I LUKASI 19 - Wunta Mempori

I Sakeu 19:1-10

¹ Ondae i Yesu mewinso a ngkota Yeriko ka melempa mpiha lumaloo kota atuu.

² I tu'ai kongko asa mia meneeako i Sakeu, petewawado puu popumpu sima'ulu, ka onae asa mia kaea.

³ Onae mo'ungke pesalaano ta kumitao to hapake Ondae i Yesu atuu, sine nahi pokokita Ira hangano mia hadio, nde koroino owowa.

⁴ Ka meluluomo mese'elungi ira mia hadio, ka i'amba momaru a ngkeu ara ka ikita Ira i Yesu anu Ira telalo i tu'ai.

⁵ Tempono Dohawe i Yesu a mpo'ianga atuu, mentombu Ira ka Dopotae, ”Sakeu, pontuturakomo petii, hangano oleo andio asalakono Aku merato i rahamu.”

⁶ Ka i'amba i Sakeu montuturako metii ka itarima Ira i Yesu mawongko aroano.

⁷ Sine luwuno mia anu mengkitao anu gagi atuu mpewuruki, dompotae, ”Ondae merato a rahano mia tehala.”

⁸ Sine i Sakeu mentade ka ipotae ndi Ondae i Ue, ”Ue, entonga inso a arataaku aku weeako ira mia mongkokolaro ka ba mansa hinao anu rinontuku inso a mia te'asa aku mokuleo meluka pepanto.”

⁹ Motae Ira i Yesu ndi onae, ”Oleo andio gagiomo tekaduduia a raha andio, hangano mia mbo'u andio anano i Burahima.

¹⁰ Hangano hawe-Do i Ana Manusia Ira mo'ungke ka mongkadudui mia anu tetadi.”

Potundaano mongkona doi mina 19:11-27 (Mat. 25:14-30)

¹¹ Tiado anu mperorongeako Ira i tu'ai, Ondae i Yesu motilaloakono pau-Do a aasa potundaano, hangano umpeda Iramo i Yerusale ka domengko'aro-aroa, nine Poparentaa-Do Ue Ala ira ronga mengkitao.

¹² Onaemo ka Dopotae, ”Hinao aasa inuleno mokole melungka lumako a aasa wita anu olai ta pinotoro gagi mokole i tu'ai ka umarino atuu ka i'amba mekule.

¹³ Ipoboi ira hopulu mia atano ka ipoweeako ira hopulu mina, ipotae: Imempakeomo andio mpebalu-baluako ranta ka kupekule.

¹⁴ Sine mia pe'asa tongkuno me'o'aliaakono, ka do'amba mpotena mia tumonda lembuio mempauo, Nahi kimebehe mia andio gagi mokolemami.

¹⁵ Ka gagiomo, tempono ipekule, umarino pinotoro gagi mokole, metenaomo moboi ira atano, anu ipoweeako iramo doi atuu, ta tumo'orio ba opia hasilino pebalu-baludo singge mia.

¹⁶ Mia amba-ambano hawe ka ipotae: Ue, Minamiu anu aasa atuu mehasiliomo hopulu mina.

¹⁷ Ipotaeakono mia atuu: Moiko ntu'u wineweumu atuu, hei ata anu moiko; metenunukomo a wineweu anu kodei, onaemo pu'uno tarimaomo ka upabawaio hopulu kota.

¹⁸ Haweomo anu ko'orua ka ipotae: Ue, minamiu mehasiliomo olima mina.

¹⁹ Ipotaeakono mia atuu: Ka omue pabawaiomo olima kota.

²⁰ Ka ata anu ko'otolu hawe ka ipotae: Ue, ndiomo minamiu, kunaao a laro lenso.

²¹ Hangano kudoitoakomiu, nde omiu mia anu motea aroa; mo'ala komiu hapa anu komba hori komiu numaao ka omiu monsowi hapa anu komba rinawomiu.

²² Ipotaeakono mia atuu: Hei ata anu mosa'o, aku bitarako montonda pinaumu omuemu. Uto'oriomo nine ongkue mia motea aroa, anu mo'ala hapa anu komba hori aku numaao ka monsowi hapa anu komba rinawoku.

²³ Tewala kanandio, tembio doiku atuu nahi uweeako ira mia anu mompesaboako doi? Ka pekuleku ku'alao saru bungano?

²⁴ Ka i'amba motaeako ira mia mpentade i tu'ai: Alaomo mina anu aasa atuu inso ndi onae ka imeweeakono mia anu hinao hopulu mina atuu.

²⁵ Dompotaeakono: Ue, onae hinaomo hopulu mina.

²⁶ Sangkino: Kupauakomiu: Sompo mia anu hinao, ndi onae ta pinowee, sine isema anu nahina, inso ndi onae ta inala, saru hapa mbo'u anu hina ndi onae.

²⁷ Sine luwuno anu umewai aku andio, anu nahi behe ba kugagi mokoleno, wawa iramo ramai ka impepate iramo i arono mataku.”

Ondae i Yesu tinotowo i Yerusale 19:28-44 (Mat. 21:1-9; Mrk. 11:1-10; Yoh. 12:12-15)

²⁸ Ka mansa-Do pauo luwuno atuu ondae i Yesu mese'elungi ira ka motilaloakono pelempaa-Do lumako i Yerusale.

²⁹ Mansano umpeda Iramo i Betipage ka Betania, anu po'iangano a ntorukuno anu meneeako Pongku Saitu, Dotena ira i Yesu orua ana guru-Do

³⁰ saru pe'oliwi, ”Ilakomo a inia anu i aromiu atuu: Tempono ipewinso i tu'ai, komiu humaweo aasa kalide mongura tinanggo, anu napi hori dompesawikio mia. Ipotolaomo kalide atuu ka iwawao ramai.

³¹ Ka tewala hinao mia sumikenokomiu: Tembio ka ipotolao? Isangkiomo kanandio: Ondae i Ue kumereo.”

³² Ka i'amba lumako iramo anu tinena atuu, ka dohaweo luwuakoano kana anu Dopauomo i Yesu.

³³ Tempono dopotolao kalide atuu, motaeomo mia anu me'ueo kalide atuu, ”Tembio ka ipotolao kalide atuu?”

³⁴ Dopotae, ”Ondae i Ue kumereo.”

³⁵ Dowawao kalide atuu ndi ondae i Yesu, ka do'amba melampiakono sangkado ka moposawi Ira i Yesu.

³⁶ Ka kontongaa-Do i Yesu mesawikio kalide atuu domewileo sangkado a nsala.

³⁷ Mansa-Do umpeda i Yerusale, a nsala pontindulua inso a Pongku Saitu, mpompu'u iramo luwuno ana guru anu tumonda Ira memawongko ka me'unde-unde Ira Ue Ala meroku suarado hangano luwuno kinohali-haliako anu domengkitaomo.

³⁸ Dompotae, ”Rinonso Iramo anu hawe gagi Mokole a nee-Do i Ue, rodoa i suruga ka marambaa a mpo'ianga anu i wawono ntu'u!”

³⁹ Ba opia ira to Parisi anu mpetonda saru mia hadio atuu mpotaeako Ira i Yesu, ”Guru, Ikuahako iramo ana guru-Miu atuu.”

⁴⁰ Dosangki ira, ”Kupauakomiu: Tewala ondae andio mengkomino, asalakono watu andio ta mebooli.”

⁴¹ Ka tempono umpeda Iramo i Yesu ka Dokitao kota atuu, Dopengeseio,

⁴² Dopotae, ”Anai, tedoa moiko tewala a oleo koa mbo'u andio upokonto'orio hapa anu kinere tiano rodoamu! Sine kanandio-andio mongkona atuu tewuni a matamu.

⁴³ Hangano ta hawe oleono, nine iwalimu ira melimbuakomu bente, ka do'amba mengkaduko ka me'asiko inso a luwuno siuno,

⁴⁴ ka ira mpepateko saru palilimu ka a rere watumu nahi ira mpo'ineeo maupo te'asa watu mo'ia a wawo watu anu susua, hangano nahi uto'orio tempo, ba te'ipia Do'aiwa kumitako Ue Ala.”

Ondae i Yesu mokomemporio Raha-Do Ue Ala 19:45-48 (Mat. 21:12-13; Mrk. 11:15-18; Yoh. 2:13-16)

⁴⁵ Ka Do'amba i Yesu mewinso a Raha-Do Ue Ala ka mompu'u Iramo sumaari ira luwu anu mpebalu-balu i tu'ai,

⁴⁶ Dopotaeako ira, ”Hinao teburi: Raha-Ku onaemo raha pekakaia. Sine omiu mpokogagio po'iangado mia mperontu.”

⁴⁷ Sompo-sompo oleo Dopompaguru a laro Raha-Do Ue Ala. Luwuno petewawado sando mpesomba ka anu mponto'ori Taura saru mia mempinemota'u inso a tongku Isaraeli mpo'ungke sala ira mpepate Ira,

⁴⁸ sine nahi domento'orio, ba kana'umpe asalakono domeweweuo, hangano luwuno palili mpe'ala-ala Ira ka mingki mperorongeako Ira.