I LUKASI 18 - Wunta Mempori

Potundaano mongkona puu mpobitara anu nahi mentee 18:1-8

¹ Dopauako ira i Yesu aasa potundaano ka domento'orio ntu'u, nine asalakono ka dowela mpekakai si donte'osa.

² Dopotae, ”A laro aasa kota hinao aasa puu mpobitara anu nahi doitoako Ira Ue Ala ka nahina maupo te'asa mia anu pinelangkaino.

³ Ka a ngkota atuu hinao aasa tuwu beine anu wela hawe a mpuu mpobitara atuu ka ipotae: I'ala-alaakune i arono taroku.

⁴ Ba opia tempo tehineno puu mpobitara atuu nami perioo. Sine lembuino ipotae i laro aroano: Maupo nahi kudoitoako Ira Ue Ala ka nahina pinelangkaiku maupo te'asa mia,

⁵ sine hangano tuwu beine andio mokomasusa aku, po'ineeomo kupokomenteeo, ka si aiwa mpiha ka poko'ariano isapoi aku.”

⁶ Dopotae i Ue, ”Impe'ihilaroomo hapa anu pinauno puu mpobitara anu nahi moleo atuu!

⁷ Nde nahi Ira mokomenteeo Ue Ala luwuno mia bininiki-Do anu meene ka wongi mpebooli ndi Ondae? Ka nde Ira motuluoke tempo ka Do'amba tumulungi ira?

⁸ Kupauakomiu: Ira koa ronga mokomentee ira. Sine, tewala hawe i Ana Manusia, hinaoke Dopohawe pompe'ala-ala i tolino?”

Potundaano mongkona to Parisi saru puu popumpu sima'ulu 18:9-14

⁹ Ka a ba opia mia anu mpementeeo koroido ka mpe'uru-uru ira luwu mia mehano, Dopauo i Yesu potundaano andio,

¹⁰ ”Hinao orua mia lumako a Raha-Do Ue Ala ta mekakai; anu asa mia onaemo to Parisi ka anu susua puu popumpu sima'ulu.

¹¹ To Parisi atuu mentade ka ipekakai i laro aroano kanandio: Oo Ue Ala, montarima kasi aku ndi Omiu, hangano nahi kupengkena kana luwuno mia mehano, komba puu mporontu, komba mia lambaha, komba anu monsosabo ka komba kana puu popumpu sima'ulu andio;

¹² ongkue puasa pendua asa minggu, ongkue mompowee tia hopuluno inso a luwuno hinaweku.

¹³ Sine puu popumpu sima'ulu atuu mentade ola-olai, maupo mentombu i langi nahi sapa, tendeano itopao koroino ka ipotae: Oo Ue Ala, Ipehohawa aku mia tehala andio.

¹⁴ Kupauakomiu: Mia andio mekule i rahano gagi mia anu Dopementeeo Ue Ala ka mia mehano atuu naahi. Hangano ba isema melangkaio koroino, onae ta pine'uru-uru ka ba isema me'urumako onae ta pinelangkai.”

Ondae i Yesu rumonso ira nana'ote 18:15-17 (Mat. 19:13-15; Mrk. 10:13-16)

¹⁵ Ka mehawe iramo mia mpowawa nana'ote anu kodei ndi Ondae i Yesu, ka Do'angga ira. Kumitao atuu ntekuda ira ana guru-Do a mia atuudo.

¹⁶ Sine Dopoboi ira i Yesu ka Dopotae, ”Po'inee iramo nana'ote atuu ka dome'aiwa ndi Ongkue, ka si me'onsoi ira, hangano mia anu kanatuumo anu mpe'umbuo Poparentaa-Do Ue Ala.

¹⁷ Kupauakomiu: Menteeano ba isema nahi tarimao Poparentaa-Do Ue Ala kana aasa nana'ote kodei andio, nahi ta mewinso i larono.”

Mia kaea motungko ipewinso a Poparentaa-Do Ue Ala 18:18-27 (Mat. 19:16-26; Mrk. 10:17-27)

¹⁸ Hinao aasa petewawa mesikeno ndi Ondae i Yesu, ipotae, ”Guru anu moiko, hapa anu asalakono kuweweuo ka kupohawe tuwua anu nahina tampulaano?”

¹⁹ Sumangki Ira i Yesu, ”Tembio ka upotaea-Kune moiko? Nahina maupo te'asa mia moiko sangkadio butu Ondae Ue Ala.

²⁰ Manasa uto'orio luwuno parenta-Do Ue Ala: Si ponsosabo, si pompepate, si ponako, si pesakosii megaupi, pelangkai iramo amamu ka inemu.”

²¹ Motae mia atuu, ”Luwuno atuu kutondaomo mompu'u da tempo kumongura.”

²² Rumongeo atuu motae Ira i Yesu ndi onae, ”Da hinao aasa rupapo mbo'u anu asalakono ka uweweuo: asaomo luwuno arataamu ka tia-tiaomo atuu a mia memongkokolaro, ka komohawe arataa i suruga, umarino atuu aiwamo ramai ka utonda Aku.”

²³ Mansano rumongeo pau atuu, mia atuu tedoa mompemasusa, gangano onae tedoa kaea.

²⁴ Ka Do'amba i Yesu mengkita ndi onae ka Dopotae, ”Motungko ntu'u mia anu hadio doino mokompewinso a Poparentaa-Do Ue Ala.

²⁵ Hangano moruanaopo aasa unta mewinso a bolono seu sekonopo aasa mia kaea mewinso a laro Poparentaa-Do Ue Ala.”

²⁶ Ka ondae anu merongeo atuu mpotae, ”Tewala kanandio, isemake anu pinokongkadudui?”

²⁷ Dopotae i Yesu, ”Hapa anu nahi polio mia, Dopolio Ue Ala.”

Tambo tumonda Ira i Yesu 18:28-30 (Mat. 19:27-30; Mrk. 10:28-31)

²⁸ Motae i Peturu, ”Omami andio kimebintaomo luwuno pine'uemami ka kimentonda Komiu.”

²⁹ Motae Ira i Yesu ndi ondae, ”Kupauakomiu, menteeano sompo mia anu hangano Poparentaa-Do Ue Ala ka ibintao rahano, beineno ke pepaekompono, mia mota'uno ke luwuno anano,

³⁰ ta wali montarima meluka i tempo koa mbo'u andio, ka a tempo anu ta hawe onae ta montarima tuwua anu nahina tampulaano.”

Pompopoto'ori kopentoluno mongkona tebobarasai-Do i Yesu 18:31-34 (Mat. 20:17-19; Mrk. 10:32-34)

³¹ Dopoboi ira i Yesu hopulu ka orua ana guru-Do, ka Do'amba motaeako ira, ”Kanandio-andio kita melako i Yerusale ka luwuakoano anu binurido nabi mongkona i Ana Manusia ta inihii.

³² Hangano Ira pineweengako a luwuno tongku anu nahi domento'ori Ira Ue Ala, pinasinggiri, pinokongkodei ka inonui,

³³ dobobarasai Ira ka mpepate Ira, ka ko'otolu oleono Ira mewangu.”

³⁴ Sine poore ba dompokonto'orio luwuno atuu; pengkonaano pau atuu tewuni ndi ondae ka nahi domento'orio hapa anu tinoo.

Ondae i Yesu mokotompao aasa mia morawu umpeda i Yeriko 18:35-43 (Mat. 20:29-34; Mrk. 10:46-52)

³⁵ Tempono Ondae i Yesu Iramo ronga hawe i Yeriko, hinao aasa mia morawu anu mentoro a wiwi nsala ka mo'ema-ema.

³⁶ Tempono irongeo mia atuu hadio mia ntelalo, mesikenoomo, ”Hapa atuu?”

³⁷ Dompotaeakono mia, ”Ondae i Yesu to Nasare telalo.”

³⁸ Ka i'amba mebooli, ”Yesu, anano i Daudi, Ipehohawa akumo!”

³⁹ Ka ondae, anu mpelempa i arono, mengkuahakono ka iperodo-rodo. Sine komero-merokuno ipebooli, ”Anano i Daudi, Ipehohawa akumo!”

⁴⁰ Ka Do'amba i Yesu menaa-naa ka Dopetena wawao mia atuu ndi Ondae. Ka mansano umpedaomo ndi Ondae, mesikeno Ira i Yesu ndi onae,

⁴¹ ”Hapa inehemu ba Kuweweuakomu?” Sumangki mia atuu, ”Ue, ka kupokompongkita!”

⁴² Ka Do'amba i Yesu motaeakono, ”Omue pongkitamo, ikaduduikomo pompe'ala-alamu!”

⁴³ Ka i tempo koa mbo'u atuu onae mongkitaomo, ka i'amba tumonda Ira saru umunde-unde Ira Ue Ala. Luwuno palili mengkitao anu gagi atuu ka dome'unde-unde Ira Ue Ala.