Imama 9 - Wunta Mempori

Sando mpesomba pontarima ira potorodo

¹ Ko'oalu oleono, i Musa moboio i Haruni ka luwuno anano ka luwudo mia memota'u Isaraeli.

² Ipotaeakono i Haruni, ”Alaomo tiamu asa sapi mongura gagi pesomba po'onini hala ka asa bimba lakino gagi pesomba tinunu, oruano nahina tataano umarino atuu pesombaakonomo i aro-Do i Ue.

³ A nto Isaraeli asalakono pauako ira kanandio: Ime'alaomo asa bembe lakino gagi pesomba po'onini hala ka asa ana nsapi ka asa bimba tinuwuno asa nta'u anu nahina tataano gagi pesomba tinunu.

⁴ Ime'alao mbo'u asa sapi ka asa bimba lakino gagi pesomba tekaduduia, kai pinesombaako i aro-Do i Ue, ka pesomba kaanga anu sinaloako lana, hangano a oleo andio Ondae i Ue Ira mepopokita ndi omiu.”

⁵ Ka do'amba mewawao hapa anu iparentaako ira i Musa a Kema Tepotowoa. Luwuno bawaa atuu mperangkuhi ira ka mpentade i aro-Do i Ue.

⁶ Motae i Musa, ”Ndiomo peparenta-Do i Ue kai mentondao ka maramba-Do i Ue tengkita ndi omiu.”

⁷ Ka i'amba motae i Musa ndi Haruni, ”Aiwamo umpeda a meda pontunua pesomba. Patindaomo pesomba po'onini hala ka pesomba tinunumu saru weweuomo pesintuwua tiano koroimu ka tiado tongku atuu. Umarino atuu patindaomo pesombado tongku atuu ka weweuomo pesintuwua tiado kana parenta-Do i Ue.”

⁸ Ka i'amba i Haruni merangkuhako a meda pontunua pesomba, ka isumbeleo ana nsapi anu ta gagi pesomba po'onini halano onaeno.

⁹ Luwuno anano i Haruni mewawao reano sapi atuu ndi onae ka i'emoo i Haruni wunga ngkaeno a rea atuu kai hahiakono a ntandu-tanduno meda pontunua pesomba. Toreano inso a rea atuu i'uwuo i totono meda pontunua pesomba.

¹⁰ Taba, wua hori ka taba umapiio ate inso a mpesomba po'onini hala atuu itunuo a wawo meda pontunua pesomba, kana parenta-Do i Ue ndi Musa.

¹¹ Sine bauno ka kulino itunuo kai pingko i bungkuno pekemaa.

¹² Ka i'amba i Haruni sumumbeleo pesomba tinunu, ka luwuno anano mpeweengakono reano pesomba atuu ndi onae. Ka i'amba i Haruni mesiwuiakono a limbuno meda pontunua pesomba.

¹³ Ondae mbo'u mpeweengakono ndi onae pesomba tinunu atuu montonda tiano anu tinantui saru uluno, ka i'amba tinunu a wawo meda pontunua pesomba.

¹⁴ Ihi kompono ka witino wino'ohi ka itinunu i wawono pesomba tinunu i wawono meda pontunua pesomba.

¹⁵ Umarino atuu iwawao pesombado tongku atuu a meda pontunua pesomba. I'alao bembe lakino anu ta gagi pesomba po'onini halado tongku atuu, ka i'amba sumumbeleo ka ipesombaakono gagi pesomba po'onini hala kana anu amba-ambano.

¹⁶ Ka i'amba wawao pesomba tinunu a meda pontunua pesomba kai patindao menunu saru atora.

¹⁷ Ka i'amba wawao pesomba kaanga ka i'alao asa raku inso ndi onae, ka i'amba tumunuo a wawo meda pontunua pesomba, i horino pesomba tinunu i tempono mo'oru.

¹⁸ Isumbeleo mbo'u sapi ka bimba lakino anu ta gagi pesomba tekaduduiado tongku atuu. Ka do'amba luwuno anano i Haruni mpeweengakono reano pesomba atuu ndi onae, ka i'amba i Haruni sumiwuiakono a limbuno meda pontunua pesomba.

¹⁹ Sine luwuno tabano sapi ka bimba lakino atuu, moiko ikino anu mentaba, maupo taba anu tumutuwio ihi kompono, wua hori ka taba anu umapiio ate,

²⁰ luwuno taba atuu domenaao i wawono radano orua pesomba atuu. Ka i'amba i Haruni tumunuo luwu taba atuu a wawo meda pontunua pesomba.

²¹ Rada ka pa'a koanano atuu ipesombaakono i Haruni gagi pesomba tinande i aro-Do i Ue, kana parentano i Musa.

²² I Haruni tumandeo orua kaeno a tongku atuu kai ronso ira. Onae metii umarino mompesombaako pesomba po'onini hala, pesomba tinunu ka pesomba tekaduduia.

²³ I Musa ka i Haruni mewinso i larono Kema Tepotowoa. Ka do'amba meluarako rumonso ira tongku atuu. Tengkitaomo maramba-Do i Ue a tongku atuu.

²⁴ Meluarakoomo api inso i aro-Do i Ue kumaano pesomba tinunu ka luwuno taba i wawono meda pontunua pesomba. Mansado luwuno tongku atuu mengkitao, mpeboo-booli iramo ka do'amba mpenggolontu mpesomba.