I LUKASI 23 - Wunta Mempori

Ondae i Yesu i arono i Pilatu 23:1-7 (Mat. 27:1-2, 11-14; Mrk. 15:1-5; Yoh. 18:28-38)

¹ Ka i'amba mpentade iramo luwu anu menteriso atuu ka domewawa Ira i Yesu i arono i Pilatu.

² I tu'ai mpompu'u iramo tumuluri Ira, dompotae, ”Kimehaweomo, nine mia andio mokontesaa ira tongkumami, ka umonto ira mpo'owahi sima'ulu a Datu, ka mongkona koroi-Do Dopotae, nine Ondaemo i Kerisituu, anu Mokole.”

³ Mesikeno i Pilatu ndi Ondae, ”Omiuke mokoledo to Yahudi?” Sumangki Ira i Yesu, ”Omiu koa pauo.”

⁴ Motae i Pilatu a mpetewawado sando mpesomba ka luwuno mia hadio atuu, ”Nahi kupohawe maupo sala hapa a mia andio.”

⁵ Sine komoro-morosono dompedada, dompotae, ”Palili doposingkiako ira pompaguru-Do i asa wawo wita Yudea, Dopompu'u inso i Galilea ka haweomo i ndi'ai.”

⁶ Mansano rumongeo i Pilatu pinau atuu mesikenoomo, nde to Galileake mia atuu.

⁷ Ka mansano tumo'orio, nine Ondae i Yesu inso a poparentaano i Herode, metenaomo ka Dowinawa me'aro ndi Herode, anu i tempo atuu kongko mbo'u i Yerusale.

Ondae i Yesu i arono i Herode 23:8-12

⁸ Tempono i Herode kumita Ira i Yesu, onae tedoa mo'unde. Hangano tehineomo ta mingki kumita Ira, hangano mararu irongeo mongkona Ondae, metiangi mbo'u pomperorohino ta kumitao kana'umpe Dopoweweu i Yesu aasa petondoni.

⁹ Onae hadio pesikenono ndi Ondae i Yesu, sine nahina sinangki-Do i Yesu maupo hapa.

¹⁰ Kontongaano atuu melako iramo petewawado sando mpesomba ka anu mponto'ori Taura i arono ka dompompau hadio pontuluri anu mobea mongkona Ondae.

¹¹ Ka mompu'uomo i Herode ka sorodaduno tumata Ira ka mopodeu-deu Ira, ipokonaako Ira lemba meloe pompelangkai ka i'amba metena mokule Ira ndi Pilatu.

¹² Ka a oleo koa mbo'u atuu mesambe'e iramo i Herode ka i Pilatu; se'eluno me'iwali ira.

Ondae i Yesu mekule i arono i Pilatu 23:13-25 (Mat. 27:15-26; Mrk. 15:6-15; Yoh. 18:38–19:16)

¹³ Ka i'amba i Pilatu pumpu ira petewawado sando mpesomba ka luwuno petewawa saru palili,

¹⁴ ka ipotaeako ira, ”Imewawaomo mia andio ndi ongkue gagi aasa mia anu mompopo'oo palili. Imengkitaomo liomiu nine kuparesa Iramo, ka inso a luwuno sala anu imentuluriako Ira nahina kupohawe ndi Ondae.

¹⁵ Ka i Herode mbo'u naahi, hangano onae metena mokule Ira ndi omami. Menteeano nahina maupo hapa te'asa anu wineweu-Do anu tekona saru pohuku mate.

¹⁶ Gagi aku sumepi Ira, ka ku'amba motola Ira.” [

¹⁷ Hangano onae asalakono mompotolaako ira asa mia a oleo langkai atuu.]

¹⁸ Sine mpebooli ira mperonga-ronga, ”Pepate Iramo, potolaakami i Baraba!”

¹⁹ I Baraba andio wininso a laro torungku hangano aasa pe'ewa a laro ngkota ka hangano pompepatea.

²⁰ Pohona mbo'u i Pilatu mepau meroku ndi ondae, hangano ta mingki motola Ira i Yesu.

²¹ Sine mpebooli ira mesangkio, dompotae, ”Paso Iramo a ngkeu pinotamba!”

²² Mepau i Pilatu anu kopentoluno ndi ondae, ”Mosa'oa hapa anu menteeano iweweuomo mia andio? Nahina maupo te'asa sala-Do anu hinaweku ndi Ondae, anu tekona saru pohuku mate. Gagi aku sumepi ira, ka ku'amba motola Ira.”

²³ Sine saru mpebooli mpedada ira ka me'emao, ka Dopinaso a ngkeu pinotamba, ka poko'ariano mponangiako ira peboolido.

²⁴ Ka i'amba i Pilatu pakosio, ka dome'ininduako po'emado.

²⁵ Ka ipotolao mia anu tinorungku hangano pe'ewano ka pompepatea atuu menunu saru po'emado, sine Ondae i Yesu ipeweengako Ira ndi ondae ka domeweweu Ira po'e-po'ehedo.

Ondae i Yesu winawa ka Dopinaso a ngkeu pinotamba 23:26-32

²⁶ Tempono Domewawa Ira i Yesu, domerakoo asa mia anu meneeako i Simo inso i Kirene, anu da iaopo ihawe inso a inia susua, ka i'amba ninaa keu pinotamba atuu a wawo oweano, ka ipo'ahao tumonda Ira i Yesu.

²⁷ Hadio ntu'u mia tumonda Ira; i olodo hadio beine anu mpengese ka sumabangi Ira.

²⁸ Mewolili Ira i Yesu ndi ondae ka Dopotae, ”Hei ana beine to Yerusale, si mpengesei Aku, tendeano impengeseiomo koroimiu ka luwuno anamiu!

²⁹ Hangano kitao, ta hawe tempono mia mpotae, Me'uraomo beine anu bita ka anu pe'anakaano nahi hori me'ana, ka anu uono nahi hori mompo'uo.

³⁰ Ka mia mpompu'u iramo mpepauako ira torukuno: Tehoamo dunsi kami! Ka a luwuno pongku: Howui kamimo!

³¹ Hangano tewala mia moweweu kanandio a ngkeu tuwu, hapake anu ta gagi a ngkeu mokari?”

³² Ka hinao koa mbo'u winawa orua mia mosa'o gaudo ira hinuku mate saru Ondae.

Ondae i Yesu pinaso a ngkeu pinotamba 23:33-43 (Mat. 27:33-44; Mrk. 15:22-32; Yoh. 19:17-24)

³³ Mansado mehawe a mpo'ianga anu meneeako Taku ulu, i tu'ai domempaso Ira i Yesu a ngkeu pinotamba ka orua mia mbo'u mosa'o gaudo atuu, anu asa mia i koana-Do ka anu asa mbo'u i manggali-Do.

³⁴ Dopotae i Yesu, ”Oo Ama, I'ampuni iramo, hangano nahi domento'orio hapa anu wineweudo.” Ka mpotende ira undi ka dompetiao sangka-Do.

³⁵ Mia hadio mpentade i tu'ai ka luwuno domengkitao. Luwuno petewawa mopodeu-deu Ira, dompotae, ”Mia susua Dokadudui ira, po'ineeomo kanandio-andio ka Dokaduduio koroi-Do Ondae-Do, tewala Ondaemo i Mesia, mia bininiki-Do Ue Ala.”

³⁶ Luwuno sorodadu mbo'u mpopodeu-deu Ira; dompotasiako Ira anggoro mo'olo

³⁷ ka dompotae, ”Tewala Omiumo mokoledo to Yahudi, kaduduiomo koroi-Miu!”

³⁸ Hinao koa mbo'u binuri a wawo ulu-Do, ”Ndiomo mokoledo to Yahudi.”

³⁹ Asa mia inso a mia mosa'o gauno anu ndinoe atuu mepaukiako Ira, ipotae, ”Kombake Omiumo i Kerisituu? Kaduduiomo koroi-Miu ka omami!”

⁴⁰ Sine anu asa mia kumuahakono, ipotae, ”Nahi udoitoako Irake Ue Ala, sekono omue montarima pohuku anu mengkena?

⁴¹ Ontae lano tekona tohinuku, hangano montarima kita sulono anu menunu saru wineweuto, sine mia andio nahina te'asa wineweu-Do anu sala.”

⁴² Ka i'amba motae, ”Yesu, Ipewowolo aku koa, tewala hawe Komiu gagi Mokole.”

⁴³ Motae Ira i Yesu ndi onae, ”Kupauakomu, menteeano oleo koa mbo'u andio omue kohawe meronga saru Ongkue i Paradesi.”

Mate-Do i Yesu 23:44-49 (Mat. 27:45-46; Mrk. 15:33-41; Yoh. 19:28-30)

⁴⁴ Tempo atuu bara'ura langku hopulu ka oruamo, ka i'amba wongi-wongi tumutuwio asa wawo wita atuu hawe langku otolu,

⁴⁵ hangano mata'oleo nahi mewanta. Ka pelingo a Raha Mempori tesempa tepe'orua.

⁴⁶ Ka Do'amba i Yesu mebooli meroku, ”Oo Ama, A ngkae-Miu Kupeweengakono penaa-Ku.” Ka umari-Do mepau kanandio Dopeweengakono penaa-Do.

⁴⁷ Mansano kumitao petewawado sorodadu hapa anu gagi, i'unde-unde Ira Ue Ala, ipotae, ”Mentee ntu'u, mia andio mia mentee!”

⁴⁸ Ka umarino luwuno mia hadio, anu mehawe mpehowu i tu'ai mpengkita, mengkitao hapa anu gagi atuu, mpekule iramo saru mentotopao koroido.

⁴⁹ Luwuno mia tepoto'ori-Do i Yesu tewinso saru beine anu mentonda Ira inso i Galilea, mpentade ola-olai ka mengkitao luwuno atuu.

Ondae i Yesu kinaburu 23:50-56a (Mat. 27:57-61; Mrk. 15:42-47; Yoh. 19:38-42)

⁵⁰ Hinao asa mia anu meneeako i Yusupu. Onae asa mia anu mentoro a Majelisi Langkai, ka asa mia anu me'aroa ka moleo.

⁵¹ Onae nahi pemoikoo pompakosi ka wineweudo Majelisi atuu. Onae inso i Arimatea, aasa kotado to Yahudi ka onae monsisikori Poparentaa-Do Ue Ala.

⁵² Onae lumako me'aro ndi Pilatu ka i'emao wata ngkoroi-Do i Yesu.

⁵³ Ka umarino ipotiio wata ngkoroi atuu, itongoakono sawu lena, ka i'amba momboleo a laro ngkaburu anu kineke a pongku watu, anu napi hori hina wata ngkoroi pinombole.

⁵⁴ Oleo atuu onaemo oleo pepatindaa ka oleo Saba tamo ronga pinu'u.

⁵⁵ Ka beine anu me'aiwa mperongaako Ira i Yesu inso i Gelilea, mpetonda ira ka domengkitao kaburu atuu ka ba kana'umpe ipinombole wata ngkoroi-Do.

^56a Ka mansado mpekule, domempatindao rampa-rampa ka lana mire.

Pewangu-Do i Yesu 23:56b–24:12 (Mat. 28:1-10; Mrk. 16:1-8; Yoh. 20:1-10)

^56b Ka a oleo Saba mpenaa-naa ira montonda Songka,