I MARAKUSU 15 - Wunta Mempori

Ondae i Yesu i arono i Pilatu 15:1-15 (Mat. 27:1-2, 11-26; Luk. 23:1-5, 13-25; Yoh. 18:28–19:16)

¹ Mo'o-mo'oru ntu'u luwuno petewawado sando mpesomba saru mia memota'u ka anu mponto'ori Taura ka luwuno Puu Mpobitara Agama domempakosiomo. Domempongu Ira i Yesu ka do'amba mewawa Ira ka mpeweengako Ira ndi Pilatu.

² Mesikeno i Pilatu ndi Ondae, ”Omiuke mokoledo to Yahudi?” Sumangki Ira i Yesu, ”Omiu isa'a pauo.”

³ Ka i'amba hadio domentuluriako Ira petewawado sando mpesomba.

⁴ Mesikeno mbo'u i Pilatu ndi Ondae, ipotae, ”Nahi Komiu sumangkike? Kitaomo hadio ntu'u domentuluria-Komiu!”

⁵ Sine poore ba Dosangki mbo'u i Yesu, onaemo ka ikohali-hali i Pilatu.

⁶ Gagiomo gau a sompo-sompo oleo langkai atuu pinotola aasa mia hinuku montonda po'emado mia hadio.

⁷ Ka i tempo atuu hinao aasa mia meneeako i Baraba kontongaano tinorungku saru ba opia mia anu umewa susuano. A laro mpe'ewado pompepate iramo.

⁸ Onaemo ka domehawe mia hadio ka me'emao kanandio-andio ka itinonda mbo'u gau atuu.

⁹ Isangki ira i Pilatu, ”Inehemiuke ka kupotolao mokoledo to Yahudi andio?”

¹⁰ Lano ito'orio, nine luwuno petewawado sando mpesomba mpeweengako Ira i Yesu hangano kohili.

¹¹ Sine petewawado sando mpesomba mosingki ira mia hadio ka dome'emao ka i Barabamo anu domempinotolaako.

¹² Pohonapo mbo'u i Pilatu sumangki ka mesikeno ndi ondae, ”Tewala kanatuu, aku mbioo mia anu nineemiu mokoledo to Yahudi andio?”

¹³ Onaemo ka dompebooli mbo'u, dompotae,”Paso Iramo a ngkeu pinotamba!”

¹⁴ Ka i'amba motaeako ira i Pilatu, ”Sine mosa'oa hapake anu Doweweuomo?” Sine komero-merokuno dompebooli, ”Paso Iramo a ngkeu pinotamba!”

¹⁵ Ka hangano i Pilatu ineheno tumondaako ira po'ehedo mia hadio atuu, ipotolaako ira i Baraba. Sine Ondae i Yesu ibobarasai Ira ka i'amba meweengako Ira ka Dopinaso a ngkeu pinotamba.

Ondae i Yesu pinasinggiri 15:16-20a (Mat. 27:27-31; Yoh. 19:2-3)

¹⁶ Ka i'amba sorodadu wawa Ira i Yesu a laro langkanae, onaemo raha pobitaraa, ka moboi ira luwu sorodadu mpepumpu.

¹⁷ Dompopolembaako Ira lemba meloe wungo, po'ena aasa ramba-ramba ulu rui ka domenaao a wawo ulu-Do.

¹⁸ Ka do'amba mpompu'u mpetabei Ira, dompotae, ”Tabe, hei mokoledo to Yahudi!”

¹⁹ Domentunduhiako Ira tuko a ulu-Do, ka umonui Ira ka mpenggolontu mpesombai Ira.

^20a Umarido mempasinggiri Ira domelohuo lemba meloe wungo atuu inso ndi Ondae ka dompokonaako Ira mbo'u sangka-Do.

Ondae i Yesu pinaso a ngkeu pinotamba 15:20b-32 (Mat. 27:32-44; Luk. 23:26, 33-43; Yoh. 19:17-24)

^20b Ka Do'amba i Yesu winawa meluarako ka Dopinaso a ngkeu pinotamba.

²¹ I tempo atuu telalo asa mia anu meneeako i Simo, to Kirene, amano i Alesande ka i Rupusi, anu da iaopo i hawe inso a inia susua, ka mia atuu domedadaio ka ipo'ahao keu pinotamba-Do i Yesu.

²² Dowawa Ira i Yesu a mpo'ianga anu meneeako Gologota, anu pengkonaano: Po'iangano Taku ulu.

²³ Ka do'amba mpoweeako Ira anggoro sinaloako mire, sine nahi Dobehe.

²⁴ Ka do'amba mempaso Ira, umarino atuu dompetia-tiao sangka-Do mpotendeakono undi ka iteto'ori tiano asa mia.

²⁵ Telaa oleo langku osio tempono Dopinaso.

²⁶ Ka pu'uno tembio ka Dohinuku pinau a binuri anu ninaa i tu'ai, ”Mokoledo to Yahudi.”

²⁷ Meronga saru Ondae pinaso a ngkeu pinotamba orua mia puu mporontu, asa mia i koana-Do ka asa mia i manggali-Do. [

²⁸ Kanandio inihiiomo pau a Wunta Mempori anu unino, ”Ira tewinso i olodo mia mpe'ewa.”]

²⁹ Mia anu ntelalo i ra'ai mpepaukiako Ira, ka mpebitu-bitu ulu dompotae, ”Hei Omiu anu komiu betao Raha Mempori ka wali wanguo i larono otolu oleo,

³⁰ Ipetiimo inso a ngkeu pinotamba atuu ka Ikaduduiomo koroi-Miu!”

³¹ Kanatuu koa mbo'u petewawado sando mpesomba saru anu monto'ori Taura mempasinggiri Ira i olodo ka dompotae, ”Mia susua Dokadudui ira, sine koroi-Do Ondae-Do nahi Dopokokaduduio!

³² Moikoomo i Mesia, Mokoledo to Isaraeli atuu, Dopetii inso a ngkeu pinotamba atuu, ka tomengkitao ka mpompe'ala-ala.” Maupo orua mia anu pinaso a ngkeu pinotamba meronga saru Ondae dotata Ira koa mbo'u.

Ondae i Yesu mate 15:33-41 (Mat. 27:45-56; Luk. 23:44-49; Yoh. 19:28-30)

³³ A langku hopulu ka orua, wongi-wongi tumutuwio wita atuu ka hawe langku otolu.

³⁴ Ka a langku otolu mebooli Iramo meroku i Yesu, ”Eloi, Eloi, lama sabaktani?”, anu pengkonaano: Ala-Ku, Ala-Ku, tembio ka Ibinta Aku?

³⁵ Rumongeo atuu, ba opia mia anu mpentade i tu'ai mpotae, ”Kitao, Dopoboio i Elia.”

³⁶ Onaemo ka i'aiwa asa mia saru beri nsawu, ka i'emoo a anggoro mo'olo ka i'amba sumonsoakono tuko ka ipopo'inuako Ira i Yesu saru motae, ”Tomensikoriomo ka tomengkitao ba hawe i Elia motii Ira.”

³⁷ Ka Do'amba i Yesu mebooli meroku ka meweengakono penaa-Do.

³⁸ Tempo atuu pelingo a Raha Mempori tesempa tepe'orua inso i wawono hawe i totono.

³⁹ Tempono ikitao petewawado sorodadu anu mentade tepo'aro saru Ondae mate-Do kanatuu, motaeomo, ”Mentee ntu'u, mia andio Ana-Do Ue Ala!”

⁴⁰ Hinao koa mbo'u ba opia ira beine anu mengkita inso olai, i olodo i Maria Madalena, i Maria inedo i Yakobu anu mongura ka i Yose, saru i Salome.

⁴¹ Luwudo mpentonda Iramo ndi Ondae i Yesu ka mekakaako Ira tempono Ondae i Galilea. Ka mekongko ira mbo'u i tu'ai hadio beine susua anu me'aiwa iramo i Yerusale mperonga saru Ondae i Yesu.

Ondae i Yesu kinaburu 15:42-47 (Mat. 27:57-61; Luk. 23:50-56; Yoh. 19:38-42)

⁴² Kontongaano atuu mompu'uomo wongi, ka oleo atuu oleo pepatindaa, onaemo oleo tamo haweako Saba.

⁴³ Onaemo pu'uno i Yusupu, to Arimatea, asa mia anu tewinso a Majelisi Langkai anu pinerorohi, anu monsisikori koa mbo'u Poparentaa-Do Ue Ala, memosiaako me'aro ndi Pilatu ka umemao wata ngkoroi-Do i Yesu.

⁴⁴ I Pilatu kohali-hali tempono irongeo nine Ondae i Yesu mate Iramo. Onaemo ka ipoboio petewawa petea ka ipesikeno mentee ke Ondae i Yesu mate Iramo.

⁴⁵ Umarino rumongeo pinauno petewawado sorodadu, i'induomo meweengakono wata ngkoroi atuu ndi Yusupu.

⁴⁶ I Yusupu mo'oliomo sawu lena, ka i'amba motiio wata ngkoroi-Do i Yesu inso a ngkeu pinotamba ka itongoako Ira sawu lena atuu. Ka i'amba mombole Ira a ngkaburu anu kineke a laro pongku watu. Ka i'amba lumundiakono aasa watu a mpewowano kaburu atuu.

⁴⁷ I Maria Madalena ka i Maria ineno i Yose kumitao ba isua Dopinombole i Yesu.