I MARAKUSU 7 - Wunta Mempori

Parenta-Do Ue Ala ka gaudo to Yahudi 7:1-23 (Mat. 15:1-20)

¹ I asa tempo asa bawaa to Parisi ka ba opia anu mponto'ori Taura inso i Yerusale me'aiwa tepohaweako Ira i Yesu.

² Domengkitao, nine ba opia ira ana guru-Do mpongkaako kae mokoburu, onaemo kae anu nahi wino'ohi.

³ Hangano to Parisi kana to Yahudi mehano nahi dompongkaa ba nahi dompewo'ohi ngkae se'elu, hangano mpe'ini ira a gaudo uempu'udo;

⁴ ka ba dompekule inso a olu nahi dompongkaa koa mbo'u ba nahi dompedolo. Hadio mbo'u gau susua anu ininido, kana mongkona mowo'ohi sangkiri, kusi ka luwuno parewa mala.

⁵ Onaemo pu'uno ka dompesikeno to Parisi ka pande ntu'u Taura atuu ndi Ondae, ”Tembio ana guru-Miu ka domentuwu nahi domentondao gaudo uempu'uto, sine mpongkaako kae mokobruru?”

⁶ Dosangki ira, ”Menteeomo pinauno anu ta gagi i Yesaya mongkona omiu, hei mia mpo'onde-onde! Hangano hinao teburi: Tongku andio umunde-undea-Kune wiwido, kahinaano aroado olai inso ndi Ongkue.

⁷ Nahina tuduno dompesomba ndi Ongkue, sekono pompaguru anu dompompaguruako onaemo parentano mia.

⁸ Parenta-Do Ue Ala nahi imperioo hangano mpe'ini a gauno mia.”

⁹ Dopotae mbo'u i Yesu, ”Mempande komiu ntu'u mpebungkuio parenta-Do Ue Ala, ka impokompekariao gaumiu.

¹⁰ Hangano motaeomo i Musa: Pelangkai ira amamu ka inemu! ka: Isema montotonaa amano ke ineno asalakono mate.

¹¹ Sine impotae: Tewala asa mia motaeakono amano ke ineno: Hapa anu hinao ndi ongkue, anu ta tekona ipepotuwuako, pinakeomo tiano pesomba – onaemo pesomba ndi Ondae Ue Ala –

¹² ka nami impo'ineeo mbo'u moweweu hapa-hapa tiano amano ke ineno.

¹³ Ba kanandio pau-Do Ue Ala nahi meweweuo hangano gau anu tinondamiu atuu. Ka hadio mbo'u anu susua wineweumiu kanatuu.”

¹⁴ Ka Do'amba i Yesu moboi ira mbo'u mia hadio ka Dopotae, ”Luwumiu, Imeronge Akumo ka impe'ihilaroo.

¹⁵ Maupo hapa inso i bungkuno, anu mewinso i larono asa mia, nahi polio kumokoburutio, sine hapa anu meluarako inso a asa mia, onaemo anu kumokoburutio.” [

¹⁶ Ba isema mebiri ka iporonge po'ineeomo ka irongeo!]

¹⁷ Mansa-Do mewinso a aasa raha Ira meliahako inso a mia hadio, mpesikeno ira ana guru-Do ndi Ondae mongkona pengkonaano potundaano atuu.

¹⁸ Onaemo ka Dosangki, ”Nde maupo mbo'u omiu nahi mpokonto'orio? Nahi imento'orioke nine luwuakoano inso i bungkuno anu mewinso i larono aasa mia nahi polio kumokoburutio,

¹⁹ hangano komba mewinso a laro aroa sine a laro kompono, ka i'amba tinadi a ngkakusu?” Hangano kanandio Dopokomengkaao luwuno kaanga moiko.

²⁰ Motae Ira mbo'u, ”Hapa anu meluarako inso a asa mia, onaemo anu kumokoburutio,

²¹ hangano inso i larono, inso i aroano mia, mesabaako luwuno pinewowolo mosa'o, pebelesua, ponakoa, pompepatea,

²² ponsosaboa, modokoa, mosa'oa, pe'akala, po'o'aroa mosa'o, mosisiri, pompepaukiako, pompelangka-langkai, monge-mongea.

²³ Luwuno anu mosa'o andio mesabaako inso i larono ka mongkokoburuti mia.”

Beine to Siro-Penesia anu mompe'ala-ala 7:24-30 (Mat. 15:21-28)

²⁴ Ka Do'amba i Yesu melungka inso i tu'ai ka Dolako i wita Tirusi. Mewinso Ira a aasa raha ka nahi Dobehe ba ihina mia tumo'orio, sine hawe-Do nahi pinokompewuniako.

²⁵ Tendeano aasa ine, anu anano ipewinsokio onitu nsa'o, ronga rumongeo mongkona Ondae, ka i'amba aiwa ka ipenggolontu a mpuu karu-Do.

²⁶ Beine atuu to Yunani tongku Siro-Penesia. I'emao ndi Ondae i Yesu ka Dosaariakono onitu nsa'o inso a anano.

²⁷ Ka Do'amba i Yesu motaeakono, ”Po'ineeomo ka domemowohi ari nana'ote, hangano nahi tekona umalao roti anu pinatindaako nana'ote ka itinendeako dahu.”

²⁸ Sine sumangki beine atuu, ”Mentee, Ue. Sine dahu anu a ntoto meda mpongkaa ira koa mbo'u siba-sibano roti anu sinosalado nana'ote.”

²⁹ Onaemo ka Dopotaeakono i Yesu beine atuu, ”Hangano luwuno paumu atuu, kanandio-andio lakomo hangano onitu nsa'o atuu meluarakoomo inso a anamu.”

³⁰ Beine atuu mekule a rahano, ka i'amba humaweo anano atuu mepombole a mpoturia, ka onitu atuu meluarakoomo.

Ondae i Yesu mokotompao asa mia mobongo 7:31-37

³¹ Ka Do'amba i Yesu bintao mbo'u wita Tirusi ka telalo i Sidoni lumako i rano Galilea, i tonga-tongano wita Dekapoli.

³² I tu'ai mia mewawao ndi Ondae asa mia anu mobongo ka montala'u'u ka dome'emao ndi Ondae, ka Dodampoakono kae-Do i wawono mia atuu.

³³ Ka umarido i Yesu monsiao inso a mia hadio, ranta orua iramo koa, Dowinsoo toniso-Do a birino mia atuu, ka Do'amba me'onui ka rumareo elono mia atuu.

³⁴ Ka i'amba kontongaa-Do mentombu i langi Ondae i Yesu mompae penaa ka Dopotaeakono, ”Epata!”, pengkonaano: Te'ungkahimo!

³⁵ Ka te'ungkahiomo birino mia atuu ka i tempo koa mbo'u atuu tepotolaomo mbo'u tanggono elono, ka i'amba moikoomo ipepau.

³⁶ Me'oliwi Ira i Yesu a mia anu mekongko i tu'ai ka si domentutuluo maupo ndi semamo koa. Sine maupo dome'inonto, komalu-maluano domempaleleo.

³⁷ Ntekokodoho ira ka mengkohali-hali ka dompotae, ”Luwuakoano Dopokogagio moiko, anu mobongo Dopokogagio ka iporonge, anu bebe Dopokogagio ka ipepau.”