I MARAKUSU 3 - Wunta Mempori

Ondae i Yesu mompokotompa a oleo Saba 3:1-6 (Mat. 12:9-14; Luk. 6:6-11)

¹ Ka Do'amba i Yesu mewinso mbo'u a raha tepumpua. I tu'ai hinao aasa mia anu mate asa mbali kaeno.

² Dompekokoongako Ira i Yesu, ba mansa Dopokotompao mia atuu a oleo Saba, ka ihina pesalaado mpokonsalao.

³ Dopotae i Yesu a mia anu mate asambali kaeno atuu, ”Aiwa, pentademo i tongano!”

⁴ Ka Do'amba motaeako ira, ”Hapa anu pinemoiko a oleo Saba, moweweu moiko ke moweweu mosa'o, mongkadudui penaano mia ke mompepate mia?” Sine butu ira mengkomino.

⁵ Mompemasusa Ira hangano pe'ulu watudo ka saru tekuda mengkita Ira limbu-limbu ndi ondae ka Do'amba motaeakono mia atuu, ”Tasiakono kaemu!” Ka itasiakono, ka tompaomo kaeno atuu.

⁶ Ka i'amba mpeluarako iramo to Parisi ka mpopari-pari mpedandi mpoweweu mosa'o saru to Herodia ka dompepate Ira.

Ondae i Yesu mompokotompa hadio mia 3:7-12

⁷ Ka Do'amba i Yesu saru ana guru-Do meliahako lumako a rano, ka hadio mia inso i Galilea tumonda Ira. Ka anu inso mbo'u i Yudea,

⁸ inso i Yerusale, inso i Idumea, inso i asatowano Yarade, ka inso i wita Tirusi ka i Sidoni me'aiwa hadio mia ndi Ondae, umarido merongeo luwuno anu wineweu-Do.

⁹ Dotena ira ana guru-Do patindaako Ira aasa bangka hangano mia hadio atuu, ka si mansa dome'asi Ira.

¹⁰ Hangano hadio mia pinokotompa-Do, onaemo ka dompegugurompo ndi Ondae luwuno mia memahaki mingki me'angga Ira.

¹¹ Tewala domengkita Ira onitu nsa'o, ira mentebangku tepantundu i aro-Do ka mpebooli, ”Omiumo Ana-Do Ue Ala.”

¹² Sine Do'onto ira ntu'u mempauo isema Ondae.

Ondae i Yesu mompoboi hopulu ka orua tinena 3:13-19 (Mat. 10:1-4; Luk. 6:12-16)

¹³ Ka i'amba mewuatako Iramo i Yesu a wawo pongku. Dopoboi ira mia anu inehe-Do ka ondae mbo'u me'aiwa ndi Ondae.

¹⁴ Dopakosio hopulu ka orua mia anu wela wali-Do ka anu ta tenaa-Do mompalele Lele Mawongkoa

¹⁵ ka Dopoweeako ira pabawa ka domposaari onitu nsa'o.

¹⁶ Hopulu ka orua mia anu pinakosi-Do onaemo: i Simo, Anu nineeako i Peturu,

¹⁷ I Yakobu anano i Sebedeu, ka i Yohane pepaekompono i Yakobu, anu oruano Doneeako ira i Boaneregesi, anu pengkonaano anano rundu,

¹⁸ ka i'amba i Andarea, i Pilipu, i Batolomeu, i Matiu, i Toma, i Yakobu anano i Alipeu, i Tadeu, i Simo to Seloti,

¹⁹ ka i Yudasi Karioti, anu meweengako Ira.

Ondae i Yesu ka i Belesebu 3:20-30 (Mat. 12:22-32; Luk. 11:14-23)

²⁰ Ka Do'amba i Yesu mewinso a aasa raha. Ka mehawe iramo mbo'u mia hadio mpenggowo, ranta maupo mongkaa nami Dotengko'ala.

²¹ Tempono domerongeo pe'etu-Do anu gagi atuu, me'aiwa ira mingki umala Ira, hangano potaedo nami Dope'aroa moiko mbo'u.

²² Ka anu mponto'ori Taura anu mehawe inso i Yerusale mpotae, ”Ipewinsoki Ira i Belesebu,” ka, ”Tadulakodo koa onitu nsa'o Doponsaariako onitu nsa'o.”

²³ Dopoboi ira i Yesu, ka Do'amba motaeako ira a mpotundaano, ”Kana'umpe i Mosa'o mokosaario i Mosa'o?

²⁴ Tewala aasa poparentaa tetia-tia, poparentaa atuu nahi ta mokompo'ia mpiha,

²⁵ ka tewala aasa sombori tetia-tia, sombori atuu nahi ta mokompo'ia mpiha.

²⁶ Kanatuu koa mbo'u tewala i Mosa'o umewaio koroino onaeno ka tewala onae tetia-tia, nahi ta mokompo'ia mpiha, tendeano haweomo pokotampulaano.

²⁷ Sine nahina maupo te'asa mia mokompewinsokio rahano asa mia anu moroso ka irontuo arataano tewala nahi ponguo se'elu mia moroso atuu. Umarino atuu ka i'amba mokorontuo ihino raha atuu.

²⁸ Kupauakomiu: Menteeano luwuno hala ka pompepaukido anano mia ta inampuni, oo, luwuno pompepaukiako anu pinaudo.

²⁹ Sine tewala asa mia mompepaukiako Penaa Mempori, onae nahi pohawe po'ampuni halano ranta nahina tampulaano, tendeano sala hangano moweweu hala anu nahina tampulaano.”

³⁰ Dopotae kanandio hangano mpotae ira nine ipewinsoki Ira onitu nsa'o.

Ondae i Yesu ka pepaekompo-Do 3:31-35 (Mat. 12:46-50; Luk. 8:19-21)

³¹ Ka i'amba hawe iramo ine-Do i Yesu ka luwuno pepaekompo-Do i Yesu. Kontongaado mpentade i bungkuno, mpontena ira mia moboi Ira.

³² Hinao mia hadio mpentoro lumimbu Ira, dompotaeako Ira, ”Kitao, ondae ine-Miu ka pepaekompo-Miu mekongko ira i bungkuno, ka mingki tepohawea-Komiu.”

³³ Dosangki ira i Yesu, ”Isema ine-Ku ka isema pepaekompo-Ku?”

³⁴ Mengkita Ira a mia anu mpentoro lumimbu Ira atuu ka Dopotae, ”Ndiomo ine-Ku ka pepaekompo-Ku!

³⁵ Ba isema weweuo po'ehe-Do Ue Ala, onaemo pepaekompo-Ku tama, onaemo pepaekompo-Ku beine, onaemo ine-Ku.”