴⁰ Ba isema anu nahi ewai kita, onae walito.

⁴¹ Kupauakomiu: Menteeano ba isema mpo'inuakomiu uwoi te'asa sangkiri hangano omiu tumonda Ira i Kerisituu, nahi ta tetadi tambono.”

Isema anu mompopo'oo mia Mongkona ohia 9:42-50 (Mat. 18:6-9; Luk. 17:1-2)

⁴² ”Ba isema mompopo'oo aasa inso a nana'ote kodei anu mompe'ala-ala andiodo, moikoopo onae ba ipinondoeako watu pogili a we'uno ka i'amba pinetendeako a laro ntahi.

⁴³ Ka tewala kaemu mopo'ooko, totopiomo, hangano moikoopo upewinso a ntuwua saru pudu kae sekonopo mompombali kaemu ka utinadi a laro naraka, alaro api anu nahi tepepate; [

⁴⁴ a mpo'ianga atuu ule-uleno nahi ta mate, ka apino nahi ta mate.]

⁴⁵ Ka tewala karumu mopo'ooko, totopiomo, hangano moikoopo upewinso a ntuwua maupo tiimpa karu, sekonopo saru mompombali karumu ka upinetadiako a laro naraka; [

⁴⁶ a mpo'ianga atuu ule-uleno nahi ta mate, ka apino nahi ta mate.]

⁴⁷ Ka tewala matamu mopo'ooko, gogoiomo, hangano moikoopo upewinso a laro poparentaa-Do Ue Ala memata aasa sekonopo memata orua ka upinetadiako a laro naraka,

⁴⁸ i ra'ai ule-uleno wata ngkoroido mia mate ka api nahi mate.

⁴⁹ Hangano sompo mia ta inohiaako api.

⁵⁰ Ohia lano moiko, sine tewala ohia gagi motewe, saru hapake komiu mpokomopa'iakono? Asalakono ka ihina mpiha ohia a laro ngkoroimiu ka mentuwu mambesintuwu mpiha.”