I LUKASI 11 - Wunta Mempori

Mongkona Mekakai 11:1-13 (Mat. 6:9-13; 7:7-11)

¹ Pohona Ondae i Yesu kontongaa-Do mekakai i aasa po'ianga. Mansa-Do menaa-naa mekakai, motaemo aasa ana guru-Do ndi Ondae, ”Ue, Ipaguru kamimo mpekakai, mengkena kana anu ipaguruako ira i Yohane a ana guruno.”

² Dosangki ira i Yesu, ”Tewala komiu mpekakai, impotaemo: Ama, nee-Miu ka ipinokomempori; Poparentaa-Miu ka ihawe.

³ Ipowee kami kaangamami sompo oleo ka isompo

⁴ ka I'ampuniakamimo halamami, hangano omami mbo'u me'apunio sompo mia anu sala ndi omami; ka siimo Iwawa kami a mpo'ara-arahakoa.”

⁵ Ka Do'amba motaeako ira, ”Tewala asa mia i olomiu lumako porontonga wongi a rahano asa mia sambe'eno ka ipotaeakono: Pepaekompo, poweeakune roti te'otolu ka kuponsabo,

⁶ hangano asa mia sambe'eku anu kontongaano a laro pelempaa tetoro i rahaku ka nahina hapa-hapa aku mompatindaakono;

⁷ komba ta sumangki anu i laro raha atuu: Si pokonsusa aku, tinondoomo pewowa ka mpoturi kamimo saru nana'ote; nahi kupokompewangu moweeko pepaekompo.

⁸ Kupauakomiu: Maupo nahi behe pewangu ka moweeakono hangano mia atuu sambe'eno, sine hangano nahina mokoko'iino atuu, onae ta koa mewangu ka moweeakono hapa anu kinereno.

⁹ Onaemo pu'uno Kupauakomiu: Impo'emamo, ka komiu mempinoweeako; impo'ungkemo ka komiu mpohawe; impetingko-tingkomo ka komiu me'inungkahiako pewowa.

¹⁰ Hangano sompo mia anu mo'ema, montarima ka sompo mia anu mo'ungke, mohawe ka sompo mia anu metingko-tingko, onae inungkahiako pewowa.

¹¹ Ama isuake i olomiu, tewala anano mo'ema bou ndi onae, ta moweeakono ule anano atuu euno bou?

¹² Ke, tewala onae mo'ema su'ului manu, ta moweeakono kasi-kasi molea?

¹³ Gagi tewala omiu anu memosa'o mponto'ori mpopeweengako pompowee anu moiko a anamiu, tamoako Amamiu anu i suruga! Ira mompowee Penaa Mempori a mia anu mpo'ema ndi Ondae.”

Ondae i Yesu ka i Beelesebu 11:14-23 (Mat. 12:22-30; Mrk. 3:22-27)

¹⁴ Pohona Ondae i Yesu monsaari aasa onitu nsa'o anu mompokobebe inso a aasa mia. Mansano meluarako onitu nsa'o atuu, mia beebe atuu mokompepau. Ka mengkohali-hali iramo mia hadio.

¹⁵ Sine hinao i olodo anu mepau, ”Doponsaariako onitu nsa'o pabawano i Beelesebu, tadulakodo onitu nsa'o.”

¹⁶ Hinao mbo'u anu mo'ema ndi Ondae aasa petondoni inso i suruga, ta umara-arahako Ira.

¹⁷ Sine Doto'orio i Yesu pinewowolodo ka Do'amba motae, ”Sompo poparentaa anu tetia-tia manasa tekale-kale, ka sompo sombori anu tetia-tia manasa tekale-kale.

¹⁸ Tewala i Mosa'o atuu tetia-tia mbo'u ka i'ewaio koroino onaeno, kana'umpeke ka ta mo'ia mpiha poparentaano? Hangano mpotae komiu, nine Ongkue monsaariako onitu nsa'o pabawano i Beelesebu.

¹⁹ Gagi tewala Ongkue monsaariako onitu nsa'o pabawano i Beelesebu, saru pabawano hapake domposaariako anu mentonda komiu? Onaemo pu'uno ondaemo anu ira megagi puu mpobitaramiu.

²⁰ Sine tewala pabawa-Do Ue Ala Kuponsariako onitu nsa'o, ka menteeano Poparentaa-Do Ue Ala haweomo ndi omiu.

²¹ Tewala aasa mia anu moroso ka anu sompo parewa mpeteano dumagaio rahano onaeno, ka tekaduduiomo luwuno arataano.

²² Sine tewala asa mia anu morosoopo sekono onae sumapoio ka inangio, asalakono mia atuu ta rumontuo parewa mpeteano, anu pinerorohino, ka ta tumia-tiao rinontuno.

²³ Isema nahi pe'asaa-Kune, i'ewai Aku ka isema nahi popumpu saru Ongkue, onae morawo-rawo.”

Pekuleno onitu nsa'o 11:24-26 (Mat. 12:43-45)

²⁴ ”Tewala meluarako onitu nsa'o inso a mia, onae mo'itu-itu a luwuno po'ianga anu londa mo'ungke penaa-naaano, ka hangano nahi pohawe, ipotae: Aku mekule a raha anu kubintaomo atuu.

²⁵ Onaemo ka ilako ka ihaweo raha atuu morina rinoahi ka te'atora moiko.

²⁶ Ka i'amba meluarako umoluako ira opitu onitu nsa'o susua anu memosa'o irapo sekono onae, ka dompewinso mpo'ia i tu'ai. Ka poko'ariano teweweuno mia atuu mosa'oopo sekono teweweuno amba-ambano.”

Isema anu me'ura 11:27-28

²⁷ Tempono da mepau Ira i Yesu, mebooliomo aasa beine inso i olodo mia hadio ka ipotae ndi Ondae, ”Me'uraomo ine anu mentiaa-Komiu ka uo anu mopo'uo Komiumo.”

²⁸ Sine Dopotae, ”Anu me'ura onaemo ondae anu mporonge pau-Do Ue Ala ka anu mpekariao.”

Petondonino i Yunu 11:29-32 (Mat. 12:38-42)

²⁹ Tempono domenggowo Ira mia hadio, motae Iramo i Yesu, ”Mia andiodo ondaemo mia anu memosa'o. Inehedo ka ihina te'asa petondoni, sine ndi ondae nahi ira mempinoweeako petondoni sangkadio petondonino Nabi Yunu.

³⁰ Hangano kana i Yunu gagi petondonido to Niniwe, kanandio koa mbo'u i Ana Manusia Ira gagi petondonido mia andiodo.

³¹ I tempono pebitaraa, mokole beine inso i Selata atuu ta mentade saru mia andiodo ka onae ta humuku ira. Hangano mokole beine andio hawe inso i tompano tolino ta rumongeo ponto'orino i Salomo, ka menteeano anu kongko i ndi'ai lauaopo sekono i Salomo!

³² I tempono pebitaraa, to Niniwe ira mpentade saru mia andiodo ka ondae anu humuku ira. Hangano to Niniwe atuudo ntepidi tempono domerongeo pompaleleno i Yunu, ka menteeano anu kongko i ndi'ai laluaopo sekono i Yunu!”

Huluno koroi 11:33-36

³³ ”Nahina maupo te'asa mia anu mompolanga hulu ka i'amba numaao a ntoto raha ke a ntoto basu, tendeano a wawo ngkaruno hulu, ka dompokokitao koa luwuno mia anu mpewinso wantano.

³⁴ Matamu onaemo huluno koroimu. Tewala mata moiko, mewineomo asa ngkoroimu, sine tewala matamu mosa'o, wongi-wongiomo koroimu.

³⁵ Onaemo pu'uno impekokoongakono ka si gagi wongi-wongi mewine anu kongko ndi omiu.

³⁶ Tewala asa ngkoroimu mewine ka nahina te'asa ntia anu wongi-wongi, asalakono luwuno ta mewine, mengkena kana hulu tewala ipokomewineakomu wantano.”

Ondae i Yesu kumuahako ira to Parisi ka anu mponto'ori Taura 11:37-54 (Mat. 23:1-36; Mrk. 12:38-40; Luk. 20:45-47)

³⁷ Mansa-Do umari mompaguru i Yesu, aasa to Parisi umolu Ira ka Dopongkaa i rahano. Ka mewinso Iramo a laro raha atuu, ka Do'amba mentoro mongkaa.

³⁸ To Parisi atuu kumitao anu gagi atuu ka onae kohali-hali, hangano Ondae i Yesu nahi Dowo'ohio kae-Do ka Do'amba mongkaa.

³⁹ Sine motae Ira i Ue ndi onae, ”Omiu to Parisi, impokomorinao bungkuno tonde ka sempe, sine i laromiu buke rinontu ka mosa'oa.

⁴⁰ Hei mia mebenge-benge, komba Ondaeke anu mokogagio bungkuno, Ondae koa mbo'u anu mokogagio larono?

⁴¹ Sine, impeweengakonomo ihino gagi pontulungi ka menteeano luwuno ta gagi morina ndi omiu.

⁴² Sine memasola komiumo, hei to Parisi, hangano ime'owahio tia hopuluno solasi, timbowane ka luwuno rupano inahu, sine nahi impebungkuio moleoa ka pompehohawa-Do Ue Ala. Anu aasa asalakono wineweu ka anu susua si mpebungkuio.

⁴³ Memasola komiumo, hei to Parisi, hangano inehemiu mpentoro a mpo'ianga i arono ntu'u a raha tepumpua ka inehemiu mpontarima pompelangkai a olu.

⁴⁴ Memasola komiumo, hangano mengkana komiu kaburu anu nahina tondonino; mia mpelempa i wawono, nahi to'orio.”

⁴⁵ Asa mia inso i olodo anu mponto'ori Taura atuu sumangki ka ipotaeako Ira, ”Guru, Ipepau kanandio, Ipokongkodei kami mbo'u.”

⁴⁶ Sine sumangki Ira, ”Memasola komiumo mbo'u, hei guru agama, hangano impopotembiako ira mia anu nahi dompokotembio, sine omiu-miu nahi medanggiakono maupo te'asa wunga ngkaemiu tinembi atuu.

⁴⁷ Memasola komiumo, hangano imeweweuo kaburudo nabi, sine uempu'umiu mpepate ira.

⁴⁸ Hangano kanandio memangaku komiu, nine impementeeo luwuno wineweudo uempu'umiu, hangano dompepate iramo nabi atuudo ka imeweweuo kaburudo.

⁴⁹ Onaemo pu'uno ponto'ori-Do Ue Ala mepau: Aku tumena ira nabi ka tinena ndi ondae ka entongano inso i olodo nabi ka tinena atuu ira mempinepate ka bobarasai ira,

⁵⁰ ka itinuntu a mia andiodo reado luwuno nabi anu te'uwuomo mompu'u ipinokogagi wawontolino,

⁵¹ mompu'u inso a reano i Habeli hawe a reano i Sakaria anu pinepateomo i olono meda pontunua pesomba ka Raha-Do Ue Ala. Tendeano Kupauakomiu: Luwuno atuu ta tinuntu inso a mia andiodo.

⁵² Memasola komiumo, hei guru agama, hangano ime'alaomo kunsino ponto'ori; omiu-miu nahi mpewinso i larono ka mia anu me'ungkeakono ira mpewinso i larono ime'onsoio.”

⁵³ Ka mansa-Do melungka i Yesu inso a mpo'ianga atuu, anu mponto'ori Taura ka to Parisi mpoporoo ira mpiha ka hadio rupa pesikenodo ndi Ondae.

⁵⁴ Onaemo atuu inungkeakodo mete'umala Ira, ka dompokorako ira me'empehiako te'asa anu pinau-Do.