Imama 8 - Wunta Mempori

Poronsoano i Haruni ka luwuno anano

¹ Ondae i Ue mepau ndi Musa,

² ”Poboio i Haruni ka luwuno anano meronga saru onae, ka alao luwuno sangka, lana po'urapi ka sapi lakino pesomba po'onini hala, orua bimba lakino ka baki me'ihi roti nahi peragi,

³ ka i'amba tumena ira pepumpu luwuno bawaa i arono pewowa Kema Tepotowoa.”

⁴ I Musa weweuo kana parenta-Do i Ue ndi onae, ka mpepumpu iramo bawaa atuu i arono Kema Tepotowoa.

⁵ Mepauomo i Musa a bawaa atuu, ”Ndiomo pau peparenta-Do i Ue kai wineweu.”

⁶ Ka i'amba i Musa tumenao i Haruni ka luwuno anano me'umpeda ka iwo'ohiako ira uwoi.

⁷ Umarino atuu ipokonaakono i Haruni lemba meloe i larono, tumanggoakono peboo ntongano, mokonaakono lemba meloe i bungkuno saru lemba epo ndi onae, metanggoakono koloro tanggono lemba epo, ranta kai tetanggo moroso ndi onae.

⁸ Ipokonaakono tutuwi rada ndi onae ka inaakono i larono tutuwi rada atuu Urimi ka Tumimi.

⁹ Ka i'amba numaao peboo ulu a uluno, ka a peboo ulu atuu i arono inaao ramba-ramba ulu inso a wulaa onaemo ramba-ramba mempori kana petena-Do i Ue ndi Musa.

¹⁰ I'alao i Musa lana po'urapi ka i'urapio Kema Mempori saru luwuno anu kongko i larono ka ipokomemporio luwuno atuu.

¹¹ Itawisiakono tedei inso a lana atuu a meda pontunua pepitu ka umurapio meda puntunua pesomba atuu saru luwuno parewano, bolusa pewo'ohia mbo'u saru empehino kai pokomemporio.

¹² Ka i'amba montawa tedei inso a lana po'urapi atuu a wawo uluno i Haruni ka umurapio kai pokomemporio.

¹³ I Musa tumena ira anano i Haruni me'umpeda, ka i'amba mokonaako ira lemba meloe i larono, itanggoakono peboo ntonga ka ipeweweakono peboo ulu kana parenta-Do i Ue ndi Musa.

¹⁴ Sapi laki pesomba po'onini hala winawa umpeda, ka i'amba i Haruni ka luwuno anano menaao kaedo a wawo uluno sapi laki pesomba po'onini hala atuu.

¹⁵ Sapi atuu sinumbele, ka i'amba i Musa mo'ala reano, ka wunga ngkaeno hahiakono rea atuu a ntandu-tanduno a limbuno meda pontunua pesomba ranta ipokomemporiomo meda pontunua pesomba atuu inso a hala. Toreano rea atuu inuwu i totono meda pontunua pesomba. Kanandiomo ipokomemporio meda pontunua pesomba atuu ka iweweuakono pesintuwuano.

¹⁶ I Musa umalao luwuno taba anu metako a ihi kompono, taba anu umapiio ate, ka orua wua horino saru tabano, ka i'amba tumunuo a wawo meda pontunua pesomba.

¹⁷ Sine sapi laki atuu saru kulino, bauno ka ta'ino tinunu ranta kai pingko i bungkuno pekemaa kana parenta-Do i Ue ndi Musa.

¹⁸ Umarino atuu winawaomo bimba lakino pesomba tinunu. I Haruni ka luwuno anano menaao kaedo a wawo uluno bimba lakino atuu.

¹⁹ Bimba lakino atuu sinumbele ka reano ipesiwuiakono i Musa a limbuno meda pontunua pesomba.

²⁰ Bimba lakino atuu binatu-batu montonda tiano anu tinantui, ka i'amba uluno ka tia-tiano saru tabano itunuo i Musa.

²¹ Sine ihi kompono ka witino wino'ohi a uwoi. Ka i'amba i Musa tumunuo luwuno bimba laki atuu a meda pontunua pesomba. Onaemo pesomba tinunu anu woono mompokomawongko, asa pesomba tinunu ndi Ondae i Ue, kana parenta-Do i Ue ndi Musa.

²² Ka i'amba winawaomo bimba lakino anu susua, bimba pesomba poronsoa. I Haruni ka luwuno anano menaao kaedo a wawo uluno bimba laki atuu.

²³ Bimba laki atuu sinumbele, ka i'amba i Musa mo'ala tedei reano ka iponaakono a lewe biri koanano i Haruni, a ine wunga ngkae koanano ka ine wunga ngkae karu koanano.

²⁴ I Musa tumena ira luwuno anano i Haruni me'umpeda, ka i'amba monaa tedei rea atuu a lewe biri koanado, a ine wunga ngkae koana ka a ine wunga ngkae karu koanado. Toreano rea atuu ipesiwuiakono i Musa a limbuno meda pontunua pesomba.

²⁵ I'alao tabano, ikino anu mentaba, luwuno taba anu metako a ihi kompono, taba anu umapiio ate, orua wua horino saru tabano ka pa'a koanano.

²⁶ Inso a laro baki anu me'ihi roti nahi peragi anu kongko i aro-Do i Ue, i'alao asa roti bonggoli nahi peragi, asa roti bonggoli anu sinaloako lana, ka asa roti monipi, ka i'amba numaao i wawono luwuno taba ka pa'a koanano atuu.

²⁷ Luwuno inaao a pelengkaeno i Haruni ka a pelengkaedo luwuno anano ka luwuno pinesombaako gagi pesomba tinande i aro-Do i Ue.

²⁸ Ka i'amba i Musa umalao luwuno atuu inso a pelengkaedo ka itunuo a wawo meda pontunua pesomba, i wawono pesomba tinunu. Onaemo pesomba poronsoa kai gagi woono mompokomawongko, asa pesomba tinunu ndi Ondae i Ue.

²⁹ I Musa umalao radano bimba atuu ka ipesombaakono gagi pesomba tinande i aro-Do i Ue. Onaemo anu hinaweno i Musa gagi tiano inso a bimba laki pesomba poronsoa atuu, kana parenta-Do i Ue ndi Musa.

³⁰ I Musa mo'ala mbo'u tedei lana po'urapi ka rea anu i wawono meda pontunua pesomba atuu, ka i'amba tawisiakono i Haruni ka sangkano, a luwuno anano ka sangkado. Kanandiomo ironsoo i Haruni saru sangkano ka luwuno anano saru sangkado.

³¹ Motaeomo i Musa ndi Haruni ka a luwuno anano, ”Imenahuomo bau atuu i arono pewowa Kema Tepotowoa. I ra'aimo asalakono imengkaano saru roti anu a laro baki pesomba poronsoa, kana anu umariomo kuparentaako ira: i Haruni ka luwuno anano asalakono mengkaano.

³² Hapa anu torea inso a bau ka roti atuu asalakono imentunuo kai pingko ikaano api.

³³ Si melako inso a mpewowano Kema Tepotowoa i larono opitu oleo, ranta kai sompo rame-rameno poronsoamiu, hangano rame-rameno poronsoa ta wineweu opitu oleo tehineno.

³⁴ Kana anu wineweu a oleo andio, kanatuu koa mbo'u parenta-Do i Ue kai meweweuo pesintuwua ndi omiu.

³⁵ I larono opitu oleo asalakono impo'ia i arono pewowa Kema Tepotowoa meene ka wongi. Asalakono impetenunu meweweuo anu lano anggaamiu ndi Ondae i Ue kasi memate, hangano kanandiomo parenta-Do ndi ongkue.”

³⁶ I Haruni ka luwuno anano meweweuo luwu peparenta-Do i Ue telalo ndi Musa.