Imama 6 - Wunta Mempori

¹ Ondae i Ue mepau ndi Musa,

² ”Tewala asa mia moweweu hala ka melelu nahi petenunu ndi Ondae i Ue kai pompopo'oo pe'asa miano mongkona sangka anu pine'ala-alaako ndi onae, ke pinepenaa ndi onaeke anu rinontuno; ke tewala onae momporo'i mpe'asa miano,

³ ke mohawe sangka anu tetadi, sine mehapu kai pesumpa megaupi mongkona hapamokoa wineweuno asa mia ranta kai tehala,

⁴ tewala kanandio ipoweweu hala ka isaala, asalakono ipokuleo sangka anu umari rinontuno ke anu pinoro'ino ke anu pine'ala-alaako ndi onaeke sangka tetadi anu hinaweno atuu,

⁵ ke luwuakoano anu hinapuno ka ipesumpa megaupi. Asalakono i'owahio euno buke saru metiangi asantia olima ka ipeweengakono ia ueno a oleo ipompesombaako pesomba pontolosi saalano.

⁶ Gagi pesomba pontolosi saala, asalakono ipompesombaako ndi Ondae i Ue asa bimba lakino anu nahina tataano inso a asa bawaa bembe bimba anu pinonaako olino, gagi pesomba pontolosi saala kai peweengakono ndi sando mpesomba.

⁷ Sando mpesomba asalakono moweweu pesintuwua tiano mia atuu i aro-Do i Ue, ka onae ta montarima te'onini halano a maupo hapa wineweuno ranta kai saala.”

Pesomba tinunu

⁸ Ondae i Ue mepau ndi Musa,

⁹ ”Parentaomo i Haruni ka luwuno anano: Ndiomo songka mongkona pesomba tinunu. Pesomba tinunu atuu asalakono mo'ia mpiha a wawo api i wawono meda pontunua pesomba, asa wongi hawe mo'oru ka api a meda pontunua pesomba asalakono dinagai kai melanga mpiha i wawono.

¹⁰ Sando mpesomba asalakono mompokona sangka lena ka mesaluara lena anu tumutuwio anuno. Asalakono itandeo awu anu i wawono meda pontunua pesomba umarino pesomba tinunu pingko ikaano api, ka inaao i horino meda pontunua pesomba.

¹¹ Ka i'amba lumohuo sangkano ka ipompokona sangka susua ka i wawao awu atuu i bungkuno pekemaa i asa po'ianga anu morina.

¹² Api i wawono meda pontunua pesomba asalakono dinagai kai melanga mpiha, si pino'inee kai mate. Sompo mo'oru asalakono sando mpesomba monaa keu a wawo meda pontunua pesomba, mo'atora pesomba tinunu i wawono ka tumunuo luwuno tabano pesomba tekaduduia i ra'ai.

¹³ Api a wawo meda pontunua pesomba asalakono dinagai kai melanga mpiha, kasi mansa mate.”

Pesomba kaanga

¹⁴ ”Ndiomo songka mongkona pesomba kaanga. Luwuno anano i Haruni asalakono mewawao i aro-Do i Ue i arono meda pontunua pesomba.

¹⁵ Asalakono sando mpesomba monsiao inso a mpesomba kaanga atuu asa raku tarigu moiko ntu'u ka lana, saru luwuno dupa anu i wawono pesomba kaanga atuu, ka i'amba tumunuo i wawono meda pontunua pesomba, ranta woono mompoko mawongko gagi tiano pepopoto'ori ndi Ondae i Ue.

¹⁶ Toreano asalakono ikaano i Haruni saru luwuno anano, kinaa kana roti nahi peragi i asa po'ianga anu mempori. Asalakono domengkaano i kintalano Kema Tepotowoa.

¹⁷ Anu tiano atuu si tinunu saru ragi. Kuweeako iramo gagi tiado inso a luwuno pesomba ndi Ongkue anu tinunuako api. Onaemo tiano tedoa mempori, mengkena kana pesomba po'onini hala ka pesomba po'onini saala.

¹⁸ Sompo tama i olono anano i Haruni, asalakono mengkaano. Onaemo asa pompakosi ndi omiu ranta inulemiu anu nahina tampulaano. Onaemo atuu tiamiu inso a luwuno pesomba ndi Ongkue anu tinunuako api. Sompo mia anu tepodanggi saru luwuno pesomba atuu gagi mempori.”

¹⁹ Ondae i Ue mepau ndi Musa,

²⁰ ”Ndiomo pesomba anu asalakono ipesombaakono i Haruni saru luwuno anano ndi Ondae i Ue a oleo i'inurapi: asantia hopulu efa tarigu moiko ntu'u gagi pesomba kaanga anu wineweu mpiha, entongano i tempono mo'oru ka entongano i tempono ngkiniwia.

²¹ Asalakono pesomba atuu sinaloako lana i wawono poraramia. Mansano tesalo asalakono kau wawaomo gagi pesomba kaanga ka mesombaakono luwuno batuno anu tinunu atuu gagi woo anu mokomawongkoo i aro-Do i Ue.

²² Sando mpesomba inso i olono luwuno anano anu inurapi gagi euno, asalakono sumaloo. Onaemo asa pompakosi anu nahina tampulaano. Luwuno asalakono tinunu gagi pesomba ndi Ondae i Ue.

²³ Sompo pesomba kaanga inso a asa sando mpesomba asalakono luwuno tinunu, nahi moiko ikinaa.”

Pesomba po'onini hala

²⁴ Mepau Ira i Ue ndi Musa,

²⁵ ”Pauakono i Haruni saru luwuno anano: Ndiomo songka mogkona pesomba po'onini hala. A mpo'ianga ponsumbelea pesomba tinunu, asalakono i tu'aimo isinumbele pesomba po'onini hala i aro-Do i Ue. Onaemo pesomba tedoa mempori.

²⁶ Sando mpesomba anu mesombaakono pesomba po'onini hala atuu, onaemo anu kumaano. Asalakono pesomba atuu ikaano i asa po'ianga mempori, a kintalano Kema Tepotowoa

²⁷ Sompo mia anu tepodanggi saru bau mpesomba atuu, gagi mempori. Tewala hinao reano anu tetawisi a sangka, asalakono imewo'ohio sangka atuu i asa po'ianga anu mempori.

²⁸ Kuro wita nahuano pesomba atuu asalakono pineha. Tewala pesomba atuu ninahu a ngkuro mala, asalakono kuro atuu hinahi ka wino'ohiako uwoi.

²⁹ Sompo tama i olono luwuno sando mpesomba asalakono mengkaano. Onaemo pesomba tedoa mempori.

³⁰ Sine sompo pesomba po'onini hala anu asantia reano winawa a Ngkema Tepotowoa kai wineweu pesintuwua a mpo'ianga mempori, si kinaa, tendeano tinunu luwu kai pingko ikaano api.”