I MARAKUSU 10 - Wunta Mempori

Teposuaa 10:1-12 (Mat. 19:1-9)

¹ Inso i tu'ai Ondae i Yesu melungka lumako i wita Yudea ka i wita asatowano koro Yarade ka i tu'ai mbo'u mia hadio mehawe nggumowo ira; ka Dopaguru ira mbo'u kana gau-Do mpiha.

² Ka mehawe iramo to Parisi, ka hangano ira me'ara-arahako Ira i Yesu mpesikeno ira ndi Ondae, ”Moiko koake aasa tama ba iteposuaakono beineno?”

³ Sine Dosangki ira, ”Hapa parentano i Musa ndi omiu?”

⁴ Mesangki ira, ”I'indu kami koa i Musa teposuaakono, poolo moweweu wunta teposuaa.”

⁵ Ka Do'amba motaeako ira i Yesu, ”Hangano koa moteano aroamiu onaemo ka iburiakomiu i Musa parenta andio.

⁶ Hangano a pompu'uano wawontolino, Dopokogagi ira Ue Ala tama ka beine,

⁷ onaemo pu'uno tama ta binta ira amano ka ineno ka ipe'asaakono beineno,

⁸ ranta orua ira atuu gagi asa ihi. Kanandiomo ondae komba orua mbo'u, tendeano aasa.

⁹ Onaemo pu'uno, hapa anu Dopo'asaomo Ue Ala, nahi moiko iponsuao mia.”

¹⁰ Tempono hawe Iramo i raha, mpesikeno ira mbo'u ana guru atuudo ndi Ondae i Yesu mongkona pinau-Do atuu.

¹¹ Ka Do'amba motaeako ira, ”Ba isema teposuaakono kombiano ka i'amba mekombiaako beine susua, onae tuwu a laro ponsosaboa a beineno atuu.

¹² Ka tewala beineno teposuaakono tamano ka mekombiaako mbo'u tama susua, onae monsosabo.”

Ondae i Yesu rumonso ira nana'ote 10:13-16 (Mat. 19:13-15; Luk. 18:15-17)

¹³ Ka do'amba mia mewawa ira nana'ote kodei ndi Ondae i Yesu, ka Do'angga ira; sine ana guru-Do tekudaako ira mia atuudo.

¹⁴ Mansa-Do kumitao i Yesu anu gagi atuu, tekuda Ira ka Dopotaeako ira, ”Po'inee ira nana'ote atuudo me'aiwa ndi Ongkue, si me'onsoi ira, hangano mia anu kana ondaemo atuu anu mpe'umbuo Poparentaa-Do Ue Ala.

¹⁵ Kupauakomiu: Menteeano ba isema nahi tarimao Poparentaa-Do Ue Ala kana aasa nana'ote kodei, onae nahi ta mewinso i larono.”

¹⁶ Ka Do'amba i Yesu kumopui ira nana'ote atuudo ka kontongaa-Do numaao kae-Do i wawodo ka Doronso ira.

Mia kaea motungko ipewinso a Poparentaa-Do Ue Ala 10:17-27 (Mat. 19:16-26; Luk. 18:18-27)

¹⁷ I tempono Dopelungka i Yesu Ira motilaloakono pelempaa-Do, haweomo aasa mia melulu-lulu tepohaweako Ira ka kontongaano menggolontu i aro-Do onae mesikeno, ”Guru anu moiko, hapa anu asalakono kuweweuo ka kupohawe tuwua anu nahina tampulaano?”

¹⁸ Sumangki Ira i Yesu, ”Tembio ka upotae Ongkue moiko? Nahina maupo te'asa mia anu moiko sangkadio butu inso ndi Ondae Ue Ala.

¹⁹ Manasa uto'orio luwuno parenta-Do Ue Ala: Si pompepate, si ponsosabo, si ponako, si pesakosii megaupi, si pompokorugi pe'asa miamu, pelangkai ira amamu ka inemu!”

²⁰ Ka i'amba motae mia atuu ndi Ondae, ”Guru, luwuno atuu kutondaomo mompu'u da kumongura.”

²¹ Sine Ondae i Yesu mengkita ndi onae ka Dopehohawao, ka Do'amba motaeakono, ”Aasapo mbo'u makuramu: lakomo, asaomo hapa anu pine'uemu ka peweengakonomo atuu a mia memongkokolaro, asalakono komohawe arataa i suruga, umarino atuu aiwamo ramai ka tonda Akumo.”

²² Rumongeo pau atuu gagiomo masusa, ka i'amba lumako masusa aroa, hangano hadio arataano.

²³ Ka Do'amba i Yesu mengkita a ana guru-Do limbu-limbu ka Dopotaeako ira, ”Motungko ntu'u mia hadio doino mewinso a laro Poparentaa-Do Ue Ala.”

²⁴ Mengkohali-hali ira ana guru-Do merongeo pinau-Do atuu. Sine Dosombuo mbo'u i Yesu, ”Ana-Ku luwu-luwu, motungko ntu'u mewinso a laro Poparentaa-Do Ue Ala.

²⁵ Moruanaopo aasa unta telalo a bolono seu sekonopo aasa mia kaea mewinso a laro Poparentaa-Do Ue Ala.”

²⁶ Tepahe iramo ntewuka ka dompepau-pau pada ondaedo, ”Tewala kanandio, isemake anu pinokokadudui?”

²⁷ Ondae i Yesu mengkita ndi ondae ka Dopotae, ”A mia mongkona atuu nahi polio, sine komba kanatuu ndi Ondae Ue ala. Hangano luwuakoano Dopolio Ue Ala.”

Tambo tumonda Ira i Yesu 10:28-31 (Mat. 19:27-30; Luk. 18:28-30)

²⁸ Motaeomo i Peturu ndi Ondae i Yesu, ”Omami andio kimebintaomo luwuakoano ka kimentonda Komiu!”

²⁹ Sumangki Ira i Yesu, ”Kupauakomiu, menteeano sompo mia anu hangano Ongkue ka hangano Lele Mawongkoa ka ibintao rahano, pepaekompono tama ke pepaekompono beine, ineno ke amano, luwuno anano ke lereno,

³⁰ mia atuu kanandio-andio i tempo koa mbo'u andio ta wali tumarimao meluka asa etu: raha, pepaekompo tama, pepaekompo beine, ine, ana ka lere, maupo tinondaako mperupa-rupa pobobarasaia, ka a tempo anu ta hawe onae ta tumarimao tuwua anu nahina tampulaano.

³¹ Sine hadio mia anu tese'elu ta gagi anu pokotompa ka anu pokotompa ta gagi anu tese'elu.”

Pompopoto'ori kopentoluno mongkona tebobarasai-Do i Yesu 10:32-34 (Mat. 20:17-19; Luk. 18:31-34)

³² Ondae i Yesu kontongaa-Do a mpelempaa saru ana guru-Do melako i Yerusale ka Ondae i Yesu i arono. Ana guru-Do mensalalaro ka mia mbo'u anu mentonda Ira medoito. Pohonapo mbo'u Dopoboi ira i Yesu ana guru-Do anu hopulu ka orua ka Dopompu'u pauako ira hapa anu ta gagi a ngkoroi-Do,

³³ Dopotae, ”Kanandio-andio kita melako i Yerusale ka i Ana Manusia Ira pineweengako a mpetewawado sando mpesomba ka guru agama, ka ira mempakosiao Ondae hinuku mate. Ka Ira pineweengako a luwuno tongku anu nahi domento'ori Ira Ue Ala,

³⁴ ka Ira pinasinggiri, inonui, sinepi ka pinepate, ka umarino otolu oleo Ira mewangu.”

Po'emado i Yakobu ka i Yohane Komba meparenta tendeano mompekakaako 10:35-45 (Mat. 20:20-28)

³⁵ Ka do'amba i Yakobu ka i Yohane, anano i Sebedeu, rumangkuhi Ira i Yesu ka dopotaeako Ira, ”Guru, kiperorohio ka I'induo aasa po'emamami!”

³⁶ Dosangki ira, ”Hapa anu inehemiu ba Kuweweuakomiu?”

³⁷ Ka do'amba motae, ”I'ehea kami koa mentoro a laro marambaa-Miu te'ipua, anu asa mia i koana-Miu ka anu asa mia mbo'u i manggali-Miu.”

³⁸ Sine Dopotaeako ira i Yesu, ”Nahi ito'orio hapa anu inemamiu. Komiu polioke uminuo ihino tonde anu asalakono Aku uminuo ka binahoako pobaho anu asalakono Aku tumarimao?”

³⁹ Sumangki ira, ”Kami koa polio.” Dopotaeako ira i Yesu, ”Lano, komiu koa uminuo ihino tonde anu asalakono Aku uminuo ka komiu binahoako pobaho anu asalakono Aku tumarimao.

⁴⁰ Sine mongkona mentoro i koana-Ku ka i manggali-Ku, komba to'oria-Ku meweengakono. Anu atuu ira mewineeako mia tiano isema atuu pinatindaako.”

⁴¹ Rumongeo atuu hopulu ana guru anu mehano tekudaako ira i Yakobu ka i Yohane.

⁴² Sine Dopoboi ira i Yesu ka Dopotae, ”Imento'orio, nine ondae anu nineeako mia meparenta a luwuno tongku meparenta mokora ira palilido, ka luwuno anu langkai potorodo mpolempao pabawado dumadai ira.

⁴³ Komba kanatuu i olo omiu. Ba isema mingki gagi langkai i olomiu, asalakono ka igagi puu pompekakakomiu,

⁴⁴ ka ba isema mingki gagi petewawa, asalakono ka igagi atamiu luwu.

⁴⁵ Hangano i Ana Manusia mbo'u hawe komba ka Dopinekakaako, tendeano mompekakaako ka meweengakono penaa-Do gagi tolosino hadio mia.”

Ondae i Yesu mokotompao i Baratimeu 10:46-52 (Mat. 20:29-34; Luk. 18:35-43)

⁴⁶ Ka i'amba hawe Iramo i Yesu ka ana guru-Do i Yeriko. Ka tempono Dopeluarako i Yesu inso i Yeriko, mperonga-ronga saru ana guru-Do ka mia hadio anu ntehuhu, hinao asa mia puu mpo'ema-ema anu morawu, meneeako i Baratimeu, anano i Timeu, mentoro a wiwi nsala.

⁴⁷ Mansano rumongeo, nine atuu Ondaemo i Yesu to Nasare, mompu'uomo mebooli, ”Oo Yesu, Anano i Daudi, Ipehohawa akumo!”

⁴⁸ Hadio mia kumuahakono ka si pohohoi. Sine komero-merokuno ipebooli, ”Anano i Daudi, Ipehohawa akumo!”

⁴⁹ Ka Do'amba i Yesu menaa-naa ka Dopotae, ”Imempoboio!” Domempoboio mia morawu atuu ka dompotaeakono, ”Pokorosoo aroamu, pentademo, Dopoboiko.”

⁵⁰ Ka i'amba lumohuo lemba meloeno, mompari-pari onae mentade ka ilako tepohaweako Ira i Yesu.

⁵¹ Mesikeno Ira i Yesu ndi onae, ”Hapa anu inehemu ba Kuweweuakomu?” Sumangki mia morawu atuu, ”Guru, ineheku ka kupongkita!”

⁵² Ka Do'amba i Yesu motaeakono, ”Lakomo ikaduduikomo pompe'ala-alamu!” I tempo koa mbo'u atuu onae mongkitaomo, ka i'amba tumonda Ira i Yesu a mpelempaa-Do.