I LUKASI 21 - Wunta Mempori

Pesombano aasa tuwu beine mongkokolaro 21:1-4 (Mrk. 12:41-44)

¹ Mansa-Do mewanguako i Yesu, Dokita ira mia mengkaea mpowinso pesombado a laro burua pesomba.

² Dokitao mbo'u aasa tuwu beine mongkokolaro mowinso orua lewe doi a laro burua atuu.

³ Ka Do'amba motae, ”Kupauakomiu, menteeano tuwu beine andio mompowee hadioopo sekono luwuno mia atuudo.

⁴ Hangano luwudo mpompowee pesombado inso a mare'edo, sine tuwu beine andio mompowee inso a makurano, tendeano ipeweengakono luwuno pepotuwuno.”

Raha-Do Ue Ala ta hinoa 21:5-6 (Mat. 24:1-2; Mrk. 13:1-2)

⁵ Tempono ba opia mia mpepau mongkona Raha-Do Ue Ala ka mpetekosio raha atuu anu rinamba-rambaako watu anu ntekokosi ka mperupa-rupa parewa mpesomba, motae Iramo i Yesu,

⁶ ”Hapa anu kinitamiu i tu'ai – ta hawe oleono nahina maupo te'asa watu ta pino'inee mo'ia a wawo watu susua; luwuno ta hinoa.”

Pompu'uano tebobarasaia 21:7-19 (Mat. 24:3-14; Mrk. 13:3-13)

⁷ Ka ana guru mpesikeno ndi Ondae i Yesu, dompotae, ”Guru, te'ipiake atuu gagiano? Ka hapake tondonino, tewala ta gagi atuu?”

⁸ Dosangki ira, ”Impetangkoromo, ka si ntepopo'oo. Hangano hadio mia ira mehawe mpeneeako nee-Ku ka dompotae: Ongkuemo Ondae, ka: Rangkuomo tempono. Si mentonda ira.

⁹ Ka tewala mporonge komiu mongkona peteaa ka pe'ewaa, si ntededengke. Hangano luwuno atuu asalakono ta gagi se'elu, sine atuu napi ta liu hawe pokotampulaano.”

¹⁰ Dopotaeako ira, ”Tongku ta mentade umewaio tongku ka poparentaa umewaio poparentaa,

¹¹ ka ta gagi lelu anu meroku ntu'u ka a sompo po'ianga ta hina haki lele ka mokoninggoa ka ta gagi mbo'u mperupa-rupa anu mompokotededengke ka luwuno petondoni anu mongkokongiri inso i langi.

¹² Sine se'eluno luwuno atuu komiu merinako ka mebinobarasai; komiu mempineweengako a hadio raha tepumpua ka torungku, ka komiu mempino'aro a hadio mokole ka anu mempabawa hangano nee-Ku.

¹³ Mongkona atuu ta gagi tempomiu mpesakosii.

¹⁴ Onaemo pu'uno imempakosiomo i laro aroamiu, ka si mpewowoloo se'elu hapa ta sangkimiu.

¹⁵ Hangano Ongkue isa'a mowee komiu pau ponto'ori, ranta nahi dompoko'ewai komiu ke mesangki komiu taromiu.

¹⁶ Ka ira mpeweengakomiu mbo'u mia mota'umiu, pepaekompomiu, pe'etumiu ka luwuno sambe'emiu ka ba opia mia i olomiu ira mempinepate

¹⁷ ka komiu ira me'o'aliaakomiu luwuno mia hangano nee-Ku.

¹⁸ Sine maupo te'asa ngkeu wuu a ulumiu nahi ta tetadi.

¹⁹ Tewala pompetea komiu mpiha, komiu mehaweo tuwumiu.”

Mongkona tekaleno Yerusale 21:20-24 (Mat. 24:15-21; Mrk. 13:14-19)

²⁰ ”Tewala imengkitao Yerusale domengkaduo sorodadu, imento'oriomo, nine tekaleano rangkuomo.

²¹ I tempo atuu mia anu mekongko i Yudea asalakono mempolai a mentorukuno, ka mia anu mekongko a laro ngkota asalakono mpeliahako, ka mia anu mekongko a inia kodei si dompewinso mbo'u a laro ngkota,

²² hangano onaemo atuu tempo pombaloa nde ta inihii luwuno anu binuri.

²³ Memasola iramo ine anu kontongaado mementia ke anu mompo'uo nana'ote kodei i tempo atuu! Hangano ta hawe ma'isoa anu mongkokongiri i asa wawo wita ka pontekudaako a tongku andio,

²⁴ ka ira memateako mata mponai ka mewinawa gagi mia mentinawa a luwuno tongku, ka Yerusale ira melolandao luwuno tongku anu nahi domento'ori Ira Ue Ala, hawe ka isompoomo tempodo tongku atuudo.”

Hawe-Do i Ana Manusia Potundaano mongkona keu ara 21:25-33 (Mat. 24:29-35; Mrk. 13:24-31)

²⁵ ”Ka ta hina luwuno petondoni a mata'oleo ka wula ka a anano wula, ka i tolino luwuno tongku ira medoito ka mebulalingo me'aropio u'uruno ka pebundeno tahi.

²⁶ Mia ira memateako doito hangano mensala-laroako luwuno ba hapa anu umaluo tolino andio, hangano luwuno pabawa i langi ta telelu.

²⁷ I tempo atuu mia ta kumita Ira i Ana Manusia hawe a laro nseru saru luwuno pabawa ka maramba-Do.

²⁸ Tewala mompu'uomo gagi luwuno atuu, pentademo ka pewanguakomo, hangano tekaduduiamiu rangkuomo.”

²⁹ Ka Do'amba i Yesu pauako ira potundaano andio, ”Impekokoongakono keu ara ke keu hapamo koa.

³⁰ Tewala imengkita ira keu atuu mentumbaomo, imento'oriomo nine tempo motu'i-tu'i rangkuomo.

³¹ Kanatuu koa mbo'u, tewala imengkitao igagi luwuno atuu, imento'oriomo, nine Poparentaa-Do Ue Ala rangkuomo.

³² Kupauakomiu: Menteeano mia andiodo nahi ta upu, ba napi gagi luwu.

³³ Langi ka tolino ta moliu, sine pau-Ku nahi ta moliu.”

Patudu ka impedaga-dagai 21:34-38

³⁴ ”Dagaiomo koroimiu, ka si aroamiu bukeako pogawea ka molangua saru luwuno po'eheno wawontolino ka si mansa mepobingko hawe oleo-Do i Ue a ngkoroimiu kana aasa oho.

³⁵ Hangano ta umaluo luwuno anu mpo'ia i tolino andio.

³⁶ Impedaga-dagai mpiha saru mpekakai, ka impohawe roso mentola inso a luwuno anu ta gagi atuu, ka imemoroso mpentade i aro-Do i Ana Manusia.”

³⁷ Tempono meene Ondae i Yesu mompaguru a Raha-Do Ue Ala ka tempono wongi meluarako Ira ka merato a ntorukuno anu meneeako Pongku Saitu.

³⁸ Ka mo'o-mo'oru luwuno mia hadio mehawe ndi Ondae a laro Raha-Do Ue Ala ka domperorongeako Ira.