Imama 26 - Wunta Mempori

Ronso

¹ ”Si mpoweweu lahumoa pesombaamiu, si mpompontade tinaha ke tugu pelahumoaamiu, ka si mponaa watu ngginori i witamiu ka impenggolontu mpesomba ndi onae, hangano Ongkuemo Ue, Ue Alamiu.

² Asalakono impekakaakono luwuno oleo Saba-Ku ka melangkaio po'ianga mempori-Ku. Ongkuemo Ue.

³ Tewala mentuwu komiu montonda pompakosi-Ku ka kongko mpe'ini a parenta-Ku saru meweweuo,

⁴ Aku moweeakomiu usa ia tempono, ranta wita atuu mompowee hasilino ka keu a lere mompowee wuano.

⁵ Tempomiu mposesa ta menggoe hawe tempo mo'opu wua anggoro ka tempo mo'opu wua anggoro ta menggoe hawe tempo morawo inii. Komiu mpongkaa kaangamiu ranta mowohi ka merodo mpo'ia i witamiu.

⁶ Aku mompowee rodoa i wita atuu, ranta komiu mpepombole nahina maupo hapa ta modengke komiu. Aku mokotampulao kondehora lambaha inso i wita atuu, ka ponai nahi ta telalo i witamiu.

⁷ Komiu melulu ira iwalimiu, ka ira memateako ponai i aromiu.

⁸ Olima mia inso i olomiu ta molulu asa etu, ka asa etu mia inso i olomiu ta molulu hopulu nsowu ka luwuno iwalimiu ira memateako ponai i aromiu.

⁹ Aku mewolili ndi omiu ka weweu komiu mpe'ana'ue saru tetiangi hadio, ka mokorosoo pedandia-Ku saru omiu.

¹⁰ Omiu da komiu mpongkaa wuano anu tehine inso a mpo'opua anu laloomo, ka wuano anu tehine atuu komiu meluarakono ka imenaao anu wo'ohu.

¹¹ Aku numaao Kema Mempori-Ku i tonga-tongamiu ka aroa-Ku nahi ta te'osa kumita komiu.

¹² Sine Aku kongko i tonga-tongamiu ka Aku gagi Ue Alamiu ka omiu megagi bawaa-Ku.

¹³ Ongkuemo Ue, Ue Alamiu, anu wawa komiu mpeluarako inso i wita Masiri, kasi megagi mbo'u atado. Kupuduomo keu pasanga anu i wawomiu ka weweu komiu mpelempa moleo.”

Totonaa

¹⁴ ”Sine tewala nahi mpomperorongeako ndi Ongkue, ka nahi meweweuo luwuno parenta atuu,

¹⁵ tewala nahi mentondao pompakosi-Ku ka aroamiu nte'osa rumongeo atora-Ku, ka nahi meweweuo luwuno parenta-Ku ka melimpaio pedandia-Ku,

¹⁶ manasa Ongkue mbo'u Aku weweuo kanandio ndi omiu, onaemo Aku mompotii tededengkea ndi omiu, mehengge mokari saru mokula, anu weweuo mata masola ka tumuwu marasai; nahi ta hina tuduno imerawoo iniimiu, hangano wuano ta pingko domengkaano iwalimiu.

¹⁷ Ongkue anu umewai komiu, ranta iwalimiu numangi komiu, ka ondae anu umo'aliaa komiu ira pabawai komiu, ka komiu mpolai, maupo nahina mia anu lumulu komiu.

¹⁸ Ka tewala omiu maupo a laro nteweweu anu kanandio nahi meronge Aku, manasa ta lansaraopo Kusepi komiu hawe meluka pepintu hangano halamiu,

¹⁹ ka Aku mokotampulao pompelangla-langkaimu ka rosomu ka weweuo langi i wawomu kana labu ka witamu kana mala.

²⁰ Ka rosomu ta pingko mpena, witamu nahi ta moweeko hasilino ka luwuno keu i wita atuu nahi ta mompowee wuano.

²¹ Tewala tumuwumu kongko umewai Aku, ka nahi behe meronge Aku, manasa Kutiangio pohuku-Ku ndi omiu hawe meluka pepintu menunu saru halamiu.

²² Aku mompotola ndi omiu kondehora mo'ila anu ta rumopu ira anamiu ka anu ta rumopuo pinotuwumiu, saru weweu komiu gagi tedei, ranta luwuno salamiu gagi boni-boni.

²³ Maupo a laro nteweweumiu anu kanandio nahi mebehe Kuhuku komiu, ka tuwumiu kongko umewai Aku,

²⁴ manasa Ongkue mbo'u umewai komiu ka Ongkue-Ku humuku komiu meluka pepintu hangano halamiu,

²⁵ ka Aku mompotii ndi omiu aasa ponai anu ta weweuo pombaloa hangano linalo pedandia atuu; tewala mpepumpu komiu te'ipua i luwuno kotamiu, ka Ku'amba mompotola haki mesaki i tonga-tongamiu ka komiu mempineweengako a ngkaedo iwali.

²⁶ Tewala Kupokotampulao kaanga pinatindamu, manasa hopulu beine ta montunu roti i larono asa pontunua. Ira mempokuleo rotimu montonda ponsa'u pinakosi, ka komiu mpongkaa, sine nahi memowohi.

²⁷ Ka tewala omiu maupo a laro nteweweu kanandio nahi meronge Aku, ka tuwumiu kongko umewai Aku,

²⁸ manasa Ongkue mbo'u ta lansara umewai komiu ka Ongkue-Ku humuku komiu meluka pepintu hangano halamiu.

²⁹ Ka komiu mpongkaa baudo anamiu tama ka beine.

³⁰ Ka luwuno pongku wita pesombaamiu Aku rumopuo, ka luwuno pontunuamiu dupa Aku mokotampulao. Aku metadiakono luwuno wata ngkoroimiu a wawo luwuno wata ngkoroino lahumoamiu ka aroa-Ku ta te'osa kumitakomiu.

³¹ Luwuno kotamiu Aku weweuo gagi hanga ngkota ka luwuno po'ianga memporimiu Aku sumolangio ka nami Kubehe mbo'u mowoo woono pesombamiu anu mompokomawongko.

³² Ongkue-Ku sumolangio wita atuu, ranta iwalimiu anu mpo'ia i tu'ai ira mengkohali-hali hangano onae.

³³ Sine omiu Aku meweengakono i olodo luwuno tongku susua ka Ku'alao ponai lumulu komiu, ka witamiu ta gagi po'ianga londa ka luwuno kotamiu ta gagi hanga ngkota.

³⁴ I tempono atuu wita tepo'ia nahi pinekakaako a luwuno ta'u Saba, i tempono wita atuu londa ka tempono impo'ia i witado iwalimiu. I tempono atuu wita ta mohawe penaa-naaano ka membasaio luwuno ta'u Saba.

³⁵ I tempono wita atuu kontongaano londa wita atuu ta mohawe penaa-naaano anu napi hori membasaio kana luwuno ta'u Sabano, tempono impo'ia i tu'ai.

³⁶ Mongkona ondae anu da kongko mentuwu inso i olomiu, Aku mompotiiako ira danggara a laro aroado a luwuno witado iwalido, maupo unino lewe anu pinuurino angi ta lumulu ira, ka ira mpolai kana mia melulu olaiakono ponai. Ka ira ntebangku, kahinaano nahina mia anu lumulu ira.

³⁷ Ka ira ntetidu asa mia ka asa mia kana molaiako ponai, kahinaaho nahina lumulu ira. Nahi komiu mempolio mpekorahako i arodo iwalimiu.

³⁸ Komiu mempinokoropu i olodo tongku, ka witado iwalimiu ta mokotampula komiu.

³⁹ Isema anu da mo'ia tuwu i olomiu, ira metempula hangano i luwuno witado iwali, ka hangano salado uempu'udo mbo'u ira meropu kana uempu'udo.

⁴⁰ Sine tewala domemangakuakono salado ka salado uempu'udo, onaemo tebali nahi dompetenunu ndi Ongkue ka me'akuio mbo'u nine mentuwu ira umewai Aku,

⁴¹ ka Ongkue mbo'u umewai ira ka wawa ira a witano iwalido ke tewala lembuino aroado anu motea atuu metuunduomo ka dome'owahio salado,

⁴² Aku rumambeo pedandia-Ku saru i Yako; pedandia-Ku mbo'u saru i Saki ka pedandia-Ku saru i Burahima ka wita atuu Aku rumambeo mbo'u.

⁴³ Wita atuu ira mebintao ka membasaio luwuno ta'u Saba onaemo tempono wita atuu londa, ka domebintao, ira me'owahio salado, komba hangano hapa, onaemo hangano nahi domentondao atora-Ku ka aroado nte'osa a pompakosi-Ku.

⁴⁴ Maupo kanandio, tempono domekongko i witano iwalido, nahi Aku mebungkui ira ke nahi Aku te'osaako ira, ranta Aku rumopu ira ka pedandia-Ku saru ondae nahi gagi, hangano Ongkuemo Ue, Ue Alado.

⁴⁵ Hangano ondae Aku rumambeo pedandia-Ku saru luwuno mia nse'elu anu winawa-Ku mpeluarako inso i wita Masiri i arodo luwuno tongku, ka Kugagi Ue Alado. Ongkuemo Ue.”

⁴⁶ Onaemo luwuno pompakosi ka luwuno atora saru luwuno songka anu pinakosi-Do i Ue, anu tinonda ndi Ondae i Ue saru to Isaraeli i torukuno Sinai, molalo i Musa.