I MARAKUSU 4 - Wunta Mempori

Potundaano mongkona mia anu morawo 4:1-20 (Mat. 13:1-23; Luk. 8:4-15)

¹ I asa tempo Ondae i Yesu mompu'u mbo'u mompaguru a wiwi rano. Ka mehawe iramo mia hadio anu tedoa mehadio ira menggowo Ira, onaemo ka Dopewuatako a bangka anu tekonai mesonda ka Do'amba mentoro i tu'ai, sine mia hadio atuu a ntuwu wita, a wiwi rano atuu.

² Ka hadio rupa Dopaguruako ira a mpotundaano. A pompaguru-Do atuu Dopotaeako ira,

³ ”Imerongeomo! Hinao aasa mia melere lumako ta morawo inii.

⁴ Tempono iporawo asa ntia inii atuu tedonta a wiwi nsala, ka do'amba mehawe manu-manu mengkaano hawe ka ipingko.

⁵ Asa ntia tedonta a wita anu melaro watu, anu nahi hadio witano, ka i'amba inii atuu ronga tuwu, hangano witano monipi.

⁶ Sine mansano saba oleo, moleuomo ka gagi mokari hangano nahi pehaka.

⁷ Asa ntia mbo'u tedonta a laro ewo rui, ka i'amba kolangka-langkaino ewo rui atuu ka ihidio ranta ka imate, onaemo ka nahi pewua.

⁸ Ka asa ntia tedonta a wita anu moiko, onae tuwu mewalo ka mewua, hasilino hinao anu meluka tolu pulu, hinao anu meluka nomo pulu, hinao anu meluka asa etu.”

⁹ Ka Dopotae, ”Isema anu mebiri ka iporonge moikoomo irongeo!”

¹⁰ Tempono asa-asa-Do, luwuno anu tumonda Ira ka hopulu ka orua ana guru-Do atuu mpesikeno ndi Ondae mongkona potundaano atuu.

¹¹ Sumangki Ira, ”Mewineeako komiumo rahasiano Poparentaa-Do Ue Ala, sine a mia i bungkuno luwuakoano pinohawe a mpotundaano,

¹² ka i'amba: Maupo domengkitao, nahi domperioo, maupo domerongeo, nahi dompokonto'orio, ka si dompepokule ka mpohawe po'oninia hala.”

¹³ Ka Do'amba motaeako ira, ”Nahi mpokonto'orioke potundaano andio? Tewala kanandio kana'umpe komiu mpokonto'orio luwuno potundaano anu susua?

¹⁴ Puu mporawo atuu morawo pau-Do i Ue.

¹⁵ Mia anu a wiwi nsala, porawoa pau-Do i Ue atuu, ondaemo anu merongeo pau-Do i Ue, ka i'amba haweomo i Mosa'o ka i'alao pau anu da iaopo irinawo ndi ondae.

¹⁶ Kanatuu koa mbo'u anu rinawo a wita anu melaro watu, ondaemo mia anu merongeo pau-Do I Ue atuu ka ronga mentarimao saru memawongko,

¹⁷ sine nahi dompehaka ka sarai koa ipo'ia. Tewala lembuino hinao pompokonsiia ke pobobarasaia hangano pau-Do i Ue atuu, sarai koa ka dompehapu.

¹⁸ Ka anu mehano onaemo anu rinawo a laro ewo rui, ondaemo anu merongeo pau-Do i Ue atuu,

¹⁹ ka i'amba sala-larono wawontolino andio ka pompopo'oono kaeaa ka hadio rupa anu minosisiriako mewinso humidio pau-Do i Ue atuu ranta nahi pewua.

²⁰ Ka poko'ariano anu rinawo a wita anu moiko, ondaemo mia anu merongeo ka mentotowoo pau-Do i Ue atuu ka i'amba mewua, hinao anu meluka tolu pulu, hinao anu meluka nomo pulu, ka hinao anu meluka asa etu.”

Potundaano mongkona hulu ka mongkona ponsa'u 4:21-25 (Luk. 8:16-18)

²¹ Ka Do'amba i Yesu motaeako ira, ”Mia mowawa hulu komba ka ininaa a ntoto basu ke a ntoto poturia, tendeano ka ininaa a wawo pentoroano hulu.

²² Hangano nahina maupo hapa anu tewuni anu nahi ta pinokomengkaa, ka nahina maupo hapa anu rahasia anu nahi ta pinosaba.

²³ Ba isema mebiri ka iporonge, moikoomo irongeo!”

²⁴ Ka Do'amba motae mbo'u, ”Impe'ihi laroomo hapa anu rinongemiu! Ponsa'u anu pinakemiu mponsa'uako ta sina'uako ndi omiu, ka umarino atuu komiu mentiniangiako mbo'u.

²⁵ Hangano isema anu hina, ndi onae ta pinowee, sine isema anu nahina, hapamo koa anu hina ndi onae ta inala inso ndi onae.”

Potundaano mongkona inii anu tuwu 4:26-29

²⁶ Ka Do'amba motae i Yesu, ”Kanandiomo mongkona Poparentaa-Do Ue Ala atuu: pinotundaako kana mia anu morawo inii a wita,

²⁷ ka i'amba tempono wongi onae moturi ka meene onae mewangu, ka inii atuu mentumba ka tumbano atuu ko'onda-ondauno, kana'umpe teweweuno nahi to'orio mia atuu.

²⁸ Tolino moluarako onaeno wua, amba-ambano tangkeno, ka i'amba tonggino, umarino atuu labano anu buke ihino a ntonggino atuu.

²⁹ Tewala wua atuu motahaomo, mompari-pariomo mia atuu sumowio, hangano haweakoomo konsowia.”

Potundaano mongkona wuku rawoho 4:30-34 (Mat. 13:31-35; Luk. 13:18-19)

³⁰ Dopotae mbo'u, ”Saru hapa kita mongkenaakono Poparentaa-Do Ue Ala atuu ke saru potundaano hapa ba togambaraakono?

³¹ Mongkona Poparentaa atuu pinotundaako wuku rawoho anu rinawo a wita. Lano wuku mpinopaho atuu anu lalu kodei inso a luwuno rupano wuku mpinopaho anu hina i tolino.

³² Sine tewala rinawo, onae tuwu ka gagi langkaiopo sekono anu mehano ka moluarako hadio sampano anu langkai, ranta manu-manu i laro meene mpokompeseno a laro mpe'engoano.”

³³ I larono hadio potundaano anu kanatuu Dopaleleo pau-Do i Ue ndi ondae menunu saru ponto'orido,

³⁴ ka ba nahi a mpotundaano nahi Dopepau ndi ondae, sine a ana guru-Do Dopauako ira luwuakoano butu ondae.

Angi mokora Dopokotemontoo 4:35-41 (Mat. 8:23-27; Luk. 8:22-25)

³⁵ A oleo atuu, tempono ngkiniwiaomo, Dopotaeako ira i Yesu, ”Aiwamo ka tomelako i asatowa.”

³⁶ Domebinta ira mia hadio atuu ka do'amba melako wawa Ira i Yesu merongaako ira a laro bangka anu lano mentoro Iramo i Yesu ka hadio mbo'u bangka susua merongaako Ira.

³⁷ Ka i'amba mepuuriomo angi mokora anu tedoa mongkokongiri ka bomba merumpa mewinso a laro bangka, ranta bangka atuu mompu'uomo bukeako uwoi.

³⁸ I tempo atuu Ondae kontongaa-Do moturi a ulimano a asa ompeo. Onaemo ka dowangu Ira ana guru-Do ka dompotaeako Ira, ”Guru, nahi perioo ba kita memate?”

³⁹ Mewangu Iramo, kumuahakono angi atuu ka Dopepauakono rano atuu, ”Penoro-noro! Pomperodomo!” Ka i'amba angi atuu temonto ka rano atuu gagi maante ntu'u.

⁴⁰ Ka Do'amba motaeako ira, ”Tembio ka itedoa medoito? Tembio ka nahi mpompe'ala-ala?”

⁴¹ Gagi iramo tedoa medoito ka dompepau pada ondaedo, ”Isema tokoa Ondae andio, ranta angi ka maupo rano momperorongeako ndi Ondae?”