I MARAKUSU 11 - Wunta Mempori

Ondae i Yesu tinotowo i Yerusale 11:1-11 (Mat. 21:1-9; Luk. 19:28-38; Yoh. 12:12-15)

¹ Tempono Ondae i Yesu ka ana guru-Do umpeda Iramo i Yerusale, umpeda i Betipage ka Betania anu po'iangano a Pongku Saitu, Ondae i Yesu tumena ira orua ana guru-Do

² saru pe'oliwi, ”Ilakomo a inia anu i aromiu atuu. Tempono ipewinso i tu'ai, komiu ronga humaweo aasa kalide mongura tinanggo, anu napi hori dompesawikio mia. Ipotolaomo tanggono ka iwawaomo ramai.

³ Ka tewala hinao mia anu motaeakomiu: Tembio ka ipoweweu kanatuu, isangkio: Dokereo i Ue. Ira koa ronga mokuleo i ndi'ai.”

⁴ Lumako iramo, ka dohaweo aasa kalide mongura tinanggo i arono pewowa i bungkuno, a wiwi nsala, ka do'amba motolao tanggono.

⁵ Ka ba opia mia i tu'ai mpotaeako ira, ”Hapa tinoomiu motolao tanggono kalide atuu?”

⁶ Ka do'amba sumangki kana Dopauako iramo i Yesu. Onaemo ka dopo'inee ira mia atuudo.

⁷ Ka do'amba wawao kalide atuu ndi Ondae i Yesu, ka domelampiakono sangkado, ka Do'amba i Yesu mesawi i wawono.

⁸ Hadio mia anu mewileo sangkado a nsala, hinao mbo'u anu me'empehiakono sampa-sampano keu da momata anu inalado inso a lere.

⁹ Mia anu mpelempa i arono ka ondae anu mpetonda inso i bungkuno mpebooli, ”Hosana! Rinonso Iramo anu hawe a nee-Do i Ue,

¹⁰ rinonsoomo Poparentaa anu hawe, Poparentaado amato i Daudi, hosana a mpo'ianga anu i wawono ntu'u!”

¹¹ Sahawe-Do i Yerusale mewinso Ira a Raha-Do Ue Ala. I ra'ai Doparesao luwu, sine hangano tamo ronga wongi meluarako Ira lumako i Betania meronga saru hopulu ka orua ana guru-Do.

Ondae i Yesu tumotonaao keu ara 11:12-14 (Mat. 21:18-19)

¹² Tisomono umari-Do i Yesu ka ana guru-Do mebitao Betenia, Ondae i Yesu mompemokoninggo.

¹³ Ka inso olai Dokitao keu ara anu meleweomo. Dorangkuhio Ira kumitao ba mansa mohawe Ira hapa-hapa a ngkeu atuu. Sine tempono Dohawe i tu'ai, nahi Dopohawe hapa-hapa sangkadio butu leweno, hangano komba tempo pewuaano ara.

¹⁴ Onaemo ka Dopotaeakono keu atuu, ”Siimo mbo'u maupo te'asa mia mongkaa wuamu ranta nahina tampulaano!” Ka domerongeo mbo'u ana guru-Do.

Ondae i Yesu mokomemporio Raha-Do Ue Ala 11:15-19 (Mat. 21:12-13; Luk. 19:45-48; Yoh. 2:13-16)

¹⁵ Ka i'amba hawe Iramo i Yesu ka ana guru-Do i Yerusale. Mansa-Do mewinso i Yesu a Raha-Do Ue Ala, mompu'u Iramo sumaari ira mia anu mpo'asa ka mpo'oli a kintalano Raha-Do Ue Ala. Luwuno meda pontobosia doi ka luwuno bangkudo anu mpo'asa marapatii Dowalite ira,

¹⁶ ka nahi Do'eheako ira mia mewawa ira sangka ntelalo a kintalano Raha-Do Ue Ala.

¹⁷ Ka Do'amba paguru ira, Dopotae, ”Kombake hinao teburi: Raha-Ku ta nineeako raha mpekakaiado luwuno tongku? Sine omiu andio impokogagiomo po'iangado mia mporontu!”

¹⁸ Domerongeo petewawado sando mpesomba ka anu mponto'ori Taura mongkona anu gagi atuu, ka dome'ungkeakono ka dompokopepate Ira, hangano medoito ira ndi Ondae, mengkitao luwuno mia hadio mengkohali-haliakono pompaguru-Do.

¹⁹ Tamo wongi mpeluarako ira mbo'u inso a ngkota.

Keu Ara anu mokariomo Patudu-Do i Yesu mongkona pekakai 11:20-26 (Mat. 21:20-22)

²⁰ Mo'o-mo'oru tempono Dotelalo i Yesu ka ana guru-Do, domengkitao keu ara hieno mokariomo hawe a luwuno hakano.

²¹ Onaemo ka ipasimpewowoloo i Peturu hapa anu gagiomo, ka i'amba motaeako Ira i Yesu, ”Guru, Ikitaomo, keu ara anu tinotonaa-Miu atuu mokariomo.”

²² Dosangki ira i Yesu, ”Pe'ala-ala Iramo Ue Ala!

²³ Kupauakomiu: Menteeano ba isema motaeakono torukuno andio: Pelimbamo ka tetadiako a laro ntahi! Poolo nahi nanta-nanta aroano, sine ipe'ala-alao, nine hapa anu pinauno atuu ta gagi, asalakono atuu ta gagi ndi onae.

²⁴ Onaemo pu'uno ka Kupauakomiu: hapamo koa anu inemamiu ka impekakaiako, impe'ala-alaomo nine imentarimaomo, asalakono mongkona atuu komiu mewineeako.

²⁵ Ka tewala mpentade komiu mpekakai, ime'amampuniomo ari ba mansa hinao kodei aroamiu a mpe'asa miamiu, ka Ondae mbo'u Amamiu i suruga umampunio luwuno salamiu.” [

²⁶ Sine tewala nahi me'ampunio, asalakono Ondae mbo'u Amamiu anu i suruga nahi Ira umampunio luwuno salamiu.]

Pesikeno mongkona pabawa-Do i Yesu 11:27-33 (Mat. 21:23-27; Luk. 20:1-8)

²⁷ Ka Do'amba i Yesu ka ana guru-Do hawe mbo'u i Yerusale. Tempono Dopelempa i Yesu a kintalano Raha-Do Ue Ala, mehawe iramo ndi Ondae petewawado sando mpesomba, anu mponto'ori Taura ka mia memota'u,

²⁸ ka dompesikeno ndi Ondae, ”Saru pabawa hapake Ipoweweuako luwuno atuu? Ka isemake anu moweea-Komiu pabawa atuu, ranta ka iweweuo luwuno atuu?”

²⁹ Sumangki Ira i Yesu ndi ondae, ”Aku mesikeno aasa rupa ndi omiu. Imesangki Aku ka Ku'amba pauakomiu saru pabawa hapa Kuweweuo luwuno atuu.

³⁰ Pobahono i Yohane atuu, inso i suruga ke inso a mia? Imesangki Aku!”

³¹ Dompepau-pauakono pada ondaedo, ka dompotae, ”Tewala mpotae kita: Inso i suruga, Ira motae: Tewala kanatuu, tembio ka nahi impe'ala-alao?

³² Sine, komba kita mpotae, Inso a mia!” Hangano medoito ira a mia hadio, hangano luwuno mia mpotae nine i Yohane mentee ntu'u aasa nabi.

³³ Ka do'amba mesangki Ira i Yesu, ”Nahi kimento'orio.” Onaemo Ondae i Yesu ka Dopotae ndi ondae, ”Tewala kanatuu, nahi Aku mbo'u pauakomiu saru pabawa hapa Kuweweuo luwuno atuu.”