I LUKASI 14 - Wunta Mempori

Pompokotompaa mbo'u a oleo Saba 14:1-6

¹ Pohona oleo Saba Ondae i Yesu aiwa a rahano aasa petewawado to Parisi Ira mongkaa i tu'ai. Luwuno anu mehawe mempoporoo Ira ntu'u.

² Borono ka ihawe asa mia mahaki mengkokamba koroino mentade i aro-Do.

³ Ka Do'amba i Yesu motaeako ira anu mponto'ori Taura ka to Parisi atuudo, Dopotae, ”Ineheako koake mompokotompa mia a oleo Saba ke naahi?”

⁴ Ondae atuu mengkomino luwu. Ka Do'amba uminio kaeno mia mahaki atuu ka Dopokotompao ka Dotenao lumako.

⁵ Ka Do'amba motaeako ira, ”Isemake i olomiu anu nahi ronga padiio meluarako anano ke sapino tewala tedonta a laro aasa sumuru, maupo a oleo Saba?”

⁶ Nahi dompokosangki Ira.

Po'ianga anu lalua ntu'u ka anu i totono ntu'u 14:7-11

⁷ Hangano Dokitao i Yesu, nine dompete'umalao totoka mpentoroki ira po'ianga pompelangkaia, Dopauako ira potundaano andio,

⁸ ”Tewala asa mia umoluko a gawe mpetaoa, si pentoro a mpo'ianga pompelangkaia, hangano bara'ura mia atuu mo'oluomo asa mia anu lalu pinelangkai sekono omue,

⁹ ka si aiwa mia atuu, anu umoluko ka onae ka ipotaeakomu: Po'ianga andio weeakono mia atuu. Ka i'amba omue saru mokoko'ii asalakono lumako a mpo'ianga anu i totono ntu'u.

¹⁰ Sine, tewala inoluko, lakomo pentoro a mpo'ianga anu i totono ntu'u. Bara'ura umbu raha ta aiwa ka ipotaeakomu: Sambe'e, pentoromo i arono. Ba kanandio komohawe pompelangkai i arodo luwuno totoka anu mehano.

¹¹ Hangano ba isema melangkaio koroino, onae ta pinokongkodei a ba isema me'urumako, onae ta pinelangkai.”

Isema anu asalakono ta inolu 14:12-14

¹² Ka motae Ira mbo'u i Yesu a mia anu umolu Ira, ”Tewala moweweuko pelimbua meene ke wongi, si olu ira sambe'emu ke pepaekompomu ke pe'etumu ke pehori rahamu anu kaea, hangano ira koa mensuloo me'oluko mbo'u ka ba kanandio omue mohawe sulono.

¹³ Sine tewala moweweuko pelimbua, olu iramo mia memongkokolaro, mia hinao tataano, mia mepungku ka mia memorawu.

¹⁴ Ka kome'ura, hangano nahina hapa-hapa ira mensuloakomu. Hangano komohawe sulono a oleo pewanguado mia mentee.”

Potundaano mongkona mia anu melelengkupi 14:15-24 (Mat. 22:1-10)

¹⁵ Rumongeo atuu motaeomo asa mia inso a ntotoka atuu ndi Ondae i Yesu, ”Me'uraomo mia anu ta inolu a Poparentaa-Do Ue Ala.”

¹⁶ Sine motae Ira i Yesu ndi onae, ”Hinao asa mia moweweu pelimbua langkai ka onae mo'olu hadio mia.

¹⁷ Tamo pinu'u pelimbua atuu, itenao atano motaeako ira inolu: Ime'aiwamo, hangano luwuakoano tetindaomo.

¹⁸ Sine mperonga-ronga ira mpotae: Tabeamiu nahi kami mpoko'aiwa. Anu amba-ambano motae: Mo'oli akumo lere ka asalakono aku lumako kumitao; tabeamiu nahi kupoko'aiwa.

¹⁹ Anu mehano motae: Mo'oli akumo sapi olima pasa anu sinu'uluiomo ka asalakono aku lumako umarahakono; tabeamiu nahi kupoko'aiwa.

²⁰ Anu mehano mbo'u motae: Da sarai kupetao onaemo pu'uno nahi kupoko'aiwa.

²¹ Ka mekuleomo ata atuu ka ipohaweo luwuno atuu a ueno. Ka i'amba tekudaomo umbu raha atuu ka ipotaeakono atano: Pontuturakomo lako a luwuno sala ka batatanano kota ka wawa iramo ramai mia memongkokolaro ka mia anu hinao tataano ka mia memorawu ka mia mepungku.

²² Ka i'amba ata atuu pauakono ueno: Ue, hapa anu iparentaakune kuweweuomo, sine maupo kanatuu da hinao po'ianga.

²³ Ka i'amba ueno atuu motaeakono atano: Lakomo a luwuno sala ka a ntelaloa ka dadai iramo mia, anu mekongko i tu'ai ka dompewinso, hangano rahaku asalakono ka ibuke.

²⁴ Hangano Kupauakomiu: Nahina maupo te'asa mia inso a luwuno mia anu me'inolu iramo atuu ta monsaamoako pogawe-Ku.”

Tumonda Ira i Yesu asalakono pinotola luwuakoano 14:25-35

²⁵ I asa tempo hadio mia ntehuhu tumonda Ira i Yesu a laro pelempaa-Do. Mewolili Ira ka Dopotaeako ira,

²⁶ ”Tewala asa mia aiwa ndi Ongkue ka nahi o'aliaakono amano, ineno, beineno, anano, pepaekompono tama ke beine, maupo penaano onaeno, nahi ta polio gagi ana guru-Ku.

²⁷ Ba isema nahi po'ahao keu pinotambano ka itonda Aku, nahi ta polio gagi ana guru-Ku.

²⁸ Hangano isemake i olomiu anu tewala ta mowangu menara nahi pentoro ari dumoao olino parewano ka pontambo, ba ta koa sompo doino ranta ka i'umari anggaa atuu?

²⁹ Ka tewala iponaakonomo empehino ka nahi poko'umario, ba mansa domengkitao luwuno mia ka dompopodeu-deuo,

³⁰ saru mpotae: Mia arau ipu'uo wanguo, sine nahi polio moko'umario.

³¹ Ke, mokole isuake tewala ta lumako metea mo'ewai mokole susua nahi pentoro ari ka ipontimbanga, ba ta koa polio umaropiakono mia hopulu nsowu iwali anu hawe sumapoio rua pulu nsowu mia?

³² Tewala naahi, tekonai da me'olai ira iwali atuu onae ta montena mia lumako mesikenoakono ba kana'umpe pesalaano pesintuwua.

³³ Kanandiomo mbo'u sompo-sompo mia i olomiu, anu nahi potolao koroino inso a luwuno arataano, nahi pokogagi ana guru-Ku.

³⁴ Ohia lano moiko, sine tewala ohia gagi motewe, saru hapa mbo'uke ipinokomopa'iako?

³⁵ Nahina mbo'u tuduno moiko a lere maupo pompokomewalo pinopaho, ka domentadio mpena mia. Isema hinao biri porongeno, ka iporongemo!”