I LUKASI 7 - Wunta Mempori

Ondae i Yesu mokotompao atano aasa petewawa sorodadu i Kapenau 7:1-10 (Mat. 8:5-13; Yoh. 4:46-53)

¹ Mansa-Do umari i Yesu mepau i arodo mia hadio, mewinso Iramo i Kapenau.

² I tu'ai kongko aasa petewawado sorodadu anu hinao asa mia atano, anu tedoa ituduo. Ata atuu kontongaano mahaki me'isei ka ilawu mate.

³ Tempono irongeo petewawado sorodadu atuu mongkona Ondae i Yesu, itena ira ba opia mia mota'u to Yahudi me'emao ndi Ondae ka Do'aiwa mokotompao atano.

⁴ Me'aiwa ira ndi Ondae i Yesu ka tedoa ira pepetulungi ndi Ondae, dompotae, ”Onae tekona Itulungio,

⁵ hangano ipehohawao tongkuto ka onaemo anu wanguo raha tepumpuamami.”

⁶ Ka Do'amba i Yesu lumako meronga saru ondae. Tempono nami Do'olai mbo'u inso a rahano petewawado sorodadu atuu, petewawado sorodadu atuu tumena ira sambe'eno ka domempauako Ira, ”Ue, siimo Ipe'i'isei, hangano nahi pototoku tumarima Komiu i laro rahaku;

⁷ onaemo pu'uno ongkue mbo'u tumuduo koroiku nahi pototoku aiwa ndi Omiu. Sine Ipepaumo koa te'asa mpali pau, asalakono ataku atuu ta tompa.

⁸ Hangano ongkue andio mia i totono, ka i totoku hinao mbo'u sorodadu. Tewala kupotaeakono aasa sorodadu atuu: Lako!, asalakono onae lumako, ka a aasa mia mbo'u: Aiwa!, asalakono onae aiwa, ke maupo a ataku: Anggao andio!, asalakono i'anggao.”

⁹ Mansa-Do rumongeo i Yesu pau atuu, Dokohali-haliakono, ka saru mewolili a mia hadio anu tumonda Ira, Dopotae, ”Kupauakomiu, pompe'ala-ala anu kanandio langkaino nahi Kuhori mohawe, maupo i olodo to Isaraeli!”

¹⁰ Ka mansado mpekule i raha mia mentinena atuu, domehaweomo ata atuu tompaomo.

Ondae i Yesu wanguo mangalitau i kota Nai 7:11-17

¹¹ Ka Do'amba i Yesu lumako a aasa kota anu meneeako Nai. Ana guru-Do melako saru Ondae, ka hadio mbo'u mia ntehuhu tumonda Ira.

¹² Mansa-Do umpeda a mpewowa langkaino kota, hinao mia mate kinati winawa meluarako, ana ntama, ana asa-asano ineno anu tuwu beineomo, ka hadio mia inso a ngkota atuu tumondao tuwu beine atuu.

¹³ Ka mansa-Do kumitao i Ue tuwu beine atuu, teleluomo aroa-Do mehohawao, ka Do'amba motaeakono, ”Si pengese!”

¹⁴ Saru rumangkuhio kati atuu Dodanggio, ka anu mengkatio mpenaa-naa, Dopotae, ”Hei mangalitau, Kupauakomu, pewangumo!”

¹⁵ Ka mewanguomo mia atuu ka ipentoro ka mompu'u mepau, ka Dopeweengakono i Yesu a ineno.

¹⁶ Luwuno mia atuu medoito ka dome'unde-unde Ira Ue Ala, saru mpotae, ”Aasa nabi langkai mesabaako i tonga-tongato,” ka ”hawe Iramo Ue Ala kumita-kita ira bawaa-Do.”

¹⁷ Ka tepaleleomo lele mongkona Ondae i Yesu i asa wawo wita Yudea ka luwuno petengi-tengino.

Ondae i Yesu ka i Yohane Puu Mpobaho 7:18-35 (Mat. 11:2-19)

¹⁸ Mansano mohawe lele i Yohane mongkona luwuno anu gagi atuu inso a ana guruno,

¹⁹ i poboio orua mia inso i olodo ka itena ira mesikeno ndi Ondae i Ue, ”Omiumoke anu Ira hawe atuu ke asalakono kami mposikori asa mia susua?”

²⁰ Mansado hawe ndi Ondae i Yesu mia orua ira atuu, dopotae, ”Itena kami i Yohane Puu Mpobaho mesikeno ndi Omiu: Omiumoke anu Ira hawe atuu ke asalakono kami mposikori aasa mia susua?”

²¹ I tempo atuu Ondae i Yesu mompokotompa hadio mia inso a luwuno haki ka marasaia ka inso a onitu nsa'o, ka mokompongkita ira hadio mia morawu.

²² Ka Dosangki ira i Yesu, ”Ilakomo, ka ipauakono i Yohane hapa anu kinitamiu ka rinongemiu. Mia morawu mongkita, mia pungku melempa, mia haki ngkuli mesaki gagi toompa, mia mobongo moronge, mia mate winangu ka a mia memongkokolaro pinaleleako lele moiko.

²³ Ka me'uraomo mia anu nahi gagi tepataa ka nahi tarima Aku.”

²⁴ Mansado lumako tinenano i Yohane atuu, mompu'u Iramo i Yesu mepauako ira mia hadio atuu mongkona i Yohane, ”Pombioke ka imelako i pada one? Mpongkita intowu anu lineluno angi ngkoraane ngkoramai?

²⁵ Ke pombioke ka imalako? Mpongkita mia anu mesangka alusu? Mia anu mesangka tekosi ka anu tuwu mare'e, po'iangano a langkanaeno mokole.

²⁶ Gagi pombioke ka imelako? Mpongkita nabi? Mentee, ka Kupauakomiu, tendeano laluaopo sekono nabi.

²⁷ Hangano mongkona onae hinao teburi: Kitaomo, Kutenao tinena-Ku mese'elungi-Komiu, onae ta patindao pesalaa-Miu i aro-Miu.

²⁸ Kupauakomiu: I olodo anu pine'anaakodo beine nahina anu langkaiopo sekono i Yohane, sine anu lalu kodei a Poparentaa-Do Ue Ala langkaiopo sekono onae.”

²⁹ Luwuno mia hadio anu rumongeo pinau-Do, tewinso luwuno puu popumpu sima'ulu, dompementee Ira Ue Ala, hangano ibaho iramo i Yohane.

³⁰ Sine to Parisi ka anu mponto'ori Taura nahi domentarimao tinoo-Do Ue Ala a ngkoroido, hangano nahi domebehe ibaho ira i Yohane.

³¹ Dopotae i Yesu, ”Saru hapake Kupotundaako ira mia andiodo ka saru hapake pengkenado atuu?

³² Ondae atuu pinotundaako nana'ote anu mpentoro a olu ka anu pada mpebooliako: Kimpesiloliakomiu, sine nahi melumense, kimpenaniako penani pompemasusa, sine nahi mpengese.

³³ Hangano hawe i Yohane Puu Mpobaho, nahi pongkaa roti ka nahi po'inu anggoro, ka impotae: Onae ipewinsokio onitu nsa'o.

³⁴ Ka i'amba hawe i Ana Manusia, Ondae mongkaa ka mo'inu, ka mpotae komiu: Kitaomo, Ondae asa mia modoko mongkaa ka mo'inu, sambe'edo puu popumpu sima'ulu ka mia ntehala.

³⁵ Sine ponto'ori mentee dompementeeo luwuno mia anu tumarimao.”

Ondae i Yesu i'urapi Ira beine tehala 7:36-50

³⁶ Aasa to Parisi umolu Ira i Yesu ka Do'aiwa mongkaa i rahano. Aiwa Ira i Yesu a rahano to Parisi atuu, ka Do'amba mentoro mongkaa.

³⁷ I kota atuu hinao aasa beine anu teto'ori asa mia tehala. Mansano rumongeo beine atuu, nine Ondae i Yesu kontongaa-Do mongkaa a rahano to Parisi atuu, aiwaomo mowawa aasa pido-pido puala me'ihi mina-mina.

³⁸ Kontongaano mengese ka ilako mentade i bungku-Do i Yesu umpeda a ngkaru-Do, ka i'amba bahoakono uwoi matano karu-Do atuu ka ipahihiakono wuuno, ka i'amba woo-wooo karu-Do ka ilanaiakono mina-mina atuu.

³⁹ Tempono to Parisi anu umolu Ira i Yesu kumitao anu gagi atuu, ipotae i laro aroano, ”Tewala Ondae andio nabi, manasa Doto'orio, isema ka mia hapake beine anu umanggao karuDo andio; manasa Doto'orio, nine beine atuu mia tehala.”

⁴⁰ Ka Do'amba motaeakono i Yesu, ”Simo, hinao anu Aku pauakomu.” Sumangki i Simo, ”Ipauomo Guru.”

⁴¹ ”Hinao orua mia anu mepasua a aasa mia anu mompesaboako doi. Anu asa mia mepasua lima etu dinare, anu aasa mbo'u lima pulu.

⁴² Hangano nahi dopoko'owahio, onaemo ka nami singao pasuado mia orua ira atuu. Isemake i olodo anu ta lalu mehohawao?”

⁴³ Sumangki i Simo, ”Potaeku onae anu lalu hadio pasuano nami singao.” Dopotae i Yesu ndi onae, ”Mentee pohawemu atuu.”

⁴⁴ Ka kontongaa-Do mewolili a beine atuu, Dopotaeakono i Simo, ”Ukitao beine andio? Kupewinso a rahamu, sine nahi upowee Aku uwoi pewo'ohi ngkaru-Ku, sine onae uwoi matano ibahoakono karu-Ku ka ipahihiakono wuuno.

⁴⁵ Nahi uwoo-woo Aku, sine onae mompu'u Kupewinso nahi penaa-naa woo-wooo karu-Ku.

⁴⁶ Nahi ulanaiakono lana ulu-Ku, sine onae karu-Ku ilanaiakono mina-mina.

⁴⁷ Onaemo pu'uno Kupauakomu, Halano anu hadio atuu inampuniomo, hangano hadioomo pompehohawa wineweuno. Sine mia anu tedei inampuni, tedei koa mbo'u pompehohawa wineweuno.”

⁴⁸ Ka Do'amba motaeakono beine atuu, ”Halamu inampuniomo.”

⁴⁹ Ka ondae anu mpentoro mpongkaa saru Ondae, mpompewowolo i laro aroado, ”Isemake Ondae andio, ranta ka Dopokompo'ampuni hala?”

⁵⁰ Sine Dopotae i Yesu a beine atuu, ”Ikaduduikomo pompe'ala-alamu, lakomo temoiko!”