I LUKASI 3 - Wunta Mempori

I Yohane Puu Mpobaho 3:1-20 (Mat. 3:1-12; Mrk. 1:1-8; Yoh. 1:19-28)

¹ I larono ta'u kohopulu ka olima inso a poparentaano Datu Tiberiu, tempono i Pontiu Pilatu gagi petewawa i wita Yudea, ka i Herode mokole i wita Galilea, i Pilipu, pepaekompono, mokole i wita Iturea ka Tarakoniti, ka i Lasania mokole i wita Abilene,

² i tempono i Hanasi ka i Kayapa gagi Sando Mpesomba Langkai, haweomo pau-Do Ue Ala ndi Yohane, anano i Sakaria, i pada one.

³ Ka aiwaomo i Yohane i asa wawo wita Yarade ka ipebooliakono, ”Intepidimo ka impepatindamo mebinaho ka Ondae Ue Ala Ira umampunio halamiu,

⁴ kana hinao teburi a wuntano i Yesaya luwuno pinauno anu ta gagi: Hinao suara anu meboo-booli i pada one: Patindaako Iramo i Ue pesalaa-Do, pokomoleoako Iramo sala.

⁵ Sompo bangano ta hinowui ka sompo torukuno ka pongku ta gagi merete, anu makulengku ta pinokomoleo, anu makuntoruku ta pinokomerete,

⁶ ka luwuno mia ira mengkitao tekaduduia inso ndi Ondae i Ue.”

⁷ Ka i'amba motaeako ira mia hadio anu me'aiwa ndi onae ka domebinaho, ipotae, ”Hei omiu inuleno ule me'ipo! Isemake anu mompauakomiu ka impolai inso a pontekudaako anu ta hawe?

⁸ Gagi impopokitaomo luwuno wua anu menunu saru tepidia. Ka si mpompewowolo i laro aroamiu: I Burahima onaemo amamami! Hangano kupauakomiu: Ondae Ue Ala Dopolio weweu ira anano i Burahima inso a watu andiodo!

⁹ Tetindaomo uase a hakano keu ka a sompo keu anu nahi pehasiliako wua anu moiko, ta tinuehi ka tinadi a laro api.”

¹⁰ Mia hadio mpesikeno ndi onae, ”Tewala kanandio, hapake anu asalakono kami mpoweweu?”

¹¹ Isangki ira, ”Ba isema hinao orua lembano, ka itiaakono anu nahina, ka ba isema anu hinao kaanga, ka iweweu mbo'u kanatuu.”

¹² Mehawe ira koa mbo'u puu popumpu sima'ulu ka domebinaho ka mpesikeno ira ndi onae, ”Guru, hapake anu asalakono kami mpoweweu?”

¹³ Isangki ira, ”Si mposinga hadioopo sekono anu imempinakosiako.”

¹⁴ Ka sorodadu mpesikeno ira koa mbo'u ndi onae, ”Ka omami hapake anu asalakono kami mpoweweu?” Isangki ira i Yohane, ”Si mporontu ka si mpodadai ka impesompoomo tambomiu.”

¹⁵ Sine hangano mia hadio kontongaado mpesikori ka mpomperorohi, ka luwudo mpesikeno i laro aroado mongkona i Yohane, ba mansa Ondaemo i Mesia,

¹⁶ Sumangki i Yohane ka ipotaeako ira luwuno mia atuu, ”Ongkue bahoakomiu uwoi, sine Ondae anu lalu pabawa sekono ongkue Ira hawe ka maupo kumaleo onggono sapatu-Do nahi pototoku. Ira bahoakomiu Penaa Mempori ka api.

¹⁷ Parewa poduku kongkoomo a ngkae-Do Ira mokomorinao ponsesaa-Do ka Ira pumpuo gandu-Do a laro nsi'e-Do, sine awuno seami atuu Ira tumunuo a laro api anu nahi pinokompepate.”

¹⁸ Saru hadio patuduno susua i Yohane paleleo Lele Mawongkoa a mia hadio.

¹⁹ Sine mansano kumuahakono mokole Herode hangano teweweuno i Herodia, beineno pepaekompono, ka hangano luwuno wineweuno susua anu mosa'o,

²⁰ mokole atuu tumiangio wineweuno mosa'o iwinsoo i Yohane a laro torungku.

Ondae i Yesu, Ana-Do Ue Ala, binaho 3:21-22 (Mat. 3:13-17; Mrk. 1:9-11; Yoh. 1:32-34)

²¹ Tempono mebinaho iramo luwu mia hadio atuu ka tempono Ondae mbo'u i Yesu binaho ka tekonai mekakai, te'ungkahiomo langi

²² ka metiiomo Penaa Mempori a laro rupano manu-manu marapatii i wawo-Do. Ka terongeomo suara inso i langi, ”Omuemo Ana-Ku anu pinehohawa-Ku, ndi Omuemo Kupemoikoo.”

Potudano anu umule Ira i Yesu 3:23-38 (Mat. 1:1-17)

²³ Tempono Dopu'uo i Yesu anggaa-Do, tinuwu-Do bara'ura tolu pulu nta'u ka montonda potaedo mia, Ondae anano i Yusupu, anano i Eli,

²⁴ anano i Matati, anano i Lewi, anano i Malaki, anano i Yanai, anano i Yusupu,

²⁵ anano i Matisa, anano i Amosi, anano i Nahumi, anano i Heseli, anano i Nagai,

²⁶ anano i Ma'ati, anano i Matisa, anano i Simei, anano i Yoseki, anano i Yoda,

²⁷ anano i Yohanani, anano i Resa, anano i Serubabe, anano i Sealatie, anano i Neri

²⁸ anano i Malaki, anano i Adi, anano i Kosami, anano i Elimada, anano i Ere,

²⁹ anano i Yesua, anano i Eliese, anano i Yorimi, anano i Matati, anano i Lewi,

³⁰ anano i Simeo, anano i Yehuda, anano i Yusupu, anano i Yona, anano i Eliaki,

³¹ anano i Melea, anano i Mina, anano i Matata, anano i Nata, anano i Daudi,

³² anano i Isai, anano i Obe, anano i Boasi, anano i Salomo, anano i Nahaso,

³³ anano i Aminada, anano i Adimi, anano i Arini, anano i Heseroni, anano i Peresi, anano i Yehuda,

³⁴ anano i Yako, anano i Saki, anano i Burahima, anano i Tera, anano Nahoro,

³⁵ anano i Serugi, anano i Rehu, anano i Pelegi, anano i Ebere, anano i Salomo,

³⁶ anano i Kenani, anano i Aripakasadi, anano i Semu, anano i Noho, anano i Lameki,

³⁷ anano i Metusala, anano i Heno, anano i Yeredi, anano i Mahalaleeli, anano i Kenani,

³⁸ anano i Enosi, anano i Seti, anano i Adama, ana-Do Ue Ala.