I MARAKUSU 8 - Wunta Mempori

Ondae i Yesu mompaka pato nsowu mia 8:1-10 (Mat. 15:32-39)

¹ I tempo atuu hinao mbo'u mia hadio i tu'ai tedoa ira mehadio, ka hangano nahina kaangado, Dopoboi ira i Yesu ana guru-Do ka Dopotae,

² ”Telelu aroa-Ku mehohawa ira mia hadio andiodo. Otolu oleomo domentonda Aku ka nahina kaangado.

³ Ka tewala Kutena ira mpekule i rahado kontongaado memokoninggo, ira ntebangku a nsala, hangano hinao anu aiwa inso a olaiano.”

⁴ Mesangki ira ana guru-Do, ”Kana'umpe a mpo'ianga boni-boni andio mia mokopakaako ira roti ranta mowohi?”

⁵ Motae Ira i Yesu ndi ondae, ”Opia roti anu hina ndi omiu?” Mesangki ira, ”Opitu.”

⁶ Ka Do'amba tumena ira mia hadio atuu mpentoro a wita. Umarino atuu Do'alao roti opitu atuu, rumonsoo, sumiba-sibao ka Doweeako ira ana guru-Do ka domentia-tiao, ka domeweeako ira mia hadio.

⁷ Hinao koa mbo'u ba opia boudo, ka umari-Do rumonsoo, metena Ira ka itinia-tia mbo'u bou atuu.

⁸ Ka mpongkaa ira ranta mowohi. Ka do'amba mia mepumpuo siba-sibano roti anu torea, opitu baki hadiono.

⁹ Ondae atuu bara'ura pato nsowu mia. Ka Do'amba i Yesu tumena ira mpekule.

¹⁰ Mompari-pari Ira me'ula a bangka saru ana guru-Do ka Dolako i wita Dalamanuta.

To Parisi mpo'ema petondoni 8:11-13 (Mat. 16:1-4)

¹¹ Ka i'amba mehawe iramo to Parisi mambe sikeno saru Ondae i Yesu. Ka do'araha-arahako Ira mpo'ema petondoni inso i suruga.

¹² Menaa runse Ira ka Dopotae, ”Tembio mia andiodo ka dompo'ema petondoni? Kupauakomiu, menteeano a mia andiodo nahi ira hori mempinoweeako petondoni.”

¹³ Dobinta ira; wali Ira me'ula a bangka ka Dolako i asatowa.

Mongkona ragido to Parisi ka ragino i Herode 8:14-21 (Mat. 16:5-12)

¹⁴ Ka i'amba mengkaa nine domengkolupeo ana guru-Do i Yesu mpowawa roti, butu koa asa bonggoli anu hina ndi ondae a laro bangka.

¹⁵ Ka Do'amba i Yesu mopoto'oriako ira, Dopotae, ”Impedagaimo ka imetangkoroo ragido to Parisi ka ragino i Herode.”

¹⁶ Onaemo ka dompompewowolo ka dompepau pada ondaedo, ”Dopauo atuu hangano nahi tompowawa roti.”

¹⁷ Ka mansa-Do tumo'orio i Yesu anu pinopaudo, Dopotae, ”Tembio ka impepau-pauako mongkona nahina roti? Naapo koa mbo'uke impokohawelaroo ka mpokonto'orio? Moteaomoke aroamiu?

¹⁸ Hinao matamiu, nahi mengkitaoke, hinao birimiu, nahi merongeoke? Nami mpewowoloo mbo'uke,

¹⁹ i tempono Kusiba-sibao olima roti tiado lima nsowu mia atuu, opia baki buke siba-sibano roti pinumpumiu?” Mesangki ira, ”Hopulu ka orua baki.”

²⁰ ”Ka i tempono opitu roti tiado pato nsowu mia atuu, opia baki buke siba-sibano roti pinumpumiu?” Mesangki ira, ”Opitu baki.”

²¹ Ka Do'amba motaeako ira, ”Naapo mbo'uke imempokonto'orio?”

Ondae i Yesu mokotompao aasa mia morawu i Besaida 8:22-26

²² Ka i'amba hawe Iramo i Yesu ka ana guru-Do i Besaida. I tu'ai mia mewawaako Ira i Yesu aasa mia morawu ka dome'emao ndi Ondae, ka Do'anggao.

²³ Do'inio i Yesu kaeno mia morawu atuu ka Dowawao meluarako inso a inia. Ka Do'amba umonuio matano mia atuu ka dumampoakono kae-Do i wawono, ka Dopesikeno, ”Hinaomoke kinitamu?”

²⁴ Mia atuu mengkita i arono, ka ipotae, ”Kukitao mia, hangano kukita ira mpelempa-lempa, sine kukita ira kana keu.”

²⁵ Ondae i Yesu medampoakono mbo'u kae-Do a matano mia atuu, onaemo ka ipongkitamo ntu'u mia atuu, ka tompaomo, ranta ipokokitao luwuakoano a menteeano.

²⁶ Umarino atuu Dotenao i Yesu ka ipekule i rahano ka Dopotae, ”Si pewinso a inia!”

Mangakuno i Peturu 8:27-30 (Mat. 16:13-20; Luk. 9:18-21)

²⁷ Ka Do'amba i Yesu saru ana guru-Do mpelungka sumompo ira inia anu umpeda i Kaisarea Pilipi. A ntonga nsala Dosikeno ira ana guru-Do, Dopotae, ”Dompotae mia, isemake Ongkue andio?”

²⁸ Mesangki ira, ”Hinao motae: i Yohane Puu Mpobaho, hinao mbo'u anu motae: i Elia, hinao mbo'u anu motae: asa mia inso a luwuno nabi.”

²⁹ Mesikeno Ira ndi ondae, ”Sine hapa potaemiu, isemake Ongkue andio?” Onaemo ka isangki i Peturu, ”Omiumo i Mesia!”

³⁰ Ka Do'amba i Yesu umonto ira ntu'u ka si domempauo maupo ndi sema mongkona Ondae.

Pompopoto'ori amba-ambano mongkona tebobarasai-Do i Yesu ka atorano tumonda Ira 8:31–9:1 (Mat. 16:21-28; Luk. 9:22-27)

³¹ Ka i'amba mompu'u Iramo i Yesu paguruako ira, nine i Ana Manusia asalakono mompembasai hadio marasaia ka nahi domentarima ira mia memota'u ka petewawado sando mpesomba ka guru agama, ka Do'amba pinepate ka mewangu umarino otolu oleo.

³² Luwuno andio Dopauako ira a menteeano. Sine i Peturu padii Ira i Yesu i horino ka ikuahako Ira.

³³ Onaemo ka Dopewolili i Yesu saru mengkita a ana guru-Do Dotekudaakono i Peturu, Dopotae, ”Polaimo Mosa'o, hangano omue komba mompewowolo hapa anu pinewowolo-Do Ue Ala, tendeano hapa anu pinewowolono mia.”

³⁴ Ka Do'amba i Yesu moboi ira mia hadio ka ana guru-Do ka Dopotaeako ira, ”Sompo mia anu ineheno tumonda Aku, asalakono ka ihapuo koroino, po'ahao keu pinotambano ka itonda Aku.

³⁵ Hangano isema anu ineheno kumaduduio penaano, ta tetadi penaano; sine ba isema tetadi penaano hangano Ongkue ka hangano Lele Mawongkoa, onae ta kumaduduio.

³⁶ Hapa tuduno asa mia humaweo asa wawontolino, sine tetadi penaano.

³⁷ Hangano hapake anu ipolio weeakono gagi euno penaano?

³⁸ Hangano ba isema anu mokoko'ii hangano Ongkue ka hangano pau-Ku i tonga-tongano mia mentuwu nahi dompetenunu ka ntehala andio, i Ana Manusia mbo'u Ira mokoko'ii hangano mia atuu ba Dohawe te'upua a laro maramba-Do Ama-Do, domentonda Ira mala'eka mempori.”