I LUKASI 17 - Wunta Mempori

Ba opia patudu 17:1-6

¹ Dopotae i Yesu a ana guru-Do, ”Asalakono ta hina pompopo'ooa, sine masolaomo mia anu weweuo.

² Da moikoopo onae ba ipinontanggoako watu pogili a we'uno, ka i'amba pinetadiako a laro ntahi, sekonopo ipompopo'oo te'asa mia inso a mia anu memolema andio.

³ Tangkoroomo koroimu! Tewala pepaekompomu moweweu hala, kuahakono, ka tewala ipe'o'oleakono, ampuniomo.

⁴ Tamoako ba ipoweweu hala ndi omue pepintu i larono asa oleo ka pepintu ipekule ndi omue ka ipotae: Me'o'ole aku, asalakono ka u'ampunio.”

⁵ Ka do'amba mpotae tinena atuudo ndi Ondae i Ue, ”Itiangiakami pompe'ala-alamami!”

⁶ Sumangki Ira i Ue, ”Tewala hinao pompe'ala-alamiu kanamo koa langkaino wuku rawoho, komiu mpokompotaeakono keu ara andio: Tebutaomo ka tepahomo a laro ntahi, ka ta tumondao paumiu.”

Ue ka ata 17:7-10

⁷ ”Isema i olomiu anu hinao asa mia atano anu mompadeko ke mompakambiakono pinotuwuno, ta motaeakono atano, mansano mekule inso i lere: Ronga aiwa pongkaa!

⁸ Kombake posuleno ta motaeakono ata atuu: Patindaakunemo kaangaku. Peboo ntongamo ka pekakaakunemo hawe ka ku'umari mongkaa ka mo'inu. Ka umarino atuu ka u'amba mongkaa ka mo'inu.

⁹ Nde montarimakasike onae a atano atuu, hangano iweweuomo ata atuu anu itinenaako?

¹⁰ Kanandiomo mbo'u omiu. Tewala imeweweuomo luwuakoano anu imentinenaako, impotaemo: Omami andio ata anu nahi mentudu; Omami butu meweweuo hapa anu asalakono kami meweweuo.”

Hopulu ira mia haki ngkuli mesaki 17:11-19

¹¹ A laro pelempaa-Do lumako i Yerusale Ondae i Yesu tumondao tidano wita Samaria ka Galilea.

¹² Tempono Dopewinsokio aasa inia mehawe iramo hopulu mia haki ngkuli mesaki tepohaweako Ira. Ondae mpentade ola-olai

¹³ ka dompebooli, ”Yesu, Guru, Ipehohawa kami!”

¹⁴ Ka Do'amba mengkita ndi Ondae ka Dopotae, ”Imelakomo, impopokitaomo koroimiu a luwuno sando mpesomba.” Ka kontongaado a ntonga nsala metompa iramo.

¹⁵ Asa mia inso ndi ondae, mansano kumitao nine onae tompaomo, mekule saru umunde-unde Ira Ue Ala ka suarano meroku,

¹⁶ ka i'amba menggolontu a mpuu karu-Do i Yesu ka montarima kasi ndi Ondae. Mia atuu to Samaria.

¹⁷ Ka Do'amba motae i Yesu, ”Kombake hopulu mia hieno luwuno metompa iramo? Isua iramoke anu osio mia atuu?

¹⁸ Nahinake i olodo anu mekule ka i'unde-unde Ira Ue Ala sangkadio mia hawe andio?”

¹⁹ Ka Do'amba motaeakono mia atuu, ”Pentademo ka lakomo, ikaduduikomo pompe'ala-alamu.”

Haweno Poparentaa-Do Ue Ala 17:20-37 (Mat. 24:23-28, 36-41)

²⁰ Montonda pesikenodo to Parisi, te'ipia ta haweano Poparentaa-Do Ue Ala, sumangki Ira i Yesu, Dopotae, ”Haweno Poparentaa-Do Ue Ala nahina petondoni anu ta kinita,

²¹ mia mbo'u nahi dompokompotae: Kitao, kongkoo i ndi'ai ke kongkoo i ra'ai! Hangano menteeano Poparentaa-Do Ue Ala kongko i olomiu.”

²² Ka Dopotaeako ira ana guru-Do, ”Ta hawe tempono komiu mingki mengkitao te'asa inso a oleo-Do i Ana Manusia atuu ka nahi komiu mengkitao.

²³ Ka mia ira mpotaeakomiu: Kitao, kongkoo i ra'ai; kitao kongkoo i ndi'ai! Si melako i tu'ai, si mpetonda.

²⁴ Hangano mengkena kana koliki mepansari inso i tompano langi anu aasa hawe i tompano langi anu susua, kanandiomo mbo'u teweweu-Do i Ana Manusia te'upua a oleo hawea-Do.

²⁵ Sine se'eluno asalakono Ira membasaio hadio marasaia ka nahi domentarima Ira mia andiodo.

²⁶ Ka mengkena kana anu gagi tempono i Noho, kanandiomo mbo'u teweweuno te'upua a oleo-Do i Ana Manusia:

²⁷ mpongkaa ira ka mpo'inu, mpekombia ira ka mempinopokombia, hawe a oleo ka ipewinso i Noho a laro bangka, ka i'amba haweomo lolowi mepate ira luwu.

²⁸ Kanandio koa mbo'u anu gagi tempono i Lo'oti: mpongkaa ira ka mpo'inu, mpo'oli ira ka mpo'asa, mpompaho ira ka mpowangu.

²⁹ Sine a oleo ipeluarako i Lo'oti inso i Sodomo metiiomo usa api ka usa walira inso i langi mepate ira luwu.

³⁰ Kanandiomo teweweuno te'upua a oleo, ba Dopepokomengkaa i Ana Manusia.

³¹ Ba isema a oleo atuu kontongaano a mpe'angi-angia a wawo raha ka luwuno sangkano kongko a laro raha, siimo ipetii ta umalao, ka kanatuu koa mbo'u mia anu kontongaano a lere, siimo ipekule.

³² Pewowoloomo beineno i Lo'oti!

³³ Ba isema mingki mekariao penaano, onae ta tetadi penaano, ka ba isema tetadi penaano, onae ta kumaduduio.

³⁴ Kupauakomiu: A wongi atuu hinao orua mia a wawo aasa poturia, anu aasa ta winawa ka anu aasa mbo'u ta bininta.

³⁵ Hinao orua beine meronga-ronga mogili, anu aasa ta winawa ka anu aasa mbo'u ta bininta.” [

³⁶ Tewala hinao orua mia i lere, anu aasa ta winawa ka anu aasa mbo'u ta bininta.]

³⁷ Dompotaeako Ira i Yesu, ”I sua, Ue?” Dopotaeako ira, ”i sua hinao wata ngkoroi, i tu'ai penggowoado singko.”