Imama 7 - Wunta Mempori

Pesomba pontolosi sala

¹ ”Ndiomo songka mongkona pesomba pontolosi sala. Onaemo pesomba tedoa mempori.

² A mpo'ianga ponsumbeleado mia pesomba tinunu, asalakono i tu'aimo isinumbele pesomba pontolosi sala, ka reano asalakono liimbu i siniwuiako meda pontunua pesomba.

³ Luwuno taba inso a mpesomba atuu asalakono pinesombaako, moiko ikino anu mentaba maupo taba anu tumutuwio ihi kompono,

⁴ saru orua wua horino ka taba anu metako a horino, ka taba anu umapiio ate asalakono pinonsia.

⁵ Sando mpesomba asalakono itunuo luwu a wawo meda pontunua pesomba gagi pesomba tinunu ndi Ondae i Ue. Onaemo pesomba pontolosi sala.

⁶ Sompo tama i olono luwuno sando mpesomba asalakono mengkaano. Pesomba atuu asalakono kinaa a mpo'ianga mempori. Onaemo tiano anu tedoa mempori

⁷ Mengkena kana pesomba po'onini hala, kanatuu koa mbo'u saru pesomba pontolosi sala; asa songka pinake a oruano: sando mpesomba anu moweweu pesintuwua saru pesomba atuu gagi tiano.

⁸ Sando mpesomba anu mompesombaako pesomba tinunu inso asa mia, kulino pesomba tinunu anu pinesombaakono atuu gagi tiano.

⁹ Sompo pesomba kaanga anu tinunu a mpotunua roti, ka luwuno anu ninahu a ngkawali ka a wawo mporaramia, luwuno tiano sando mpesomba anu mesombaakono.

¹⁰ Sompo pesomba kaanga anu ninahuako lana ke anu mokari luwuno tiado anano i Haruni, singge mia mohawe tiano.”

Pesomba tekaduduia

¹¹ ”Ndiomo songka mongkona pesomba tekaduduia anu asalakono pinesombaako ndi Ondae i Ue.

¹² Tewala ipesombakono hangano mawongko, asalakono ipesombaakono pesomba mawongko atuu saru roti bonggoli nahi peragi anu sinaloako lana ka roti monipi nahi peragi anu hinahiako lana saru roti bunggoli inso a ntarigu moiko ntu'u anu tesalo, anu sinaloako lana.

¹³ Asalakono ipesombaakono mbo'u pesombano atuu saru roti bonggoli anu meragi, saru pesomba mawongko anu gagi pesomba tekaduduiano.

¹⁴ Inso a sompo tiano mpesomba atuu, asalakono ipesombaakono asa roti gagi pesomba pinesusua ndi Ondae i Ue. Pesomba atuu gagi tiano sando mpesomba anu monsiwuiako reano pesomba tekaduduia.

¹⁵ Bau pesomba mawongko anu gagi pesomba tekaduduiano atuu, asalakono ikinaa a oleo ipinesombaako. Maupo tedei sipinetorea hawe mo'oru.

¹⁶ Tewala pesomba sinumbele anu pinesombaako atuu gagi pesomba pontanga ke pesomba po'eheno aroa, asalakono bauno ikinaa a oleo ipinesombaako, sine toreano moiko ikinaa tisomono.

¹⁷ Sine bau pesomba sinumbele anu da torea hawe a oleo ko'otolu, asalakono tinunu ranta kai pingko.

¹⁸ Tewala a oleo ko'otolu bau pesomba tekaduduia atuu da kinaa, nahi Dotarimao i Ue mia anu mompesombaako ka pesomba atuu nahi rineke, tendeano gagi asa anu mokoburu, ka mia anu kumaano asalakono itembio salano onaeno.

¹⁹ Tewala bau atuu ikonao anu mokoburu si kinaa, sine asalakono tinunu ranta kai pingko. Sompo mia anu morina moiko ipongkaa bau pesomba.

²⁰ Sine asa mia anu mongkaa bau pesomba tekaduduia ndi Ondae i Ue, ka kontongaano mokoburu, mia atuu asalakono pinokotampula inso a tongkuno.

²¹ Tewala asa mia ikonao anu mokoburu, moiko mokoburua inso a mia, ke inso a mpinotuwu, ke inso a sompo kondehora melele, ka i'amba mongkaa bau pesomba tekaduduia ndi Ondae i Ue, asalakono mia atuu pinokotampula inso a tongkuno.”

Pepo'onto mongkaa taba ka rea

²² Ondae i Ue mepau ndi Musa,

²³ ”Pauako ira to Isaraeli: Luwuno taba inso a nsapi, bimba ke maupo bembe, si mengkaano.

²⁴ Tabano kondehora anu mate onaeno, ke tabano kondehora anu mate pinerangkami moiko ipinake montonda luwuno paraluuno, sine si ntu'u imengkaano.

²⁵ Menteeano, sompo mia anu mongkaa taba inso a mpinotuwu anu pinake mompesombaako pesomba tinunu ndi Ondae i Ue, mia anu kumaano asalakono pinokotampula inso a tongkuno.

²⁶ Kanatuukoa mbo'u si mpongkaa rea hapamokoa a luwuno po'iangamiu, moiko reano manu-manu ke maupo reano pinotuwu.

²⁷ Sompo mia anu mongkaa rea hapamokoa, mia atuu asalakono pinokotampula inso a tongkuno.”

Tiano sando mpesomba inso a luwuno pesomba tekaduduia

²⁸ Ondae i Ue mepau ndi Musa,

²⁹ ”Pauako ira to Isaraeli: Mia anu mompesombaako pesomba tekaduduiano ndi Ondae i Ue, asalakono mowawa asantia inso a mpesomba tekaduduiano atuu gagi pesombano.

³⁰ Asalakono kaeno onaeno wawao luwuno pesomba tinunu ndi Ondae i Ue. Asalakono iwawao tabano saru radano, kai tinande radano atuu gagi pesomba tinande ndi Ondae i Ue.

³¹ Ka i'amba sando mpesomba asalakono tumunuo tabano a wawo meda pontunua pesomba, sine radano atuu gagi tiano i Haruni saru luwuno anano.

³² Pa'a koanano asalakono impeweengakono a sando mpesomba gagi pesomba pinesusua inso a luwuno pesomba tekaduduiamiu.

³³ Maupo isema inso i olodo anano i Haruni anu mompesombaako rea ka tabano pesomba tekaduduia, onaemo anu humaweo pa'a koana atuu gagi tiano.

³⁴ Hangano rada pesomba tinande ka pa'a pesomba pinesusua Ku'alaomo inso a luwuno pesomba tekaduduia anu winawado to Isaraeli ka Kuweeakonomo sando mpesomba i Haruni ka luwuno anano. Onaemo pompakosi anu Doweweuo a nto Isaraeli ranta nahina tampulaano.”

³⁵ Onaemo tiano i Haruni ka luwuno anano inso a luwuno pesomba tinunu ndi Ondae i Ue a oleo domentinena me'aiwa gagi sando mpesomba ndi Ondae i Ue.

³⁶ Onaemo asalakono dompeweengakono montonda parenta-Do i Ue inso a nto Isaraeli ndi ondae a oleo Do'urapi ira; onaemo pompakosi ndi ondae anu ira meweweuo mpiha asa mpinu'u.

³⁷ Onaemo songka mongkona pesomba tinunu, pesomba kaanga, pesomba po'onini hala, pesomba pontolosi sala, pesomba poronsoa ka pesomba tekaduduia,

³⁸ anu parenta-Do i Ue ndi Musa i wawo torukuno Sinai a oleo parenta-Do i Ue a nto Isaraeli mpopesombaako pesomba ndi Ondae i Ue i pada one Sinai.