I MARAKUSU 1 - Wunta Mempori

I Yohane Puu Pobaho 1:1-8 (Mat. 3:1-6, 11-12; Luk. 3:3-6, 15-17; Yoh. 1:19-28)

¹ Ndiomo pompu'uano Lele Mawongkoa mongkona Ondae i Yesu Kerisituu, Ana-Do Ue Ala.

² Kana hinao teburi a wuntano Nabi Yesaya, ”Kitaomo, Kutenao tinena-Ku mese'elungi-Komiu, onae ta patindao pesalaa-Miu;

³ hinao suarano mia meboo-booli i pada one: Patindaako Iramo i Ue pesalaa-Do, pokoleoako Iramo sala”,

⁴ kanandiomo i Yohane Puu Mpobaho meposaba i pada one ka ipobaho tepidia tiano po'ampunia hala.

⁵ Ka i'amba mehawe iramo ndi onae mia inso i asa wawo wita Yudea ka luwuno palilino Yerusale, ka kontongaado memangakuakono halado mebinaho ira a ngkoro Yarade.

⁶ I Yohane mompokona lemba meloe inso a wulu unta ka meboo-booako kuli, ka kaangano kosume ka siu hoani.

⁷ Ndiomo anu pinaleleno, ”Umarino ongkue Ira hawe anu lalu pabawa sekono ongkue; sekonopo metuundu kumaleako Ira onggono sapatu-Do nahi pototoku.

⁸ Ongkue bahoakomiu uwoi, sine Ondae Ira bahoakomiu Penaa Mempori.”

I Yohane baho Ira i Yesu 1:9-11 (Mat. 3:13-17; Luk. 3:21-22; Yoh. 1:32-34)

⁹ I tempo atuu hawe Iramo i Yesu inso i Nasare i wita Galilea, ka Ondae ibaho Ira i Yohane a ngkoro Yarade.

¹⁰ I tempono Dope'engka inso a uwoi, Dokitao langi teberi, ka Penaa kana manu-manu marapatii metii i wawo-Do.

¹¹ Ka i'amba terongeomo suara inso i suruga, ”Omuemo Ana-Ku anu pinehohawa-Ku, Omuemo mokomawongkoo aroa-Ku.”

Po'ara-arahakoa i pada one 1:12-13 (Mat. 4:1-11; Luk. 4:1-13)

¹² Nahi tehine umarino atuu Penaa wawa Ira i pada one.

¹³ I pada one atuu Dopo'ia patopulu oleo tehineno, i Mosa'o umara-arahako Ira. Dopo'ia i ra'ai i olodo kondehora mo'ila ka mala'eka mpekakaako Ira.

Ondae i Yesu meposaba i Galilea 1:14-15 (Mat. 4:12-17; Luk. 4:14-15)

¹⁴ Umarino rinako i Yohane hawe Iramo i Yesu i Galilea paleleo Lele Mawongkoa-Do Ue Ala,

¹⁵ Dopotae, ”Tempono inihiiomo; Poparentaa-Do Ue Ala rangkuomo. Intepidimo ka impe'ala-alaomo Lele Mawongkoa!”

Ondae i Yesu mompoboi ana guru anu amba-ambano 1:16-20 (Mat. 4:18-22; Luk. 5:1-11)

¹⁶ Tempono Ondae i Yesu kontongaa-Do melempa tumondao wiwi rano Galilea, Dokitao i Simo ka i Andarea, pepaekompono i Simo. Kontongaado tumendeo buanido a rano, hangano ondae puu mpobuani bou.

¹⁷ Dopotaeako ira i Yesu, ”Aiwa, ka itonda Akumo ka Aku mokogagi komiu puu mpobuani mia.”

¹⁸ Ka do'amba mompari-pari bintao buanido ka dotonda Ira.

¹⁹ Ka mansa-Do motilaloakono i Yesu pelempaa-Do nahi olai, Dokitao i Yakobu, anano i Sebedeu, ka i Yohane, pepaekompono, kontongaado mokomoikoo buanido a laro bangka.

²⁰ Mompari-pari Ira i Yesu moboi ira onaemo ka dobintao amado, i Sebedeu, a laro bangka saru mia mentinambodo ka do'amba tumonda Ira.

Ondae i Yesu a laro raha tepumpua i Kapenau 1:21-28 (Luk. 4:31-37)

²¹ Mehawe iramo i Kapenau. Mansano mompu'u oleo Saba, Ondae i Yesu mompari-pari mewinso a laro raha tepumpua ka mompaguru.

²² Mengkohali-hali ira merongeo pompaguru-Do, hangano Dopaguru ira kana mia anu pabawa, komba kana luwuno guru agama.

²³ I tempo atuu a laro raha tepumpua atuu hinao asa mia anu pinewinsokino onitu nsa'o. Mia atuu mebooli,

²⁴ ”Hapa ta wineweu-Miu ndi omami, hei Yesu to Nasare? Komiu hawe mepate kami? Kuto'orio isema Omiu: Anu Mempori inso ndi Ondae Ue Ala.”

²⁵ Sine Dokuahakono i Yesu, Dopotae, ”Perodo-rodo, peluarakomo inso ndi onae!”

²⁶ Onitu nsa'o atuu nggumenggetoo mia atuu, ka kontongaano meraali meroku onae meluarako inso ndi onae.

²⁷ Mengkohali-hali ira luwu, onaemo ka domempopauo, dompotae, ”Hapa ndio? Aasa pompaguru wo'ohu. Ondae mepauako pabawa. Maupo onitu nsa'o Doparenta ira ka domentondao.”

²⁸ Ka i'amba rongaomo telele mongkona Ondae i asa wawo wita Galilea.

Ondae i Yesu mokotompao ponino i Peturu anu beine ka hadio mia susua 1:29-34 (Mat. 8:14-17; Luk. 4:38-41)

²⁹ Sapeluarako-Do inso a raha mpesombaa atuu lumako Iramo i Yesu saru i Yakobu ka i Yohane a rahano i Simo ka i Andarea.

³⁰ Ponino i Peturu anu beine kombole-mbole hangano mahaki mokula. Liu domempauako Ira i Yesu teweweuno.

³¹ Lumako Ira a mpo'iangano beine atuu, ka tekonai uminio kaeno Dowanguo, ka i'amba tompaomo mokulano. Ka i'amba beine atuu mekakaako ira.

³² Tamo wongi, umarino sumoo oleo, winawaomo ndi Ondae i Yesu luwuno mia anu memahaki ka anu pinewinsokino onitu nsa'o.

³³ Onaemo ka dompehowu luwuno palilino kota atuu i arono pewowa.

³⁴ Hadio mia pinokotompa-Do anu mperupa-rupa hakido ka monsaari hadio onitu nsa'o; Nahi Dobehe ira onitu nsa'o atuu mpepau, hangano domento'ori Ira.

Ondae i Yesu mompaguru a ngkota susua 1:35-39 (Luk. 4:42-44)

³⁵ Mo'o-mo'oru ntu'u, da wongi-wongi, mewangu Ira ka Dolako i bungkuno. Lumako Ira a mpo'ianga boni-boni ka Dopekakai i ra'ai.

³⁶ Sine i Simo ka wali-walino tumonda bungku Ira;

³⁷ tempono dontepohaweako Ira dompotae, ”Dome'ungke Komiu luwuno mia.”

³⁸ Sumangki Ira, ”Aiwamo ka tomelako a mpo'ianga susua, a ngkota anu ntepo'umpeda, ka Kupaleleo mbo'u i ra'ai Lele Mawongkoa, hangano onaemo Ku'aiwaako.”

³⁹ Ka Do'amba lumako a luwuno wita Galilea ka paleleo Lele Mawongkoa a luwuno raha tepumpuado ka sumaari ira onitu nsa'o.

Ondae i Yesu mokotompao asa mia anu mahaki ngkuli mesaki 1:40-45 (Mat. 8:1-4; Luk. 5:12-16)

⁴⁰ Aasa mia anu mahaki ngkuli mesaki aiwa ndi Ondae i Yesu, ka kontongaano menggolontu i aro-Do onae mepetulungi ndi Ondae, ipotae, ”Tewala behe Komiu, Ipolio mokotompa aku.”

⁴¹ Ka teleluomo aroa-Do mehohawao, ka Do'amba tumasiakono kae-Do, umanggao mia atuu ka Dopotae, ”Behe Aku, ka ugagimo tompa.”

⁴² I tempo koa mbo'u atuu moliuomo haki ngkuli mesakino mia atuu, ka tompaomo.

⁴³ Mompari-pari Ira tumenao mia atuu ka ilako saru umoliwio moroso,

⁴⁴ ”Pepentiio, si pompau hapa-hapa mongkona andio maupo ndi sema, sine lakomo, popokitaomo koroimu a nsando mpesomba ka pesombaakonomo pesombamu hangano tompakomo, kana peparentano i Musa.”

⁴⁵ Sine mia atuu lumako pauo anu gagi atuu ka paleleo ba isua-suamo koa, ranta Ondae i Yesu nami Dopepopokita mewinso a laro ngkota. Mo'ia Ira i bungkuno a mpo'ianga anu boni-boni; sine mehawe ira koa mbo'u mpiha mia ndi Ondae inso a luwuno po'ianga.