I MARAKUSU 12 - Wunta Mempori

Potundaano tutulu mongkona mia mpo'angga a lere anggoro 12:1-12 (Mat. 21:33-46; Luk. 20:9-19)

¹ Ka Do'amba i Yesu mompu'u mepauako ira a mpotundaano tutulu, ”Hinao asa mia melere anggoro ka iwalao limbu. Onae mongkeke pomporo'ia anggoro ka mowangu menara podagaia. Ka i'amba metamboakono lere atuu a mia mpo'angga lere ka i'amba lumako i wita susua.

² Ka mansano haweakoomo tempo po'opua, itenao aasa atano lumako a mia mpo'angga lere atuu ka itarimao asa ntia inso a hasilino lere atuu inso ndi ondae.

³ Sine domerakoo ata atuu ka mentunduhio, ka do'amba mentenao lumako saru kae mooa.

⁴ Ka i'amba tumenao mbo'u aasa ata susua lumako ndi ondae. Mia andio domentunduhio ranta mobela a uluno ka tedoa dompokoko'iio.

⁵ Ka i'amba tumenao mbo'u aasa ata susua, ka mia andio dompepateo. Ka hadio mbo'u anu susua, hinao anu domentunduhio ka hinao anu dompepateo.

⁶ Kanandio-andio asamo koa mo'ia anano anu pinehohawano. Poko'ariano itenao lumako ndi ondae, ipotae: Anaku ira metampahio.

⁷ Sine dompotae anu mpo'angga lere atuu pada ondaedo: Onaemo anu me'umbuo, aiwa tompepateo, ka pusaka andio gagi ontae mpe'ueo.

⁸ Domerakoo ka mpepateo, ka do'amba mpetendeakono a bungku lere anggoro atuu.

⁹ Kanandio-andio hapa ta wineweuno anu me'umbuo lere anggoro atuu? Onae ta aiwa ka mepate ira anu mpo'angga lere atuu, ka i'amba me'ala-alaakono lere anggoro atuu a mia.

¹⁰ Nahi horike mebasao pau andio: Watu anu tinadido mia puu mpowangu raha gagiomo watu po'empehi a nsiuno:

¹¹ mongkona atuu gagi inso ndi Ondae i Ue, aasa wineweu kinohali-haliako a pongkitato.”

¹² Ka do'amba me'ungkeakono ira merako Ira i Yesu, hangano domento'orio, nine ondaemo anu tinoo-Do a mpotundaano tutulu atuu. Sine medoito ira a mia hadio, gagi ondae melako ka dompo'inee Ira.

Mongkona mo'owahi sima'ulu ndi Datu 12:13-17 (Mat. 22:15-22; Luk. 20:20-26)

¹³ Ka i'amba mentinena ba opia ira to Parisi ka to Herodiani melako ndi Ondae i Yesu ka dompete'umala mpauako Ira aasa pesikeno.

¹⁴ Mia atuudo mehawe ka dompotaeako Ira, ”Guru, kimento'orio, Omiu asa mia anu moleo, ka nahi doito maupo ndi sema, hangano Omiu nahi pobiniki mia, tendeano a menteeano Ipompaguruako sala lumako ndi Ondae Ue Ala. Nde tekonake mo'owahi sima'ulu ndi ondae Datu ke naahi? Asalakonoke kami me'owahio ke naahi?”

¹⁵ Sine Doto'orio i Yesu po'onde-ondedo, ka Do'amba motaeako ira, ”Tembio ka ime'ara-arahako Aku? Wawaomo ramai te'asa dinare ka Kukitao!”

¹⁶ Ka do'amba mewawao. Ka Dopesikeno ndi ondae, ”Gambara ka binurino isemake andio?” Mesangki ira, ”Gambara ka binurido Datu.”

¹⁷ Ka Do'amba i Yesu motaeako ira, ”Weeako iramo Datu hapa anu asalakono imeweeako ira Datu ka weeako Iramo Ue Ala hapa anu asalakono imeweeako Ira Ue Ala!” Mengkohali-hali ira ntu'u rumonge Ira.

Pesikenodo to Saduki mongkona pewangua 12:18-27 (Mat. 22:23-33; Luk. 20:27-40)

¹⁸ Mehawe iramo ba opia to Saduki, anu pohawedo, nine nahina pewangua. Mpesikeno ira ndi Ondae,

¹⁹ ”Guru, i Musa buriakita parenta andio: Tewala asa mia hinao pepaekompono tama, mate ka ibintao beineno sine nahina anado, asalakono ka ikombiao pepaekompono beineno atuu ka iwanguakono inuleno pepaekompono atuu.

²⁰ Hinao opitu mia mpepaekompo. Anu ko'aasa mekombiaako aasa beine ka mate nahina inuleno.

²¹ Ka i'amba kumombiao mbo'u anu ko'orua ka mate nahina inuleno. Kanandio koa mbo'u anu ko'otolu.

²² Ka kanatuumo mpiha, opitu ira nahina inuledo. Ka poko'ariano, umarido memate luwu, beine mbo'u atuu mate.

²³ A oleo pewangua, tewala mpewangu ira, isemake anu ta gagi tamano beine atuu? Hangano domengkombiaomo opitu ira.”

²⁴ Dosangki ira i Yesu, ”Tepopo'oo komiu, ndio koa hangano nahi mpokonto'orio Wunta mempori maupo pabawa-Do Ue Ala.

²⁵ Hangano tewala mia mewangu inso i olodo mia mate, mia nahi pekombia ka nahi pinopokombia tendeano tuwu kana mala'eka i suruga.

²⁶ Ka mongkona mbo'u pewangudo mia mate, nahi mebasao a wuntano i Musa, a laro ntutulu mongkona ntonga rui, kana'umpe unino pau-Do Ue Ala ndi onae: Ongkuemo Ue Alano i Burahima, Ue Alano i Saki ka Ue Alano i Yako?

²⁷ Ondae komba Ue Alado mia mate, tendeano Ue Alado mia mentuwu. Mentee ntu'u ntepopo'oo komiu!”

Songka anu lalua 12:28-34 (Mat. 22:34-40; Luk. 10:25-28)

²⁸ Ka i'amba aasa guru agama, anu rumonge Ira i Yesu ka to Saduki mambesikeno ka ito'orio, nine sangki-Do i Yesu a mia atuudo kona ntu'u, aiwa ndi Ondae ka mesikeno, ”Songka isuake anu lalua ntu'u?”

²⁹ Sumangki Ira i Yesu, ”Songka anu lalua onaemo: Rongeomo, hei to Isaraeli, Ondae Ue Alato, Ondae Ue Ala atuu asa-asa-Do.

³⁰ Pehohawa Iramo i Ue, Ue Alamu, tompaano aroamu ka tompaano sumangamu ka tompaano pinewowolomu anu molino ka tompaano rosomu.

³¹ Ka songka anu ko'orua onaemo: Pehohawaomo pe'asa miamu kana koroimu. Nahina songka susua anu lalua inso a orua songka andio.”

³² Ka i'amba motae anu monto'ori Taura atuu ndi Ondae i Yesu, ”Kona ntu'u, Guru, mentee pinau-Miu atuu, nine Ondae asa-asa-Do, ka nahina anu susua sangkadio Ondae.

³³ Lano mehohawa Ira tompaano aroa ka tompaano ponto'ori ka tompaano roso, ka mehohawao mbo'u pe'asa mia kana koroito ontaeto laluaopo langkai sekonopo luwuno pesomba tinunu ka pesomba sinumbele.”

³⁴ Dokitao i Yesu, kana'umpe moleono sangkino mia atuu, ka Dopotaeakono, ”Omue nahi olai inso a Poparentaa-Do Ue Ala!” Ka maupo te'asa mia nahina mbo'u sapa mompesikenoako ndi Ondae i Yesu.

Penggoea-Do i Yesu ka i Daudi 12:35-37 (Mat. 22:41-46; Luk. 20:41-44)

³⁵ Pohona tempono Dopompaguru i Yesu a Raha-Do Ue Ala, Dopotae, ”Kana'umpe ka dompotae anu mponto'ori Taura, nine i Mesia anano i Daudi?

³⁶ Sekono i Daudi a pontaateno Penaa Mempori motae: Mepau Iramo i Ue ndi ondae ueku: pentoromo i koana-Ku, hawe ka Kunaa ira iwali-Miu a ntoto ngkaru-Miu.

³⁷ Sekono i Daudi numeeako Ira Ueno, nde kana'umpe ka Dogagi mbo'u anano?” Mia anu tedoa hadio inehedo meronge Ira.

Patudu-Do i Yesu ka dompetangkoro ia anu mponto'ori Taura 12:38-40 (Mat. 23:5-7; Luk. 20:45-47)

³⁸ A pompaguru-Do Dopotae i Yesu, ”Imentangkoro ira anu mponto'ori Taura anu inehedo mpelempa-lempa mpelemba meloe ka inehedo mempinelangkai a olu,

³⁹ anu inehedo mpentoro i arono ntu'u a raha tepumpua ka a mpo'ianga pinelangkai a mpelimbua,

⁴⁰ anu mporontu rahado tuwu beine, ka mia domempopo'ooako ira pekakai anu me'o'ondau. Ondae andio manasa ira mpontarima pohuku anu lalu mobea.”

Pesombano aasa tuwu beine anu mongkokolaro 12:41-44 (Luk. 21:1-4)

⁴¹ Pohona Ondae i Yesu mentoro umo'aroo burua ponaapa pesomba ka kumikita ira mia hadio kana'umpe dompowinso doi a laro burua atuu. Hadio mia kaea mpompowee hadio.

⁴² Ka i'amba haweomo aasa tuwu beine anu mongkokolaro ka iwinsoo orua peseree, onaemo aasa doi.

⁴³ Onaemo ka Dopoboi ira ana guru-Do ka Dopotaeako ira, ”Kupauakomiu, menteeano tuwu beine mongkokolaro andio mompowee hadioopo sekono luwuno mia anu mpowinso doi a laro burua ponaapa pesomba.

⁴⁴ Hangano luwudo mpompowee inso a mare'edo, sine tuwu beine andio mompowee inso a makurano, luwuno anu hina ndi onae, onaemo luwuno pepotuwuno.”