I MARAKUSU 5 - Wunta Mempori

Ondae i Yesu monsaari onitu nsa'o inso a nto Gerasa 5:1-20 (Mat. 8:28-34; Luk. 8:26-39)

¹ Ka i'amba mehawe iramo i asatowano rano, i witado to Gerasa.

² Da iaopo Dopetii i Yesu inso a bangka, aiwaomo aasa mia anu pinewinsokino onitu nsa'o inso a mpekaburua tepohaweako Ira.

³ Mia atuu mo'ia i ra'ai ka nahina mbo'u maupo te'asa mia anu polio ponguo, maupo mompake rante,

⁴ hangano mararuomo ipinongu ka rinante, sine ranteno ibiteo ka ponguno ibite-biteo, ranta nahina maupo te'asa mia anu moroso mokomoneao.

⁵ Meene wongi ipo'itu-itu a mpekaburua ka pongku-pongku ka ikokora-kora ka tumunduhiakono watu koroino.

⁶ Tempono ikita Ira i Yesu inso olai, meluluomo tepohaweako Ira ka i'amba mesombai Ira,

⁷ ka meroku ikokora-kora, ”Hapa ta mbinio-Miu ndi ongkue, hei Yesu, Ana-Do Ue Ala Anu Lalu i wawono? A nee-Do Ue Ala, si bobarasai aku!”

⁸ Hangano se'eluno Dopotaeakono i Yesu, ”Hei omue onitu nsa'o peluarakomo inso a mia andio!”

⁹ Ka Do'amba sumikenoo mia atuu, ”Isema neemu?” sangkino, ”Neeku i Legio, hangano mehadio kami.”

¹⁰ Tedoa i'emao ntu'u ka si Dosaari ira i Yesu onitu nsa'o atuudo mpeluarako inso i wita atuu.

¹¹ Hinao i ra'ai a pongku asa bawaa boe tekonai mpo'ungke kaangado,

¹² ka i'amba onitu nsa'o atuudo me'emao ndi Ondae, dompotae, ”Itena kamimo ka kimpelimba a laro boe atuudo, Ipo'inee kamimo mpewinsoki ira!”

¹³ Do'induo i Yesu po'emado. Ka i'amba mpeluarako iramo onitu nsa'o atuu ka mpewinsoki ira boe atuudo. Bawaano boe anu bara'ura rua nsowu hadiono atuu mpentoa inso a wiwi wingke a laro rano ka memate mo'opo i larono.

¹⁴ Onaemo ka dompolai anu mpodagai boe atuu ka mentutuluo anu gagi atuu a ngkota ka a luwuno inia petengi-tengino. Ka i'amba mpeluarako iramo mia ira mengkitao hapa anu gagi.

¹⁵ Me'aiwa ira ndi Ondae i Yesu ka domengkitao mia anu pinewinsokino onitu nsa'o atuu mentoro, mesangkaomo ka me'aroaomo moiko, mia anu hieno ipewinsokio i legio atuu. Onaemo ka domedoito.

¹⁶ Mia anu mengkitaakono matado mongkona atuu mentutuluo ndi ondae mongkona hapa anu gagiomo a mia anu pinewinsokino onitu nsa'o atuu, ka mongkona boe atuudo.

¹⁷ Ka do'amba medadai Ira i Yesu ka Dobintao witado.

¹⁸ I tempono Dope'ula mbo'u i Yesu a laro bangka, mia anu hieno ipewinsokio onitu nsa'o atuu mo'ema, ka Dobeheo tumonda Ira.

¹⁹ Nahi Dobeheo i Yesu, sine Dopotaeakono mia atuu, ”Pekulemo i rahamu, a mia pe'asa iniamu, ka pauako iramo luwuakoano anu Doweweuomo i Ue ndi omue ka ba kana'umpe Dopehohawako!”

²⁰ Lumakoomo mia atuu ka mompu'u paleleo i wita Dekapoli luwuno hapa anu Doweweuomo i Yesu a ngkoroino ka luwudo gagi mengkohali-hali.

Ondae i Yesu wanguo anano i Yairu ka mokotompao aasa beine anu mahaki merea 5:21-43 (Mat. 9:18-26; Luk. 8:40-56)

²¹ Mansa-Do hawe i Yesu i asatowa, mia hadio ntehuhu me'aiwa ka do'amba menggowo Ira. Kontongaa-Do a wiwi rano,

²² haweomo aasa mia petewawa a raha tepumpua anu meneeako i Yairu. Mansano kumita Ira i Yesu, menggolontuomo a mpuu karu-Do

²³ ka tedoa mepepehohawa ndi Ondae, ”Anaku beine kontongaano mahaki, tamo ronga mate, po'ineeomo ka i'aiwa dumampoakono kae-Miu i wawono, ka itekadudui ka ikongko tuwu.”

²⁴ Ka Do'amba i Yesu lumako saru mia atuu. Mia hadio ntehuhu tumonda Ira ka mpehihidi umpedaako Ira.

²⁵ Kongko i tu'ai aasa beine anu hopulu ka orua nta'umo tehineno imahaki merea.

²⁶ Mararuomo domempakulio mperupa-rupa sando, ranta ipingkoomo luwuno anu hina ndi onae, sine nahina tuduno tendeano koteti-tetiangino hakino.

²⁷ Irongeomo luwuno lele mongkona Ondae i Yesu, onaemo ka ipe'oloako i tonga-tongano mia hadio atuu rumangkuhi Ira i Yesu inso i bungku-Do ka i'anggao lemba meloe-Do.

²⁸ Hangano potaeno, ”Polomo koa ka ku'anggao lemba meloe-Do, aku tompa.”

²⁹ I tempo koa mbo'u atuu menaa-naaomo mereano ka ipodeao, nine koroino tompaomo inso a hakino.

³⁰ I tempo koa mbo'u atuu Doto'orio i Yesu, nine hinao roso anu meluarako inso a ngkoroi-Do, ka Do'amba mewolili i olono mia hadio ka mesikeno, ”Isema anu umanggao lemba meloe-Ku?”

³¹ Mesangki ira ana guru-Do, ”Ikitao kana'umpe mia hadio andio dompehihidi rumangkuhi Komiu, ka Ipesikeno: Isema anu umangga Aku?”

³² Ka Do'amba mengkita limbu-limbu ka Dokitao isema anu moweweuomo kanatuu.

³³ Beine atuu, anu gagiomo doito ka mondidi-ndidi mansano tumo'orio hapa anu gagiomo a ngkoroino, aiwa ka ipenggolontu i aro-Do i Yesu ka a moleono aroano ipauako Ira luwuakoano.

³⁴ Onaemo ka Dopotaeakono i Yesu beine atuu, ”Hei ana-Ku, ikaduduikomo pompe'ala-alamu. Lakomo tekadudui ka tompamo inso a hakimu!”

³⁵ Tempono Ondae i Yesu da mepau haweomo mia inso a mpe'etuno petewawa a raha tepumpua atuu ka ipotae, ”Anamu mateomo, pombio mbo'u upokomasusaako Ira Guru?”

³⁶ Sine nahi Doperioo i Yesu paudo ka Dopotaeakono petewawa a raha tepumpua, ”Si doito, pompe'ala-alamo!”

³⁷ Ka Do'amba i Yesu nahi Dopo'eheako maupo te'asa mia tumonda Ira, sangkadio i Peturu, i Yakobu ka i Yohane, pepaekompono i Yakobu.

³⁸ Mehawe ira a rahano petewawa a raha tepumpua, ka i ra'ai Dokitao mia mpohoho, mpengese ka mposabangi meroku.

³⁹ Mansa-Do mewinso Dopotaeako ira mia atuudo, ”Tembio ka impohoho ka mpengese? Nana'ote andio komba mate, sine moturi!”

⁴⁰ Sine dompengingisii Ira. Onaemo ka Dosaari ira luwu mia atuudo, ka Do'amba wawao amano ka ineno nana'ote atuu ka ondae anu merongaako Ira mewinso a bolongkono nana'ote atuu.

⁴¹ Ka Do'amba uminio kaeno nana'ote atuu, Dopotae, ”Talita kum,” anu pengkonaano, ”Hei ana, Kupauakomu, pewangumo!”

⁴² I tempo koa mbo'u atuu nana'ote atuu mewangu ka ipentade ka melempa, hangano tinuwuno hopulu ka orua nta'umo. Luwuno mia anu mehawe mengkohali-hali.

⁴³ Do'oliwi ira ntu'u, ka si hina maupo te'asa mia anu tumo'orio mongkona atuu, ka Do'amba tumena ira mempakao nana'ote atuu.