I MARAKUSU 13 - Wunta Mempori

PONTUTULU MONGKONA OLEO TAMPULAANO WAWONTOLINO LAMORO 13 Raha-Do Ue Ala ta rinongka 13:1-2 (Mat. 24:1-2; Luk. 21:5-6)

¹ Tempono Dopeluarako i Yesu inso a Raha-Do Ue Ala, aasa ana guru-Do motaeako Ira, ”Guru, Ikitaomo tedoa moroso watu atuudo ka tedoa tekosi luwuno raha atuu!”

² Ka Do'amba i Yesu motaeakono, ”Ukitao luwuno raha anu langkai andio? Nahina maupo te'asa ta pino'inee metako i wawono watu anu susua, luwuno ta rinongka.”

Pompu'uano tebobarasaia 13:3-13 (Mat. 24:3-14; Luk. 21:7-19)

³ Tempono Ondae i Yesu mentoro a wawo Pongku Saitu, tepo'aroakono Raha-Do Ue Ala, mpesikeno iramo butu ondae i Peturu, i Yakobu, i Yohane ka i Andarea ndi Ondae,

⁴ ”Ipauakamimo, te'ipiake ta gagiano atuu, ka hapake tondonino, tewala luwuno atuu ta hawe pokotampulaano.”

⁵ Ka mompu'u Iramo i Yesu mepauako ira, ”Impetangkoromo ka si domempopo'oo komiu mia!

⁶ Ira mehawe hadio mia mpeneeako nee-Ku ka mpotae: Ongkuemo Onae, ka ta hadio mia pinopo'oodo.

⁷ Ka tewala mporonge komiu u'uruno peteaa ke lele mongkona peteaa, si medanggara. Luwuno atuu asalakono gagi, sine atuu napi komba tampulaano.

⁸ Hangano tongku ta mentade umewaio tongku ka poparentaa umewaio poparentaa. Ta gagi leelu a hadio mpo'ianga, ka ta hina mokoninggoa. Luwuno atuu da pompu'uano marasaia ta haweano tempo wo'ohu.

⁹ Sine omiu andio, impetangkoromo! Komiu mempineweengako a majelisi agama ka komiu mentinunduhi a raha tepumpua ka komiu mewinawa i arodo anu mempabawa ka luwuno mokole hangano Ongkue, gagi sakosiido.

¹⁰ Sine Lele Mawongkoa asalakono pinalele ari a luwuno tongku.

¹¹ Ka tewala mewinawa komiu ka pineweengako, si mensalalaro ta hapa anu asalakono komiu mempauo, sine imempauomo hapa anu imewineeako i tempo koa mbo'u atuu, hangano komba omiu anu mpepau tendeano Penaa Mempori.

¹² Aasa pepaekompo ta meweengakono pepaekompono ka ipinepate, kanatuu koa mbo'u aasa ama a anano. Ka nana'ote ta umewa a mia mota'uno ka ta mepate ira.

¹³ Ira me'o'aliaakomiu luwuno mia hangano nee-Ku. Sine mia anu mompetea hawe a pokotampulaano onae ta tekadudui.”

Pobobarasaia anu mobea ka luwuno Mesia anu mpegaupi 13:14-23 (Mat. 24:15-28; Luk. 21:20-24)

¹⁴ ”Tewala imengkitao Puu Pompepate mokoburu mentade a mpo'ianga anu nahi pototono – anu mpobasa asalakono ka dompepenteeo – ka luwuno mia anu i Yudea asalakono ka dompolai a mentorukuno.

¹⁵ Mia anu kontongaano me'angi-angi a wawo raha siimo ipetii ka mewinso ta mo'ala hapamo koa inso a rahano,

¹⁶ ka mia anu kontongaano a lere siimo ipekule ta mo'ala sangkano.

¹⁷ Memasola iramo ine anu kontongaado mementia ke anu mompo'uo anano i tempo atuu.

¹⁸ Impekakaimo, ka si gagi luwuno atuu i tempo morini.

¹⁹ Hangano i tempo atuu ta gagi pobobarasaia kana anu napi hori gagi tampu'uno wawontolino, anu pinokogagi-Do Ue Ala, hawe kanandio-andio ka anu nahi ta gagi mbo'u.

²⁰ Ka tewala nahi Dopoko'owowao i Ue tempono, asalakono inso a luwuno anu tuwu nahi ta hina anu tekadudui; sine hangano mia mebininiki anu Dobiniki iramo, Dopoko'owowaomo i Ue tempono.

²¹ I tempo atuu ba dompotaeakomiu mia: Kitao, i Mesia kongko Ira i ndi'ai, ke: Kitao, i Mesia kongko Ira i ra'ai, si mpe'ala-alao.

²² Hangano i Mesia mpegaupi ka nabi anu mpegaupi ira mpesabaako ka ira mpoweweu hadio petondoni kinohali-haliako, anu tinoodo bakana mopo'oo ira mia mebininiki.

²³ Impopesu'uimo! Se'eluomo Kupauakomiu luwuno andio.”

Hawe-Do i Ana Manusia Potundaano tutulu mongkona keu ara 13:24-32 (Mat. 24:29-36; Luk. 21:25-33)

²⁴ ”Sine i tempo atuu, umarino pobobarasaia atuu, mata oleo ta gagi wongi-wongi ka wula nahi mewanta

²⁵ ka anano wula ira ntedodonta inso i langi, ka luwuno pabawano langi ta melelu.

²⁶ I tempo atuu mia ta kumita Ira i Ana Manusia hawe a laro nseru saru luwuno pabawa ka maramba-Do.

²⁷ Ka i tempo mbo'u atuu Ira metena ka dompeluarako mala'eka-Do ka Ira pumpuo luwuno mia bininiki-Do inso a opaa siuno tolino, inso i tompano tolino hawe i tompano langi.

²⁸ Impo'alamo pepaguru inso a mpotundaano tutulu mongkona keu ara. Tewala molusaomo luwuno sampa motutuno ka mompu'u mentumba, imento'orio, nine tempo motu'i-tu'i rangkuomo.

²⁹ Kanatuu koa mbo'u, tewala imengkitao gaagi luwuno atuu, imento'oriomo nine tempono rangkuomo, a mpuu pewowano.

³⁰ Kupauakomiu: Menteeano mia andiodo nahi ira metampula, ba napi gagi luwuno atuu.

³¹ Langi ka tolino ta tampula, sine pau-Ku nahi ta tampula.

³² Sine mongkona oleo andio ke tempo atuu nahina maupo te'asa mia anu tumo'orio, luwuno mala'eka i suruga naahi, ka maupo Ana naahi, butu Ondae i Ama.”

Patudu ka impetangkoro 13:33-37

³³ ”Impopesu'uimo ka impetangkoromo! Hangano nahi imento'orio ba te'ipia ihawe tempono.

³⁴ Ka teweweuno mengkena kana aasa mia anu lumako a nsingge inia, anu mobinta rahano ka iweeako ira atano pabawano singge mia saru anggaano, ka parentao anu modagai pewowa ka ipedaga-dagai.

³⁵ Onaemo pu'uno impedaga-dagaimo, hangano nahi imento'orio ba te'ipia ipekule umbu raha atuu, tamo wongi, ke ntonga wongi, ke tehine wongi, ke mo'o-mo'oru ntu'u,

³⁶ ba mansa hawe mepakada ka si hawe komiu tekonai mpoturi.

³⁷ Hapa anu Kupauakomiu, Kupauako ira luwuno mia: impedaga-dagaimo!”