I LUKASI 8 - Wunta Mempori

Beine anu mpekakaako Ira i Yesu 8:1-3

¹ Nahi tehine umarino atuu Ondae i Yesu melempa sumompoo kota ka inia mompalele Lele Mawongkoa Poparentaa-Do Ue Ala. Hopulu ka orua ana guru-Do mperonga saru Ondae,

² ka ba opia ira mbo'u beine anu mempinokotompa iramo inso a mpinewinsokido onitu nsa'o ke mperupa-rupa haki, onaemo i Maria anu nineeako i Madalena, anu pinotolaomo inso a opitu onitu nsa'o,

³ i Yohana beineno i Kusa puu pompekaria arataano i Herode, i Susana ka hadio beine susua. Beine andiodo mpekakaako ira bawaa atuu inso a ngkaeado.

Potundaano mongkona asa mia anu morawo 8:4-15 (Mat. 13:1-23; Mrk. 4:1-20)

⁴ Tempono dontehuhu mia hadio mehawe, onaemo mia anu te'inso a ba'opia kota ntepumpu ndi Ondae i Yesu, mepau Iramo a laro aasa potundaano,

⁵ ”Hinao asa mia anu morawo meluarako ta rumawoo iniino. Tempono iporawo, asa ntia inii atuu tedonta a wiwi nsala, ka do'amba melandao mia ka manu-manu i laro meene metungkuo ranta ka ipingko.

⁶ Asa ntia tedonta a wita melaro watu, ka mansano tuwu gagi mokari hangano nahi pohawe uwoi.

⁷ Asa ntia mbo'u tedonta a laro ewo rui, ka ewo atuu tuwu meronga-ronga ka ihidio ranta ka imate.

⁸ Ka asa ntia tedonta a wita anu moiko, ka mansano tuwu mewua meluka asa etu.” Umari-Do mepau kanandio mebooli Ira i Yesu, ”Isema hinao biri porongeno, asalakono ka iporonge!”

⁹ Mpesikeno ira ana guru-Do ndi Ondae, hapa tinoono potundaano atuu.

¹⁰ Ka Do'amba sumangki, ”Ndi omiu pinoweeako pe'aroa ka imento'orio rahasiano Poparentaa-Do Ue Ala, sine a mia mehano mongkona atuu pinau a laro potundaano, kai maupo dompengkita nahi domengkitao ka maupo domerongeo nahi dompokonto'orio.

¹¹ Ndiomo pengkonaano potundaano atuu: Inii atuu onaemo pau-Do Ue Ala.

¹² Anu tedonta a wiwi nsala atuu onaemo mia anu rumongeomo; ka i'amba haweomo i mosa'o umalao pau atuu inso i laro aroado, ka si dompompe'ala-ala ka mengkinadudui.

¹³ Anu tedonta a wita anu melaro watu atuu onaemo mia, anu mansado merongeo pau atuu, mawongko aroado mentarimao, sine ondae atuu nahi pehaka, sarai koa dompe'ala-alao ka a tempo po'ara-arahakoa mpeposuka ira.

¹⁴ Anu tedonta a laro ewo rui onaemo mia anu rumongeomo pau atuu, ka a laro ntumuwudo lembuino tehidiako sala-laro ka kaeaa ka manangaino tumuwu, ranta nahi pewuaako wua anu moiko.

¹⁵ Anu tedonta a wita anu moiko atuu onaemo mia, anu mansado merongeo pau atuu, menaao i laro aroado anu moiko ka mpoluarako wua a pompedatodo.”

Potundaano mongkona hulu 8:16-18 (Mrk. 4:21-25)

¹⁶ ”Nahina mia anu mompolanga hulu ka i'amba tumutuwiakono kusi ke numaao a ntoto poturia, sine inaao a wawo ngkaruno hulu, kai luwuno mia anu mpewinso a laro raha mpokokitao wantano.

¹⁷ Hangano nahina te'asa anu tewuni anu nahi ta pinokomengkaa, ka nahina te'asa anu rahasia anu nahi ta tino'ori ka pinopoto'ori.

¹⁸ Onaemo pu'uno, impepentiio kana'umpe porongemiu. Hangano isema anu hinao, ndi onae ta pinowee, sine isema anu nahina, inso ndi onae ta inala, maupo mbo'u anu potaeno hinao ndi onae.”

Ondae i Yesu ka pepaekompo-Do 8:19-21 (Mat. 12:46-50; Mrk. 3:31-35)

¹⁹ Ine-Do i Yesu ka pepaekompo-Do me'aiwa ndi Ondae, sine nahi dontepohaweako Ira hangano mia hadio.

²⁰ Domempauako Ira mia, ”Ine-Miu ka pepaekompo-Miu mekongko ira i bungkuno ka ira mingki tepohawea-Komiu.”

²¹ Sine Dosangki ira, ”Ine-Ku ka pepaekompo-Ku onaemo ondae anu merongeo pau-Do Ue Ala ka meweweuo.”

Angi mokora pinokotemonto 8:22-25 (Mat. 8:23-27; Mrk. 4:35-41)

²² Pohona Ondae i Yesu me'ula a bangka meronga saru ana guru-Do, ka Dopotaeako ira, ”Aiwamo ka tomelako i asatowano rano.” Ka i'amba melako iramo.

²³ Ka kontongaado mpesumomba, tekoturi Ira i Yesu. Borono tiiomo angi mokora a rano, ranta bangka atuu ipewinsokio uwoi ka iramo memasola luwu.

²⁴ Ka me'aiwa iramo ana guru-Do wangu Ira, dompotae, ”Guru, Guru, kita memasola!” Mewangu Iramo, ka Do'amba kumuahakono angi ka uwoi anu uma'e atuu. Ka menaa-naaomo angi ka uwoi atuu ka rano atuu gagi temonto.

²⁵ Ka Do'amba motaeako ira, ”Isuake pompe'ala-alamiu?” Ka medoito iramo ka mengkohali-hali, ka do'amba mpepau-pau pada ondaedo, ”Isema tokoa mia andio, ranta ka Doparentao angi ka uwoi ka mpetenunu ira ndi Ondae?”

Ondae i Yesu sumaario onitu nsa'o inso a nto Gerasa 8:26-39 (Mat. 8:28-34; Mrk. 5:1-20)

²⁶ Ka do'amba i Yesu ka ana guru-Do mpewuatako a witado to Gerasa anu po'iangano i asatowano Galilea.

²⁷ Mansa-Do mewuatako i Yesu a ntuwu wita, haweomo aasa tama inso i kota atuu tepohaweako Ira; mia atuu dompewinsokio onitu nsa'o ka tehineomo nahi pesangka ka nahi po'ia a laro raha, sine a ngkaburu.

²⁸ Tempono ikita Ira i Yesu, kumoraomo ka i'amba menggolontu i aro-Do ka ipepau meroku, ”Komiu mbio aku, hei Yesu Ana-Do Ue Ala Anu i Wawono luwuakoano? Ku'emao ntu'u ndi Omiu, si bobarasai aku.”

²⁹ Ipotae kanandio hangano Doparentao i Yesu onitu nsa'o atuu ka ipeluarako inso a mia atuu. Hangano mararu onitu nsa'o atuu moporende-rendeo, ka dagaino, onae rinante ka pinongu, sine ibiteo luwu ponguno atuu ka onae isaario onitu nsa'o atuu a boni-boniano.

³⁰ Ka motae Ira i Yesu ndi onae, ”Isemake neemu?” isangki Ira, ”I Legio,” hangano onae ipewinsokio hadio onitu nsa'o.

³¹ Ka i'amba onitu nsa'o atuudo mpo'ema ndi Ondae i Yesu, ka si parenta ira mpewinso a wingke matea.

³² I ra'ai hinao aasa bawaa langkai boe kontongaado mpo'ungke kaangado a ngkorimbino torukuno, ka i'amba onitu nsa'o atuudo mpo'ema ndi Ondae i Yesu, ka Do'eheako ira mpewinso a boe atuudo. Do'induo i Yesu po'emado.

³³ Ka do'amba mpeluarako onitu nsa'o atuudo inso a mia atuu ka dompewinso a boe atuudo. Bawaano boe atuudo mpentoa a laro rano inso a wingke ka do'amba memate mo'opo.

³⁴ Mansado mengkitao anu mpodagai boe atuu hapa anu gagiomo, mpelulu ira ka do'amba mentutuluo anu gagi atuu a ngkota ka a luwuno inia petengi-tengino.

³⁵ Ka mpeluarako iramo mia ira mengkitao hapa anu gagiomo. Me'aiwa ira ndi Ondae i Yesu ka dontepohaweakono mia anu domebintaomo onitu nsa'o atuu mentoro a mpuu karu-Do i Yesu; mesangkaomo ka moikoomo ipompewowolo. Onaemo ka domedoito.

³⁶ Mia anu domengkitaomo ondaedo anu gagi atuu mempauako ira, kana'umpe mia anu pinewinsokino onitu nsa'o atuu kinaduduiomo.

³⁷ Ka i'amba luwuno palili i wita Gerasa me'emao ndi Ondae i Yesu, ka Dobinta ira hangano tedoa ira medoito. Onaemo ka Dope'ula a bangka, ka Do'amba sumomba mekule.

³⁸ Ka mia anu domebintaomo onitu nsa'o atuu mo'ema ka i'ineheako tumonda Ira. Sine Dotenao i Yesu ka ilako, Dopotae,

³⁹ ”Pekulemo i rahamu ka tutuluomo luwuakoano anu Doweweuomo Ue Ala ndi omue.” Mekuleomo mia atuu sumompoo luwuno kota ka ipauo luwuno hapa anu Doweweuomo i Yesu a ngkoroino.

Ondae i Yesu wanguo anano i Yairu ka mokotompao aasa beine anu mahaki merea 8:40-56 (Mat. 9:18-26; Mrk. 5:21-43)

⁴⁰ Tempono Dopekule i Yesu, domentotowo Ira mia hadio hangano luwudo mensikori Ira.

⁴¹ Ka haweomo aasa mia anu meneeako i Yairu. Onae petewawa a raha tepumpua. Kontongaano menggolontu i arono karu-Do i Yesu i'emao ndi Ondae, ka Dolako i Yesu i rahano,

⁴² hangano anano beine anu asa-asano, anu tinuwuno bara'ura hopulu ka orua nta'u, ilawu mate. A laro pelempaa lumako i tu'ai Ondae i Yesu domehihidi Ira mia hadio.

⁴³ Hinao aasa beine anu hopulu ka orua nta'umo imahaki merea ka nahina anu mokompakulio maupo isema.

⁴⁴ Onae lumako umpedaako Ira i Yesu inso i bungku-Do ka i'anggao untu lemba meloe-Do, ka i tempo koa mbo'u atuu menaa-naaomo mereano.

⁴⁵ Ka Do'amba motae i Yesu, ”Isema anu umangga Aku?” Ka hangano nahina anu mangakuakono, motaeomo i Peturu, ”Guru, mia hadio anu mpenggowo ka humidi Komiu.”

⁴⁶ Sine Dopotae i Yesu, ”Hinao asa mia anu umangga Aku, hangano Kuto'orio hinao pabawa meluarako inso a ngkoroi-Ku.”

⁴⁷ Tempono ikitao beine atuu, nine wineweuno atuu tino'ori, aiwaomo saru mondidi-ndidi, menggolontu i aro-Do ka itutuluako ira mia hadio hapa pu'uno ka i'angga Ira ka nine i tempo koa mbo'u atuu onae tompa.

⁴⁸ Onaemo ka Dopotaeakono beine atuu, ”Hei ana-Ku, ikaduduikomo pompe'ala-alamu, lakomo temoiko!”

⁴⁹ Tempono da mepau Ira i Yesu, haweomo asa mia inso a nsomborino petewawa a raha tepumpua atuu ka ipotae, ”Anamiu mateomo, siimo mbo'u ipokomasusa Ira Guru!”

⁵⁰ Sine Dorongeo i Yesu ka Dopotaeakono i Yairu, ”Si doito, pompe'ala-alamo koa, ka anamu ta tekadudui.”

⁵¹ Kohawe-Do a rahano i Yairu, nahi Do'eheakono i Yesu maupo te'asa mia tumonda Ira mewinso, sangkadio i Peturu, i Yohane ka i Yakobu ka amano nana'ote atuu saru ineno.

⁵² Luwuno mia mpengese ka mensabangio nana'ote atuu. Sine Dopotae i Yesu, ”Si mpengese; onae komba mate, sine moturi.”

⁵³ Dompengingisii Ira, hangano domento'orio nine mateomo nana'ote atuu.

⁵⁴ Ka Do'amba i Yesu uminio kaeno nana'ote atuu ka Dopebooli, Dopotae, ”Hei ana pewangumo!”

⁵⁵ Ka mekuleomo penaano nana'ote atuu ka i tempo koa mbo'u atuu onae mewangu ka ipentade. Ka Do'amba i Yesu tumena ira ka domempakao nana'ote atuu.

⁵⁶ Ka kohali-hali iramo mia mota'uno nana'ote atuu, sine Ondae i Yesu umonto ira pauo maupo ndi semamo koa hapa anu gagi atuu.