I LUKASI 5 - Wunta Mempori

Puu mpobuani bou gagi puu mpobuani mia 5:1-11 (Mat. 4:18-22; Mrk. 1:16-20)

¹ Pohona Ondae i Yesu mentade a wiwi rano Genesare, tempo atuu mia hadio menggowo Ira inehedo mporonge pau-Do Ue Ala.

² Dokitao orua bangka a wiwi rano. Puu mpobuani mpetii iramo ka kontongaado mpowo'ohi buanido.

³ Me'ula Ira a laro aasa bangka atuu, onaemo bangkano i Simo, ka tumenao ka itadao bangkano te'olai tedei inso a wiwi rano. Ka Do'amba mentoro ka paguru ira mia hadio inso a wawo bangka.

⁴ Mansa-Do umari mepau, Dopotaeakono i Simo, ”Petadamo a ondaloano ka tendeomo buanimu pompete'umala bou.”

⁵ Sumangki i Simo, ”Guru, asa wongimo kimpopete'umala nahi kipompoko'ala hapa-hapa, sine hangano Omiu metena, aku koa tumendeo mbo'u buaniku.”

⁶ Ka mansado mentendeo, mpompoko'ala ira hadio ntu'u bou, onaemo ka ipompu'u teberi buanido.

⁷ Ka do'amba mpoweeako ira petondoni a wali-walido a bangka anu susua ka dome'aiwa mpokowali ira. Ka ondae atuu me'aiwa, ka do'amba mperonga-ronga me'ihiiakono bou orua bangka atuu ranta mingki toondu.

⁸ Mansano kumitao i Peturu anu gagi atuu menggolontuomo i aro-Do i Yesu ka ipotae, ”Ue, Ibinta akumo, hangano ongkue andio asa mia tehala.”

⁹ Hangano onae ka luwuno mia anu perongano mengkohali-haliakono hadiono bou anu pinongko'alado;

¹⁰ kanatuu koa mbo'u i Yakobu ka i Yohane, anano i Sebedeu, anu gagi walino i Simo. Dopotae i Yesu ndi Simo, ”Si doito, mompu'u kanandio-andio omue komobuani mia.”

¹¹ Ka umarido mewuatakono bangkado a ntuwu wita, domebintaomo luwuakoano, ka do'amba tumonda Ira i Yesu.

Ondae i Yesu mokotompao asa mia anu mahaki ngkuli mesaki 5:12-16 (Mat. 8:1-4; Mrk. 1:40-45)

¹² Pohona Ondae i Yesu kongko Ira a laro aasa kota. I tu'ai hinao aasa mia haki ngkuli mesaki asa ngkoroi. Mansano kumita Ira i Yesu, menggolontuomo ka mo'ema pompehohawa, ”Ue, tewala behe Komiu, Ipolio Ue mokotompa aku.”

¹³ Ka Do'amba tumasiakono kae-Do, umanggao mia atuu, ka Dopotae, ”Behe Aku, omue gagimo tompa.” I tempo koa mbo'u atuu moliuomo haki ngkuli mesakino.

¹⁴ Do'ontoo i Yesu mia atuu ka si pauo maupo ndi semamokoa ka Dopotae, ”Lakomo, popokitaomo koroimu a sando mpesomba ka pesombaakonomo pesomba hangano tompakomo kana peparentano i Musa, gagi tondonino ndi ondae.”

¹⁵ Sine lele mongkona Ondae i Yesu ko'ola-olaino itepalele ka mehawe iramo mia ntehuhu ndi Ondae mperorongeako Ira ka domempinokotompa inso a hakido.

¹⁶ Sine monsuka Ira lumako a mpo'ianga anu boni-boni ka Dopekakai.

Mia pungku pinokotompa 5:17-26 (Mat. 9:1-8; Mrk. 2:1-12)

¹⁷ Pohona tempono Dopompaguru i Yesu, hinao ba opia ira to Parisi ka anu monto'ori Taura mpentoro mperorongeako Ira. Me'aiwa ira inso a luwuno inia i Galilea ka Yudea ka inso i Yerusale. Pabawa-Do i Ue kumongkomi Ira, onaemo ka Dopompokotompa mia mahaki.

¹⁸ Ka i'amba mehawe iramo ba opia mia mengkatio asa mia pungku a wawo mpoturia; dompo'ungkeakono pesalaa mewinso ka domenaao i aro-Do i Yesu.

¹⁹ Hangano hadiono mia i tu'ai nahi dompokowawao mewinso, onaemo ka dompewuatako a atono raha, ka do'amba mebetao ato atuu, ka dompotiio mia atuu saru poturiano i tonga-tongado mia hadio kona ntu'u i aro-Do i Yesu.

²⁰ Mansa-Do kumitao i Yesu pompe'ala-alado, motae Iramo, ”Hei pepaekompo, inampuniomo halamu.”

²¹ Sine anu mponto'ori Taura ka to Parisi mpompewowolo i laro aroado, ”Isemake mia anu mepaukiako Ira Ue Ala andio? Isema anu polio mo'ampuni hala sangkadio Ondae Ue Ala?”

²² Sine Doto'orio i Yesu pinewowolodo, ka Do'amba motaeako ira, ”Hapake anu pinewowolomiu i laro aroamiu?

²³ Isuake anu moruanaopo, motae: Halamu inampuniomo, ke motae: Pewangumo, ka pelempamo?

²⁴ Sine ka imento'orio, nine i wawontolino andio i Ana Manusia pabawa mo'ampuni hala” – motae Iramo a mia pungku atuu –, ”Kupotaeakomu, pewangumo, tandeomo poturiamu ka pekulemo i rahamu!”

²⁵ Ka i tempo koa mbo'u atuu mewanguomo, i arodo, ka i'amba tumandeo poturiano ka ipekule i rahano saru umunde-unde Ira Ue Ala.

²⁶ Luwuno mia atuudo mengkohali-hali, ka do'amba me'unde-unde Ira Ue Ala, ka tedoa ira medoito, dompotae, ”Oleo andio kimensakosiiomo mongkona anu tedoa kinohali-haliako.”

I Lewi puu popumpu sima'ulu tumonda Ira i Yesu 5:27-32 (Mat. 9:9-13; Mrk. 2:13-17)

²⁷ Ka i'amba, tempono Ondae i Yesu lumako i bungkuno, Dokitao aasa puu popumpu sima'ulu, anu meneeako i Lewi, kontongaano mentoro a raha sima'ulu. Motae Ira i Yesu ndi onae, ”Tonda Akumo!”

²⁸ Ka mentadeomo i Lewi ka ibintao luwuakoano, ka i'amba tumonda Ira.

²⁹ Ka i Lewi moweweuako Ira aasa pelimbua langkai i rahano ka hadio ntu'u puu popumpu sima'ulu ka mia susua mpongkaa mperonga-ronga saru Ondae.

³⁰ Luwuno to Parisi ka anu mponto'ori Taura mpewurukiako ira ana guru-Do i Yesu, dompotae, ”Tembio ka impongkaa ka mpo'inu mperongaako ira puu popumpu sima'ulu ka mia ntehala?”

³¹ Ka Do'amba i Yesu sumangki ira, ”Komba mia madoo anu mongkere sando, sine mia mahaki;

³² Ku'aiwa komba ka Kupompoboi mia mentee, sine mia ntehala, ka dontepidi.”

Mongkona puasa 5:33-39 (Mat. 9:14-17; Mrk. 2:18-22)

³³ To Parisi atuudo mpotaeako Ira mbo'u i Yesu, ”Ana guruno i Yohane mararu domempuasa ka mpekakai, kanatuu koa mbo'u ana gurudo to Parisi, sine ana guru-Miu mpongkaa ka mpo'inu.”

³⁴ Sumangki ira i Yesu ndi ondae, ”Polioke sambe'eno umbu ngkoroi tama tinena mepuasa, sekono umbu ngkoroi atuu kongko saru ondae?

³⁵ Sine ta hawe tempono, tewala umbu ngkoroi atuu inala inso ndi ondae, i tempomo atuu ira mempuasa.”

³⁶ Dopauako ira mbo'u aasa potundaano, ”Nahina maupo te'asa mia moberi asa nsore sawu inso a lemba anu wo'ohu motompeliako lemba anu laano. Tewala kanatuu, anu wo'ohu mbo'u atuu ta teberi ka anu laano atuu nahi ta metoto sawu potompeli anu bineri inso a nsawu wo'ohu atuu.

³⁷ Kanatuu koa mbo'u nahina maupo te'asa mia mo'ihiiako anggoro anu da sarai a laro ngkadu kuli anu laano, hangano tewala kanatuu, anggoro anu da sarai atuu ta berio kadu ngkuli atuu ka anggoro atuu ta te'uwu ka kadu mbo'u atuu teberi-beri.

³⁸ Sine anggoro anu da sarai asalakono ninaa a laro ngkadu anu wo'ohu mbo'u.

³⁹ Ka nahina maupo te'asa mia anu mo'inuomo anggoro tehineomo mingki mo'inu anggoro anu da sarai, hangano ta motae: Anggoro anu tehineomo atuu moiko.”