Imama 5 - Wunta Mempori

¹ Tewala asa mia moweweu hala hangano moronge pau pontotonaa, ka onaemo sakosiino hangano ikitao ke tumo'orio, sine nahi behe pauo, asalakono itembio salano atuu.

² Ke tewala asa mia tepodanggi saru asa anu mokoburu, moiko kondehora mo'ila anu mate ka mokoburu, ke kondehora melele anu mate ka mokoburu, nahi pokoto'orio atuu, asalakono onae gagi mokoburu ka saala.

³ Tewala onae tepodanggiako anu mokoburu inso a mia, mokoburua hapamo koa anu weweuo kai mokoburu anu nahi pokonto'orio, sine lembuino ito'orio, asalakono onae saala.

⁴ Tewala asa mia inso a wiwino mesumpa mondeenomokoa ta moweweu mosa'o ke moiko, maupo sumpa hapamokoa pinauno mia a mondeenomokoa anu nahi pokonto'orio, sine lembuino ito'orio, onaemo kai saala i larono aasa kara-kara atuu.

⁵ Gagi, tewala onae saala i larono asa kara-kara atuu, onae asalakono umakuio hala anu iweweuomo.

⁶ Onae asalakono mompesombaako mbo'u ndi Ondae i Ue, gagi pontolosi sala hangano hala atuu, asa bimba ke bembe waino gagi pesomba po'onini hala. Kanandiomo sando mpesomba moweweuakono pesintuwua mia atuu hangano halano.

⁷ Sine, tewala nahi polio mompatinda bembe ke bimba, anu gagi pontolosi sala hangano hala anu iweweuomo atuu, asalakono ipesombaakono ndi Ondae i Ue orua manu-manu wurokou ke orua anano manu-manu marapati. Asa gagi pesomba po'onini hala ka anu asa mbo'u gagi pesomba tinunu.

⁸ Asalakono iwawao ia sando mpesomba. Sando mpesomba atuu asalakono tese'elu mesombaakono manu-manu tiano pesomba po'onini hala. Asalakono ilisuakono uluno manu-manu atuu a mpalontunduno, sine si mansa te'opu.

⁹ Tedei inso a reano pesomba po'onini hala atuu asalakono tinawisiako a rereno meda pontunua pesomba. Toreano inso a rea atuu asalakono pinisi kai peluarako i totono meda pontunua pesomba. Onaemo pesomba po'onini hala.

¹⁰ Manu-manu ko'orua asalakono pinatinda gagi pesomba tinunu menunu saru atora. Kanandiomo sando mpesomba moweweuakono mia atuu pesintuwua hangano hala anu iweweuomo, ranta kai pontarima te'oninino halano.

¹¹ Sine tewala nahi polio mompatinda orua manu-manu wurokou ke orua anano manu-manu marapati, asalakono iwawao gagi pesomba hangano halano atuu asantia hopulu efa tarigu moiko ntu'u gagi pesomba po'onini hala. Nahi moiko iponaakono lana ke dupa i wawono, hangano onaemo pesomba po'onini hala.

¹² Ka i'amba wawao ia sando mpesomba. Sando mpesomba atuu asalakono mo'ala te'asa raku inso a ntarigu atuu gagi tiano pepopoto'ori, ka i'amba tumunuo a wawo meda pontunua pesomba i wawono luwuno pesomba ndi Ondae i Ue anu tinunuako api. Onaemo pesomba po'onini hala.

¹³ Kanandiomo sando mpesomba moweweuakono mia atuu pesintuwua hangano halano asa i olono kara-kara atuu, ranta kai pontarima te'oniniano halano. Toreano onaemo tiano sando mpesomba, kana koa mbo'u pesomba kaanga.”

Pesomba pontolosi sala

¹⁴ Ondae i Ue mepau ndi Musa,

¹⁵ ”Tewala asa mia moweweu nahi petenunu ka nahi pe'inungako moweweu hala mongkona asa anu mempori ndi Ondae i Ue, anu gagi tolosino salano asalakono ipompesombaako ndi Ondae i Ue asa bimba lakino anu nahina tataano inso a asa bawaa bembe bimba, anu pinonaako olino montonda sikala, sikala a mpo'ianga mempori gagi pesomba pontolosi saala.

¹⁶ Maupo hapa hala anu wineweuno a asa anu mempori, asalakono inowahi euno saru metiangi asantia olima, ka i'amba meweengakono ia sando mpesomba. Sando mpesomba asalakono moweweu pesintuwua tiano mia atuu mesombaakono bimba lakino pesomba pontolosi saala, ranta kai pontarima te'oninino halano.

¹⁷ Tewala asa mia moweweu hala, nahi pokoto'orio ka iweweuo asa i olono anu inonto-Do i Ue, manasa onae sala ka asalakono itembio salano.

¹⁸ Asalakono iwawao ndi sando mpesomba asa bimba lakino anu nahina tataano inso a asa bawaa bembe bimba anu umariomo pinonaako olino, gagi pesomba pontolosi sala. Sando mpesomba atuu asalakono moweweu pesintuwua tiano mia atuu a wineweuno anu nahi pe'inungakono ka nahi pokonto'orio atuu, ranta kai pontarima te'oninino halano.

¹⁹ Onaemo pesomba pontolosi saala; mia atuu tedoa saala ndi Ondae i Ue.”