Imama 25 - Wunta Mempori

Ta'u Saba ka ta'u Yobeli

¹ Ondae i Ue mepau ndi Musa i torukuno Sinai,

² ”Pepaumo a nto Isaraeli ka potaeako ira: Tewala mpewinso komiumo a wita anu Aku weeakomiu, wita atuu asalakono mohawe penaa-naaano gagi saba ndi Ondae i Ue.

³ I larono onoo nta'u asalakono imporawoakono leremiu, ka onoo nta'u tehineno asalakono imperangkaio lere anggoromiu saru mpopumpu hasilino wita atuu.

⁴ Sine a nta'u ko'opitu asalakono hinao tiano wita atuu asa saba, tempo penaa-naaano ntu'u, asa saba ndi Ondae i Ue. Leremiu si mporawoio ka lere anggoromiu si mperangkaio.

⁵ Hapa anu tuwuako onaeno inso a mposowiamiu atuu, si sowio, ka wua anggoro inso a ngkeuno anggoromiu anu nahi mperangkaio, si me'opuo. Ta'u atuu asalakono gagi ta'u penaa-naaano ntu'u wita atuu.

⁶ Hasilino wita i larono saba atuu asalakono gagi kaangamiu, omiu isa'a saru atamiu tama ka beine, tiado mia mentinambo ka mia hawe anu mpo'ia ndi omiu,

⁷ tiado mbo'u pinotuwumiu ka kondehora mo'ila anu kongko i witamiu. Luwuno hasilino wita atuu moiko ikinaa.

⁸ Umarino atuu asalakono imedoao opitu nta'u saba, opitu nta'u pepitu, ranta tempo opitu nta'u saba atuu onaemo pato pulu ka osio nta'u.

⁹ Ka i'amba asalakono mpoporongeo unino tawuwua maupo isua a wula ko'opitu, tanggala hopulu wula atuu. A oleo langkai Pesintuwua asalakono impoporongeo unino tawuwua atuu maupo isua a luwuno wita atuu.

¹⁰ Asalakono kai mpokomemporio ta'u kolima pulu, ka pinopoto'ori pompotolaa i wita atuu a luwuno palilino. Tempo atuu asalakono gagi ta'u Yobeli ndi omiu, a singge mia mekule a wita pine'ueno ka a nsukuno.

¹¹ Ta'u kolima pulu atuu asalakono gagi ta'u Yobeli ndi omiu. Si mporawo inii, ka hapa anu tuwuako onaeno i larono ta'u atuu si mensowio, ka keu anggoro anu nahi mperangkaio si me'opuo wuano.

¹² Hangano ta'u atuu ta'u Yobeli, asalakono atuu mempori ndi omiu. Hapa anu komiu mpongkaa asalakono hasili inso a lere.

¹³ A nta'u Yobeli atuu asalakono singge mia mekule a wita pine'ueno.

¹⁴ Tewala hinao inasamiu a mpe'asa miamiu ke mpo'oli inso ndi onae, si hina anu rugi i olomiu.

¹⁵ Tewala mpo'oli komiu a mpe'asa miamiu asalakono montonda hadiono ta'u umarino ta'u Yobeli, ka tewala onae mo'asa ndi omue asalakono montonda hadiono ta'u ponsowia.

¹⁶ Kolangka-langkaino hadiono ta'u atuu, kolangka-langkaino olino, ka komaku-makurano hadiono ta'u atuu, kokode-kodeino olino, hangano mararuno ponsowia anu inasano ndi omue.

¹⁷ Si hina anu rugi i olomiu, sine asalakono imedoitoako Ira Ue Alamiu, hangano Ongkuemo Ue, Ue Alamiu.

¹⁸ Asalakono imeweweuomo pompakosi-Ku ka mpe'ini mpiha a atora-Ku saru meweweuo, onaemo kai merodo mpo'ia i witamiu.

¹⁹ Wita atuu ta mompowee hasilino, komiu mpongkaa ranta kai memowohi ka komiu merodo mpo'ia i ra'ai.

²⁰ Tewala mpesikeno komiu: Hapa anu kami mpokaa a nta'u ko'opitu atuu, kombake nahi moiko kami mporawo inii ka nahi moiko kami mpopumpu hasilino wita mami?

²¹ Aku parentao poronso-Ku ndi omiu a nta'u ko'onoo, kai wita atuu mompowee hasilino tiano otolu nta'u.

²² A nta'u ko'oalu komiu mporawo inii, sine komiu mpongkaa inso a hasili anu laano ranta ta'u ko'osio; ranta kai pewinso hasilino, komiu mpongkaa anu laano.”

Pontolosia wita

²³ ”Wita si me'asao mpiha, hangano Ongkuemo ueno wita atuu, sekono omiu mia mehawe ka mia anu me'aiwa mperato ndi Ongkue.

²⁴ A luwuno wita pine'uemiu asalakono impompowee tiano po'owahi pontolosi wita.

²⁵ Tewala pepaekompomu gagi mongkokolaro, ranta kai asao asa ntia inso anu pine'ueno, asalakono pe'etuno anu umpeda ta umowahio pontolosi atuu aiwa ka itolosio anu inasano pepaekompono.

²⁶ Tewala nahina mia anu tumolosio, sine lembuino ipolio ka ipohawe anu ta tumolosiakono pine'ueno atuu,

²⁷ asalakono ka iwinsoo luwuno ta'u umarino umasao atuu a laro podoano. Polaluano asalakono ka ipokuleo a mia anu umolio inso ndi onae, ka ipepokule a wita pine'ueno.

²⁸ Sine tewala nahi polio mohawe anu ta wali mokuleakono, asalakono anu i'asao atuu mo'ia mpiha a ngkaeno mia anu umolio hawe a nta'u Yobeli. A nta'u Yobeli wita atuu tepotola, ka mia atuu moiko ipekule a wita pine'ueno.”

Pontolosia raha

²⁹ ”Tewala asa mia mo'asa raha po'ianga i asa kota anu merere watu, ka pontolosia butu asa nta'u koa mompu'u inso a oleo i'asao.

³⁰ Tewala raha atuu nahi tinolosi i larono tempo asa nta'u, raha a laro kota merere watu atuu manasaomo gagi ipe'ueo mia umolio hawe a inuleno. A nta'u Yobeli raha atuu nahi pinokule.

³¹ Sine luwuno raha a luwuno inia anu nahi limbuo rere watu asalakono rineke mengkena kana luwuno lere i wita atuu. A raha atuu asalakono ninao pabawa tumolosio ka a nta'u Yobeli raha atuu asalakono bebasi.

³² Mongkona luwuno raha i luwuno kotado to Lewi, anu ta tumolosio luwuno raha atuu butu a nto Lewi anu nahina tampulaano.

³³ Maupo anu montolosi inso i olodo to Lewi, raha anu inasa i kotano anu me'ueo atuu asalakono pinokule a nta'u Yobeli. Hangano luwuno raha i luwuno kotado to Lewi, onaemo anudo i tonga-tongado to Isaraeli.

³⁴ Sine, pada pompakambia petengi-tengino luwuno kotado nahi moiko i inasa, hangano pada atuu anudo ranta nahina tampulaano.”

Pelelu a mia mongkokolaro

³⁵ ”Tewala pepaekompomiu gagi mongkokolaro, ranta nahi polio kumorahakono tumuwuno i olomiu, omiu asalakono mentulungio kana a mia hawe ka mia susua, kai pokotuwu i olomiu.

³⁶ Si mpo'ala bungano doi ke untu inso ndi onae, tendeano omiu asalakono medoitoako Ira Ue Alamiu, kai pokotuwu pepaekompomiu i olomiu.

³⁷ Si poweeakono doimu ndi onae saru po'ema bungano, ka kaangamu si poweeakono ka mo'ema bungano.

³⁸ Ongkuemo Ue, Ue Alamiu, anu wawa komiu mpeluarako inso i wita Masiri, ka weeakomiu wita Kana'a, kai Ongkue gagi Ue Alamiu.

³⁹ Tewala pepaekompomiu gagi mongkokolaro i olomiu ka ipeweengakono koroino ndi omiu, asalakono si mentenao mo'angga kana ata.

⁴⁰ Kana teweweuno mia tinambo ka mia hawe asalakono ipo'ia i olomiu, ranta ta'u Yobeli onae asalakono mo'angga ndi omue.

⁴¹ Ka i'amba po'ineeomo ka ilako inso ndi omue, onae saru luwuno anano ka ipekule a mpe'etuno, mekule a wita pine'uedo uempu'uno.

⁴² Hangano ondae atuu luwuno tetenaa-Ku anu Kuwawa ira mpeluarako inso i wita Masiri, si dome'inasa kana mia mo'asa ata.

⁴³ Si koa parentao saru tekuda, tendeano omiu asalakono medoitoako Ira Ue Alamiu.

⁴⁴ Atamu tama ke beine anu moiko impe'ueo onaemo inso i olodo luwuno tongku petengi-tengimu. Butu koa inso ndi ondae moiko impo'oli ata tama ke beine.

⁴⁵ Kanatuu koa mbo'u luwuno anado mia mehawe anu mpo'ia i olomiu moiko ime'olio ka pe'etudo mbo'u anu mpo'ia i olomiu ka anu pine'anaako i witamiu. Mia atuudo moiko impe'ue ira.

⁴⁶ Moiko impeweengako ira gagi tia pusakado ana'uemiu lembuino ka dompe'ueo; moiko impe'ata ira mpiha. Sine a luwuno pepaekompomiu, luwuno to Isaraeli si mpeparenta saru tekuda a mpe'asa miamiu.

⁴⁷ Tewala asa mia hawe ke mia susua i olomiu mompoliomo, sekono pepaekompomiu anu mo'ia ndi onae gagi mongkokolaro ka meweengakono koroino a mia hawe ke mia susua i olomiu atuu, ke asa mia anu te'inso a mpe'etudo mia hawe,

⁴⁸ ka umarino ipeweengakono koroino, onae tekona itinolosi. Asa mia inso i olono luwuno pepaekompono moiko itolosio,

⁴⁹ ke pepaekompono amano ke ana ntama anano pepaekompono amano, ke asa mia pepaekompo lalu umpeda inso a pe'etuno, ke tewala ipoliomo, onaeno tekona tumolosio koroino.

⁵⁰ Meronga saru mia anu umolio, asalakono ipoweweu pedoaa mompu'u inso a nta'u ipeweengakono koroino a mia atuu hawe ta'u Yobeli. Olino i'asao koroino asalakono tinantui montonda porokono luwuno ta'u atuu menunu saru tempo ipo'ia a mia atuu gagi mia tinambo.

⁵¹ Tewala porokono ta'u atuu da hadio, onaemo asa ntia olino pe'olia asalakono ipokuleo gagi tolosino koroino montonda porokono ta'u atuu.

⁵² Tewala tedei porokono ta'u anu torea hawe ta'u Yobeli atuu, asalakono ipoweweu pedoaa saru mia atuu; montonda porokono ta'u atuu asalakono i'owahio doi tolosino koroino.

⁵³ Kanatuumo asalakono ipo'ia ndi onae gagi mia tinambo inso a nta'u hawe a nta'u. Siimo ipinarenta mia atuu saru tekuda i aromu.

⁵⁴ Tewala onae nahi tinolosiako kanandio pesalaano, moikoomo ilako a nta'u Yobeli, onae saru luwuno anano.

⁵⁵ Hangano to Isaraeli gagi ata ndi Ongkue, ondae atuu tetenaa-Ku anu Kuwawa ira mpeluarako inso i wita Masiri. Ongkuemo Ue, Ue Alamiu.”