Imama 24 - Wunta Mempori

Lana pehulu

¹ Ondae i Ue mepau ndi Musa,

² ”Parenta iramo to Isaraeli ka dompowawa ndi omue lana saitu ntu'u anu inisa pehulu, ranta kai melanga mpiha hulu.

³ I Haruni asalakono umatorao mpiha luwuno hulu atuu i arono pelingo buruano songka-Do Ue Ala i larono Kema Tepotowoa, mompu'u ngkiniwia hawe mo'oru i aro-Do i Ue. Onaemo atuu asa pompakosi ndi omiu anu nahina tampulaano hawe asa mpinu'u.

⁴ I wawono hulu mekaru inso a wulaa mpena asalakono kai atorao mpiha luwuno hulu atuu i aro-Do i Ue.”

Roti pesomba

⁵ ”Omue asalakono mo'ala tarigu moiko ntu'u ka montunu hopulu ka orua roti bonggoli inso ndi onae. Sompo roti bonggoli asalakono wineweu inso a orua ntia hopulu efa.

⁶ Omue asalakono umatorao gagi orua ntuda, onoo roti asa ntuda i wawono meda inso a wulaa mpena atuu, i aro-Do i Ue.

⁷ Asalakono ponaakono dupa ntu'u i wawono sompo tudano. Dupamo atuu anu asalakono gagi pepopoto'ori inso a roti atuu, asa pesomba tinunu ndi Ondae i Ue.

⁸ Sompo oleo saba asalakono kai atorao mpiha i aro-Do i Ue. Onaemo pedandia anu nahina tampulaano inso a nto Isaraeli.

⁹ Roti atuu tiano i Haruni saru luwuno anano ka asalakono domengkaano i asa po'ianga anu mempori, hangano onaemo anu tedoa mempori ntu'u tiano inso a luwuno pesomba tinunu ndi Ondae i Ue. Onaemo asa pompakosi anu nahina tampulaano.”

Mia montutundali nee-Do i Ue hinuku Mperupa-rupa wineweu mosa'o

¹⁰ I tempono asa oleo asa tama anu ineno to Isaraeli sine amano to Masiri, aiwa i tonga-tongano pekemaado to Isaraeli, ka mia atuu me'u'ua saru asa to Isaraeli a mpekemaa.

¹¹ Anano beine to Isaraeli atuu tumutundalio nee-Do i Ue saru tumotonaao, onaemo kai winawa ndi Musa. Ineno meneeako i Selomi anano i Debiri inso a nsuku Dani.

¹² Onae wininso a laro torungku sumikorio pomputusi menunu saru pau-Do i Ue.

¹³ Ka i'amba mepau Iramo i Ue ndi Musa,

¹⁴ ”Wawaomo mia anu montotonaa atuu i bungkuno pekemaa ka luwuno mia anu rumongeo asalakono numaao kaeno a wawo uluno mia atuu. Ka i'amba luwuno bawaa asalakono wunoakono watu.

¹⁵ Omue asalakono pauako ira to Isaraeli, kanandio: Sompo mia anu tumotonaao Ue Alano asalakono tumembio halano onaeno.

¹⁶ Isema anu montutundali nee-Do i Ue, asalakono hinuku mate, luwuno bawaa wunoakono watu. Moiko mia hawe maupo bawaa ntu'u, tewala montutundali nee-Do i Ue, asalakono hinuku mate

¹⁷ Tewala asa mia mompepate pe'asa miano, onae asalakono hinuku mate.

¹⁸ Isema anu mompepate asa pinotuwu, asalakono i'owahio euno, asa me'eu asa.

¹⁹ Tewala asa mia weweuo pe'asa miano kai hina tataano, kanamo anu wineweuno, kanatuumo asalakono iwineweu ndi onae:

²⁰ tepudu me'eu tepudu, mata me'eu mata, ngisi me'eu ngisi. Kana iweweuo mia kai hina tataano, kanatuumo asalakono iwineweu ndi onae.

²¹ Isema anu mompepate asa pinotuwu, asalakono i'owahio euno, sine isema anu mompepate pe'asa miano, onae asalakono hinuku mate.

²² Asa songka koona ndi omiu, moiko a mia hawe maupo bawaa ntu'u, hangano Ongkuemo Ue, Ue Alamiu.”

²³ Kanandiomo ipohaweo i Musa pau atuu a nto Isaraeli. Ka i'amba mia anu montotonaa atuu winawa i bungkuno pekemaa kai winunoako watu. To Isaraeli meweweuo kana peparenta-Do i Ue ndi Musa.