I MARAKUSU 6 - Wunta Mempori

Ondae i Yesu nahi Dotinarima i Nasare 6:1-6a (Mat. 13:53-58; Luk. 4:16-30)

¹ Ka Do'amba i Yesu melungka inso i tu'ai ka Dohawe a mpo'ianga insoa-Do, ka ana guru-Do mentonda Ira.

² A oleo Saba mompu'u Iramo mompaguru a raha tepumpua ka bawaa anu hadio mengkohali-hali tempono domeronge Ira ka dompotae, ”Inso isua Dohaweo luwuno atuu? Ponto'ori mentee hapa mbo'uke Dowineeako? Ka anu mengkinohali-haliako kanandio kana'umpeke ka Dopokoweweakono kae-Do?

³ Kombake Ondae andio puu mpo'angga keu, anano i Maria, pepaekompono i Yakobu, i Yohane, i Yudasi ka i Simo? Ka kombake luwuno pepaekompo-Do beine kongko saru ontae?” Mosa'oomo aroado ka i'amba nami domentarima Ira.

⁴ Onaemo ka Dopotaeako ira i Yesu, ”Aasa nabi pinelangkai i sua-suamo koa sangkadio a mpo'ianga insoano, i olodo pe'etuno ka i rahano.”

⁵ Nahi Dopokompoweweu maupo te'asa anu kinohali-haliako i ra'ai, sangkadio mompokotompa ba opia mia mahaki Dodampoakono kae-Do i wawono.

^6a Dokohali-haliakono hangano nahi dompompe'ala-ala.

Ondae i Yesu tumena ira hopulu ka orua tinena 6:6b-13 (Mat. 10:5-15; Luk. 9:1-6)

^6b Ka Do'amba i Yesu melempa mompaguru sumompoo inia.

⁷ Dopoboi ira hopulu ka orua ana guru atuu ka Dotena ira mpe'oru-orua mia. Dopoweeako ira pabawa, pabawaio onitu nsa'o,

⁸ ka umoliwi ira ka si dompowawa hapa-hapa a mpelempaado, sangkadio tuko, maupo roti osi'i, maupo pebaku osi'i, doi a laro mpeboo-boo mbo'u osi'i,

⁹ moiko koa dompesandala, sine si dompelemba orua.

¹⁰ Dopauako ira mbo'u, ”Tewala i asa po'ianga mentinarima komiumo a aasa raha, impo'iamo i tu'ai hawe ka impelungka inso a mpo'ianga atuu.

¹¹ Ka tewala hinao asa po'ianga anu nahi dobehe mentarima komiu ka tewala nahi dobehe mperorongeakomiu, impeluarakomo inso i tu'ai ka imetantamio awu a ngkarumiu gagi pepopoto'ori ndi ondae.”

¹² Ka i'amba melako iramo mempaleleo nine mia asalakono ka itepidi,

¹³ ka ondae mponsaari hadio onitu nsa'o, ka mohahiako ira lana hadio mia memahaki ka dometompa.

I Yohane Puu Mpobaho pinepate 6:14-29 (Mat. 14:1-12; Luk. 9:7-9)

¹⁴ Irongeo mbo'u Mokole Herode lele mongkona Ondae i Yesu, hangano teleleomo nee-Do ka dompotae mia, ”I Yohane Puu Mpobaho mewanguomo inso i olodo mia mate ka onaemo pu'uno luwuno pabawa atuu mo'angga i laro-Do.”

¹⁵ Anu mehano mpotae, ”Ondae atuu i Elia!” Anu mehano mbo'u mpotae, ”Ondae atuu aasa nabi mengkena kana luwuno nabi se'eluno.”

¹⁶ Tempono irongeo i Herode mongkona atuu, ipotae, ”Naahi, onae atuu i Yohane anu ku'impahiomo uluno, ka wali mewangu.”

¹⁷ Hangano lano i Herodemo anu montena mia rumakoo i Yohane ka domemponguo a ntorungku menggoe saru teweweuno i Herodia, beineno i Pilipu pepaekompono, hangano i Herodia i'alaomo gagi beineno.

¹⁸ Hangano horio i Yohane kumuahakono i herode, ”Upali u'alao beineno pepaekompomu!”

¹⁹ Onaemo pu'uno i Herodia monaa-naa aroa ndi Yohane ka montoo ta mepateo, sine nahi pokompepateo,

²⁰ hangano i Herode tumampahio i Yohane hangano ito'orio, nine i Yohane mia mentee ka mempori, gagi ikaduduio. Sine tewala iperorongeakono i Yohane, aroano wela bulalingo, sine sanaano koa mbo'u merorongeakono.

²¹ Poko'ariano hawe koa tempono i Herodia anu moiko, tempono oleo hinaano i Herode wineweu pelimbuado anu melangkai potorodo, petewawado sorodadu ka mia memota'u i Galilea.

²² I tempo atuu ana beineno i Herodia mentade ka i'amba lumense, ka ipokomawongkoo aroano i Herode ka luwuno totokano. Motae mokole a ana beine atuu, ”Emao ndi ongkue hapa anu inehemu, asalakono aku weeko!”,

²³ ka i'amba mesumpa ndi onae, ”Hapamo koa inemamu aku weeko, maupo entongano inso a poparentaaku!”

²⁴ Nana'ote atuu lumako ka sumikenoo ineno, ”Hapa anu asalakono kupo'ema?” Sumangki ineno, ”Uluno i Yohane Puu Mpobaho!”

²⁵ Ka mompari-pariomo lumako ndi mokole ka i'emao, ”Ineheku, ka ikanandiomo isa'a iweeakune uluno i Yohane Puu Mpobaho inula a dula!”

²⁶ Ka i'amba tedoaomo masusa aroano mokole, sine hangano sumpano ka hangano luwuno totokano onaemo ka nahi ontoakono.

²⁷ Mopari-pari mokole tumenao asa mia puu mpodagaino ka iparentao umalao uluno i Yohane. Mia atuu lumako ka i'impahio uluno i Yohane a torungku.

²⁸ Iwawao ulu atuu inula a baki ka iweeakono ana beine atuu ka ana beine atuu weeakono mbo'u ineno.

²⁹ Tempono domerongeo ana guruno i Yohane anu gagi atuu aiwa ira me'alao wata ngkoroino, ka do'amba mpomboleo a laro ngkaburu.

Ondae i Yesu mompaka lima nsowu mia 6:30-44 (Mat. 14:13-21; Luk. 9:10-17; Yoh. 6:1-13)

³⁰ Ka do'amba mpekule luwuno tinena atuu mpepumpu saru Ondae i Yesu ka pauako Ira luwuno inanggado ka pompagurudo.

³¹ Ka Do'amba motaeako ira, ”Aiwamo ka tomelako a mpo'ianga boni-boni, ka ibutu ontae, ka tompenaa-naa sarai!” Hangano lano hadio ntu'u mia anu mehawe ka melako, ranta maupo mpongkaa nahi dontengko'ala.

³² Ka mpelungka iramo butu ondae mpebangka a mpo'ianga boni-boni.

³³ Sine i tempono dompelungka hadio mia kumita ira ka mento'orio te'aroado. Mpotuturako iramo mia mpewita inso a luwuno kota melako a mpo'ianga atuu ranta ka dompese'elungi ira.

³⁴ Mansa-Do metii i Yesu inso a bangka, Dokita ira mia hadio ntu'u, onemo ka itelelu aroa-Do mehohawa ira, hangano kana bimba anu nahina pakambi ira. Ka i'amba mompu'u Iramo paguruako ira hadio rupa.

³⁵ Tempono mompu'uomo woongi, me'aiwa iramo ana guru-Do ndi Ondae ka dompotae, ”Po'ianga andio boni-boni ka tamo ronga wongi.

³⁶ Itena iramo ka domelako, ka donte'alu koa mpo'oli kaanga a luwuno inia anu umpeda i ndi'ai.”

³⁷ Sine sumangki Ira, ”Asalakono imempaka ira!” Dompotaeako Ira, ”Gagi asalakono kami mpo'oli roti me'oli rua etu dinare ta kaangado?”

³⁸ Sine Dopotaeako ira, ”Opia hadiono roti anu hina ndi omiu? Imemparesao ari!” mansado memparesao dompotae, ”Roti olima ka bou orua.”

³⁹ Ka Do'amba tumena ira mia atuudo, ka dompentoro mpehowu-howu a wawo ewo molowulu.

⁴⁰ Ka mpentoro iramo mpehowu-howu, hinao anu asa etu, hinao anu lima pulu mia.

⁴¹ Ka mansa-Do umalao roti olima ka bou orua atuu, mentombu Ira i langi ka Doronsoo, ka Do'amba sumiba-sibao roti atuu ka Doweeako ira ana guru-Do, ka domentia-tiaako ira mia atuudo; kanatuu koa mbo'u bou orua Dotia-tiaako ira luwu.

⁴² Ka luwudo mpongkaa ranta mowohi.

⁴³ Ka do'amba mia mepumpuo siba-sibano roti hopulu ka orua baki buke, sangkadio tore-toreano bou.

⁴⁴ Anu mpetonda mpongkaa roti atuu hinao telima nsowu mia tama.

Ondae i Yesu melempa a wawo uwoi 6:45-52 (Mat. 14:22-33; Yoh. 6:16-21)

⁴⁵ Umarino atuu Dodarasi Iramo i Yesu ana guru-Do mpe'ula a bangka ka dompelungka se'elu melako i asatowa, i Betesaida, kontongaano atuu Dotena ira mia hadio mpekule.

⁴⁶ Mansado mpensua, Ondae lumako a pongku ka Dopekakai.

⁴⁷ Mansano wongi bangka atuu haweomo a ntongano rano, sine Ondae i Yesu mo'ia asa-asa-Do a ntuwu wita.

⁴⁸ Mansa-Do kumitao tedoa mapari dompebose hangano angi anu inso i arono, bara'ura langku otolu wongi hawe Ira ndi ondae melempa a wawo uwoi ka mingki lumalo ira.

⁴⁹ Tempono domengkita Ira melempa a wawo uwoi, potaedo onitu, ka do'amba mengkokora-kora,

⁵⁰ hangano luwudo mengkita Ira ka tedoa ira ntededengke. Sine Doronga mepauako ira, ”Imperodoo aroamiu Ongkue koa andio, si medoito!”

⁵¹ Ka Do'amba me'ula a bangka tepohaweako ira, ka angi mbo'u temontoomo. Tedoa ira mengkohali-hali ka mebulalingo,

⁵² hangano umarino teweweuno roti atuu naapo koa mbo'u dompokonto'orio, ka aroado kongkono motea.

Ondae i Yesu mokotompa ira mia memahaki i Genesare 6:53-56 (Mat. 14:34-36)

⁵³ Sahawe-Do i Yesu ka ana guru-Do i asatowa mpetii i Genesare ka mpesanda iramo i tu'ai.

⁵⁴ Tempono dompeluarako inso a bangka, mia ronga mento'ori Ira i Yesu.

⁵⁵ Ka mpelulu-lulu iramo mesompoo wita atuu ka mpompu'u mengkati ira mia memahaki a wawo mpoturia wawa ira ndi Ondae i Yesu, ba isuamo koa leleno Dokongko.

⁵⁶ Maupo isua Dolako, a luwuno inia, a ngkota langkai, ke a ngkota kodei, mia menaa ira mia memahaki a olu ka mpo'ema ndi Ondae, ka dome'ineheako maupo butu me'anggao wuakino lemba meloe-Do. Ka luwuno mia anu umangga Ira gagi tompa.