I LUKASI 1 - Wunta Mempori

Pau amba-ambano 1:1-4

¹ I Teopilu anu pinelangkai, Hadio mia mpompe'arahako iramo meburio aasa lele mongkona luwuno anu gagiomo i oloto,

² kana anu pinohawedo ndi ontae, anu inso a pompu'uano mengkitaakono matado ka anu mompalele pau-Do i Ue.

³ Onaemo pu'uno, mansaku mepenteeo ntu'u luwuno anu gagi atuu inso a pompu'uano, kupakosiomo aku buriakomiu tepotuda moiko a wunta,

⁴ ka upokonto'orio, nine luwuakoano anu upinaguruako mentee ntu'u.

Pompopoto'ori mongkona hinaano i Yohane Puu Mpobaho 1:5-25

⁵ Tempono i Herode, mokole i Yudea, hinao asa mia sando mpesomba anu meneeako i Sakaria inso a binawaano i Abia. Beineno mbo'u inso a inuleno i Haruni, neeno i Elisabe.

⁶ Orua ira tuwu mentee i aro-Do Ue Ala ka tuwu montonda luwuno parenta ka pompakosi-Do i Ue ka nahina tataado.

⁷ Sine nahina anado, hangano i Elisabe biita ka orua ira mota'u iramo.

⁸ Pohona, tempono haweako tiano bawaano, i Sakaria weweuo anggaano sando mpesomba i aro-Do i Ue.

⁹ Hangano tempono inundi, kana gaudo, ka itinantui sando mpesomba anu mo'angga, onaemo anu tiniso ka ipewinso a laro Raha Mempori ka montunu dupa i tu'ai.

¹⁰ Kontongaano atuu luwuno bawaa mpepumpu i bungkuno ka mpekakai. Tempo atuu onaemo tempo pontunua dupa.

¹¹ Ka ikitaomo i Sakaria aasa mala'eka-Do i Ue mentade i koanano meda pontunua dupa pesomba.

¹² Kumitao anu gagi atuu onae tededengke ka gagi doito.

¹³ Sine ipotae mala'eka atuu ndi onae, ”Si doito, hei Sakaria, hangano pekakaimu ininduomo ka i Elisabe, beinemu, ta me'anaakomu aasa ana ntama ka asalakono konumeeakono i Yohane.

¹⁴ Komo'unde ka mawongko, tendeano hadio mia ira mempo'undeakono hinaano atuu.

¹⁵ Hangano onae ta langkai i aro-Do i Ue ka onae nahi ta mo'inu anggoro ke inua mompokomolangu ka onae ta bukeako Penaa Mempori mompu'u inso a mpe'anakaano ineno;

¹⁶ onae ta weweuo hadio to Isaraeli mpepokule ndi Ondae i Ue, Ue Alado,

¹⁷ ka onae ta melempa mese'elungi Ira i Ue a laro mpenaa ka pabawano i Elia ka iweweuo aroado luwuno ama mpepokule a luwuno anado ka aroado mia me'ewa a mpinewowolodo mia mentee ka hangano kanandio patindaako Ira i Ue aasa bawaa anu mpompe'ala-ala ndi Ondae.”

¹⁸ Ka i'amba i Sakaria motaeakono mala'eka atuu, ”Kana'umpeke ka kuto'orio, nine mongkona andio ta gagi? Hangano mota'u akumo ka beineku tende ntinuwuomo.”

¹⁹ Mala'eka atuu sumangkio, ”Ongkuemo i Gabarieli anu mekakaako Ira Ue Ala ka tinena akumo mepauakomu ka mohaweo lele moiko andio ndi omue.

²⁰ Menteeano kogagi beebe ka nahi komokompepau hawe a oleo, ka igagi luwuno andio, hangano nahi upe'ala-alao pinauku anu ta mengkaa menteeano a tempono.”

²¹ Kontongaano atuu mia hadio mensisikorio i Sakaria. Mengkohali-hali iramo, hangano tehineomo lahi ipo'ia a laro Raha Mempori.

²² Tempono ipeluarako, nahi pokompepauako ira ka dompokonto'oriomo, nine hinaomo kinitano a laro Raha Mempori. Ka i'amba kumawe-kawe ira, hangano kongkono beebe.

²³ Mansano tampulaomo tempo po'anggaano, mekuleomo i raha.

²⁴ Nahi tehine umarino atuu i Elisabe, beineno, mentia ka i larono olima wula nahi pelua-luarako, ipotae,

²⁵ ”Onaemo andio wineweu-Do i Ue ndi ongkue, ka kanandio-andio Dopahihiakunemo tekoko'iiku a mia.”

Pompopoto'ori mongkona hinaa-Do i Yesu 1:26-38

²⁶ I larono wula ko'onoo Dotenao Ue Ala mala'eka Gabarieli lumako a aasa kota i Galilea meneeako Nasare,

²⁷ a aasa ana beine anu mesamboraako aasa mia meneeako i Yusupu inso a nsomborino i Daudi; neeno ana beine atuu i Maria.

²⁸ Tempono ipewinso mala'eka atuu a rahano i Maria, ipotae, ”Tabea, hei omue anu rinonso, Ondae i Ue kumongkomiko.”

²⁹ Tededengke i Maria rumongeo pau atuu, ka i'amba mesikeno i laro aroano, bahapa pengkonaano tabea atuu.

³⁰ Mala'eka atuu motaeakono, ”Si doito, hei Maria, hangano omue mohawe pompehohawa i aro-Do Ue Ala.

³¹ Menteeano komentia ka kome'anaakono aasa ana ntama ka asalakono ka uneeako Ira i Yesu.

³² Ira gagi langkai tuwu-Do ka Ira nineeako Ana-Do Ue Ala Anu Lalu i Wawono. Ka Ondae Ue Ala weeako Ira kadera poparentaano i Daudi, uempu'u-Do,

³³ ka Ira gagi mokoledo inuleno i Yako hawe nahina tampulaano ka Poparentaa-Do nahina tompaano.”

³⁴ Motae i Maria a mala'eka atuu, ”Kana'umpe ka ta gagi pinau atuu, hangano napi hina tamaku?”

³⁵ Sumangki mala'eka atuu, ”Penaa Mempori ta metii ndi omue ka pabawa-Do Ue Ala Anu Lalu I Wawono ta umengoiko; onaemo pu'uno ana anu ta pine'anaako atuu ta pinau mempori, Ana-Do Ue Ala.

³⁶ Ka menteeano, i Elisabe, potehamu atuu, onae mbo'u kontongaano mentiaakono aasa ana ntama i tempono mota'uomo ka ndio ko'onoo wulanomo onae, anu pinau biita atuu.

³⁷ Hangano ndi Ondae Ue Ala nahina anu nahi ta gagi.”

³⁸ Motae i Maria, ”Menteeano ongkue andio tetenaa-Do i Ue; ka igagimo ndi ongkue montonda pinaumiu atuu.” Ka i'amba mala'eka atuu bintao.

I Maria ka i Elisabe 1:39-45

³⁹ Nahi tehine umarino atuu melungkaomo i Maria ka ipelempa lumako a mentorukuno te'aro a aasa kota i Yehuda.

⁴⁰ I tu'ai onae mewinso a rahano i Sakaria ka metabe ndi Elisabe.

⁴¹ Ka mansano rumongeo i Elisabe petabeno i Maria, me'ungkulako ana anu a laro mpe'anakaano ka i Elisabe mbo'u bukeakoomo Penaa Mempori,

⁴² ka i'amba mebooli meroku, ”Omuemo rinonso i olodo luwuno beine ka rinonsoomo wuano pe'anakaamu.

⁴³ Isemake ongkue andio ranta ka ihawe ine-Do Ueku kumita aku?

⁴⁴ Hangano menteeano, mansano hawe a biriku petabemu, ana anu a laro mpe'anakaaku me'ungkulako mo'unde.

⁴⁵ Ka me'uraomo onae, anu mompe'ala-alaomo, hangano hapa anu ipinauako inso ndi Ondae i Ue, ta inihii.”

Penani po'unde-undeno i Maria 1:46-56

⁴⁶ Ka i'amba motae i Maria, ”Sumangaku umunde-unde Ira i Ue,

⁴⁷ ka aroaku mawongko hangano Ondae Ue Ala, Puu pongkaduduiku,

⁴⁸ hangano Dopensiroiomo kodeino tuwuno tetenaa-Do. Menteeano, mompu'u kanandio-andio luwuno inule ira mempau aku me'ura,

⁴⁹ hangano Doweweuomo Anu Tedoa Pabawa luwuno wineweu langkai ndi ongkue ka nee-Do memporiomo nee-Do.

⁵⁰ Ka pompehohawa-Do mapa'api-api inule a mia anu doitoako Ira.

⁵¹ Dopopokitao pabawa-Do a wineweuno kae-Do ka sumiarawo ira mia anu aroado mpompelangka-langkai;

⁵² Dopotii ira mia anu mempabawa inso a ngkadera poparentaado ka tumande ira mia anu tetotoako;

⁵³ Dopokohadioako ira ntu'u luwuno anu moiko a mia anu mokoninggo, ka tumenao mia anu kaea lumako saru kae mooa;

⁵⁴ Dotulungio i Isaraeli, tetenaa-Do, hangano Dorambeo pompehohawa-Do,

⁵⁵ kana anu Dodandiako ira uempu'uto, ndi Burahima ka inuleno ranta nahina tampulaano.”

⁵⁶ Ka i Maria mo'ia bara'ura otolu wula tehineno merongaakono i Elisabe, ka i'amba mekule i rahano.

Hinaano i Yohane Puu Mpobaho 1:57-66

⁵⁷ Ka i'amba sompoomo wulano i Elisabe ta me'ana ka ipe'anaakono aasa ana ntama.

⁵⁸ Mansado merongeo pehori rahano saru pe'etuno, nine Dopopokitaomo i Ue pompehohawa-Do anu tedoa langkai ndi onae, mpo'unde iramo meronga saru onae.

⁵⁹ Ka a oleo anu ko'oalu mehawe iramo mia ka domentindio nana'ote atuu ka mingki ira meneeakono i Sakaria montonda neeno amano,

⁶⁰ sine motae ineno, ”Osi'i, onae asalakono nineeako i Yohane.”

⁶¹ Dompotaeakono, ”Nahina i olodo pe'etumu anu meneeako kanatuu.”

⁶² Ka do'amba mengkaweo amano mpesikenoakono nee anu ta pinoponeeako anano atuu.

⁶³ I'emao watu poburia, ka i'amba buri ira pau andio, ”Neeno onaemo i Yohane.” Ka mengkohali-hali iramo luwu.

⁶⁴ Ka i tempo koa mbo'u atuu te'ungkahiomo ngangano ka tepotolaomo elono, ka i'amba mepau ka umunde-unde Ira Ue Ala.

⁶⁵ Ka medoito iramo luwu mia anu mpo'ia i horino, ka luwuno anu gagi atuu gagiomo popauado luwuno anu mpo'ia i mentorukuno Yudea.

⁶⁶ Ka luwuno mia, anu merongeo, mpe'ihilaroo ka dompotae, ”Gagi hapake nana'ote andio lembuino?” Hangano kae-Do i Ue kumongkomio.

Penani po'unde-undeno i Sakaria 1:67-80

⁶⁷ Ka i Sakaria, amano, bukeako Penaa Mempori, ka i'amba mompau anu ta gagi, ipotae,

⁶⁸ ”Inunde-unde Iramo i Ue, Ue Alado to Isaraeli, hangano hawe Ira kumitao bawaa-Do ka mowawaako ira tolaa,

⁶⁹ Dopotuwuo aasa tandu tekaduduiato a laro inuleno i Daudi, tetenaa-Do atuu,

⁷⁰ – kana anu Dopauomo a wiwido luwuno nabi-Do anu mempori inso i ndi'upua –

⁷¹ ka Dopotola kita inso a luwuno iwalito ka inso a ngkaedo mia anu umo'aliaakita,

⁷² ka Dopopokitao pompehohawa-Do a uempu'uto ka rumambeo pedandia-Do anu mempori,

⁷³ onaemo sumpa anu pinau-Do ndi Burahima, uempu'uto, nine Ira moweeakita,

⁷⁴ ka tontepotola inso a ngkaedo iwali, mpokompesomba ndi Ondae nahi tomedoito,

⁷⁵ a laro memporia ka menteea i aro-Do asa ntinuwuto.

⁷⁶ Ka omue, hei anaku konineeako nabi-Do Ue Ala Anu Lalu i Wawono; hangano komelempa mese'elungi Ira i Ue patindaako Ira pesalaa-Do.

⁷⁷ Ka Dopoweeako ira bawaa-Do ponto'oria mongkona tekaduduia anu me'empehiako po'ampunia luwuno halado,

⁷⁸ hangano pe'aroa ka pompehohawa inso ndi Ondae Ue Alato, onaemo ka Dohawe kumita kita, mata'oleo mo'oru inso i wawono,

⁷⁹ ka ipansari ira anu mpo'ia a wongi-wongiano ka a laro mpe'engono matea ka Dopo'aroo karuto a nsala rodoa.”

⁸⁰ Ndio nana'ote atuu kolangka-langkaino ka komoro-morosono penaano. Ka onae mo'ia i pada one hawe a oleo anu asalakono ka ipeposaba a nto Isaraeli.