Imama 3 - Wunta Mempori

Pesomba tekaduduia

¹ ”Tewala pesombano onaemo pesomba tekaduduia ka anu pinesombaakono atuu sapi, lakino ke waino, asalakono ipesombaakono anu nahina tataano i aro-Do i Ue.

² Asalakono inaao kaeno a wawo uluno pesomba atuu, ka isumbeleo i arono pewowa Kema Tepotowoa. Ka i'amba luwuno anano i Haruni, sando pesomba atuudo asalakono mesiwuiakono reano liimbu a meda pontunua pesomba.

³ Inso a mpesomba tekaduduia atuu asalakono ipesombaakono taba anu walungio ihi kompo ka luwuno taba anu metako a ihi kompo atuu gagi pesomba ndi Ondae i Ue anu tinunuako api,

⁴ saru orua wua horino ka tabano anu metako i horino ka taba anu umapiio ate umpeda wua horino atuu asalakono iponsiao.

⁵ Luwuno anano i Haruni asalakono mentunuo i wawono meda pontunua pesomba, i wawono pesomba tinunu anu kontongaano tinunu i wawono api, gagi pesomba tinunuako api anu woono mokomawongkoo aroa-Do i Ue.

⁶ Tewala pesombano ndi Ondae i Ue, pesomba tekaduduia onaemo asa bawaa bembe bimba, lakino ke waino, asalakono ipesombaakono anu nahina tataano.

⁷ Tewala ipesombaakono asa bimba gagi pesombano, asalakono iwawao i aro-Do i Ue.

⁸ Asalakono inaao kaeno a wawo uluno pesombano atuu ka isumbeleo i arono Kema Tepotowoa. Ka i'amba luwuno anano i Haruni asalakono domensiwuiakono reano liimbu meda pontunua pesomba.

⁹ Inso a mpesomba tekaduduia atuu, gagi pesomba ndi Ondae i Ue anu tinunuako api, asalakono ipesombaakono tabano, luwuno ikino anu mentaba asalakono tinotopi umpeda wuku ntorukuno, ka taba anu walungio ihi kompo, saru luwuno taba anu metako a ihi kompo atuu,

¹⁰ saru orua wua hori ka taba anu metako i horino ka taba anu umapiio ate umpeda wua hori atuu asalakono iponsiao.

¹¹ Asalakono itunuo sando mpesomba i wawono meda pontunua pesomba gagi kaanga, asa pesomba ndi Ondae i Ue anu tinunuako api.

¹² Tewala pesombano asa bembe, asalakono iwawao i arodo i Ue.

¹³ Asalakono inaao kaeno a wawo uluno bembe atuu ka isumbeleo i arono Kema Tepotowoa. Ka i'amba luwuno anano i Haruni asalakono domesinwuiakono reano liimbu a meda pontunua pesomba.

¹⁴ Inso a hapa anu ipesombaako atuu, gagi pesomba ndi Ondae i Ue anu tinunuako api, asalakono ipesombaakono taba anu walungio ihi kompo ka luwuno taba anu metako a ihi kompo atuu,

¹⁵ saru mbo'u orua wua hori ka taba anu metako ndi onae anu mo'ia i horino ka taba anu umapiio ate umpeda wua hori atuu anu asalakono iponsiao.

¹⁶ Luwuno atuu asalakono itunuo sando mpesomba i wawono meda pontunua pesomba gagi kaanga kana pesomba tinunuako api gagi woo anu mompokomawongko. Luwuno taba onaemo tia-Do i Ue.

¹⁷ Ndiomo aasa pompakosi mpiha ndi omiu hawe a inulemiu i sompo po'iangamiu: osi'i ntu'u imengkaano taba ka rea.”