I MARAKUSU 14 - Wunta Mempori

Tinoo mepate Ira i Yesu 14:1-2 (Mat. 26:1-5; Luk. 22:1-2; Yoh. 11:45-53)

¹ Oleo langkai Pasa ka oleo langkai Roti Nahi Peragi ta pinu'u orua oleopo mbo'u. Petewawado sando mpesomba ka anu mponto'ori Taura mpo'ungke sala saru mpe'akala ka dompokorako Ira ka mepate Ira i Yesu,

² hangano dompotae, ”Osi'i i tempono porame-ramea, ka si hina tegagaa i olodo palili.”

Ondae i Yesu inurapi 14:3-9 (Mat. 26:6-13; Yoh. 12:1-8)

³ Tempono Ondae i Yesu kongko i Betania, a rahano i Simo mia haki ngkuli mesaki, ka kontongaa-Do mentoro mongkaa, haweomo aasa beine mowawa aasa pido-pido puala me'ihi mina-mina anu masuli olino. Mansano pehao we'uno pido-pido atuu, itawao mina-mina atuu a wawo ulu-Do i Yesu.

⁴ Hinao mia anu mosa'ono ka dompepau-pau pada ondaedo, ”Pombio ka isinosala mpena mina-mina andio?

⁵ Hangano mina-mina andio ba i'inasa torea tolu etu dinare ka doino wineeako mia memongkokolaro.” Ka do'amba ntekudaakono beine atuu.

⁶ Sine Dopotae i Yesu, ”Impo'ineeomo. Tembio ka impokomasusao? Iweweuomo aasa wineweu anu moiko ndi Ongkue.

⁷ Hangano mia memongkokolaro mekongko ira mpiha ndi omiu, ka impokotulungi ira ba inehemiu, sine Ongkue nahi Aku meronga-rongaakomiu mpiha.

⁸ Iweweuomo hapa anu ipokoweweuo. Koroi-Ku imina-minaomo gagi pepatinda ba Kukinaburu.

⁹ Kupauakomiu: Menteeano i suamo koa ipinalele Lele Mawongkoa i asa wawontolino, hapa anu wineweuno andio ta pinau mbo'u gagi rorambeno.”

I Yudasi umasa Ira i Yesu 14:10-11

¹⁰ Ka i'amba lumakoomo i Yudasi to Karioti, aasa mia inso a hopulu ka orua ana guru-Do atuu, a mpetewawado sando mpesomba saru tinoono ta meweengako Ira i Yesu ndi ondae.

¹¹ Tedoa ira memawongko tempono domerongeo ka ondae mpedandi ira mpoweeakono doi. Ka i'amba mo'ungke tempo anu moiko ka ipeweengako Ira i Yesu.

Ondae i Yesu mongkaa kaanga Pasa saru ana guru-Do 14:12-21 (Mat. 26:17-25; Luk. 22:7-14, 21-23; Yoh. 13:21-30)

¹² A oleo amba-ambano inso a oleo langkai Roti Nahi Peragi, i tempono mia mposumbele bimba Pasa, dompotae ana guru-Do i Yesu ndi Ondae, ”A mpo'ianga i sua inehe-Miu kami mpopatindaa-Komiu pelimbua Pasa?”

¹³ Ka Do'amba tumena ira orua ana guru-Do saru pe'oliwi, ”Ilakomo a ngkota; i ra'ai komiu tepohaweakono aasa mia anu mowawa kusi me'ihi uwoi. Onaemo itondao

¹⁴ ka ipotaeakono umbu raha anu pinewinsokino: Pe'oliwi-Do Guru: i suake bolongko anu ipatindaa-Kune ka Kupongkaa kaanga Pasa meronga-ronga saru ana guru-Ku?

¹⁵ Ka i'amba mia atuu ta tumisoakomiu aasa bolongko i wawono anu langkai, anu sompoomo parewa ka tetinda. Asalakono i tu'aimo ipompatindaa kita pelimbua Pasa!”

¹⁶ Ka melungka iramo orua ana guru atuu ka sahawedo i kota, luwuno dohaweo kana anu pinau-Do i Yesu ndi ondae. Ka do'amba patindao pongkaanga Pasa.

¹⁷ Mansano wongi, hawe Iramo i Yesu meronga saru hopulu ka orua ana guru-Do atuu.

¹⁸ Tempono dompentoro i tu'ai ka kontongaado mpongkaa, Dopotae i Yesu, ”Kupauakomiu, menteeano aasa mia i olomiu ta meweenga-Kune, onaemo onae anu mongkaa saru Ongkue.”

¹⁹ Onaemo ka imasusa aroado ka singge mia motaeako Ira, ”Komba ongkue, oo Ue?”

²⁰ Dosangki ira, ”Mia atuu onaemo aasa mia inso ndi omiu anu hopulu ka orua andio, onae anu mo'emo roti a laro aasa sempe saru Ongkue.

²¹ I Ana Manusia lano Ira lumako menunu saru anu hinao teburi mongkona Ondae, sine masolaomo mia anu hangano onae ka Dopineweengako i Ana Manusia atuu. Da moikoopo mia atuu ba nahi pine'anaako.”

Pompakosia Pelimbua Wongi 14:22-25 (Mat. 26:26-29; Luk. 22:15-20; 1Kor. 11:23-25)

²² Ka tempono Ondae i Yesu ka ana guru-Do kontongaado mpongkaa, Ondae i Yesu mo'ala roti, Doronsoo, sumiba-sibao ka Do'amba weeako ira ka Dopotae, ”Alaomo, ndiomo koroi-Ku.”

²³ Umarino atuu Do'alao tonde, Doronsoo ka Do'amba weeako ira, ka luwudo mpo'inu inso a tonde atuu.

²⁴ Ka Dopotaeako Ira: ”Ndiomo rea-Ku, rea pedandia, anu inuwu tiado Mia hadio.

²⁵ Kupauakomiu, Menteeano nahi Aku mo'inu mbo'u hasilino keu anggoro hawe a oleo ka Ku'inuo, onaemo anu wo'ohu, a laro Poparentaa-Do Ue Ala.”

I Peturu ta humapu Ira i Yesu 14:26-31 (Mat. 26:30-35; Luk. 22:31-34; Yoh. 13:36-38)

²⁶ Umarido mpenaniako penani mpo'unde-unde, melako iramo a Pongku Saitu.

²⁷ Ka Do'amba i Yesu motaeako ira, ”Luwumiu ta telelu pompe'ala-alamiu. Hangano hinao teburi: Aku tumunduhio puu mpompakambi ka bimba atuudo ira ntesiarawo.

²⁸ Sine umari-Ku mewangu, Aku mese'elungi komiu lumako i Galilea.”

²⁹ Motae i Peturu ndi Ondae, ”Maupo luwudo telelu pompe'ala-alado, ongkue naahi.”

³⁰ Ka Do'amba i Yesu motaeakono, ”Kupauakomu, menteeano a oleo andio, wongi koa mbo'u andio napi pendua ikokoroido manu, pentolumo uhapu Aku.”

³¹ Sine ipokorosoo mbo'u i Peturu pauno ipotae, ”Maupo kumate saru Omiu, nahi aku humapu Komiu.” Luwudo anu mehano kanatuu koa mbo'u dompotae.

I Bonde Getesemani 14:32-42 (Mat. 26:36-46; Luk. 22:39-46)

³² Ka i'amba hawe Iramo i Yesu ka ana guru-Do i aasa po'ianga anu meneeako Getesemani. Dopotaeako ira i Yesu ana guru-Do, ”Impentoromo i ndi'ai, kontongaa-Ku mekakai.”

³³ Ka Dowawa ira i Peturu, i Yakobu ka i Yohane merongaako Ira. Tedoa Ira doito ka mondidi-ndidi,

³⁴ ka Do'amba motaeako ira, ”Tedoa masusa aroa-Ku, kana Akumo mate. Impo'iamo i ndi'ai ka impetangkoromo.”

³⁵ Lumako Ira olai tedei, menggolontu a wita ka Dopekakai, ba moiko tempo atuu ka itelalo inso ndi Ondae.

³⁶ Dopotae, ”Oo Aba, oo Ama, nahina anu nahi Ipolio, I'alaomo tonde andio inso ndi Ongkue, sine komba po'ehe-Ku, tendeano po'ehe-Miu.”

³⁷ Umarino atuu wali Iramo aiwa, ka Dohawe ira kontongaado mpoturi otolu ira. Ka Dopotaeakono i Peturu, ”Simo, tekonaiko moturike? Nahi upolioke metangkoro te'asa langku?

³⁸ Impetangkoromo ka impekakaimo, ka si ntedonta a mpo'ara-arahakoa; penaa lano umehe, sine koroi molema.”

³⁹ Ka Do'amba lumako mbo'u ka Dopekakai onae koa mbo'u pekakai-Do.

⁴⁰ Ka tempono Dopekule mbo'u, Dohawe ira kontongaado mpoturi, hangano mobeaomo matado ka nahi domento'orio ba hapa anu asalakono domesangkiako Ira.

⁴¹ Ka Do'amba mekule anu kopentoluno ka Dopotaeako ira, ”Kanandio-andio impoturimo ka impenaa-naa. Sompoomo. Haweakoomo tempono, kitao, i Ana Manusia pineweengako a ngkaedo mia ntehala.

⁴² Impewangumo, aiwamo ka tomelako. Onae anu meweenga-Kune umpedaomo.”

Ondae i Yesu rinako 14:43-52 (Mat. 26:47-56; Luk. 22:47-53; Yoh. 18:1-11)

⁴³ Tempono da mepau Ira i Yesu, mesabaakoomo i Yudasi, aasa mia inso a hopulu ka orua ana guru atuu, ka meronga saru onae asa bawaa mia anu mpowawa ponai ka pontunduhi, tinenado petewawado sando mpesomba, anu mponto'ori Taura ka mia memota'u.

⁴⁴ Mia anu meweengako Ira umariomo pauo petondoni andio ndi ondae, ”Mia anu aku woo-wooo, Ondaemo atuu, rako Iramo ka wawa Iramo temoiko.”

⁴⁵ Ka tempono ihawe i tu'ai mompari-pari lumako tepohaweako Ira i Yesu ka ipotae, ”Guru,” ka i'amba woo-woo Ira.

⁴⁶ Onaemo ka dome'ini Ira i Yesu ka domerako Ira.

⁴⁷ Aasa mia inso ndi ondae anu kongko i tu'ai butao ponaino, ka i'amba sumaleo atano petewawado Sando Mpesomba ranta te'otu birino.

⁴⁸ Dopotaeako ira i Yesu, ”Potaemiu Ongkue andio puu mporontu, ka ime'aiwa komiu merako Aku mpowawa ponai ka pontunduhi?

⁴⁹ Kahinaano sompo-sompo oleo Kukongko i tonga-tongamiu mompaguru a Raha-Do Ue Ala, ka nahi imerako Aku. Sine asalakono ka i'inihii anu teburi a Wunta Mempori.”

⁵⁰ Ka do'amba mpolai luwu ana guru atuudo binta Ira.

⁵¹ Hinao aasa mangalitau, anu i tempo atuu butu mehawuako asa lewe sawu lena, tumonda Ira. Ira mingki merakoo,

⁵² sine ipotolao sawuno ka ipolai kolambe-lambe.

Ondae i Yesu i arono Pobitaraa Agama 14:53-65 (Mat. 26:57-68; Luk. 22:54-55, 63-71; Yoh. 18:12-14, 19-24)

⁵³ Ka Do'amba i Yesu winawa me'aro a Sando Mpesomba Langkai. Ka i'amba luwuno sando mpesomba, mia memota'u ka anu monto'ori Taura mpepumpu i tu'ai.

⁵⁴ Ka i Peturu tumonda Ira inso olai, hawe a laro kintalano Sando Mpesomba Langkai, ka i ra'ai onae mentoro i olodo anu mpodagai saru meraho umpeda a api.

⁵⁵ Luwuno petewawado sando mpesomba, maupo luwuno Puu mpobitara Agama mpo'ungke anu sumakosii Ira i Yesu ka dompokohuku mate Ira, sine nahi dompohawe.

⁵⁶ Hadio koa mia anu mpompau sumakosii Ira butu megaupi, sine luwuno pesakosii atuu nahi penunu anu aasa saru anu mehano.

⁵⁷ Ka i'amba ba opia mia umewai ira mpesakosii tumuluriako Ira anu nahi mentee andio:

⁵⁸ Kimerongeomo ipotae mia andio: Aku betao Raha mempori wineweuno kaeno mia andio ka i larono otolu oleo Aku wanguo anu susua, anu komba wineweuno kaeno mia.

⁵⁹ Maupo kanandio nahina anu menunu pesakosiido anu aasa saru anu mehano.

⁶⁰ Onaemo ka ipentade Sando Mpesomba Langkai i tonga-tongano pebitaraa ka isikeno Ira i Yesu, ipotae, ”Nahi Komiu sumangkioke luwuno pontulurido sakosii andio ndi Omiu?”

⁶¹ Sine komino Ira mpiha nahi Dosangki hapa-hapa. Sando Mpesomba Langkai atuu sumikeno Ira pohona mbo'u, ipotae, ”Omiuke i Mesia, Ana-Do Anu Inunde-unde?”

⁶² Sumangki Ira i Yesu, ”Ongkuemo Ondae, ka komiu mengkitao i Ana Manusia mentoro i koana-Do Anu Tedoa Pabawa ka aiwa i tonga-tongano seru i langi.”

⁶³ Onaemo ka iberio Sando Mpesomba Langkai atuu sangkano ka ipotae, ”Pombio ka kita mpokere mbo'u sakosii?

⁶⁴ Imerongeomo pepauki-Do ndi Ondae Ue Ala. Kana'umpe pohawemiu?” Ka i'amba memoroko ira mempakosio, nine Ondae asalakono hinuku mate.

⁶⁵ Ka i'amba mpompu'u iramo ba opia mia umonui Ira ka domengkukumbuo rupa-Do tumidu Ira ka dompotaeako Ira, ”Hei nabi, po'arahakomo guruo!” maupo mbo'u anu mpodagai mentunduhi Ira.

I Peturu humapu Ira i Yesu 14:66-72 (Mat. 26:69-75; Luk. 22:56-62; Yoh. 18:15-18, 25-27)

⁶⁶ I tempo atuu i Peturu da kongko i totono, a kintala. Ka i'amba haweomo aasa beine atano Sando Mpesomba Langkai,

⁶⁷ ka tempono ikitao beine atuu i Peturu kontongaano meraho, ikokontoo rupano ka ipotae, ”Omue mbo'u wela merongaako Ira i Yesu, to Nasare atuu.”

⁶⁸ Sine ihapuo ka ipotae, ”Nahi kuto'orio ka nahi kupokonto'orio hapa anu tinoomu.” Ka i'amba lumako a ntambino i arono [ka kumokoroidoomo manu].

⁶⁹ Tempono ikitao mbo'u ata beine atuu i Peturu, motaeomo mbo'u a mia anu mekongko i tu'ai, ”Mia andio aasa inso ndi ondae.”

⁷⁰ Sine i Peturu mehapu mbo'u. Nahi tehine umarino atuu mia anu mekongko i tu'ai mpotae mbo'u ndi Peturu, ”Manasa omue andio aasa inso ndi ondae, tamoako omue aasa to Galilea!”

⁷¹ Onaemo i Peturu ka ipompu'u metotonaa ka mesumpa, ”Nahi kuto'orio mia anu wela nineemiu andio!”

⁷² Ka i tempo atuu kumokoroidoomo manu anu kompenduano. Ka ipasimpewowoloomo i Peturu, nine Dopauakonomo i Yesu, ”Napi kokoroido manu kompenduano, pentolumo uhapu Aku.” Ka i'amba mengeseomo sensedu.